navarra.es
Castellano | Euskara | Français | English
Ezagutzera eman
88/2007 Foru Agindua, uztailaren 4koa, Hezkuntza kontseilariak emana, martxoaren 19ko 22/2007 Foru Dekretuaren bidez araututako araubide bereziko hizkuntza irakaskuntzen oinarrizko eta erdiko mailak antolatzen dituena
(Testu bateratua. Jatorrizkoa 2007ko 107. NAOn argitaratua, abuztuaren 29an. Aldaketak: Orden Foral 78/2008, de 28 de mayo; 220/2011 Foru Agindua, abenduaren 2koa)
Atarikoa
Hezkuntzari buruzko maiatzaren 3ko 2/2006 Lege Organikoak ezarritako araubide bereziko hizkuntza irakaskuntza, zeinen helburua baita ikasleak gaitzea hezkuntza sistemako etapa arruntetatik kanpora hizkuntza erabiltzeko, hiru mailatan antolaturik dago: oinarrizkoa, erdikoa eta aurreratua.
Martxoaren 19ko 22/2007 Foru Dekretuak alemana, euskara, frantsesa, ingelesa eta italiera Nafarroako Foru Komunitatean irakasteko oinarrizko eta erdiko mailetarako curriculumak ezarri zituen, abenduaren 29ko 1629/2006 Foru Dekretuak ezarritako gutxieneko edukietatik abiatuta (2007/01/04ko Estatuko Aldizkari Ofiziala).
Martxoaren 19ko 22/2007 Foru Dekretuaren xedapen iragankor bakarrak ezartzen du Nafarroako Foru Komunitatean 2007-2008 ikasturtean ezarriko direla oinarrizko eta erdiko mailak uztailaren 16ko 196/2001 Foru Dekretuaren bidez araututako hizkuntzen irakaskuntzako 1., 2. eta 3. kurtsoen ordez.
Hortaz, bidezkoa da martxoaren 19ko 22/2007 Foru Dekretuaren bidez araututako araubide bereziko hizkuntzen irakaskuntzaren oinarrizko eta erdiko mailen antolaketa ezartzea.
Horrenbestez, eta Nafarroako Gobernuari eta lehendakariari buruzko abenduaren 3ko 14/2004 Foru Legeko 41. artikuluko 1. idatz-zatiko g) letran ematen zaizkidan ahalmenak erabiliz, agindu dut:
1. artikulua. Helburua eta aplikazio eremua.
Foru agindu honek martxoaren 19ko 22/2007 Foru Dekretuaren bidez araututako araubide bereziko hizkuntzen irakaskuntzaren oinarrizko eta erdiko mailen antolaketa ezartzen du eta Nafarroako Foru Komunitateko hizkuntza eskola ofizialetan aplikatuko da.
2. artikulua. Iraupena.
2.1. Hizkuntzen irakaskuntzaren oinarrizko maila bi kurtsotan egituratzen da eta bakoitzak, gutxienez, 130 eskola ordu izanen ditu.
2.2. Hizkuntzen irakaskuntzaren erdiko maila kurtso bakar batean egituratzen da eta, gutxienez, 130 eskola ordu izanen ditu.
3. artikulua. Ordutegiak.
3.1. Nafarroako Hizkuntza Eskola Ofizialetan bertaratu beharreko modalitatean eskaintzen diren ohiko ordutegiak hauek dira:
-Ordu bat egunero, astean lau egunetan, eta ordu bat gehiago hamabostean behin.
-1,5 ordu egunero, astean hirutan.
-2 ordu egunero, astean bitan, eta bi ordu gehiago hilabetean behin.
3.2. Ikaslearen asistentzia eta ikasketa prozesua erraztu nahian, modalitate intentsiboa eta/edo semipresentziala baimentzen ahalko dira. Ezaugarri hauek izanen dituzte:
a) Modalitate intentsiboan oinarrizko maila ikasturte bakarrean eginen da, ondoko bideetako bat aukeratuz:
-2 ordu egunero, astean lau egunetan, eta bi ordu gehiago hamabostean behin.
-3 ordu egunero, astean hirutan.
b) Modalitate semipresentziala, erdiko mailarako, ondoko bideetako bat aukeratuz:
-Ordu bat, astean bi egunetan, eta horren osagarri, 2,5 ordu astean, norberaren lanetarako.
-2 ordu, astean behin, eta horren osagarri, 2,5 ordu astean, norberaren lanetarako.
Horretarako, hizkuntzen eskola ofizialek eskaera behar bezala justifikatua bidali beharko diote Eskola Antolamendu eta Berriztapenerako Zerbitzuari eta horrek, bere aldetik, baimena emateko behar duen informazioa eskatuko dio Zerbitzuak Ikuskatzeko eta Ikuskapen Teknikorako Zerbitzuari.
Modalitate intentsiboan eta semipresentzialean irakasteko baimena urtero berriztatu beharko da, eskolak berak eskatuta.
3.3. Urrutiko irakaskuntzaren modalitatea Nafarroako Urrutiko Hizkuntza Eskola Ofizialaren bidez eginen da.
4. artikulua. Ratioak.
Oro har, talde bakoitzean 25 ikasle egonen dira, hizkuntza, kurtso eta modalitate guztietan berdin.
5. artikulua. Ikasleak onartzeko prozedura.
5.1. Ikasleak eskolan sartzeko prozedura eta eskaerak ebazteko arauak hizkuntza eskola ofizialetako eskola kontseiluek finkatuko dituzte. Arau horietan jaso beharko da, eskaera eskaintzen diren plazak baino handiagoa bada, lanpostuak zozketa bidez adjudikatuko direla.
5.2. Hizkuntza eskola ofizialek ikasturte bakoitzeko eskaintza akademikoaren berri emanen dute, baita onarpen prozeduraren berri ere.
5.3. Hizkuntza eta zentro bakoitzeko, eskabide bat bete beharko da. Eskaera hori norberarena eta utziezina izanen da.
5.4. Oinarrizko mailako 2. kurtsoan edo erdi mailan zuzenean sartzeko adinako hizkuntza maila dutela uste duten pertsonek 11. artikuluan azaltzen den mailakatze proba egitea eskatu beharko dute. Mailakatze proben emaitzaren berri jakin ondoren, sailkatu diren mailan hasteko eskaera egiten ahalko dute.
6. artikulua. Ikasleen matrikulazioa.
Hizkuntzen eskola ofizialek matrikulazio tokia erreserbatuko diete araubide ofizialean segitzeko eskubidea duten ikasle ofizialei. Era beran, ikasle berriendako matrikulazio epe bat finkatuko du.
Ikaspostu hutsik baldin badago, irailean beste matrikulazio epe bat irekiko da.
7. artikulua. Bi matrikula aldi berean.
7.1. Ikasle bera ezin da matrikulatu hizkuntza berean modalitate batean baino gehiagotan.
7.2. Bi espediente baldin badaude, hizkuntza eskola ofizialek, ofizioz, zehazten duten eskolan eta/edo modalitatean egindako matrikula deuseztatuko dute.
8. artikulua. Matrikulari uko egitea.
8.1. Ikasle guztiek eskatzen ahalko dute matrikula deuseztatzea. Horretarako, bere ikasketa espedientea zein hizkuntza eskola ofizialetan dagoen, hango zuzendariari eskatu beharko diote apirilaren 30a baino lehen, betiere, agiri bidez egiaztatzen badute eritasun fisiko edo psikikoren bat izan dutela edo lanean hasi direla eta, horregatik, ezin izan direla klasera joan matrikulatuta zeuden orduetan.
8.2. Eskaerak eskolako zuzendariak ebatziko ditu. Aurreko puntuan adierazitako kausak egiaztatuz gero, deuseztatzeko baimena emanen du.
8.3. Hemen aurreikusi ez den kausa bereziren bat gertatuz gero, matrikulari uko egiteko eskaerak lehen aipatutako epe berean aurkeztu beharko zaizkio eskolako zuzendariari. Horrek txostena eginen du eta ikaslearen eskaerarekin eta, beharrezkoa baldin bada, bidezko dokumentazioarekin batera, Zerbitzuak Ikuskatzeko eta Ikuskapen Teknikorako Zerbitzuari igorriko dio, behar den ebazpena eman dezan.
8.4. Matrikulari uko egiten bazaio, ikaslearen ikasketa espedientean jasoko da eginbide baten bidez. Hortaz, ikasturte hori ez da kontatuko kurtsoa errepikatzearen ondorioetarako.
8.5. Ikasketa hauetako kurtso bakoitzean, behin baizik ezin izanen zaio uko egin matrikulari.
9. artikulua. Matrikula lekuz aldatzea.
Ikasturtea bukatu gabe beste ikastetxe batera lekuz aldatzen den ikasleak jatorrizko ikastetxeak emandako ikasketa agiria ekarri beharko du. Helburuko ikastetxeak eskatuta, jatorrizko ikastetxeak ikaslearen ikasketa espedientea igorri beharko dio. Matrikulazioa behin betikoz egin dela ondorioztatuko da helburuko eskolak ikasketa espedientea eta lekualdaketaren jakinarazpena jasotakoan.
10. artikulua. Ikasle libreen matrikula.
Ikasle libreek oinarrizko edo erdiko mailaren ziurtagiria lortzeko inskripzioa zentralizatua izanen da, Hezkuntza Departamentuak ezartzen dituen baldintzetan eta egunetan.
11. artikulua. Mailakatze probak.
11.1. Kasuan kasuko maila edo kurtsorako eskatzen diren betekizun akademikoak bete beharra galarazi gabe, aurretik hizkuntzaren ezagupenak dituzten ikasleek zilegi izanen dute oinarrizko zikloko bigarren kurtsoan edo erdiko mailan sartzea araubide ofizialean, baldin eta dagokion mailakatze proba gainditzen badute.
11.2. Mailakatze proben emaitzak ez du ondorio akademikorik eta ikasturte horrexetarako bakarrik balioko du. Ikaslea sailkatzen deneko kurtsoa gainditzen ez badu, behin baizik ezin izanen du errepikatu kurtsoa.
11.3. Proba hauek eginen dira ikastetxearen ohiko irakaskuntza jarduera galarazi gabe.
12. artikulua. Ebaluazioa.
12.1. Ebaluazioari esker ikasleak zenbat aurreratzen duen neur daiteke eta, orobat, proposaturiko helburuak lortzeko eta zuzentzeko neurriak hartu. Horregatik, garrantzitsua denez, departamentu didaktikoetako irakasleek hasierako ebaluazioa eginen dute kurtsoaren hasieran, irakaskuntza eta ikasketa prozesua ikaslearen ezaugarriei eta mailari egokitzeko. Gainera, hiru hilean behin, etengabeko ebaluazioa eta diagnostikoa eginen dira, ikaslearen ikasketa prozesuari buruzko informazioa jasotzeko aukera emanen duena, behaketa sistematikoaren bidez eta lanak eta berariazko probak baloratuz.
Hasierako ebaluazioa egindakoan, irakasleek ahalmena izanen dute goragoko kurtso bat egiteko ezaupide eta gaitasun aski dituzten ikasleak hurrengo kurtsoetara igotzeko proposamena egiteko, ikaspostu hutsik baldin badago, baina horrek ez du ondorio akademikorik izanen.
12.2. Horren ondorioetarako, martxoaren 19ko 22/2007 Foru Dekretuan ezarritako curriculuma kurtso bakoitzerako gauzatzeko tresna kasuko programazio didaktikoa izanen da. Programazio didaktikoetan, gutxienez, oinarrizko mailako kurtso bakoitzeko edukiak, helburuak eta ebaluazio irizpideak ezarri beharko dira hizkuntzaren lau gaitasunetarako.
13. artikulua. Kalifikazioa.
Ikasleei lau gaitasunetan ematen zaien kalifikazioa ebaluazio prozesuaren emaitza gauzatzeko bidea izanen da. Kalifikazio hori foru agindu honen 15. artikuluan aipatu diren agiri ofizialetan jasoko da, "gai" edo "ez gai" adieraziz, beste ezer erantsi gabe.
Guztira "gai" kalifikazioa lortzeko, lau gaitasunetan "gai" kalifikazioa lortu beharko da.
14. artikulua. Mailaz igotzea eta kurtsoa errepikatzea.
14.1. Oinarrizko mailako lehenengo kurtsotik bigarrenera igotzeko, programazio didaktikoetan hizkuntza gaitasun bakoitzerako ezarritako helburu guztiak gainditu behar dira. Gainditzeak esan nahi du, guztira, "gai" kalifikazioa lortu dela.
14.2. Bertaratu beharreko modalitatean, ikasleak behin baizik ezin izanen du errepikatu oinarrizko mailako edo erdiko kurtso bat. Errepikatuta ere gainditzen ez badu, ikasle ofizialaren izaera galduko du hurrengo bi urterako. Epe hori bukatuta, ikaslea hizkuntza eskola ofizial horretako ikasle ofiziala izaten ahalko da berriro ere, hizkuntza bera ikasteko, aurreinskripzioa gainerako izangaien baldintza berberetan egin ondoren.
15. artikulua. Ebaluazio agiriak.
15.1. Oinarrizko eta erdiko mailetako irakaskuntzako ikasleak ebaluatzeko agiri ofizialak ikasketa espedientea eta kalifikazio aktak dira.
15.2. Ikasketa espedientea ikasleak ikastetxe batetik bestera lekualdatzea bermatzen duen oinarrizko agiria da eta honako datu hauek bildu beharko ditu:
-Ikastetxearen identifikazio datuak.
-Ikaslearen datu pertsonalak.
-Matrikularen gaineko datuak: ikasketen modalitatea, hizkuntza, maila eta kurtsoa, ikasturtea, kurtso edo mailaren batean zuzenean sartu ote den, matrikulari egindako ukoak, ezarritako deialdi kopurua gainditu ote duen, ikastetxe aldaketak, modalitate aldaketak.
-Dagokion mailaren ziurtagiria emateko proposamena, bidezkoa bada.
15.3. Ikasketa espedientean maila eta kurtsoen egitura agertuko da, hala nola kurtso bakoitzeko gutxieneko eskola ordu kopurua, martxoaren 19ko 22/2007 Foru Dekretuan eta foru agindu honetan ezarritakoari jarraikiz.
15.4. Ikasleak matrikula egin ondoren, ikastetxeko idazkaritzak ikasketa espedientea irekiko du.
Ikasketa espedienteak eta kalifikazio aktak gorde eta atxibatzea ikastetxeko idazkaritzari dagokio. Hezkuntza Departamentuak behar diren neurriak ezarriko ditu agiri horiek zaindu edo lekualdatzeko, ikastetxea desagertuz gero.
15.5. Ikasleek zilegi dute beren ikasketa espedientean agertzen diren datuei buruzko ziurtagiriak eskatzea. Ziurtagiriok ikastetxeko idazkariak sinatu eta zuzendariak ikus-onespena emanen die.
15.6. Kalifikazio aktak maila bakoitzeko kurtso bakoitza bukatutakoan beteko dira. Akta horietan taldeko ikasle guztien izenen zerrenda eta bakoitzak lortutako emaitza agertuko dira, foru agindu honen 13. artikuluan ezarritakoari jarraikiz. Talde bakoitzeko aktak hango irakasle arduradunak sinatuko ditu eta kasuan kasuko departamentuko buruaren ikus-onespena beharko dute.
15.7. Departamentu didaktikoetako irakasleek, ikasleen ikaskuntza eta irakaskuntza prozesuez gain, beren irakaslana ere ebaluatuko dute.
16. artikulua. Erdiko maila ziurtatzeko probari buruzko ohar orokorrak.
16.1. Erdiko maila lortzeko azkeneko proba arau hauei jarraikiz eginen da:
a) Proba horren bidez, ikasleek erdiko maila bukatutakoan hizkuntza gaitasun guztietan duten komunikazio ahalmena neurtuko da.
b) Proban hizkuntza gaitasun hauek neurtuko dira: entzunaren ulermena, irakurriaren ulermena, ahozko adierazpena eta idatzizko adierazpena.
c) Gaitasun bakoitza bereiz aztertuko da.
d) Proba arauetan hizkuntza bakoitzerako adierazten diren ebaluazio irizpideen arabera prestatuko da.
e) Probetan benetako materiala erabiliko da, hedabideetatik eta/edo hizkuntzaren ohiko eta eguneroko erabilerari loturiko iturrietatik aterea. Nolanahi ere, materiala moldatzen ahalko da, erdiko mailara egokitzeko beharrezkotzat jotzen bada.
f) Materialaren egilea eta zein hedabidetan argitaratu zen aipatu beharko da.
16.2. Departamentu didaktikoek ziurtatze probak egin, ebaluatu eta kalifikatzeko prozedurari buruzko ohar garrantzitsuak emanen dituzte, ikastetxeko iragarki oholen eta bertako baliabide elektronikoen bidez.
16.3. Hizkuntza eskola ofizialek proba eredu bat argitaratuko dute, hurrengo urteetarako erreferentzia izan dadin. Eredu hori gutxienez hiru urtean behin berrituko da.
16.4. Artikulu honetako 16.1 puntuan adierazitako ohar orokorrez gain, Hezkuntza Departamentuak beste ohar batzuk ematen ahalko ditu probak egiteko modua hobeki azaltzeko.
17. artikulua. Oinarrizko mailaren ziurtapena.
17.1. Oinarrizko mailaren ziurtapena lortzeko, ikasleak ebaluazio jarraia gainditu beharko du. Horretarako, hizkuntza gaitasun guztietan erdiko maila bukatzen denerako ezarri diren helburuak bete dituela bermatzeko probak gainditu beharko ditu. Helburu horiek martxoaren 19ko 22/2007 Foru Dekretuan ezarritako curriculumean adierazita daude.
17.2. Proba horiek kasuan kasuko hizkuntzaren departamentu didaktikoek prestatuko dituzte, foru agindu honen 16.1 artikuluan ezarritako arau orokorrei eta aurrerago ezartzen diren beste arau batzuei jarraikiz.
17.3. Oinarrizko mailako bigarren ikasturteko ebaluazio jarraiaren azken kalifikazioan emaitza positiboa lortzen bada (16.1 artikuluan aipatutako lau gaitasunetan emaitza positiboak lortu beharko dira), oinarrizko mailako ziurtagiria eskuratzen ahalko da. Kasuan kasuko irakasleak proposatuko du eta ikaslea zein hizkuntza eskola ofizialetan matrikulatuta dagoen, eskola horrek bidaliko du.
18. artikulua. Erdiko mailaren ziurtapena.
18.1. Erdiko mailaren ziurtapena lortzeko, ikasleak maila horretarako ezarri diren helburuak bete dituela bermatzeko proba berariazko bat gainditu beharko du. Helburu horiek martxoaren 19ko 22/2007 Foru Dekretuan ezarritako curriculumean adierazita daude. Hori horrela, ikasle ofizialen hirugarren ebaluazioa berariazko proba hura prestatzeko froga gisa erabiliko da bakar-bakarrik.
18.2. Proba hori denontzat berdina izanen da eta hizkuntza eskola ofizialen urteko deialdi batean gutxienez aplikatuko da. Hortaz, hizkuntza bakoitzeko probak aldi berean banatuko dira deialdi bakarrean, ahozko adierazpenaren proba izan ezik, horretarako egutegi bat prestatuko baita.
18.3. Hizkuntz gaitasun guztietan "gai" kalifikazio lortuz gero, ikasleak Erdi mailako ziurtagiria eskuratzeko eskubidea bereganatuko du. Ziurtagiria Hezkuntza Departamentuak luzatuko du. Erdiko mailako ziurtagiria lorzen ez duten ikasleek matrikula egin duten hizkuntza eskola ofizialari eskatzen ahalko diote ebaluaturiko hizkuntz gaitasun batzuetan eskatzen den maila lortu izanaren ziurtagiria, probak egin eta hilabeteko epean.
18.4. Hezkuntza Departamentuak hizkuntza bakoitzeko erdiko mailako ziurtagiria lortzeko probak egiteko batzordeen eraketa koordinatzen ahalko du, foru agindu honetan ezarritako arau orokorrekin eta Hezkuntza Departamentuak horretarako ematen dituen gainerako jarraibideekin bat.
18.5. Hezkuntza Departamentuak behar diren prozedurak finkatuko ditu, probak egin eta kalifikatu ondoren, emaitzen ebaluazioa egiteko, hurrengo urteetan probaren antolaketan egokiak diren zuzenketa eta egokitzapenak egin ahal izateko, probaren plangintzari, prestaketari, egiturari eta banatzeari dagokienez, baita programazio didaktikoei eta alderdi metodologikoei begira ere.
19. artikulua.
Lehen Xedapen Gehigarria
Aukera-berdintasunaren, bazterkeriarik ezaren eta desabantaila egoeran izateagatiko konpentsazioaren printzipioak aintzat harturik, ezgaitasunen bat izateagatik probak ohiko moduan egiterik ez duten ikasleek denbora eta baliabideen aldetik behar dituzten egokitzapenak eskatzen ahalko dituzte. Egoera hori frogatzeko, minusbaliotasun agiria aurkeztu beharko dute, Nafarroako organo eskudun batek prestatua.
Minusbaliotasun maila % 25ekoa edo handiagoa baldin bada, Hezkuntza Departamentuak bere menpe dituen zerbitzu pedagogikoei aholku eskatuko die, ikaslearen ezgaitasun motaren eta mailaren arabera nolako egokitzapenak egin behar diren jakiteko.
Bigarrrena.-Beste nazionalitate batzuetako ikasleek ikastetxean irakasten diren atzerriko hizkuntzak ikasten ahalko dituzte, baita ikasle libre gisa azterketa egin ere, betiere haien ama-hizkuntza eskatu dutenaz beste bat baldin bada.
Hirugarren Xedapen Gehigarria
Hizkuntza eskola ofizialek ikastaro monografikoak egiteko baimenari eta baldintzei dagokienez, berariazko araudian ezarritakoari segituko zaio.
Azken Xedapenetako Lehena
Eskola eta Lanbide Irakaskuntzaren zuzendari nagusiari baimena ematen zaio foru agindu hau garatzeko eta betearazteko behar diren xedapen guztiak eman ditzan.
Azken Xedapenetako Bigarrena
Foru agindu honek 2007ko irailaren 1ean hartuko du indarra.
Azken Xedapenetako Hirugarrena
Foru agindu hau Nafarroako Aldizkari Ofizialean argitaratzea.
Azken Xedapenetako Laugarrena
Foru agindu hau igortzea Eskola Antolamendu eta Berriztapenerako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Euskara Zerbitzura, Giza Baliabideen Zerbitzura, Ikasketak Antolatzeko Atalera, Araubide Bereziko Irakaskuntzaren Atalera, Informazioa Kudeatzeko Bulegora eta Nafarroako hizkuntza eskola ofizialetara, behar diren ondorioak izan ditzan.
