navarra.es
Castellano | Euskara | Français | English
Ezagutzera eman
149/2008 Foru Agindua, irailaren 11koa, Hezkuntza Kontseilariak emana, araubide bereziko hizkuntza ikasketen maila aurreratuaren antolaketa ezartzen duena
(2008ko 127. NAOn argitaratutako testua, urriaren 17an)
Atarikoa
Hezkuntzari buruzko maiatzaren 3ko 2/2006 Lege Organikoak ezarritako araubide bereziko hizkuntza ikasketak, zeinen helburua baita ikasleak gaitzea hezkuntza sistemako etapa arruntetatik kanpora hizkuntzak egoki erabiltzeko, hiru mailatan antolaturik daude: oinarrizkoa, erdikoa eta aurreratua.
Ekainaren 2ko 58/2008 Foru Dekretuak, Hezkuntzari buruzko maiatzaren 3ko 2/2006 Lege Organikoaren araubide bereziko hizkuntza ikasketen maila aurreratuaren curriculuma ezartzen duenak, abenduaren 29ko 1629/2006 Errege Dekretuan xedatutako gutxieneko alderdietatik abiatuta (07/1/04ko Estatuko Aldizkari Ofiziala), Nafarroako Foru Komunitatean alemana, euskara, frantsesa, ingelesa eta italiera hizkuntzen maila aurreratuaren curriculuma ezartzen du.
Ekainaren 2ko 58/2008 Foru Dekretuko 7. artikuluak, ezarpen egutegiari buruzkoak, 2008-09 ikasturtean maila aurreratuaren lehen eta bigarren kurtsoak ezarriko direla dio, eta horiek lekua hartuko dietela ikasketa espezializatuen lehen maila antolatzen duen irailaren 2ko 967/1988 Errege Dekretuak arautzen zituen hizkuntza ikasketen laugarren eta bosgarren kurtsoei, hurrenez hurren.
Hortaz, bidezkoa da ekainaren 2ko 58/2008 Foru Dekretuaren bidez araututako araubide bereziko hizkuntza ikasten maila aurreratuaren antolaketa ezartzea Nafarroako Foru Komunitatean.
Nafarroako Gobernuari eta lehendakariari buruzko abenduaren 3ko 14/2004 Foru Legearen ) artikuluak ematen dizkidan ahalmenak erabiliz, agindu dut:
1. artikulua. Xedea eta aplikazio eremua.
Foru Agindu honek Hezkuntzari buruzko maiatzaren 3ko 2/2006 Lege Organikoaren araubide bereziko hizkuntza ikasketen maila aurreratuaren curriculuma ezartzen duen ekainaren 2ko 58/2008 Foru Dekretuaren araubide bereziko hizkuntza ikasketen maila aurreratuaren antolaketa ezartzen du, eta Nafarroako Foru Komunitateko hizkuntza eskola ofizialetan aplikatuko da.
2. artikulua. Iraupena.
Araubide bereziko hizkuntza ikasketen maila aurreratua bi kurtsotan egituratzen da eta bakoitzak, gutxienez, 130 eskola ordu izanen ditu.
3. artikulua. Ordutegiak.
1. Nafarroako Hizkuntza Eskola Ofizialetan bertaratu beharreko modalitatean eskaintzen diren ohiko ordutegiak hauek dira:
-Ordu bat egunero, astean lau egunetan, eta ordu bat gehiago hamabostean behin.
-1,5 ordu egunero, astean hirutan.
-2 ordu egunero, astean bitan, eta bi ordu gehiago hilabetean.
2. Ikaslearen asistentzia eta ikasketa prozesua erraztu nahian, modalitate erdipresentziala baimentzen ahalko da, hurrengo aukerekin bat:
-Ordu bat, astean bi egunetan, eta horren osagarri, 2,5 ordu ez-presentzial astean.
-2 ordu, astean behin, eta horren osagarri, 2,5 ordu ez-presentzial astean.
Horretarako, hizkuntza eskola ofizialek eskaera behar bezala justifikatua bidali beharko diote Eskolako Hizkuntza Plangintzaren Zerbitzuari eta horrek, bere aldetik, baimena emateko behar duen informazioa eskatuko dio Hezkuntzako Ikuskapen Zerbitzuari.
Modalitate semipresentzialean irakasteko baimena urtero berriztatu beharko da, eskolak berak eskatuta.
4. artikulua. Ratioak.
Oro har, talde bakoitzean 25 ikasle egonen dira, hizkuntza, kurtso eta modalitate guztietan berdin.
5. artikulua. Ikasleak onartzeko prozedura.
1. Ikasleak eskolan sartzeko prozedura eta eskaerak ebazteko arauak hizkuntza eskola ofizialetako eskola kontseiluek finkatuko dituzte. Arau horietan jaso beharko da, eskaera eskaintzen diren plazak baino handiagoa bada, lanpostuak zozketa bidez esleituko direla.
2. Hizkuntza eskola ofizialek ikasturte bakoitzeko eskaintza akademikoaren berri emanen dute, baita onarpen prozeduraren berri ere.
3. Hizkuntza eta zentro bakoitzeko, eskabide bat bete beharko da. Eskaera hori norberarena eta utziezina izanen da.
4. Maila aurreratuaren lehen eta bigarren kurtsoan zuzenean sartzeko adinako hizkuntza maila dutela uste duten pertsonek 11. artikuluan azaltzen den mailakatze proba egitea eskatu beharko dute. Mailakatze proben emaitzaren berri jakin ondoren, sailkatu diren mailan hasteko eskaera egiten ahalko dute.
6. artikulua. Ikasleen matrikulazioa.
Hizkuntza eskola ofizialek matrikulazio tokia erreserbatuko diete araubide ofizialean segitzeko eskubidea duten ikasle ofizialei. Era berean, ikasle berriendako matrikulazio epe bat finkatuko dute.
Ikaspostu hutsik baldin badago, beste matrikulazio epe bat irekiko dute.
7. artikulua. Bi matrikula aldi berean.
1. Ikasle bera ezin da matrikulatu hizkuntza berean modalitate eta eskola batean baino gehiagotan.
2. Bi espediente baldin badaude, hizkuntza eskola ofizialek, ofizioz, zehazten duten eskolan eta modalitatean egindako matrikula deuseztatuko dute.
8. artikulua. Matrikulari uko egitea.
1. Ikasle guztiek eskatzen ahalko dute matrikula deuseztatzea. Horretarako, bere ikasketa espedientea zein hizkuntza eskola ofizialetan dagoen, hango zuzendaritzari eskatu beharko diote apirilaren 30a baino lehen, betiere, agiri bidez egiaztatzen badute eritasun fisiko edo psikikoren bat izan dutela edo lanean hasi direla eta, horregatik, ezin izan direla klasera joan matrikulatuta zeuden orduetan.
2. Eskaerak eskolako zuzendariak ebatziko ditu. Aurreko puntuan adierazitako arrazoiak egiaztatuz gero, deuseztatzeko baimena emanen du.
3. Hemen aurreikusi ez den egoera bereziren bat gertatuz gero, matrikulari uko egiteko eskaerak lehen aipatutako epe berean aurkeztu beharko zaizkio eskolako zuzendariari. Horrek txostena eginen du eta ikaslearen eskaerarekin eta, beharrezkoa baldin bada, bidezko dokumentazioarekin batera, Hezkuntzako Ikuskapen Zerbitzuari igorriko dio, behar den ebazpena eman dezan.
4. Matrikulari uko egiten bazaio, ikaslearen ikasketa espedientean jasoko da eginbide baten bidez. Hortaz, ikasturte hori ez da kontatuko kurtsoa errepikatzearen ondorioetarako.
5. Ikasketa hauetako kurtso bakoitzean, behin baizik ezin izanen zaio uko egin matrikulari.
9. artikulua. Matrikula lekuz aldatzea.
Ikasturtea bukatu gabe beste ikastetxe batera lekuz aldatzen den ikasleak jatorrizko ikastetxeak emandako ikasketa agiria ekarri beharko du. Helburuko ikastetxeak eskatuta, jatorrizko ikastetxeak ikaslearen ikasketa espedientea igorri beharko dio. Matrikulazioa behin betikoz egin dela ondorioztatuko da helburuko eskolak ikasketa espedientea eta lekualdaketaren jakinarazpena jasotakoan.
10. artikulua. Ikasle libreen matrikula.
Ikasle libreek maila aurreratuaren ziurtagiria lortzeko inskripzioa Hezkuntza Departamentuak ezartzen dituen baldintzetan eta egunetan eginen da.
11. artikulua. Mailakatze probak.
1. Kasuan kasuko kurtsorako eskatzen diren betekizun akademikoak bete beharra galarazi gabe, aurretik hizkuntzaren ezagupenak dituzten ikasleek zilegi izanen dute maila aurreratuko lehen edo bigarren kurtsoan sartzea araubide presentzialean, betiere ikaspostu betegabeak gelditzen badira eta mailakatze proba gainditzen badute.
2. Mailakatze proben emaitzak ez du ondorio akademikorik eta ikasturte horrexetarako bakarrik balioko du. Ikasleak sailkatzen deneko kurtsoa gainditzen ez badu, behin baizik ezin izanen du errepikatu kurtsoa.
3. Proba hauek eginen dira ikastetxearen ohiko irakaskuntza jarduera galarazi gabe.
12. artikulua. Ebaluazioa.
1. Ebaluazioari esker ikasleak zenbat aurreratzen duen neur daiteke eta, orobat, proposaturiko helburuak lortzeko eta zuzentzeko neurriak hartu. Horregatik, garrantzitsua denez, departamentu didaktikoetako irakasleek hasierako ebaluazioa eginen dute kurtsoaren hasieran, irakaskuntza eta ikasketa prozesua ikasleen ezaugarriei eta mailari egokitzeko. Gainera, hiru hilean behin, etengabeko ebaluazioa eta diagnostikoa eginen dira, ikasleen ikasketa prozesuari buruzko informazioa jasotzeko aukera emanen duena, behaketa sistematikoaren bidez eta lanak eta berariazko probak baloratuz.
Hasierako ebaluazioa egindakoan, irakasleek ahalmena izanen dute ezagupen eta gaitasun aski duten ikasleak maila aurreratuaren bigarren kurtsora igotzeko proposamena egiteko, ikaspostu hutsik baldin badago, baina horrek ez du ondorio akademikorik izanen.
2. Horretarako, programazio didaktikoetan ekainaren 2ko 58/2008 Foru Dekretuan ezarritako curriculumaren mailaren kurtso bakoitzerako edukiak, helburuak eta ebaluazio irizpideak ezarri beharko dira hizkuntzaren lau gaitasunetarako.
13. artikulua. Kalifikazioa.
Ikasleei lau gaitasunetan ematen zaien kalifikazioa ebaluazio prozesuaren emaitza gauzatzeko bidea izanen da. Kalifikazio hori foru agindu honen 15. artikuluan aipatu diren agiri ofizialetan jasoko da, "gai" edo "ez gai" adieraziz, beste ezer erantsi gabe.
14. artikulua. Mailaz igotzea eta kurtsoa errepikatzea.
1. Maila aurreratuko lehenengo kurtsotik bigarrenera igotzeko, programazio didaktikoetan hizkuntza gaitasun bakoitzerako ezarritako helburu guztiak gainditu behar dira. Gainditzeak esan nahi du, guztira, "gai" kalifikazioa lortu dela.
2. Bertaratu beharreko modalitatean, ikasleak behin bakarrik errepikatu ahalko du maila aurreratuko kurtso bat. Errepikatuta ere gainditzen ez badu, ikasle ofizialaren izaera galduko du hurrengo bi urterako. Epe hori bukatuta, ikaslea hizkuntza eskola ofizial horretako ikasle ofiziala izaten ahalko da berriro ere, hizkuntza bera ikasteko, aurreinskripzioa gainerako izangaien baldintza berberetan egin ondoren.
Dena dela, eskaerarik gabeko ikaspostu hutsak egonez gero zuzendaritza taldeak salbuespenak egin ahalko ditu.
15. artikulua. Ebaluazio agiriak.
1. Maila aurreratuaren irakaskuntzako ikasleak ebaluatzeko agiri ofizialak ikasketa espedientea eta kalifikazio aktak dira.
2. Ikasketa espedientea ikasleak ikastetxe batetik bestera lekualdatzea bermatzen duen oinarrizko agiria da eta honako datu hauek bildu beharko ditu:
-Ikastetxearen identifikazio datuak.
-Ikaslearen datu pertsonalak.
-Matrikularen gaineko datuak: ikasketen modalitatea, hizkuntza, maila eta kurtsoa, ikasturtea, kurtso edo mailaren batean zuzenean sartu ote den, matrikulari egindako ukoak, ezarritako deialdi kopurua gainditu ote duen, ikastetxe aldaketak, modalitate aldaketak.
-Mailaren ziurtagiria emateko proposamena, bidezkoa bada.
3. Ikasketa espedientean maila eta kurtsoen egitura agertuko da, hala nola kurtso bakoitzeko gutxieneko eskola ordu kopurua, ekainaren 2ko 58/2008 Foru Dekretuan eta foru agindu honetan ezarritakoari jarraikiz.
4. Ikasleak matrikula egin ondoren, ikastetxeko idazkaritzak ikasketa espedientea irekiko du.
Ikasketa espedienteak eta kalifikazio aktak gorde eta artxibatzea ikastetxeko idazkaritzari dagokio. Hezkuntza Departamentuak behar diren neurriak ezarriko ditu agiri horiek zaindu edo lekualdatzeko, ikastetxea desagertuz gero.
5. Ikasleek zilegi dute beren ikasketa espedientean agertzen diren datuei buruzko ziurtagiriak eskatzea. Ziurtagiriok ikastetxeko idazkariak sinatu eta zuzendariak ikus-onespena emanen die.
6. Kalifikazio aktak maila bakoitzeko kurtso bakoitza bukatutakoan beteko dira. Akta horietan taldeko ikasle guztien izenen zerrenda eta bakoitzak lortutako emaitza agertuko dira, foru agindu honen 13. artikuluan ezarritakoari jarraikiz. Talde bakoitzeko aktak hango irakasle arduradunak sinatuko ditu eta kasuan kasuko departamentuko buruaren ikus-onespena beharko dute.
7. Departamentu didaktikoetako irakasleek, ikasleen ikaskuntzaz eta irakaskuntza prozesuez gain, beren irakaslana ere ebaluatuko dute.
16. artikulua. Maila aurreratua ziurtatzeko probei buruzko ohar orokorrak.
1. Maila aurreratua lortzeko azkeneko proba arau hauei jarraikiz eginen da:
a) Proban hizkuntza gaitasun hauek neurtuko dira: entzunaren ulermena, irakurriaren ulermena, ahozko adierazpena eta idatzizko adierazpena.
b) Proba horren bidez, ikasleek maila hori bukatutakoan hizkuntza gaitasun guztietan duten komunikazio ahalmena neurtuko da.
c) Gaitasun bakoitza bereiz aztertuko da.
d) Proba hizkuntza bakoitzerako ofizialki adierazten diren ebaluazio irizpideen arabera prestatuko da.
e) Probetan benetako materiala erabiliko da, hedabideetatik eta hizkuntzaren erabilerari loturiko iturrietatik aterea. Dena den, materiala egokitu ahalko da, betiere azterketaren idazketa eta ezaugarriek hala eskatzen badute.
f) Materialaren egilea eta zein hedabidetan argitaratu zen aipatu beharko da.
g) Ahozko adierazpenaren proba grabatu eginen da.
2. Departamentu didaktikoek ziurtatze probak egin, ebaluatu eta kalifikatzeko prozedurari buruzko ohar garrantzitsuak emanen dituzte, ikastetxeko iragarki oholen eta bertako baliabide elektronikoen bidez.
3. Hizkuntza eskola ofizialek dagoeneko erabilia izan den proba eredu bat argitaratuko dute, hurrengo urteetarako erreferentzia izan dadin. Eredu hori gutxienez hiru urtean behin berrituko da.
4. Artikulu honetako 16.1 atalean adierazitako ohar orokorrez gain, Hezkuntza Departamentuak beste ohar batzuk ematen ahalko ditu proben idazketa eta aplikazioa errazteko xedearekin.
17. artikulua. Maila aurreratuaren ziurtapena.
1. Maila aurreratuaren ziurtapena lortzeko, ikasleak maila horretarako ezarri diren helburuak bete dituela bermatzeko proba berariazko bat gainditu beharko du. Helburu horiek ekainaren 2ko 58/2008 Foru Dekretuan ezarritako curriculumean adierazita daude. Hori horrela, maila aurreratuaren bigarren kurtsoko ikasle ofizialen hirugarren ebaluazioa berariazko proba hura prestatzeko froga gisa erabiliko da bakar-bakarrik.
2. Ziurtatze proba hori denontzat berdina izanen da eta hizkuntza eskola ofizialen urteko deialdi batean gutxienez aplikatuko da. Hortaz, hizkuntza bakoitzeko proba aldi berean aplikatuko da deialdi bakarrean, ahozko adierazpenaren proba izan ezik, horretarako egutegi bat prestatuko baita.
3. Hizkuntz gaitasun guztietan "gai" kalifikazio lortuz gero, ikasleak Maila aurreratuaren ziurtagiria eskuratzeko eskubidea bereganatuko du. Ziurtagiria Hezkuntza Departamentuak luzatuko du. Maila aurreratuaren ziurtagiria lortzen ez duten ikasleek matrikula egin duten hizkuntza eskola ofizialari eskatzen ahalko diote ebaluaturiko hizkuntz gaitasun batzuetan eskatzen den maila lortu izanaren ziurtagiria, probak egin eta 30 eguneko epean.
4. Hezkuntza Departamentuak hizkuntza bakoitzeko maila aurreratuaren ziurtagiria lortzeko hizkuntza eskola ofizialetako irakasleek prestatutako probak berrikusteko batzordeak eratu eta koordinatu ahalko ditu, foru agindu honetan ezarritako arau orokorrekin eta Hezkuntza Departamentuak horretarako ematen dituen gainerako jarraibideekin bat.
5. Hezkuntza Departamentuak behar diren prozedurak finkatuko ditu, probak egin eta kalifikatu ondoren, emaitzen ebaluazioa egiteko, hurrengo urteetan probaren antolaketa eta prestakuntzan egokiak diren zuzenketa eta hobekuntzak egin ahal izateko
18. artikulua. Informazioa jasotzeko bidea eta erreklamazioak.
1. Ebaluazio prozesua ahalik eta gardenena izan dadin, ikasleak kurtsoaren helburuak, edukiak, ebaluatu eta kalifikatzeko irizpideak, eskatzen zaizkion gutxienekoak etab. ezagutzeko eskubidea izanen du.
2. "Ez gai" kalifikazioa lortzen duten ikasleek eskubidea dute zuzendutako probak ikusteko.
3. Azkeneko proban hizkuntz gaitasunen batean edo denetan lorturiko kalifikazioarekin ados ez badago, ikasleak behar diren argibideak eska ditzake eta, beharrezkoa izanez gero, idatzizko erreklamazioa ere jartzen ahalko du. Horretarako, bi egun balioduneko epea izanen du emaitzak argitaratzen direnetik hasita.
4. Erreklamazioak tramitatzen hasiko dira, baldintza hauek betez gero:
-Probaren baten abiapuntua bat ez badator programa ofizialaren edukiekin edo departamentu didaktikoak eduki horiek garatzeko prestatutako programazioarekin.
-Departamentu didaktikoak probak ebaluatu eta kalifikatzeko adostutako irizpideak edo ebazpen honetan ezarritakoa gaizki aplikatzea.
-Beste arrazoi batzuengatik, ebaluazioaren gainean indarra duten arauak desegoki aplikatu direlako ustea baldin badago.
5. Idatzizko erreklamazioen kasuan, departamentuek idatzizko txosten bat prestatuko dute, ondoko hauek azaltzeko:
-Gertatutakoaren azalpena eta aurretik egindako jarduketak.
-Erreklamazioaren oinarri diren argudioen azterketa.
-Jarritako kalifikazioa aldatzen edo berresten den.
6. Txostenak ikasketaburuari igorriko zaizkio eta horrek kopia bat bidaliko die ikasleei edo, hala behar denean, haien gurasoei edo legezko ordezkariei. Ahozko adierazpenaren probaren kasuan grabazioa entzuteko aukera eskainiko da.
7. Berraztertzeko prozesua agortuta, ikasleek zilegi izanen dute, dela nork bere kasa, dela legezko ordezkarien bitartez, ikastetxeko zuzendaritzari eskatzea erreklamazioa Hezkuntzako Ikuskapen Zerbitzura igor dezala, azken jakinarazpena egin eta bi eguneko epean. Ikastetxeko zuzendaritzak, gehienez ere hiru eguneko epean, erreklamazioaren espedientea Hezkuntzako Ikuskapen Zerbitzura bidaliko du. Espedientea jasotzen duenetik hamabost egun balioduneko epean, Ikuskapenaren eta Zerbitzuen zuzendari nagusiak ebazpena emanen du, Hezkuntzako Ikuskapen Zerbitzuaren txostenak kontuan izanik. Ebazpen horrek bukaera emanen dio administrazio bideari.
8. Aurkeztutako erreklamazioaren aldeko ebazpena ematen baldin bada arestian aipatutako instantzietakoren batean, dagokion zuzenketa agerraraziko da ebaluazio agirietan, ikastetxeko idazkariak sinatutako eta zuzendariak ikus-onetsitako eginbidearen bitartez.
Lehenengo Xedapen Gehigarria
Hizkuntza eskola ofizialek modu arautuan eskaintzen dituzten hizkuntza gaitasunen hobekuntzarako gaurkotze eta espezializazio ikastaroak antolatu ahalko dituzte, bereziki Europako Kontseiluko B eta C mailetan, maila hauek Europako Erreferentzia Marko Bateratuan zehazten diren moduan.
Hizkuntza eskola ofizialek proposatuko dituzte gaurkotze eta espezializazio ikastaroak, eta Hezkuntza Departamenduak baimenduko ditu urtero, ezartzen den hizkuntza eskaintzaren plangintzarekin bat. Orokorrean ikastaro hauek 65 ordukoak izanen dira, eta maila jakin baten edo hizkuntzaren erabilera eremuen, (pertsonala, publikoa, profesionala edo hezkuntzakoa) alderdi linguistikoak garatzea izanen dute helburu.
Bigarren Xedapen Gehigarria
Aukera-berdintasunaren, bazterkeriarik ezaren eta desabantaila egoeran izateagatiko konpentsazioaren printzipioak aintzat harturik, ezgaitasunen bat izateagatik probak ohiko moduan egiterik ez duten ikasleek denbora eta baliabideen aldetik behar dituzten egokitzapenak eskatzen ahalko dituzte. Egoera hori frogatzeko, elbarritasun agiria aurkeztu beharko dute, Nafarroako organo eskudun batek prestatua.
Elbarritasun maila %25ekoa edo handiagoa baldin bada, Hezkuntza Departamentuak bere menpe dituen zerbitzu pedagogikoei aholku eskatuko die, ikaslearen ezgaitasun motaren eta mailaren arabera nolako egokitzapenak egin behar diren jakiteko.
Azken Xedapenetan Lehena
Ahalmena ematen zaio Antolamenduaren, Kalitatearen eta Berrikuntzaren zuzendari nagusiari foru agindu honetan ezarritakoa garatu eta betetzeko beharrezkoak diren jarduketa guztiak egiteko.
Azken Xedapenetan Bigarrena
Foru agindu honek Nafarroako Aldizkari Ofizialean argitaratu eta biharamunean hartuko du indarra.
