Foru Gobernuak, Nafarroako Unibertsitate Publikoa (NUP) 245 milioi eurorekin finantzatuko du hurrengo hiru urteetarako (2022-2024), urte anitzeko hitzarmen berriari esker. Hitzarmen horrek zentroari epe ertainean finantzaketa-esparru nahikoa eta egonkorra bermatuko dio, Gobernuaren jarraipen- eta kontrol-lanak hobetuko ditu, eta NUPi eskualdeko garapenari laguntzeko lider gisa finkatzeko aukera emango dio.

Hitzarmen berria Nafarroako Gobernuak onartu du gaurko bileran, Unibertsitate, Berrikuntza eta Eraldaketa Digitaleko kontseilari Juan Cruz Cigudosak bileraren ondoren egindako prentsaurrekoan adierazi duen moduan.

Hitzarmen berria idazteko, aurreko hitzarmena hartu dute oinarri, eta, hitzarmen berri honen arabera, Nafarroako Gobernuak NUPi guztira emango dion finantzaketa honela banatuko da: 77,3 milioi euro 2022rako; 81,6 milioi euro 2023rako; eta 86,1 milioi euro 2024rako.

Hitzarmenaren barruko hobekuntza nagusietako bat da epe ertainean NUPentzat finantzaketa nahikoa eta egonkorra bermatzea; era horretan, zentroak jakin ahal izango du zer baliabide izango dituen eta plan estrategikoaren arabera jarduerak planifikatu ahal izango ditu. Gainera, horrek indartu egingo du unibertsitate publikoak “izan beharreko eginkizuna, Nafarroako garapen ekonomiko eta sozialaren eragile bezala”, azpimarratu du Cigudosak.

Bestalde, finantzaketa-esparru horrek Nafarroako Gobernuaren epe ertaineko aurrekontu-plangintzaren ziurgabetasuna murrizteko aukera emango du, NUPen finantzaketa osoaren %88 aurrez ezarrita geratuko baita.

Hitzarmen berriaren inguruan Cigudosak aipaturiko beste hobekuntzetako bat da Gobernuak segimendu eta kontrola egiteko dakarren hobekuntza; izan ere, aldeen konpromisoak ezartzeaz gain, NUPek foru exekutiboari tarteka bidali beharko dion dokumentazioa zehazten da. Halaber, hitzarmenaren helburuen segimendua egiteko aginte-taula sartu da.

Gainera, Finantzazioaren 2022-2024 Urte Anitzeko Hitzarmenak aukera ematen dio NUPi Nafarroako gizarteak behar duen unibertsitate-eredurantz hazteko, herrialdeko onenen artean kokatuta, eta Nafarroako Gobernuak unibertsitateari egin dizkion eskaerei erantzuten die, eskaintza ekonomikoari, ikerketa-jarduerari eta ezagutza gizarteari transferitzeari dagokienean.

Ildo horretan, Juan Cruz Cigudosak nabarmendu du NUPeko irakaskuntza eta ikerketa “funtsezko faktore” direla Foru Komunitateak aurrera egin dezan, ekoizpen-egiturak aldatu daitezen eta Nafarroako ekonomiaren lehiakortasuna hazi dadin.

“CYD Fundazioaren 2021eko unibertsitate-rankingaren arabera, NUP eskualde-garapena bultzatzeko unibertsitate liderren artean aurkitzen zen, eta, hain zuzen ere, urte anitzeko finantzaketa-hitzarmen hau funtsezko erreminta da unibertsitate publikoak lidergo hori sendotu dezan”, gehitu du Cigudosak.

Bestalde, hitzarmen berri honek NUPeko Gizarte Kontseiluaren aldeko balorazioa du, eta “Nafarroako Gobernuak unibertsitate publiko eta kalitatezko baten alde egindako apustua islatzen du, gazteen aukera-berdintasuna bermatzen duena, familien errenta-maila edozein dela ere, Foru Komunitatean talentu gazteari eusteko egiten den ahalegina agerian uztearekin batera”, nabarmendu du Cigudosak prentsaurrekoan.

Hitzarmenean aurreikusten diren finantzaketa-igoera progresiboei dagokienez, Unibertsitate, Berrikuntza eta Eraldaketa Digitalaren Departamentuko titularrak azpimarratu du Nafarroako Gobernuak duen konpromisoa erakusten dutela, Nafarroak gero eta indartsuagoa eta lehiakorragoa den unibertsitatea izan dezan, bai nazio mailan, bai nazioartean.

Finantzaketa-eredua

Finantzaketaren 2022-2024 Urte Anitzeko Hitzarmenean eredu bat ezartzen da, NUPek Nafarroako Aurrekontu Orokorretatik jasoko duen finantzaketa arautzen duena, eta, hala badagokio, atxiki gabeko diruzaintzako gerakina erabiltzetik eratorriko litzatekeena.

Eredu honetan, kontuan hartzen da emandako zerbitzuaren kostua, unibertsitaterako egiturazko finantzaketa konbinatzen du jarduera ezberdinak egitearekin lotuta dagoen batekin, eta finantzaketa horren beste zati bat hobekuntza-helburuak lortzera baldintzatzen du.

Zehazki, hitzarmenean araututako finantzaketa lau ataletan zatitzen da: egiturazko finantzaketa, jardueraren araberako finantzaketa, helburuen araberako finantzaketa eta inbertsioetarako finantzaketa.

Egiturazko finantzaketak finantzaketa osoaren %88 izango du, eta unibertsitatearen egitura-gastu eta, bereziki, irakaskuntzako jarduera nagusiekin eta ikerketa-gaitasunarekin lotutako gastuetarako erabiliko da; hots, langileen gastuak eta unibertsitateko egiturazko instalazioen eta ekipamenduen funtzionamendu arruntari, konponketari, mantentzeari eta kontserbatzeari dagozkionak.

Finantzaketaren bigarren atala NUPek garatzen dituen jardueren ingurukoa da, eta, beraz, unibertsitateak ikerketan, ezagutzaren transferentzian, nazioartekotzean, euskarazko irakaskuntzan eta etengabeko prestakuntzan garatzen duen jardueraren arabera aldatu egingo da.

Helburuen araberako finantzaketaren xedea da unibertsitate-jardueraren funtsezko eremuetan helburuak lortzea bultzatzea eta sustatzea.

Era horretan, Nafarroako Unibertsitate Publikoaren V. Plan Estrategikoan programaturiko ekintzei erreparatuta, Nafarroako Gobernuarentzat interes berezikoak izanik, nahiz Foru Komunitateko plan estrategikoetan jasotakoak ere kontuan hartuta, helburuen arabera finantzatzeko jarduerak honako hauetara bideratuko dira: irakaskuntzako metodologia berriak ezartzera, unibertsitatearen prozesuen digitalizazioan aurrera egitera, nazioarteko aipamena duten tesi-kopuru irakurriak gehitzea, master plazen okupazioa hobetzea eta ikasleen gaitasun digitalak hobetzea.

Helburuen araberako finantzaketan adostutako helburuak lortu diren ebaluatzeko, masterrean eskainitako plazen okupazio-tasa egungo %63tik 2024an %70era igarotzea bezalako adierazleak ezarriko dira. NUPek helburuarekin loturiko zenbateko osoa jasoko du baldin eta adierazlearen balioak helburua berdintzen edo gainditzen badu; balioa azpitik geratzen bada, ordea, helburuarekiko lotutako balioaren zati proportzionala jasoko du.

Azkenik, finantzaketaren laugarren atala unibertsitate-jarduerak behar dituen inbertsio eta azpiegitura gehigarriak ordaintzeko izango da. Modu horretan, Open eta Maker espazioak, irakaskuntza-ekipamendua eta ikerketa-ekipamendua finantzatuko dira.

Eguneratze-indizea

Hitzarmen honen bidez NUPentzat proposaturiko finantzaketa-ereduak ikuspegi mistoa du (gastuak-pizgarriak), aurreko hitzarmenaren bideari jarraituta.

Horrela, egiturazko finantzaketarako eta jardueraren araberako finantzaketarako, erreferentziazko hasierako zenbatekoa eta hitzarmena indarrean izango den hiru urteetan finantzaketa kalkulatzeko aplikatuko den eguneratze-indizea zehazten dituzten formulak ezartzen ditu.

Indize hori bat dator unibertsitatearen finantza-premiekin, eta urteko %4,5ekoa izango da; hau da, azken 4 urteetako finantzaketa-hitzarmenaren batez besteko eguneratze-indize erreala izanik zehaztu den balioa.

Bestalde, helburuen araberako finantzaketarako eta inbertsioetarako finantzaketarako, hitzarmenean gehieneko zenbateko bat ezarri da indarraldiko hiru urteetarako.

Finantzaketaren 2022-2024 Urte Anitzeko Hitzarmenaren helburuak

Finantzaketaren 2022-2024 Urte Anitzeko Hitzarmenaren bidez, honako helburu orokor hauek lortu nahi dira: goi-mailako hezkuntzaren eta I+G+b-ren zerbitzu publikoa emateko eta sektore pribatuaren eta publikoaren eskariak artatzeko, NUPek beharrezko finantza-baliabideak izatea bermatzea; irakaskuntzan, ikerketan eta ezagutzaren transferentzian emaitzak etengabe hobetzea bultzatzea; eta bere baliabideetatik datorren finantzaketa sustatzea, autofinantzaketaren ratioa gehitzearren.

Halaber, epe ertainerako finantzaketa-esparrua ezarri nahi da, gardentasunean, giza baliabideen eta baliabide materialen eraginkortasunean, erantzunkidetasunean eta eusten dioten Nafarroako erakundeei eta gizarteari kontuak ematean oinarritua; eta gizartean duen presentzia aktiboagoa bultzatzea, herritarrekiko harremanak areagotuaz eta hobetuaz.