navarra.es
Castellano | Euskara | Français | English
Ezagutzera eman
422/1995 Foru Agindua, uztailaren 3koa, Hezkuntza eta Kultura kontseilariak emana, erdiko mailari dagozkion eta urriaren 3ko 1/1990 Lege Organikoaren bidez finkatu ziren musika irakaskuntzen ezarpena arautu eta erdiko mailako musika irakaskuntza ...
422/1995 FORU AGINDUA, uztailaren 3koa, Hezkuntza eta Kultura kontseilariak emana, erdiko mailari dagozkion eta urriaren 3ko 1/1990 Lege Organikoaren bidez finkatu ziren musika irakaskuntzen ezarpena arautu eta erdiko mailako musika irakaskuntza horien curriculuma Nafarroako Foru Komunitatean garatzeko jarraibideak ematen dituena
(1995eko 103. NAOn argitaratutako testua, abuztuaren 18an)
Atarikoa
Hezkuntza eta Kultura kontseilariak uztailaren 3an emandako 422/1995 Foru Aginduaren bidez, erdiko mailari dagozkion eta urriaren 3ko 1/1990 Lege Organikoaren bidez finkatu ziren musika irakaskuntzen ezarpena arautu eta erdiko mailako musika irakaskuntza horien curriculuma Nafarroako Foru Komunitatean garatzeko jarraibideak eman egin dira.
Ikasketak Antolatu eta Hezkuntza Berriztatzeko Zerbitzuko zuzendariak adostasun txostena aurkeztu du, Lehen Hezkuntzako irakaskuntzen ezarpen orokorraren, urriaren 3ko 1/1990 Lege Organikoaren bidez finkatu ziren musika irakaskuntzen ezarpenari ekin dakion eta irakaskuntza horien curriculuma Nafarroako Foru Komunitatean garatzeko arau orokorrak onets daitezen.
Foru Agindu hau egiteko kontutan hartu dira abuztuaren 31ko 1070/1990 Errege Dekretua (1990.eko irailaren 1eko E.A.O.), Nafarroako Foru Komunitateari irakaskuntza ez-unibertsitarioen gaietan Estatuko Administrazioaren eginkizun eta zerbitzuak eskualdatzea onesten duena, irailaren 5eko 153/1994 Foru Dekretuaren lehenbiziko xedapen gehigarria, zeinak Hezkuntza Sistemaren Antolamendu Orokorrari buruzko urriaren 3ko 1/1990 Legean aipatzen diren irakaskuntzak aplikatzeko egutegi berria onesten baitu eta haren bidez indargabetzen baitira Lege hori Nafarroako Foru Komunitatean aplikatzeko egutegi bana finkatzen dituzten abenduaren 30eko 573/1991 eta ekainaren 7ko 184/1993 Foru Dekretuak (1994.eko irailaren 9ko N.A.O.), apirilaren 15eko 389/1992 Errege Dekretua, arte irakaskuntzak ematen dituzten ikastetxeen gutxieneko baldintzak finkatzen dituena (1992.eko apirilaren 28ko E.A.O.), ekainaren 26ko 756/1992 Errege Dekretua, musika irakaskuntzen oinarrizko eta erdiko mailako curriculumaren oinarriak finkatzen dituena (1992.eko abuztuaren 27ko E.A.O.), otsailaren 13ko 34/1995 Foru Dekretua, musika irakaskuntzen erdiko mailako curriculuma finkatu eta Nafarroako Foru Komunitatean maila horretara sartzeko zenbait alderdi orokor arautzen dituena (1995.eko ekainaren 9ko N.A.O.), eta otsailaren 22ko 55/1995 Foru Agindua, urriaren 3ko 1/1990 Lege Organikoan ezarritako musika irakaskuntzen erdiko mailan Nafarroako Foru Komunitatearen lurraldean diren musika kontserbatorio profesionaletan eta erdiko mailako ikastetxe baimenduetan sartzeko arauak finkatzen dituena (1995.eko martxoaren 17ko N.A.O.).
Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2. b) artikuluak ematen dizkidan ahalmenak erabiliz, agindu dut:
I.-Hezkuntza sistemaren antolamendu orokorrari buruzko urriaren 3ko 1/1990 Lege Organikoaren arabera araututako musika irakaskuntzen erdiko mailaren ezarpena.
Lehena
Agindu hau aplikatuko da Nafarroako Foru Komunitatean dauden ikastetxe publiko eta pribatuetan, erdiko mailari dagozkion eta urriaren 3ko 1/1990 Lege Organikoaren bidez finkatu ziren musika irakaskuntzetako espezialitate desberdinak emateko baimenik baldin badute.
Bigarrena
Foru Agindu honen Lehen puntuan aipatzen diren ikastetxeetan, hezkuntza sistemaren antolamendu berriko erdiko mailari dagozkion irakaskuntzen ezarpena, espezialitate guztietan, honako egutegi honen arabera eginen da:
2.1. 1995-1996 ikasturtetan hezkuntza sistemaren antolamendu berriari dagokion erdiko mailako lehen kurtsoa ezarriko da.
2.2. 1996-1997 ikasturtean erdiko mailako bigarren kurtsoa ezarriko da.
2.3. 1997-1998 ikasturtean erdiko mailako hirugarren kurtsoa ezarriko da.
2.4. 1998-1999 ikasturtean erdiko mailako laugarren kurtsoa ezarriko da.
2.5. 1999-2000 ikasturtean erdiko mailako bosgarren kurtsoa ezarriko da.
2.6. 2000-2001 ikasturtean erdiko mailako seigarren kurtsoa ezarriko da.
Hirugarrena
Erdiko mailari dagozkion eta urriaren 3ko 1/1990 Lege Organikoaren bidez finkatu ziren musika irakaskuntzetako espezialitate desberdinak emateko baimena jasotzen dutenean, ikastetxeak honela izendatuko dira: ikastetxe publikoek musika-kontserbatorio profesional izena hartuko dute, eta ikastetxe pribatuek erdiko mailako musika-ikastetxe izena.
Laugarrena
1995-1996 ikasturtetik aurrera, Foru Agindu honen bigarren puntuan finkatutakoaren arabera ezartzen doazen erdiko mailako kur- tsoetan, irakasle/ikasle gehieneko kopurua honako hau izanen da:
4.1. Instrumentu gabeko klaseetan, 1/15.
4.2. Ganbara-musikako, orkestako eta abesbatzako klaseetan edo instrumentuarekiko taldeko klaseetan, zein talde den halako kopurua izanen da eta, bestela, hartarako argitaratzen diren jarraibideen araberakoa.
4.3. Banakako irakaskuntzako klaseetan, 1/1.
Bosgarrena
Ekainaren 14ko 986/1991 Errege Dekretuko 27.6 artikuluaren idazketa berriak (uztailaren 1eko 1487/1994 Errege Dekretuko 12. puntua) ezartzen duenez, 2000-2001 ikasturtetik aurrera, musika irakasten duten ikastetxe profesional guztiek instalazio eta baliabide materialei buruzko gutxieneko baldintzak bete beharko dituzte, apirilaren 15eko 389/1992 Errege Dekretuan finkatzen den bezala. Era berean, aipatu data horretatik aurrera, ikastetxe profesional horiek 180 ikaspostu izan beharko dituzte gutxienez, edota 260 oinarrizko mailako irakaskuntzarik ematen badute. Kopuru horiekin aditzera eman nahi da ikastetxe batek har dezakeen ikasle multzoa, kasuan kasuko irakaskuntzak emateko eska daitezkeen gutxieneko baldintzak eta gutxieneko kalitatea bermaturik.
II.-Ikasleen sarbidea.
Seigarrena
Musika irakaskuntzetako erdi mailako lehen kurtsora sartuko dira harako otsailaren 13ko 34/1995 Foru Dekretuko 15. artikuluan aipatzen den sarbideko proba gainditzen duten ikasleak, kontutan hartuz proba hori otsailaren 22ko 55/1995 Foru Aginduaren bidez arauturik dagoela.
Zazpigarrena
Foru Agindu honetako bigarren puntuan finkatutakoari jarraituz kurtsoak ezartzen doazen heinean, musika irakaskuntzetako lehen kurtsora ez erdi mailako gainerako kurtsoetako edozeinetara sartuko dira harako otsailaren 13ko 34/1995 Foru Dekretuko 16. artikuluan aipatzen den sarbideko proba gainditzen duten ikasleak, kontutan hartuz proba hori otsailaren 22ko 55/1995 Foru Aginduaren bidez arauturik dagoela.
Zortzigarrena
Era berean, musika irakaskuntzetako erdi mailako kasuan kasuko kurtsoetara sartuko dira, kurtsoak ezartzen doazen heinean, ekainaren 14ko 986/1991 Errege Dekretuko 30. artikuluaren idazketa berriko (uztailaren 1eko 1487/1994 Errege Dekretuko artikulu bakarreko 15. puntua) 3. eta 4. puntuetan aipatzen diren egoeretakoren batean dauden ikasleak.
Bederatzigarrena
Musika irakaskuntzetako erdi mailako kasuan kasuko kurtsoetara sartuko dira, ekainaren 14ko 986/1991 Errege Dekretuko 30. artikuluaren idazketa berriko (uztailaren 1eko 1487/1994 Errege Dekretuko artikulu bakarreko 15. puntua) 1., 2. eta 5. puntuetan aipatzen diren egoeretakoren batean dauden ikasleak, hala nahi baldin badute, bakoitza dagokion kurtsora, kontutan hartuz aipatutako ekainaren 14ko 986/1991 Errege Dekretuko III. Eraskinean heldu den baliokidetasunen taula eta ezar daitezkeen gainerako arauak oro.
III.-Kontserbatorioetako eta musikako erdi mailako ikastetxe baimenduetako curriculum garapenerako jarraibideak.
Hamargarrena
Kontserbatorio profesionalek eta musikako erdi mailako ikastetxe baimenduek plangintza instituzionaleko tresna hauek prestatu beharko dituzte:
-Ikastetxearen hezkuntza-proiektua.
-Erdi mailako curriculum-proiektua
-Urteko programazio orokorra.
Azken hori prestatzeko kontutan hartuko dira hartarako argitara emanen diren jarraibideak.
Hamaikagarrena
11.1. Hezkuntza-proiektuak, plangintza instituzionaleko tresna den aldetik, ikastetxearen barreneko egoera eta ikastetxearen beraren testuinguru sozioekonomikoa eta kulturala aztertu ondoren, ikastetxearen ikasketako eta hezkuntzako ekinbidearen koherentzia eta jarraipena bermatu egiten ditu.
11.2. Hezkuntza-proiektuak finkatuko ditu iharduketako helburuak, lehentasunak eta prozedurak. Hori dela eta honakook bilduko ditu:
a) Ikastetxearen nortasun ezaugarriak.
b) Eskola-elkarteak ezartzen dituen hezkuntz helburuak.
c) Ikastetxearen antolamendu orokorra.
d) Ikastetxearen Barne-araudia.
e) Erakunde publiko eta pribatuekin izan gogo diren harremanak, ezarritako xedeak hobeki lortzeko.
11.3. Ikastetxeko zuzendaritza taldea arduratuko da hezkuntza-proiektuaren prestaketaz, kontutan hartuz eskola kontseiluak ezartzen dituen irizpideak eta irakasleen klaustroaren proposamenak.
Hamabigarrena
Kontserbatorio profesionalek eta musikako erdi mailako ikastetxe baimenduek behar diren irakaskuntzak emanen dituzte, kontutan hartuz otsailaren 13ko 34/1995 Foru Dekretuan araututakoaren arabera gauzatuko diren curriculum-proiektua eta programazio didaktikoak, Dekretu horretan ezartzen baita musikako irakaskuntzen erdi mailako curriculuma eta arautzen baitira maila horretarako sarbidearen inguruabar orokorrak.
Hamahirugarrena
Curriculum-proiektuak, curriculumeko elementu desberdinen gaineko erabakien multzo bezala harturik, ikasleek lanbide aldetik dauzkaten prestakuntza beharrei erantzun nahi die, ikastetxearen errealitatean berean oinarrituta. Horretaz gain, maila honetako irakasleen iharduketen koherentzia ziurtatu egin behar du. Dena dela, curriculum-proiektuak hezkuntza-proiektuaren erabakiak izan behar ditu abiapuntu.
Hamalaugarrena
1. Otsailaren 13ko 34/1995 Foru Dekretuko 9. artikuluan xedatutakoarekin bat, curriculum-proiektuak honakook bilduko ditu:
A) Curriculum-koordinazioari buruzko honako erabaki eta neurri hauek:
a) Erdiko mailaren helburu orokorrak egokitzea, ikastetxearen eta ikasleen ezaugarriak kontutan hartuz, egokitzapen hori lortzeko hartu behar diren neurriak adieraziko direlarik.
b) Metodologiari buruzko erabaki orokorrak.
c) Ikasleen ebaluazio eta promozio prozesuari buruzko irizpideak.
d) Curriculumeko materialak eta erabili behar diren baliabide didaktikoak.
e) Ebaluatzeko irizpideak eta, hala behar bada, berrikustea irakaskuntza prozesuak eta irakasleen lana, bai eta curriculum-proiektua bera ere.
B) Erdiko mailako hirugarren zikloko aukerako irakasgaien eskaintza.
C) Tutoretza-plana ezartzea.
D) Curriculum-proiektuaren barrenean sartuko dira, baita ere, irakasgai bakoitzerako programazio didaktikoa, zeinetan bilduko baitira kurtso bakoitzerako helburuak, edukiak, metodologia berariazkoa, ebaluazioko irizpideak eta erabili gogo diren materialak eta baliabideak. Hori dena ikasgelan garatuko dute gero irakasleek, ikasgela bakoitzeko programazioen bitartez.
E) Era berean, curriculum-proiektuaren barrenean sartuko dira erdiko mailako kurtso desberdinetarako sarrera probaren edukia eta ebaluazioa, lehen kurtsorakoa izan ezik.
14.2. Koordinazio pedagogikoko batzordeak ikastetxean ematen diren erdiko mailako musika-irakaskuntzen curriculum-proiektuaren prestaketa koordinatuko du eta haren idazketaz arduratuko da, kontutan hartuko dituelarik curriculum ofiziala, hezkuntza-proiektua, klaustroak ezarritako irizpideak eta departamentuek egindako proposamenak. Era berean, prestaketa prozesuan, koordinazio pedagogikoko batzordeak ikastetxeko irakasleen partaidetza bultzatuko du.
14.3. Irakasleen klaustroak ebaluatu eta onetsiko ditu etapako curriculum-proiektuak eta beraien urteroko aldaketak.
Hamabosgarrena
Programazio didaktikoak curriculum-proiektuan hartutako erabakien garapena dira. Haien prestaketan honako inguruabar hauek hartu behar dira kontutan:
a) Programazio didaktikoek oinarritzat hartuko dituzte erdiko mailako sei kurtsoetan banatutako helburu eta edukiak.
b) Programazio didaktikoetan curriculum-proiektua are zehatzago gauzatzen da, eta era horretan bermatu beharko dituzte ikaskuntza esanguratsuak eta irakasle taldearen iharduketen koherentzia.
Hamaseigarrena
1. Departamentuak arduratuko dira programazio didaktikoen prestaketaz, kontutan hartuz koordinazio pedagogikoko batzordetik sortzen diren eta curriculum-proiektuan biltzen diren lerro nagusiak. Haien barrenean sartuko dira, irakasgai eta espezialitate bakoitzerako, ondotik aipatzen diren alderdi hauek:
a) Helburuen, edukien eta ebaluazio-irizpideen banaketa kurtsoz kurtso.
b) Aplikatu gogo den metodologia didaktikoa.
c) Ikasleen ikaskuntza ebaluatzeko irizpideak eta prozedurak.
d) Erabili gogo diren promozio-irizpideak, eska daitezkeen gutxienekoak eta kalifikazio-irizpideak bereziki azpimarratuz.
e) Gainditu gabeko irakasgaiak dituzten ikasleentzako, horiek berreskuratzeko ekintzak eta berreskurapena lortzeko neurriak.
f) Errepertorioa, materialak eta erabili gogo diren baliabide didaktikoak.
g) Beste departamentuekin batera programatzea espezialitate edo irakasgai desberdinak ukitzen dituzten ekintza akademiko bateratuak, ganbara-musika esate baterako.
h) Departamentutik egin gogo diren ekintza osagarriak eta eskolaz kanpokoak.
16.2. Irakasleek programatuko dute irakaskuntzako beren zeregina, kontutan hartuz haiei dagozkien departamentuen programazio didaktikoak. Irakasleren batek erabakitzen badu departamentuko programazio bateratutik aparte ikasgelako programazioan aldaketaren bat sartzea, aldaketa hori eta haren justifikazioa departamentuko programazio didaktikoan sartu beharko da.
Hamazazpigarrena
Curriculum-proiektua eta programazioak garatzen direnean, irakasleek ebaluatuko dituzte, ikasleen hezkuntza-beharrei egokitzen zaizkiela bermatzeko.
Hamazortzigarrena
Hezkuntza eta Kultura Departamentuak diseinatuko duen planean bilduko dira gidabide nagusiak, ikastetxeek ikastetxeko hezkuntza-proiektua eta erdiko mailako curriculum-proiektua presta ditzaten.
Xedapen Gehigarri Bakarra
Foru Agindu honek arautzen ez duen orotan, kasu eginen zaio arte-irakaskuntzen ikastetxeen antolamendua eta funtzionamendua urtero arautzen dituzten jarraibideak onesten dituen arauterian xedatutakoari.
Azken Xedapenetako Lehena
Hezkuntza zuzendari nagusiari baimena ematen zaio Foru Agindu honetan xedatutakoa aplikatu eta garatzeko beharrezko diren xedapen guztiak eman ditzan.
Azken Xedapenetako Bigarrena
Foru Agindu hau igortzea Zerbitzuak Ikuskatzeko eta Ikuskapen Teknikorako Zerbitzura; Ikasketak Antolatu eta Hezkuntza Berriztatzeko Zerbitzura; Plangintza eta Inbertsio Zerbitzura; Giza Baliabideen Zerbitzura; Itun, Dirulaguntza eta Beka Atalera; Obra eta Ekipamendu Atalera; Irakasleen Hobekuntzako Atalera; Plangintza eta Ikastetxeen Atalera; Hezkuntza Erreforma eta Berriztapen Atalera; Ikasketak Antolatzeko Atalera eta "Pablo Sarasate" Kontserbatoriora, behar diren ondorioak izan ditzan.
Azken Xedapenetako Hirugarrena
Foru Agindu honek Nafarroako Aldizkari Ofizialean argitaratu eta hurrengo egunean hartuko du indarra.
