Kultura Zuzendaritza Nagusiak antolatzen duen Kultur programaren 25. edizioa izanen da aurtengoa. Ostegun, ostiral, larunbat eta igandeetan eginen da, uztailaren 18tik irailaren 13ra bitartean, 36 herri eta intereseko gunetan, programazioan musika, dantza eta artea eskainiz. Larunbatetan, gainera, eskualdean eginiko turismo-jarduera batek osatuko du kultur proposamena, Turismo, Merkataritza eta Kontsumo Zuzendaritza Nagusiaren laguntzaz.

Emanaldiak Alsatsu/Alsasuan, Aoiz / Agoitzen, Arguedasen, Artaxoan, Beran, Corellan, Donamarian, Etxarri Aranatzen, Elizondon, Estella-Lizarran, Fiteron, Garraldan, Isaba / Izaban, Leitzan, Lekunberrin, Lizason, Lodosan, Los Arcosen, Martzillan, Mendigorrian, La Olivako Monasterioan, Irantzuko Monasterioan, Leireko Monasterioan, Ochagavía / Otsagabian, Orreaga / Roncesvallesen, Puente la Reina / Garesen, Ribaforadan, Roncal / Erronkarin, San Adriánen, Sangüesa / Zangozan, Tafallan, Tuteran, Ujué / Uxuen, Vianan eta Zugarramurdin eginen dira. Gainera, Bertizko Jaurerriko Jauregiak Pedro Salaberriren “Caminos” erakusketa hartuko du.

Kultur 2020ren aurkezpenean parte hartu dute Rebeca Esnaola Kultura eta Kirol kontseilariak, Santos Induráin Osasun kontseilariak, Juan Carlos Castillo Nafarroako Udal eta Kontzejuen Federazioko lehendakariak eta Pedro Salaberri artista eta margolariak.     

Esnaolak adierazi duenez, Kultur programak aukera ematen du “kultur eskaintza erakargarri batez gozatzeko, aldi berean babesa ematen diona artearen sektoreari eta lurraldean musika, dantza eta arte bisualak hedatzera bideratua”. “Aurten hainbat aldaketa egin dira derrigorrezko osasun-neurriak direla eta; baina beti izan da programa bizia, denboraz eraldatu egin dena, lurraldearekin batera lan egiteko oinarriari eutsirik betiere”, azpimarratu du.

Bestalde, Induráin kontseilariak nabarmendu du “garrantzitsua dela uda honetan kontrolaturiko formatua eta edukiera dituzten kultur jarduerak izatea Nafarroan, aisialdi- eta entretenimendu-eskaintza dakartenak, eta nolabait beteko dutenak egin ezin izanen diren festen hutsunea, horiek, hain zuzen ere, kontrolatzeko ekitaldi zailak baitira, osasun-arrisku handiagokoak”.   

Kulturren 25. edizioa

Programa honen helburuak dira Nafarroako lurraldean kalitatezko eta askotariko eskaintza artistikoa sustatzea eta zabaltzea; tokiko erakundeekin elkarlanean artea eta kultura hedatzea; arte-sektorearen ezagutza bultzatzea eta erraztea; eta behar bezala baloratzea ondare historiko, artistiko eta naturala, musika, dantza eta arte plastikoetako jarduerak programatuz.   

Kultur 2020 uztailaren 18an hasiko da Irantzuko Monasterioan, Tubala Uxoa abesbatzak kontzertua emanik, eta Korrontziren kontzertuak emanen dio bukaera irailaren 13an, igandearekin, Garesen.

Aurten, COVID-19a dela eta, segurtasun- eta osasun-neurriak hartuko dira udalekin elkarlanean, osasun-agintariek ezarririko araudia betetzeko. Tokiko entitateek kontrolerako osasun-neurriak errespetatuko dituzte emanaldiak eginen diren azpiegituretan.