navarra.es
Castellano | Euskara | Français | English
Ezagutzera eman
34/2014 Foru Agindua, otsailaren 11koa, Landa Garapeneko, Ingurumeneko eta Toki Administrazioko kontseilariak emana. Honen bidez Nafarroako Nekazaritzako Ustiategien Erregistroan inskribatutako nekazaritza ustiategiak kalifikatzeko irizpideak ...
34/2014 FORU AGINDUA, OTSAILAREN 11KOA, LANDA GARAPENEKO, INGURUMENEKO ETA TOKI ADMINISTRAZIOKO KONTSEILARIAK EMANA. HONEN BIDEZ NAFARROAKO NEKAZARITZAKO USTIATEGIEN ERREGISTROAN INSKRIBATUTAKO NEKAZARITZA USTIATEGIAK KALIFIKATZEKO IRIZPIDEAK EZARTZEN DIRA
(2014ko 46. NAOn argitaratutakoa, martxoaren 7an)
Atarikoa
Nafarroako Nekazaritzako Ustiategien Erregistroari buruzko Foru Legearen testu bategina onesten duen uztailaren 2ko 150/2002 Legegintzako Foru Dekretuaren 4. artikuluak ezartzen du Nafarroako Nekazaritzako Ustiategien Erregistroa zerbitzu administratibo bat dela, eta laguntza publikoen hartzaileak zehazteko erabiltzen den nekazaritzako ustiategien informazioa bertan jasotzen dela. Nekazaritzako Ustiategien Modernizazioari buruzko uztailaren 4ko 19/1995 Legearekin koordinatzen da Nafarroako legeria, hark oinarrizko izaerako zenbait artikulu baititu.
Nekazaritza, Abeltzaintza eta Elikadurako kontseilariaren uztailaren 6ko 220/2007 Foru Aginduaren bidez Nafarroako Foru Komunitatean nekazaritzako lan unitateak ezarri dira. 1995eko abenduaren 13ko Aginduak Nekazaritzako Ustiategien Modernizazioari buruzko uztailaren 4ko 19/1995 Legea garatzen du.
Beharrezkoa da irizpideak ezartzea zenbait parametro lortzeko, zeinak, ustiategi bati egozten ahal zaizkion lan unitate kopurua bezala, edo haren marjina garbiaren zehazte objektiboa bezala, erabakigarriak baitira irizteko ea titularra ogibide nagusia nekazaritza duen norbait den, baita ustiategia lehentasunezko gisa kalifikatzeko ere, 150/2002 Legegintzako Foru Dekretuaren 10., 11., 12. eta 13. artikuluetan ezarritakoarekin bat. Orobat, informazio horren balioa ezartzea.
Kontuan hartzen da ezen marjina garbi estandarraren parametroak eta nekazaritza ustiategi batetik lortutako errentaren parametroak eragin handia jasaten dutela prezioetan urtean zehar izaten diren aldaketen ondorioz, baita produkzioetan izaten diren aldaketen ondorioz ere, ustiategietan aldaketarik egin beharrik gabe. Orobat, ustiategiaren titularrek zergaldi bakoitzean aitortutako nekazaritzako errenta eta guztirako errenta zer egunetan eskuratzen den, hori berebizikoa da urteko katalogazioak eta kalifikazioak egiteko, eta horien baliozkotasuna baldintzatzen du.
Bestalde, uztailaren 2ko 150/2002 Legegintzako Foru Dekretuaren 1. artikuluak adierazten duen bezala, Erregistroan dagoen informazioa oinarri gisa erabiltzen da nekazaritzako egituren modernizatze politika garatzeko eta Nafarroako nekazaritza sektorea antolatzeko eta planifikatzeko. Hortaz, laguntza publikoen lehentasunezko xede izateko, zenbait onura fiskal lortzeko eta estatistikaren ondorioetarako, beharrezkoa da ogibide nagusia nekazaritza izatearen kalifikazioa erabiltzea, edo ustiategia lehentasunezkoa izatearen kalifikazioa, eta inskribatzeko prozesua arautzea, baita informazio hori eta kasuan-kasuan aurkeztu beharreko agiriak eguneratzeko prozesua ere.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz, agindu dut:
1. artikulua. Nekazaritzako lan unitatea zehaztea.
Nekazaritzako Ustiategiak Modernizatzeko uztailaren 4ko 19/1995 Legea garatzen duen Ministerioaren Aginduan ezarritakoarekin bat finkatuko da 150/2002 Legegintzako Foru Dekretuaren 3. artikuluko 8. atalean definitutako nekazaritzako lan unitatea. Gaur egun, urteko mila bederatziehun eta hogei ordukoa da.
Irizpide teknikoetan oinarrituta zehaztutako modulu objektiboen arabera kalkulatuko dira ustiategiaren nekazaritzako lan unitateak. Irizpide tekniko horiek ondokoak izanen dituzte kontuan: ustiategiaren tamaina, teknika eta ekonomia arloko orientabidea eta produkzio sistema.
2. artikulua. Erreferentziako errenta zehaztea.
150/2002 Legegintzako Foru Dekretuaren 3. artikuluko 10. atalak aipatzen duen erreferentziako errenta Nekazaritza, Elikadura eta Ingurumeneko Ministerioak ezarriko du urtero, Nekazaritzako Ustiategiak Modernizatzeko uztailaren 4ko 19/1985 Legearekin bat.
3. artikulua. Unitateko lan errenta kalkulatzeko irizpideak.
Nekazaritzako Ustiategiak Modernizatzeko 150/2002 Legegintzako Foru Dekretuaren 3. artikuluko 9. atalean adierazitako unitateko lan errenta kalkulatzearen ondorioetarako, irizpide hauek ezarriko dira:
1. Ustiategiaren marjina garbiari dagokionez:
Bi hauen arteko aldea hartuko da marjina garbitzat: batetik ekoizpen jarduera guztietatik (ustiategietarako diru-laguntza barne) ustiategiak jasotzen dituen diru-sarrerak eta bestetik gastu finko eta aldakor guztiak, salbu kapital berekien ordainsariak eta familiako eskulanarenak.
Marjina garbi estandarren arabera kalkulatuko da ustiategiko marjina garbia.
2. Nolanahi ere, ustiategien titularrek eska dezakete beren ustiategiei buruzko datu errealen gainean zehaztu dadila unitateko errenta. Horretarako, eskaerarekin batera, ustiategiaren kontabilitate datuak aurkeztu beharko ditu, aurreko atalean zehazten denarekin bat, eta frogagiriak, eta, kasua bada, Gizarte Segurantzari buruzko agiriak, ustiapenerako erabilitako nekazaritzako lan unitateen kopurua zehazteko.
3. Unitateko lan errenta zehazteko ezarritako modulu ekonomikoak urtero eguneratuko dira.
4. Lehentasunezko gisa kalifikatu ondoko bost urtean nekazaritza ustiategi bateko unitateko lan errentan aldaketarik baldin bada, 3. puntuan adierazitako moduluen urteko eguneraketaren ondorioz, horrek ez du eraginik izanen kalifikazio horretan, aipatutako aldian.
4. artikulua. Hasierako inskripzioa.
1. Nekazaritza ustiategien titularrek, Nekazaritzako Ustiategien Erregistroan inskribatzeko, Nekazaritzako Politika Bateratuko laguntzen eskaera bakarra balia dezakete, eskaera hori aurkezteko ezartzen diren epe eta baldintzetan, edo zuzenean Nafarroako Nekazaritzako Ustiategien Erregistroari zuzendutako eskaera aurkeztu dezakete.
Aurreko lerroaldean adierazitako epea bukaturik, nekazariek inskripzio eskaeraren aldaketa bat aurkeztu beharko dute, zuzenean Nekazaritzako Ustiategien Erregistroari zuzendua, ondoko kasuetan:
–Laguntzen eskabide bakarra aurkezteko aldia bukatu ondoren ustiategiko lurzatietan aldaketak izatea.
–Laguntzen eskaera bakarrean aitortu ezin diren bigarren laboreak.
2. Abeltzaintzako Ustiategien Erregistroan edo Mahastien Erregistroan titular berri gisa inskribatzeak berarekin ekarriko du Nafarroako Nekazaritzako Ustiategien Erregistroan ofizioz inskribatzea, 150/2002 Legegintzako Foru Dekretuaren 6. artikuluko 1b) atalarekin bat. Nolanahi ere, artikulu honen 3. atalean adierazitako agiriak aurkeztu beharko dituzte.
3. Landa Garapeneko, Ingurumeneko eta Toki Administrazioko Departamentuan aurkeztu beharreko agiriak, Erregistroko hasierako inskripzioa egiteko.
a) Titularraren identifikazioa. Nekazari batasunen ustiategien kasuan, eratze-estatutuak, non honako hauek bilduko baitira: xede soziala, izenpetutako kapitala, erabakitze organoen ordezkatzea, bazkideen zerrenda eta horietako bakoitzaren parte-hartzearen ehunekoa, eta nekazaritzako sozietate zibilen kasuan, eratzearen eskritura publikoa.
b) Ustiategiaren titularraren azkeneko zergaldiko errenta aitorpenaren fotokopia, eta, sozietateen kasuan, hura osatzen duten guztiena.
c) Gizarte Segurantzako beregaineko langileen edo autonomoen araubide berezian kotizatzen aritzearen frogagiria, nekazaritzako jardueraren arabera, ustiategiaren titularrarena eta, sozietateen kasuan, bazkide guztiena.
d) Ustiategian, laboreak ezarrita dituzten lurzatiak.
e) Hala badagokio, unitateko lan errenta beren ustiategiei buruzko datu errealen gainean zehazteko eskaera, baita 150/2002 Legegintzako Foru Dekretuaren 3. artikuluko 2. atalean aipatzen duen dokumentazioa ere.
f) 150/2002 Legegintzako Foru Dekretuaren 3. artikuluko 5. atalak aipatzen dituen ordezkatze jarduerak gauzatzen badira, horren frogagiriak, baita horietatik eratorritako errenten justifikazioa ere.
g) Norberaren ekoizpena eraldatu gabe zuzenean saltzen bada, edo norberaren ekoizpenaren lehen eraldaketa zuzenean saltzen bada, jarduera horren Jarduera Ekonomikoen gaineko Zergaren erregistroan alta emanik egotearen frogagiria, baita zuzeneko salmentatik eratorritako errenten justifikazioa ere.
h) Norberaren ekoizpenaren lehen eraldaketa egiten bada, industrien erregistroan eta Osasun eta Kontsumo Ministerioaren Elikagaien Osasun Erregistro Orokorrean (elikagaien eraldaketa jarduera zehatzetan) izena emanik egotearen frogagiria.
i) Naturguneak zaintzearekin eta ingurumena babestearekin lotutako jarduerak egiten badira norberaren ustiategian, edo landa turismoarekin edo nekazaritza turismoarekin edo jarduera zinegetiko edo artisautzakoekin lotutakoa, Jarduera Ekonomikoen gaineko Zergaren erregistroan jarduera horiengatik alta emanik egotearen frogagiria, baita horietatik eratorritako errenten frogagiria ere.
b) eta c) ataletan adierazitako agiriak aurkeztetik salbuetsirik egonen dira ustiategien titularrak edo batasunen ustiategietako bazkideak baldin eta errenta aitorpena Nafarroan egiten badute eta Gizartze Segurantza Nafarroan kotizatzen badute, betiere hasierako inskripzio eskaeran baimena eman badute Departamentuak datu horiek bil ditzan.
5. artikulua. Erregistroko datuen urteko aitorpena.
1. Nafarroako Nekazaritzako Ustiategien Erregistroan inskribatutako nekazaritza ustiategien titularrek urtero aitortu beharko dituzte beren ustiategiaren datuak laguntzen eskaera bakarraren bidez, eskaera hori aurkezteko ezartzen diren epe eta baldintzetan.
Aurreko lerroaldean adierazitako epea bukaturik, nekazariek urteko aitorpenaren aldaketa bat aurkeztu beharko dute, zuzenean Nekazaritzako Ustiategien Erregistroari zuzendua, ondoko kasuetan:
–Laguntzen eskabide bakarra aurkezteko aldia bukatu ondoren ustiategiko lurzatietan aldaketak izatea.
–Laguntzen eskaera bakarrean aitortu ezin diren bigarren laboreak.
2. Abeltzaintzako Ustiategien Erregistroan edo Mahastien Erregistroan aldaketak egiteak berarekin ekarriko du Nafarroako Nekazaritzako Ustiategien Erregistroan ofizioz urteko aitorpena egitea, 150/2002 Legegintzako Foru Dekretuaren 6. artikuluko 1b) atalarekin bat. Nolanahi ere, behar den kasuetan, artikulu honen 3. atalean adierazitako agiriak aurkeztu beharko dituzte.
3. Landa Garapeneko, Ingurumeneko eta Toki Administrazioko Departamentuan aurkeztuko dira aitortutako datuen frogagiriak, 4. artikuluko 3. atalean ezartzen den bezala.
4. Lurzatiei edo abereei dagokienez urteko aldaketen aitorpenik egiten ez bada, horrek berarekin ekarriko du Nafarroako Nekazaritzako Ustiategien Erregistroan baja izatea, aurretik interesdunari entzutea emateko tramitea beteta, eta gainerako datuei dagokienez, dagoen informazioa ez eguneratzeak.
6. artikulua. Nekazaritzako ustiategien kalifikazioa.
Ustiategien titularrak edo batasunen ustiategietako bazkideak ogibide nagusia nekazaritza duten nekazari gisa kalifikatzea, edo nekazari profesional gisa, edo nekazaritzako profesional gisa, eta ustiategiak lehentasunezkotzat katalogatzea, urtero eginen da.
Ustiategien katalogazioak eta ustiategien titularren eta batasunen ustiategietako bazkideen kalifikazioak egiteko, oinarritzat hartuko dira Nafarroako Nekazaritzako Ustiategien Erregistroan urriaren 1ean dauden datuak, foru agindu honen 3. artikuluan ezarritakoarekin bat eguneraturik.
Urtero, azaroaren 1a baino lehen, Nekazaritza eta Abeltzaintzako zuzendari nagusiak ebatziko ditu katalogazioak, eta onesten direnetik hurrengo urtekoak onetsi arte izanen dira baliozkoak, betiere ez bada egiaztatzen jadanik ez direla betetzen onetsitako katalogazioa ekarri zuten baldintzak. Landa Garapeneko, Ingurumeneko eta Toki Administrazioko Departamentuaren web orrian argitaratuko dira katalogazioak.
Nolanahi ere, Erregistroan urriaren 1aren ondoren inskribatu diren ustiategietarako, inskripzioaren ondorengo katalogazio bat ebatziko da, eta kasu horretan ere hurrengo urteko katalogazioa onesten denean bukatuko da, betiere ez bada egiaztatzen jadanik ez direla betetzen onetsitako katalogazioa ekarri zuten baldintzak.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitara eman eta biharamunean hartuko du indarra.
