navarra.es
Castellano | Euskara | Français | English
Ezagutzera eman
23/2003 Foru Agindua, martxoaren 24koa, Lehendakaritza, Justizia eta Barne kontseilariak emana, Nafarroako Foru Komunitateko Administrazioaren eta haren erakunde autonomoen zerbitzuko langileen ordezkaritza organoetarako hauteskundeei buruzko ...
23/2003 FORU AGINDUA, MARTXOAREN 24KOA, LEHENDAKARITZA, JUSTIZIA ETA BARNE KONTSEILARIAK EMANA, NAFARROAKO FORU KOMUNITATEKO ADMINISTRAZIOAREN ETA HAREN ERAKUNDE AUTONOMOEN ZERBITZUKO LANGILEEN ORDEZKARITZA ORGANOETARAKO HAUTESKUNDEEI BURUZKO AGINDUAK EMATEN DITUENA.
(2003ko 45. NAOn argitaratutako testua, apirilaren 11n)
Atarikoa
Funtzionarioei eta lan-kontratudunei aplikatzen zaien araudiari jarraituz, sindikatuek haien ordezkaritza organoetarako hauteskundeak bultzatu dituzte Nafarroako Foru Komunitateko Administrazioaren eta haren erakunde autonomoen esparru guztietan.
Alde horretatik, beharrezko da jarraibideak bilduko dituen Foru Agindu bat ematea, ukitutako langileek boto eskubidea erabil dezaten laguntzeko, eta indarra duen araudiari jarraituz hauteskundeetan parte hartzen duten organoen eginbeharra bultzatzeko; hori guztia, urriaren 30eko 348/2000 Foru Dekretuaren 17. artikulua eta Azken Xedapenetako Lehena garatuz. Izan ere, Dekretu horrek Nafarroako Foru Komunitateko eta haren erakunde autonomoetako funtzionarioen opor, lizentzia eta baimenen araubidea erregulatzen du.
Foru Agindu honetako jarraibideak ordezkaritza organoetarako dei egindako hauteskunde prozesuari aplikatuko zaizkio, baina baita datozen urteetan eginen direnei ere.
Horrenbestez, agindu dut:
1. artikulua
Nafarroako Foru Komunitateko Administrazioaren eta haren erakunde autonomoen zerbitzuko langileek behar adina denbora izanen dute lanaldiaren barrenean ordezkaritza organoetarako hauteskundeetan boto eskubidea erabiltzeko.
2. artikulua
1. Hauteskunde Mahai bateko buru edo kide izendatzen direnek eta interbentore direla frogatzen dutenek behar adina denbora izanen dute erregelamenduz dagozkien eginkizunak betetzeko, bai bozketa egunean bai hauteskunde prozesuaren gainerakoan.
2. Bozketa egunean lan egitera beharturik ez badaude, gero egun bat ordaindua izanen dute libre.
3. artikulua.
1. Hauteskunde Mahaietako kideek eta bozketa egunean interbentore lana egiten dutenek biharamunean ordaindutako egun librea izanen dute.
2. Egun horretan lan egitera beharturik ez badaude, hauteskunde mahaiko kideek bakarrik izanen dute ordaindutako eguna libre, gero.
4. artikulua.
Hauteskunde mahaietako kideei kalte-ordaina emanen zaie eginkizunek sortutako gastuengatik, erregelamenduan ezarritako diru kopuruaren arabera.
5. artikulua.
Hautagai-zerrenda bakoitzeko ordezkariak eskaturik, lanera ez joateko baimena emanen zaie aldarrikatutako hautagai-zerrendetako kideei bozketa aurreko hamar egun naturaletan, eskala honi jarraituz:
A) 250 hautesletik beherako hauteskunde-unitateetan aurkeztutako zerrendak: kide bat, hautagai-zerrenda bakoitzeko.
B) 250-4.000 hautesleko hauteskunde-unitateetan aurkeztutako zerrendak: bi kide, hautagai-zerrenda bakoitzeko.
C) 4.000 hautesletik gorako hauteskunde-unitateetan aurkeztutako zerrendak: hiru kide, hautagai-zerrenda bakoitzeko.
Lan-kontratudunen kasuan, ondorio hauetarako, bi kolegioetako hautesle kopurua eta aurkeztutako hautagai-zerrendak batuko dira hauteskunde-unitate bakoitzean.
6. artikulua
Urriaren 30eko 348/2000 Foru Dekretuaren 24. artikuluan aipatzen diren organoek dute eskumena Foru Agindu honetan araututako baimenak emateko, baita langileen parte-hartzea antolatzeko ere, eta zerbitzua uneoro behar bezala atenditua egon dadin bermatzeko. Izan ere, Foru Dekretu horrek ezartzen du Nafarroako Foru Komunitateko Administrazioko eta bere erakunde autonomoetako funtzionarioei aplikatzen zaien araubidea opor, lizentzia eta baimen kontuetan.
7. artikulua
Argitara bedi Foru Agindu hau Nafarroako ALDIZKARI OFIZIALean, orok jakin dezan
