navarra.es
Castellano | Euskara | Français | English
Ezagutzera eman
146/2009 Foru Agindua, abuztuaren 18koa, Hezkuntzako kontseilariak emana, alemanezko, frantsesezko eta euskarazko hizkuntza ikasketen oinarrizko mailako eta alemanezko erdiko mailako ziurtagiria lortzeko proba homologatuak arautzen dituena ...
146/2009 FORU AGINDUA, abuztuaren 18koa, Hezkuntzako kontseilariak emana, alemanezko, frantsesezko eta euskarazko hizkuntza ikasketen oinarrizko mailako eta alemanezko erdiko mailako ziurtagiria lortzeko proba homologatuak arautzen dituena eta ziurtagiri hori lortzeko 2010eko deialdiak onesten dituena. Ikasketa horiek martxoaren 19ko 22/2007 Foru Dekretuak arautu zituen
(2009ko 111. NAOn argitaratutako testua, irailaren 9an)
Atarikoa
LOEren lehenbiziko xedapen gehigarriarekin bat eta abenduaren 29ko 1629/2006 Errege Dekretuak finkatutako curriculumeko oinarrizko alderdietatik abiaturik, Hezkuntza Departamentuak alemanezko, euskarazko, frantsesezko, ingelesezko eta italierazko oinarrizko eta erdiko mailen curriculumak garatu zituen Nafarroako Foru Komunitatean, martxoaren 19ko 22/2007 Foru Dekretuaren bidez.
Martxoaren 19ko 22/2007 Foru Dekretuaren bigarren xedapen gehigarriak, 1629/2006 Errege Dekretuaren hirugarren xedapen gehigarriari lotuz, bestelako ikasketekiko egokitasunari baitagokio, Nafarroako Hezkuntzari esku ematen dio Bigarren Hezkuntzako eta Lanbide Heziketako ikasleek ikasten dituzten hizkuntzen jakite-maila ofizialki ziurtatzeko proba homologatuak egiteko.
Eskolako Hizkuntza Plangintzaren Zerbitzuko zuzendariak proposatu du 2009-2010 ikasturtean Bigarren Hezkuntzako eta Lanbide Heziketako ikasleendako proba homologatu horiek antolatu eta horietarako dei egin dadila.
Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz, agindu dut:
1. Alemanezko, frantsesezko eta euskarazko hizkuntza ikasketen oinarrizko mailako eta alemanezko erdiko mailako ziurtagiria lortzeko proba homologatuak antolatzea hizkuntza horiek beren ikastetxeetan ikasten dituzten Bigarren Hezkuntzako eta Lanbide Heziketako ikasleendako.
2. 1. puntuan aipatzen diren proba homologatuen 2010eko ekaineko eta iraileko deialdiak onestea, ebazpen honen eranskinean zehazten diren oinarriei jarraituz.
3. Eskolako Hizkuntza Plangintzaren Zerbitzua probak antolatu eta garatzeko kontrolaren arduradun izendatzea. Proba horiek Nafarroako Urrutiko Hizkuntza Eskola Ofizialaren bitartez eginen dira.
4. Foru agindu hau eta eranskina Nafarroako Aldizkari Ofizialean argitaratzea.
5. Foru agindu hau eta eranskina igortzea Antolamenduaren, Kalitatearen eta Berrikuntzaren Zuzendaritza Nagusira, Ikuskapenaren eta Zerbitzuen Zuzendaritza Nagusira, Lanbide Heziketaren eta Unibertsitateen Zuzendaritza Nagusira, Eskolako Hizkuntza Plangintzaren Zerbitzura, Antolamendu eta Berrikuntza Zerbitzura, Lanbide Heziketaren Zerbitzura, Hezkuntzako Ikuskapen Zerbitzura, Atzerriko Hizkuntzen Atalera, Antolamenduaren eta Tituluen Atalera eta hizkuntza eskola ofizialetara, behar diren ondorioak izan ditzaten.
6. Foru agindu honen aurka gora jotzeko errekurtsoa jar daiteke, Hezkuntza Departamentuko kontseilariari zuzendua, argitaratu eta, biharamunetik, hilabeteko epean.
ERANSKINA
DEIALDIAREN OINARRIAK
1. oinarria. Betebeharrak.
a) Bigarren Hezkuntzako eta Lanbide Heziketako ikastetxeetako ikasleak aurkezten ahalko dira azterketa horretara, hamasei urte bete ez badituzte, euskara, frantsesa edo ingelesa ikasten ari badira eta ikastetxe horiek ikasturte honetan Nafarroako Urrutiko Hizkuntza Eskola Ofizialaren duten lankidetza programan matrikulaturik badaude.
Halaber, Bigarren Hezkuntzako eta Lanbide Heziketako ikastetxeetan alemana ikasten ari diren ikasleek ere egiten ahalko dute proba, lankidetza programa horretan matrikulaturik badaude.
b) Hizkuntza horrexetan aldi berean beste hizkuntza eskola ofizial batean matrikulatuta dauden ikasleak ezin izanen dira matrikulatu.
2. oinarria. Azterketaren helburua.
Oinarrizko eta erdiko mailak lortzeko proba homologatuak izangaiek helburu komunikatibo orokorretarako lau hizkuntza trebetasun nagusietan duten gaitasuna ebaluatzeko diseinaturiko proba batzuek osatzen dituzte.
Maila horietako ikasketak Foru Komunitaterako 22/2007 Foru Dekretuaren I., II., III. eta IV. eranskinetan zehaztu dira. Bertan Europako Kontseiluko A2 mailako berezko trebetasunak ezartzen dira oinarrizko mailarako eta B1 mailakoak erdiko mailarako.
3. oinarria. Azterketaren egitura.
Azterketak lau zati ditu. Irakurriaren ulermenaren proba, ahozkoaren ulermenarena eta idazmenarena saio berean eginen dira. Ahozko adierazpena neurtzeko proba beste saio batean eginen da. Proba bakoitza banaka eginen da, multzotan batu gabe (idatzia/ahozkoa), eta ez da proba baztergarririk izanen.
Ikasle guztiek proba guztiak egin ditzakete, izan ere, ezein proba gainditzea ez da baldintza izanen hurrengoak egin ahal izateko. Azterketa osoa gainditzeko eta, horrenbestez, ziurtagiria lortzeko, azterketa osatzen duten lau probak gainditu beharko dira.
4. oinarria. Proben balorazioa.
Probaren emaitzari buruz ikasleei emanen zaien informazio-orrian GAI edo EZ-GAI kalifikazio orokorra jarriko da.
Foru agindu honetan azaltzen diren proba homologatuak gaindituz gero, hizkuntzaren hurrengo mailara jotzeko aukera izanen dute.
5. oinarria. Agiriak eta izena emateko epeak.
a) Izena emateko epea Nafarroako Urrutiko Hizkuntza Eskola Ofizialak ikasleek behar denean matrikula egin ahal izateko adieraziko duena izanen da.
b) Izen-emateko ekaineko eta iraileko deialdietako azterketetarako balioko du.
c) Izen-ematea NUHEOren bitartez eginen da, agiri hauek aurkeztuz:
-Izen-ematearen eta azterketa eskubideak ordaindu izanaren inprimakia, behar bezala betea eta Nafarroako Kutxak zigilatua, zenbatekoa argi azalduta.
-Azterketa eskubideengatik ordaindutako diruaren gordekina.
-NANaren fotokopia.
-Argazki bat.
-Familia liburuaren fotokopia, bidezkoa bada.
-Familia ugariaren txartela, bidezkoa bada.
d) Izena eman duten ikasleak elkarlaneko zein ikastetxetan dauden matrikulatuta, horietara bidaliko da beren izenak biltzen dituen zerrenda.
6. oinarria. Azterketa eskubideak.
Azterketa eskubideengatik 2010erako Hezkuntza Departamentuaren mendeko irakaskuntza ez-derrigorrezkoen tarifak eta ikasleen egoitzetako prezioak finkatu zituen Foru Aginduak ezarritako zenbatekoa ordainduko da.
7. oinarria. Azterketa egunak.
NUHEOk elkarlanean ari diren ikastetxeen bitartez jakinaraziko die ikasleei ekaineko eta iraileko azterketak zein egunetan eginen diren.
Azterketa idatziak finkoak dira eta ezin da aldaketarik egin.
8. oinarria. Azterketako lau proben ezaugarriak.
Alemanezko, euskarazko eta frantsesezko oinarrizko mailako eta alemanezko erdiko mailako proba homologatuak araubide bereziko hizkuntza ikasketen oinarrizko maila eta erdikomaila egiaztatzeko ziurtagiri proben gaineko oharrak onesten dituen abenduaren 2ko 507/2008 Ebazpenaren bidez ezarririko zehaztasunen arabera arautuko dira ondorio guztietarako.
9. oinarria. Izangaien eginbeharrak.
-Azterketako ikasgelan eskatutakoan, izangaiek NANa, pasaportea edo haien nortasuna frogatzeko beste agiri bat aurkeztu beharko dute.
-Izangaiek garaiz iritsi behar dute eta deialdian finkatzen den orduan egon beharko dute azterketa egiteko gelan.
-Izangaiek bolaluma urdina edo beltza erabiliko dute azterketa egiteko. Lapitzez egindako probak ez dira zuzenduko.
-Idazteko materialaz beste tresnarik ezin da eduki mahai gainean.
-Sakelako telefonoak itzalita eduki beharko dira.
10. oinarria. Ezgaitasunak dituzten ikasleak.
Norbaitek, ezgaitasunen bat duelako, probak egiteko zailtasunak baditu, azterketetarako baldintza bereziak jartzeko eskaera egin dezake. Nahi hori izena emateko eskaeran egokiro adierazi behar da.
11. oinarria. Erreklamazioak egiteko eskubidea.
Probako trebetasun guztietan edo baten batean lorturiko kalifikazioarekin ados ez badago, ikasleak behar diren argibideak eska ditzake eta, beharrezkoa izanez gero, idatzizko erreklamazioa ere jartzen ahalko du, uztailaren 4ko 88/2007 Foru Aginduaren 19. artikuluan ezarritako moduan (2007-8-29ko Nafarroako Aldizkari Ofiziala).
