navarra.es
Castellano | Euskara | Français | English
Ezagutzera eman
119/2008 Foru Agindua, abuztuaren 4koa, Hezkuntza kontseilariak emana. Honen bidez, helduentzako batxilergoko ikasketak araubide presentzialean eta urrutiko araubidean ematea arautu eta antolatu da Nafarroako Foru Komunitatean
(2008ko 111. NAOn argitaratutako testua, irailaren 10ean)
Atarikoa
Hezkuntzari buruzko maiatzaren 3ko 2/2006 Lege Organikoko helduentzako hezkuntzaren "Helburu eta printzipioen" gaineko 66. artikuluaren arabera, hemezortzi urtetik gorako heldu guztiei eskaini nahi zaie haien ezagutzak eta gaitasunak eguneratu, osatu eta gehitzeko aukera, arlo pertsonalean eta profesionalean gara daitezen. Lege organiko horretako 67.2. artikuluan ezarri da, helduentzako ikasketak presentzialak eta urrutikoak izan daitezkeela. Izan ere, 69.1. artikuluan hezkuntzako administrazioei eskatzen zaie pertsona guztiei eman diezaien batxilergoko edo lanbide heziketako ikasketak egiteko aukera.
Nafarroako Gobernuko Hezkuntza Departamentuak 49/2008 Foru Dekretuko bigarren xedapen gehigarrian ezarri du, batxilergoko ikasketak helduentzat egokitu eta malgutu daitezkeela. Baina ikasle horiek ezaugarri bereziak dituztenez, araubide arruntean baino antolaketa malguagoa egiten lagunduko duten aldaketak egin behar izanen lirateke, hau da, haien curriculuma bizi dituzten egoera berezietara egokitzeko moduko aldaketak. Nolanahi ere, maila berberak eskatuko dira eta kalitate-maila egokia duen batxilergoa bermatuko da.
Aipatutako bigarren xedapen gehigarrian xedatutakoaren ondorioz, Hezkuntza Departamentuak erabaki du batxilergoko ikasketen eskaintza antolatuko duela eta, horrela, helduei batxilergo presentziala eta urrutiko batxilergoa egiteko aukera emanen diela.
Ikasleek prestakuntza orokorra jasotzeko irakasgai komunak eta prestakuntza espezializatuagoa lortzeko modalitateko irakasgaiak eta aukerako irakasgaiak dituen batxilergo eredua eskainiko da. Irakasgai horiek guztiak bi kurtsotan emanen dira; posible izanen da kurtso oso batean matrikulatzea edo, bestela, kurtso bateko edo bietako irakasgai batzuetan bakarrik matrikulatzea.
Horregatik guztiagatik, Nafarroako Gobernuari eta haren lehendakariari buruzko abenduaren 3ko 14/2004 Foru Legearen ) artikuluak ematen dizkidan ahalmenak erabiliz, agindu dut:
I. KAPITULUA. Xedapen orokorrak
1. artikulua. Xedea eta aplikazio eremua.
Foru agindu honen xedea da helduentzako batxilergoko ikasketetan araubide presentziala eta urrutiko araubidea arautu eta antolatzea. Nafarroako Foru Komunitateko lurralde eremuan ikasketa horiek ematen dituzten ikastetxe publiko eta pribatu guztiei aplikatuko zaie foru agindu hau.
2. artikulua. Ikastetxeentzako baimena.
Soilik eman ahal izanen dute helduentzako batxilergoa Hezkuntza Departamentuak baimentzen dituen bigarren hezkuntzako ikastetxeek eta institutuek; are gehiago, Departamentuak ezarriko du batxilergoko zein araubide eta modalitate emateko baimena izanen duten.
3. artikulua. Sartzea.
1. Helduentzako batxilergoko ikasketetara sartzeko 18 urte baino gehiago eduki behar dira edo kurtsoa hasten den urtean adin hori bete behar da.
2. Hala ere, eta salbuespenez, 16 urtetik gorakoak ere sartu ahal izanen dira helduentzako ikasketa araubide horretan, baldin eta beren lan kontratuaren ondorioz ikastetxe arruntetara joaterik ez badute edo errendimendu handiko kirolariak badira.
3. Helduentzako batxilergoko ikasketetan sartu ahal izanen dira, artikulu honetako 1. edo 2. puntuan zehazten diren baldintzak betetzeaz gainera derrigorrezko bigarren hezkuntzako graduatu titulua duten edo lanbide heziketako teknikariaren nahiz kirol teknikariaren titulua duten ikasleak.
4. Halaber, helduentzako batxilergoko ikasketak egin ahal izanen dituzte, Hezkuntzari buruzko maiatzaren 3ko 2/2006 Lege Organikoa ezarri baino lehenagoko ikasketak egin dituzten eta ikasketa horiek egiteko moduan dauden pertsonak.
4. artikulua. Ikasketen antolaketa.
1. Helduentzako batxilergoko ikasketak bi kurtsotan eginen dira.
2. Batxilergo hori egiten duten ikasleek, lau irakasgai komun, modalitateari lotutako hiru irakasgai eta aukerako irakasgai bat izanen dute kurtso bakoitzean.
3. Irakasgai komunek, aukerako irakasgaiek eta kurtso bakoitzean horiek izanen duten banaketak foru agindu honetako I. eranskinean ezarritakoa beteko dute.
4. Helduentzako batxilergoan araubide presentzialean ematen den irakasgai bakoitzak foru agindu honetako I. eranskinean ezartzen den asteko ordutegia izanen du.
5. Artikulu honetako 2. puntuan ezartzen dena betetze aldera, ikastetxeek modalitateari lotutako hiru irakasgaiko multzoak dituen hezkuntza eskaintza diseinatuko dute kurtso bakoitzerako; foru agindu honetako II. eranskinean zehazten direnen artean aukeratuko dituzte irakasgai horiek. Horrela bermatu eginen da modalitateari lotutako 6 irakasgai eginen dituztela etapa osoan zehar eta horietako bost, gutxienez, aukeratu duten modalitateari lotutakoak izanen direla; eta, bide batez, unibertsitatera sartzeko proba egiteko aholkuak emanen dira.
5. artikulua. Matrikula
1. Ezin da aldi berean matrikulatu batxilergoko araubide arruntean eta helduentzako batxilergoko ikasketetan.
2. Kurtso osorako matrikula egin daiteke edo, bestela, kurtso bateko edo bietako irakasgai batzuetarako bakarrik. Era berean, bigarren kurtsoko matrikula egiteko lehenengo kurtsoko bi irakasgai utzi ahal izanen dira, gehienez, gainditu gabe.
6. artikulua. Ebaluazioa, mailaz igotzea eta titulazioa.
1. Helduentzako batxilergoa egiten duten ikasleen ebaluazioa eta titulazioa ezartzeko, Nafarroako Foru Komunitatean alderdi horiek arautzen dituen indarreko araudian ezarritakoa hartuko da oinarri moduan.
2. 49/2008 Foru Dekretuaren bigarren xedapen gehigarriko 3. puntuan ezarritakoa kontuan hartuta, eta ikasleak kurtso bietan irakasgai solteetan matrikula daitezkeenez, lehenengo mailako amaierako ebaluazio aktetan ez da sartuko ikaslea bigarren kurtsora igarotzeario buruzko erabakia.
3. Kurtso bateko irakasgai batzuetan bakarrik matrikulatzen den ikasleari ez erabiltzeko moduan utziko zaizkio ebaluazio agiri guztietan erabiliko ez diren laukiak.
4. Ikasleak ezin izanen ditu helduentzako batxilergoan berriz egin ikasketa horietan dagoeneko egin eta gainditu dituen irakasgaiak.
5. Helduentzako batxilergoan matrikulatzen diren ikasleek ez dute bete beharrik izanen 49/2008 Foru Dekretuko 2.2. artikuluan batxilergorako ezartzen den lau urteko gehieneko egonaldia.
6. 49/2008 Foru Dekretuko 21.2. artikuluan ezarritakoa dela bide, batxilergoko titulua eskuratzeko, batxilergo horretako bi kurtsoetan emanen diren irakasgai guztien ebaluazio positiboa lortu behar izanen da.
7. artikulua. Ikasketen programazioa.
1. Helduentzako batxilergoko ikasketak emateko baimena duten ikastetxeek, programazio didaktikoak lantzean, orientazio metodologiko zehatzak ezarriko dituzte. Horrela, behar bezala erantzunen zaie ikasleen inguruabar bereziei: adina, lan-esperientzia eta bestelako ezaugarriak.
2. Helduentzako batxilergoko programazio didaktikoak egiteko, gainera, 49/2008 Foru Dekretuan ezarritako curriculuma beteko da. Izan ere, foru dekretu horretan Nafarroako Foru Komunitateko batxilergoko ikasketen egitura eta curriculuma ezarri da. Halaber, maiatzaren 14ko 66/2008 Foru Aginduko V. eranskinean ezarritako batxilergoko aukerako irakasgaien curriculumak ere bete beharko dira.
3. Urteko programazio orokorra lantzean, helduentzako batxilergoko ikasketak emateko baimena duten ikastetxeek bigarren kurtsoko ikasleentzako denbora jakin bat ezarriko dute, amaierako ebaluazioaren ostean. Denbora horretan zehar, koordinazio didaktikorako departamentuetako irakasleek unibertsitatean sartzeko probaren xede diren irakasgaiak sakonduko dituzte probara aurkeztuko diren ikasleekin.
8. artikulua. Araubide presentzialaren eta urrutiko araubidearen arteko mugigarritasuna helduen kasuan.
1. Irakaskuntzako araubide horietako batetik bestera aldatu nahi duten ikasleei gaindituta dituzten irakasgaien kalifikazioa mantenduko zaie.
2. Ebaluazio agirietan jasoko da ikasleak ikasketa araubidea aldatu duela, foru agindu honetan ezarritakoa betez.
9. artikulua. Batxilergoko araubide arruntaren eta helduentzako batxilergoko ikasketen arteko mugigarritasuna.
1. Araubide arruntean dabilen ikaslea helduentzako batxilergoko ikasketak egiten has daiteke, baldin eta araubide arrunteko mailaz igotzeko baldintzak errespetatzen baditu. Foru agindu honetako III. eranskinarekin bat etorriz ezarriko da aldaketa hori.
2. Helduentzako batxilergoan ikasten ari den ikaslea araubide arrunteko batxilergora alda daiteke, baldin eta oraindik ez badu amaitu 49/2008 Foru Dekretuko 2.2. artikuluan ezartzen den lau urteko egonaldia. Araubide arrunteko mailaz igotzeko baldintzak betez eginen da aldaketa. Matrikulan, lehenengo mailako Gorputz Hezkuntza ere sartuko da.
3. Ebaluazio agirietan jasoko da ikasleak ikasketa araubidea aldatu duela, foru agindu honetan ezarritakoa betez.
10. artikulua. Modalitate, bide edo multzo aldaketa.
Ikasleak baldintza jakin batzuk bete behar izanen ditu helduentzako batxilergoan hasi ostean ikasketa horiek amaitu baino lehen beste modalitate, bide edo multzo batera aldatu nahi denean; hain zuzen, Hezkuntza Departamentuak arautuko ditu baldintza horiek.
II. KAPITULUA. Helduentzako batxilergoa araubide presentzialean
11. artikulua. Araubide presentzialeko ikasleen onarpena eta matrikula.
Foru agindu honetako 3. artikuluan ezarritakoaz gainera, batxilergoko ikasketak araubide presentzialean egin nahi dituzten ikasleak onartuak izateko eta matrikula egiteko baldintzak urteko ebazpenean ezarrikoarekin bat etorriko dira, hau da, batxilergoko ikasketak eginen dituzten ikasleak onartzeko prozedura arautzen duten oinarriak onartzeko urteko ebazpenean ezarritakoarekin bat.
12. artikulua. Araubide presentzialeko batxilergoko ikasketen antolaketa.
Aurreko 4. artikuluan ezarritakoaz gainera, ikasketa hauek antolatzerakoan ondokoak hartuko dira kontuan:
a) Helduentzako batxilergo presentziala eskaintzen duten ikastetxeek, D/A ereduen arabera, hiru saio gehiago jarriko dituzte kurtso bakoitzean Euskal hizkuntza eta literatura irakasgaia emateko asteko ordutegian.
b) Batxilergo mota horretako kurtso bakoitzean ikasleek astelehenetik ostiralera izanen dituzte eskola orduak; dena den, egunean sei saio izan ditzakete gehienez eta lau gutxienez. Saio bakoitza 45 minutukoa izanen da.
c) Ikastetxeek astean bi irakastordu gehiago izateko eskabidea egin dezakete. Hori gorabehera, ikasleek edo familiek ez dute ekarpen gehiago egin beharrik izanen eta ezin izanen zaio Hezkuntza Departamentuari aparteko baliabiderik eskatu.
d) Koordinazio didaktikorako departamentuek lagunduko diete eta gero ebaluatuko dituzte bigarren eta lehenengo mailetako irakasgaietan matrikulatuta dauden ikasleak, ordutegiak bat ez datozelako irakasgai batzuetara joan ezin direnean. Horretarako, programazio didaktikoetan lanerako plan bat diseinatuko dute; eska daitezkeen gutxieneko edukiak eta gomendatzen diren jarduerak jasoko dira plan horretan. Bestalde, azken probaz gainera proba partzialak ere programatuko dituzte.
III. KAPITULUA. Helduentzako batxilergoa urrutiko araubidean
13. artikulua. Urrutiko araubideko ikasleen onarpena eta matrikula.
1. Foru agindu honetako 3. artikuluan ezarritakoaz gainera, batxilergoko ikasketak urrutiko araubidean egin nahi dituzten ikasleak onartuak izateko eta matrikula egiteko baldintzak hurrengo puntuetan ezarritako berezitasunekin (irakaskuntza mota hau berezia delako) bat etorriko dira.
2. Urrutiko araubidean matrikulatu ahal izateko ez da aurrematrikularik egin behar.
3. Matrikula irailaren 1etik 30era bitartean eginen da. Ikasketa horiek emateko baimena duten ikastetxeetan aurkeztuko da eskabidea.
4. Salbuespenez, ikastetxeko zuzendariak batxilergoko beste araubide batean eskolatuta dauden ikasleak epez kanpoko matrikulatzeko baimena eman ahal izanen du, baldin eta agiri bidez frogatzen badute ezin dutela araubide horretan ikasten jarraitu.
14. artikulua. Urrutiko araubideko batxilergoko ikasketen antolaketa.
Aurreko 4. artikuluan ezarritakoaz gainera, ikasketa hauek antolatzerakoan ondokoak hartuko dira kontuan:
a) Ikasleak tutore bat izanen du matrikulatu den irakasgai bakoitzeko.
b) Ikasleari irakasgai bakoitzean arreta emateko, taldeka zuzeneko tutoretzak izaanen dira eta banaka orientaziorako tutoretzak eskainiko dira.
c) Urrutiko batxilergoan dauden ikasleen kasua berezia denez, ikasle hauek nahi izanez gero joan ahal izanen dira tutoretzetara. Taldeko tutoretzetara joan ezin direnek kurtso hasieran eman behar izanen diote horren berri tutoreari, eta orduan zehaztu behar izanen dute zein den haien beharrizanetara egokitzen den banako tutoretza.
d) Taldeka egiten diren zuzeneko tutoretzetan, irakasgaiaren funtsezko alderdiak jorratuko dira ikaslearekin. Horretarako, tutoreak kurtso hasieran ikasleei jakinaraziko dien jarduera programa beteko da.
e) Banako tutoretza telefonoz, bide telematikoak erabiliz edo zuzenean bertaratuta egin ahal izanen da. Tutoreak ikaslearen ikaskuntza-prozesuari buruzko banako jarraipena eginen du; halaber, ikasleak orientatuko ditu eta sortzen diren zalantza guztiak argituko ditu.
f) Oro har, irakasgai bakoitzak astean ordu kopuru jakin bat izanen du taldeko tutoretzarako, eta beste ordu kopuru bat banako tutoretzarako. Dena den, irakasgai batzuetan (matrikulatu den ikasle kopuruaren arabera), astean tutoretzarako ezarri den ordu kopurua aldatu ahal izanen da; alabaina, ikastetxeko zuzendaritza taldeak eta Zerbitzuak Ikuskatzeko eta Ikuskapen Teknikorako Zerbitzuak hartu behar dute erabaki hori.
g) Taldeko eta banako tutoretzen ordutegia ezartzean ahalegindu beharko da talde eta modalitate bereko tutoretzak asteko ahalik eta egun gutxienetan biltzen, horrela errazagoa izanen delako ikasleentzat tutoretzetara joatea.
h) Helduek izaten dituzten beharrizanak eta interesak kontuan hartuta, oro har tutoretzak arratsaldez programatuko dira. Ikasleak hala behar duelako, tutoretzaren ordutegia aldatu behar bada, zuzendaritza taldeak ordutegi berri bat proposatuko dio Zerbitzuak Ikuskatzeko eta Ikuskapen Teknikorako Zerbitzuari, honek onar dezan.
i) Tutoretzaren osagarri gisa, ikastetxeetan irakasleen eta ikasleen arteko komunikazioa errazteko gela birtual bat izanen dute. Gela horretan, gainera, ikaslea orientatzeko eta horren ikaskuntza-prozesuari laguntzeko beharrezkoak diren hezkuntza baliabideak egonen dira.
j) Urrutiko batxilergoko ikasleak bere kabuz egin beharreko lanean laguntzeko ikaslearen gida bat izanen du.
k) Gidan ikastetxeari eta ikasketei buruzko informazio orokorra jasoko da, baita ebaluazioen eta tutoretzen egutegia eta irakasgai bakoitzean lan egiteko agenda bat ere. Hain zuzen, ikasleak errazago ikasteko interesekotzat jotzen den informazioa jasoko da agenda horretan, hala nola: helburuak, edukiak, denboraren banaketa, ebaluatzeko irizpideak, material didaktikoak, jarduerak, ikasteko orientazioak, etab.
l) Koordinazio didaktikorako departamentuen ardura izanen da ikaslearen gida prestatzea, eta ikasketa burutzak lan hori zuzenduko du.
m) Zuzendaritza taldeak, kurtso hasieran, beharrezkoak diren neurriak hartuko ditu ikasle guztiek gida jaso dezaten edo bide telematikoz eskuratzeko aukera izan dezaten.
15. artikulua. Balio akademikoa
Urrutiko araubidean dauden ikasleak, matrikulatuta dauden ikastetxeko ikasle ofizial moduan hartuko dira ondorio guztietarako. Araubide arrunteko edo helduentzako araubide presentzialeko ikasketek duten balio akademiko bera izanen dute helduentzako urrutiko batxilergoko ikasketek.
Lehen Xedapen Gehigarria. Aplikatzeko egutegia.
1. 2008/2009 kurtsoan, oro har, Hezkuntzari buruzko maiatzaren 3ko 2/2006 Lege Organikoak arautu dituen batxilergoko lehenengo kurtsoko ikasketak ezarriko dira. Ondorioz, ez dira emanen urriaren 3ko 1/1990 Lege Organikoak arautzen dituen batxilergoko lehenengo kurtsoko ikasketak.
2. 2009/2010 kurtsoan, oro har, Hezkuntzari buruzko maiatzaren 3ko 2/2006 Lege Organikoak arautu dituen batxilergoko lehenengo kurtsoko ikasketak ezarriko dira. Ondorioz, ez dira emanen urriaren 3ko 1/1990 Lege Organikoak arautu dituen batxilergoko lehenengo kurtsoko ikasketak.
Bigarren Xedapen Gehigarria. Batxilergoko modalitateak.
Helduei zuzendutako araubide presentzialean eta urrutiko araubidean honako batxilergoko modalitateak egin daitezke: "Zientziak eta teknologia" eta "Giza eta gizarte zientziak".
Hirugarren Xedapen Gehigarria. Ikastetxeentzako baimena.
Iruñeko bigarren hezkuntzako "Plaza de " eta "Navarro Villoslada" institutuei eta Tuterako bigarren hezkuntzako "Benjamín de Tudela" institutuari baimena eman zaie helduentzako batxilergo presentziala emateko; bestalde, Helduentzako Bigarren Hezkuntzako Nafarroako "Félix Urabayen" Institutuari baimena eman zaio helduei urrutiko batxilergoa emateko. Hori guztia, betiere, aurreko xedapenetan hurrenez hurren aurreikusitako egutegiarekin eta modalitateekin bat etorriz.
Laugarren Xedapen Gehigarria. Unibertsitatera sartzeko proba egiteko aukerak.
1. "Zientziak eta teknologia" edo "Giza eta gizarte zientziak" modalitateetan batxilergoko bigarren kurtsoa gainditu duten ikasleak aukera ezberdinean (baina egin dituzten ikasketen batxilergoko modalitate berean) aurkeztu nahi badira unibertsitatera sartzeko probara, azterketan izanen diren irakasgaiak osatzeko behar dituen bigarren kurtsoko modalitateko irakasgaietan matrikulatu ahal izanen da helduentzako batxilergoan. Hori gorabehera, unibertsitatera sartzeko proba arautzen duen araudian ezarritakoa beteko da.
2. Aurreko puntuan aipatutako irakasgaietako bat aurretik gaindituta duen ikasleak ezin izanen du irakasgai hori berriz egin.
3. Bigarren kurtsoko irakasgaietako bat lehenengo kurtsokoren baten jarraipena bada, ikaslea lehenengo kurtsoko irakasgai horretan matrikulatu behar da eta irakasgai hori gainditu behar du bigarren kurtsokoan ebaluatua izan baino lehen.
Bosgarren Xedapen Gehigarria. Ikasketak aldi berean ematea.
Helduentzako batxilergoko ikasketetan matrikulatu ahal izateko, batxilergo horretara sartzeko eta bertan ikasteko baldintza akademikoak betetzeaz gainera, erdi mailako heziketa zikloetan matrikulatuta egon behar da eta soilik eduki behar da gainditu gabe Lantokietako Prestakuntza modulua edo, Arte Plastikoetako eta Diseinuko ikasketen kasuan, enpresa, estudio edo tailerretako prestakuntza praktikoko fasearen modulua.
Seigarren Xedapen Gehigarria. Erlijio ikasketak eta hezkuntza- arreta.
Nafarroako Foru Komunitatean batxilergoko ikasketen egitura eta curriculuma ezartzen dituen maiatzaren 12ko 49/2008 Foru Dekretuko hirugarren xedapen gehigarrian ezarritakoarekin bat etorriz antolatuko dira erlijio ikasketak eta hezkuntza arreta, helduentzako batxilergoan.
Xedapen iragankor bakarra . Araudiaren indarraldia.
Batxilergoaren antolamendu berria ezarri arte, eta foru agindu honetako lehen xedapen gehigarrian araututakoarekin bat etorriz, helduentzako ikasketak urriaren 3ko 1/1990 Lege Organikoaren arabera ikasketa horiek arautzen dituen araudian xedatutakoaren bidez arautuko dira.
Xedapen Indargabetzaile bakarra. Arauak indargabetzea.
1. Indarrik gabe geratzen da Nafarroako Foru Komunitatean LOGSE batxilergoko ikasketak gauez egitea arautu eta antolatu duen maiatzaren 23ko 171/2002 Foru Agindua, 2008/2009 kurtsoan lehenengo kurtsoari dagokionez eta 2009/2010 kurtsoan bigarren kurtsoari dagokionez.
2. Indarrik gabe geratzen da Hezkuntza eta Kultura kontseilariaren otsailaren 17ko 44/1998 Foru Agindua; horren bidez, ikasleak sartu, onartu eta matrikulatzeko jarraibideak eman dira, baita antolaketa pedagogikoari buruzko irizpideak ere 1998/1999 kurtsoaz gero Nafarroako Foru Komunitatean batxilergoa ematen duten ikastetxeen funtzionamendurako.
3. Indarrik gabe geratzen da otsailaren 17ko 44/1998 Foru Agindua aldatu duen Hezkuntza eta Kultura kontseilariaren martxoaren 27ko 90/2002 Foru Agindua; azken agindu honen bidez, ikasleak sartu, onartu eta matrikulatzeko jarraibideak eman dira, baita antolaketa pedagogikoari buruzko irizpideak ere 1998/1999 kurtsoaz gero Nafarroako Foru Komunitatean batxilergoa ematen duten ikastetxeen funtzionamendurako.
4. Indarrik gabe geratzen da Hezkuntza eta Kultura kontseilariaren ekainaren 6ko 213/2002 Foru Agindua, urrutiko araubideko batxilergoko ikasketak arautu eta antolatu duena Nafarroako Foru Komunitatean.
Azken Xedapen Bakarra
Foru Agindu honek Nafarroako Aldizkari Ofizialean argitara eman eta biharamunean hartuko du indarra.
I. ERANSKINA. Helduentzako batxilergoan ematen diren irakasgaiak. Helduentzako batxilergo presentzialeko asteko ordutegia
Irakasgai komunak
Lehenengo kurtsoa Bigarren kurtsoa
IRAKASGAIAK IRAKASTORDUAK IRAKASGAIAK IRAKASTORDUAK
Gaztelania eta literatura I 3 Gaztelania eta literatura II 4
Atzerriko hizkuntza I 3 Atzerriko hizkuntza II 3
Filosofia eta herritartasuna 2 Filosofiaren historia 3
Mundu garaikiderako zientziak 2 Espainiako historia 3
Ikastetxeak erabakitzeko orduak 2 Ikastetxeak erabakitzeko orduak 1
Erlijioa eta horren ordezkoa den hezkuntza laguntza emateko 70 eskola ordu bermatu behar ditu ikastetxeak etapa osoan. Ikastetxeak berak zehaztuko du, gainera, hezkuntza laguntza horren edukia.
D/A ereduak dituzten eta batxilergoa eskaintzen duten ikastetxeek hiru irakastordu gehiago jarriko dituzte kurtso bakoitzeko asteko ordutegian, Euskal hizkuntza eta literatura irakasgaia emateko.
Modalitateari lotutako irakasgaiak
Modalitateari lotutako hiru irakasgai (4 ordu bakoitzak) 12 Modalitateari lotutako hiru irakasgai (4 ordu bakoitzak) 12
Aukerako irakasgaiak
Informazioaren teknologiak 2 Informazioaren teknologiak 2
Ikastetxeak diseinaturiko irakasgaia 2 Ikastetxeak diseinaturiko irakasgaia 2
Ikasleak aukerako irakasgai bat eginen du lehenengo kurtsoan, eta beste bat bigarren kurtsoan.
II. ERANSKINA. Zientzien eta Teknologiaren modalitateko irakasgaiak
LEHENENGO KURTSOA BIGARREN KURTSOA
Matematika I Matematika II
Fisika eta kimika Fisika
Biologia eta geologia Biologia
Marrazketa teknikoa I Marrazketa teknikoa II
Teknologia industriala I Elektroteknia
Kimika
Teknologia industriala II
Lurraren eta ingurumenaren zientziak
Giza eta Gizarte Zientzien modalitateko irakasgaiak
LEHENENGO KURTSOA BIGARREN KURTSOA
Mundu garaikidearen historia Artearen historia
Latina I Latina II
Grekoa I Grekoa II
Ekonomia Enpresaren ekonomia
Gizarte zientziei aplikatutako matematika I Gizarte zientziei aplikatutako matematika II
Geografia
Literatura unibertsala
ANEXO III. Batxilergoko araubide arruntetik helduentzako batxilergora aldatzea
ARAUBIDE ARRUNTEKO HURRENGO KURTSOA EGITEKO AUKERAK
KURTSO AMAIERAKO HELDUENTZAKO BATXILERGOAN,
EGOERA PRESENTZIALEAN EDO URRUTIKOAN
Batx. 1 Dena gaindituta Batx. 2.a osoarekin
1 edo 2 irakasgai gainditu gabe Batxilergoko 2. kurtsoa osorik + lehenengo kurtsoan gainditu gabe utzi diren irakasgaiak
3 edo 4 irakasgai gainditu gabe a) Batxilergoko 1. kurtsoa osorik errepikatu
b) 1. kurtsoan gainditu gabeko irakasgaiak + 2. kurtsoko 2 edo 3 irakasgaiak
4 irakasgai baino gehiago gainditu gabe Batxilergoko 1. kurtsoa osorik errepikatu
Batx. 2 Gainditu gabeko irakasgaiak (1. edota 2. kurtsokoak) Bi mailetan gainditu ez diren irakasgaiak
Batxilergoko bigarren kurtsoa araubide arruntean egin duten ikasleak, lehenengo kurtsoko Gorputz Hezkuntza irakasgaia bakarrik utzi badute gainditu gabe, ezin izanen dira matrikulatu helduentzako batxilergoan.
Araubide arruntean gainditu gabe utzi den aukerako edo modalitateari lotutako irakasgairen bat ez badago helduentzako batxilergoan, ikasleak mota bereko beste irakasgai bat egin behar izanen du.
