navarra.es
Castellano | Euskara | Français | English
Ezagutzera eman
384/1993 Foru Dekretua, abenduaren 27koa, salmonidoen Arrantzaren Nafarroako plangintzari buruzkoa
(1994ko 6. NAOn argitaratutako testua, urtarrilaren 14an)
Atarikoa
Arrantza daitekeen basa faunaren barnean, salmonidoak (amuarraina eta izokina) arrantzaleek hoberesten dituzten espezieak dira, urteoro beren populazioek presio haundia nozitzen dutelarik. Bertzalde, espezie hauen berezitasun ekologikoek, ur laster, oxigenatu eta garbiak dituzten ibai tarteetara mugatzen dute beren hedadura.
Bi faktoreek, arrantzak nahiz muga ekologikoek, komenigarri egiten dute amuarrain eta izokinen populazioaren ustiapenak aldez aurretik plangintza egokia izatea, probetxamendurik hoberena bateragarria izan dadin espezie hauek gaurregun zein hurrengo urteetan beren horretan iraun eta indarberritzearekin. Hala bada, baliabide natural hauen erabilpen zuzena bermatzeko modurik koherenteena, aldez aurreko plangintza lantzea da, salmonidoek betetzen duten eremu guztia bereganaturik, eskualdekatzea eta baliabide hauek antolatu eta probetxatzeko arauteria orokorra ezar ditzan.
Uretako faunaren probetxamenduen plangintzaren ideia bete-betean jasorik gelditu da Basa Fauna eta haren Habitatak Babestu eta Kudeatzeari buruzko martxoaren 5eko 2/1993 Foru Legearen 54. artikuluko 1. zenbakian, ezartzen baitu, barrutietan, uretako faunaren probetxamendu guztiak, Lurraldearen Antolamendu eta Ingurugiro Departamentuak onetsitako Antolamendu Planaren arabera egin behar dela eta hartan justifikatuko dela zer motatakoak eta zenbatekoak izaten ahal diren harrapaketak, animali aberastasuna babestu eta berretzeko asmoz.
Fauna babesten duen legerian dauden aurrikuspenak kontutan harturik, eta salmonidoen kudeaketari ikuspegi horretatik begiraturik, Foru Dekretu honek, salmonido espezieen Arrantza Antolatzeko Plan Gidari baten bidez egituratzen du Nafarroako Arrantzaren antolamendua, baita Plan Gidari hori garatuz, ibai nagusietako eta hirien ibaiadarretako Arrantzaren Antolamendurako Planen bidez ere. Horietan zehatz-mehatz planifikatzen da amuarrainaren eta izokin arruntaren kudeaketa eta haiek babesteko eta haien habitata indarberritzeko neurri zehatzak ezartzen dira.
Horiek horrela, Lurraldearen Antolamendu eta Ingurugiro Kontseilariak proposaturik, eta Nafarroako Gobernuak mila bederatziehun eta lauretan hogeita hamahiruko abenduaren hogeita zazpian egin bilkuran harturiko erabakiari jarraikiz, dekretatu dut:
1. artikulua
Nafarroako salmonidoen Arrantzaren antolamendua, ondoko plangintza bideen bitartez gauzatuko da:
a) Salmonidoen Arrantza Antolatzeko Plan Gidari bat.
b) Ibai nagusietako eta horien ibaiadarretako salmonidoen Arrantza Antolatzeko Planak, Plan Gidariaren garapen.
2. artikulua
Plan Gidariak ondoko zehaztapenak izanen ditu:
a) Salmonidoen ibai tarteak mugatzea.
b) Salmonidoak babesteko irizpide nagusiak ezartzea baita, hala behar baldin bada, helburuak ere, ibaiak espezie hauekin birpopulatzeari dagokionez.
c) Salmonidoen Arrantza zer muga orokorri egokitu behar zaien ezartzea, bereziki harrapaketen gehieneko kopuruari dagozkion mugak, erabili beharreko arrantza tresna eta baliabideak, tamainak eta espezie hauen iraupena era birpopulaketa bermatzen duten gainerako alderdi guztiak.
d) Salmonidoen arrantzarako barrutiak mugatzea, Basa Fauna eta haren habitatak Babestu eta Kudeatzeari buruzko martxoaren 5eko 2/1993 Foru Legearen 85. artikuluko 3. zenbakiak ezarritako ondorioetarako.
e) Salmonidoen arrantzarako tarte debekatuak mugatzea, martxoaren 5eko 2/1993 Foru Legearen 52.3 artikuluaren irizpideen arabera.
3. artikulua
Salmonidoen Arrantza Antolatzeko Plan Gidariaren formulazioa eta onespena prozedura honi lotuko zaizkio:
a) Lurraldearen Antolamendu eta Ingurugiro Departamentuak Planaren Aurreproiektua prestatuko du.
b) Lurraldearen Antolamendu eta Ingurugiro Kontseilariak Planaren Proiektua hasiera batez onetsiko du, Nafarroako Aldizkari Ofizialean argitaratuko den Foru Agindu baten bidez.
c) Proiektua jendaurrean jarriko da hilabetez, hasierako onespena Nafarroako Aldizkari Ofizialean argitaratzen denetik, interesatuek bitarte horretan egoki juzkatzen dituzten iradokizun eta ohartarazpenak idatziz aurkez ditzaten. Jendaurreko aldia, guttienez ere Nafarroan zabalduen dauden egunkarietariko batean iragarriko da.
Jendaurreko aldiarekin batean entzutea emanen zaie Ebroko eta Iparraldeko Ur Konfederazioei, bidezko juzkatzen dituzten ohartarazpenak aurkez ditzaten.
d) Ingurugiro Zerbitzuak alegazioei buruzko txostena eginda, Planaren Proiektua eta alegazioak Nafarroako Ingurugiro Batzordearen esku utziko dira, txostena egin dezan.
e) Bidezko diren ekarpen berriekin, Lurraldearen Antolamendu eta Ingurugiro Kontseilariak Nafarroako Gobernuari aurkeztuko dio Plana, behin-betikoz onets dezan. Behin-betikoz onesteko erabakia Foru Dekretu baten bidez eginen da eta Planaren arauteria orokorra Nafarroako Aldizkari Ofizialean argitaratuko da.
4. artikulua
Salmonidoen Arrantza Antolatzeko Planek, ondoko zehaztapenak izanen dituzte, Plan Gidariaren garapen:
a) Bakoitzak bere eremuko salmonidoen populazioen hasierako egoera deskribatzea.
b) Salmonidoen populazioa babestu eta indarberritzearen ikuspegitik begiratuta, interes gehien duten ibai tarteak sailkatzea.
c) Antolatzen diren ibaietako tarte ezberdin bakoitzean, salmonidoen populazio ahalmenak ezartzea.
d) Salmonidoak hobetzeko programak definitzea, baita, salmonidoen habitatak diren aldetik, ibaiertzak eta ibaibideak berreskuratzeko programak ere.
e) Planaren eremuan, salmonidoak ustiatzeko eta probetxatzeko programa zehatzak definitzea.
f) Salmonido espezieak babesteko arauteria ezartzea.
g) Salmonidoen habitata diren aldetik, uren kalitate biologikoaren arloan, helburuak definitzea.
h) Plana betetzeko eta burutzeko neurri egokiak.
5. artikulua
Salmonidoen Arrantza Antolatzeko Planen formulazioa eta onespena prozedura honi lotuko zaizkio:
a) Lurraldearen Antolamendu eta Ingurugiro Departamentuak Planaren Aurreproiektua prestatuko du.
b) Lurraldearen Antolamendu eta Ingurugiro Kontseilariak Planaren Proiektua hasiera batez onetsiko du, Nafarroako Aldizkari Ofizialean argitaratuko den Foru Agindu baten bidez.
c) Proiektua jendaurrean jarriko da eta aldi berean entzutea emanen zaie doakien Ur Konfederazioei, ibai ondoko Toki Entitateei eta Arrantzale Elkarteei, hilabetez, hasierako onespena Nafarroako Aldizkari Ofizialean argitaratzen denetik, interesatuek bitarte horretan egoki juzkatzen dituzten iradokizun eta ohartarazpenak idatziz aurkez ditzaten.
Jendaurreko aldia, guttienez ere Nafarroan zabalduen dauden egunkarietariko batean iragarriko da.
d) Ingurugiro Zerbitzuak alegazioei buruzko txostena eginda, Planaren Proiektua eta alegazioak Nafarroako Ingurugiro Batzordearen esku utziko dira, txostena egin dezan.
e) Bidezko diren ekarpen berriekin, Lurraldearen Antolamendu eta Ingurugiro Kontseilariak behin-betikoz onetsiko du Plana. Behin-betikoz onesteko Foru Agindua eta Planaren arauteria orokorra Nafarroako Aldizkari Ofizialean argitaratuko dira.
6. artikulua
Foru Dekretu honek ezartzen dituen planen aldaketak eta igorpenak horien formulazio eta onespenerako erabilitako prozedura berari lotuko zaizkio.
Lehenbiziko Xedapen Gehigarria
Salmonidoen Arrantza Antolatzeko Plan Gidaria behin-betikoz onesten ez den artean, formulatzen ahalko dira Arrantza Antolatzeko Planak, Foru Dekretu honek ezarritako eduki eta prozedurari lotzen bazaizkio, baina ez dira behin-betikoz onesten ahalko.
Bigarren Xedapen Gehigarria
Orientazio gisa eta Lurraldearen Antolamendu eta Ingurugiro Departamentuaren baliabideek baldintzapeturik, ondoko egutegia ezartzen da salmonidoen Arrantzaren plangintzarako:
a) 1994. Salmonidoen Arrantza Antolatzeko Plan Gidariak eta Ega-Urederra, Arakil-Larraun-Basaburua eta Arga-Ultzama-Mediano ibaietako salmonidoen Arrantza Antolatzeko planak behin-betikoz onestea.
b) 1995. Zaraitzu-Eska ibaietako salmonidoen Arrantza Antolatzeko plana behin-betikoz onestea.
c) 1996. Erro-Urrobi-Irati ibaietako salmonidoen Arrantza Antolatzeko plana behin-betikoz onestea.
d) 1997. Bidasoa-Araxes-Leitzaran eta Urumea ibaietako salmonidoen Arrantza Antolatzeko plana behin-betikoz onestea.
Azken Xedapenetako Lehenbizikoa
Esku ematen zaio Lurraldearen Antolamendu eta Ingurugiro Kontseilariari Foru Dekretu hau garatu eta aplikatzeko behar diren xedapen guztiak eman ditzan.
Azken Xedapenetako Bigarrena
Foru Dekretu honek Nafarroako Aldizkari Ofizialean argitaratu eta biharamunean hartuko du indarra.
