navarra.es
Castellano | Euskara | Français | English
Ezagutzera eman
63/2015 Foru Agindua, otsailaren 20koa, Landa Garapeneko, Ingurumeneko eta Toki Administrazioko kontseilariak emana, nekazaritzako politika bateratuaren arloko zuzeneko laguntzen, landa garapeneko laguntzen eta mahastizaintza sektorearen laguntzen...
63/2015 FORU AGINDUA, OTSAILAREN 20KOA, LANDA GARAPENEKO, INGURUMENEKO ETA TOKI ADMINISTRAZIOKO KONTSEILARIAK EMANA, NEKAZARITZAKO POLITIKA BATERATUAREN ARLOKO ZUZENEKO LAGUNTZEN, LANDA GARAPENEKO LAGUNTZEN ETA MAHASTIZAINTZA SEKTOREAREN LAGUNTZEN BALDINTZAZKOTASUNAREN ESPARRUAN ESKUMENA DUTEN KONTROL AGINTARITZAK IZENDATZEN DITUENA
(2015eko 65. NAOn argitaratutako testua, apirilaren 7an; akats zuzenketa, 2015-04-14ko NAO)
Nekazaritzako politika bateratuaren esparru berrian, Europako Parlamentuaren eta Kontseiluaren abenduaren 17ko 1306/2013 EB Erregelamenduak, Nekazaritzako politika bateratuaren finantzaketari, kudeaketari eta jarraipenari buruzkoak, VI. tituluan ezartzen ditu 2015eko urtarrilaren 1etik aurrera aplikatu beharreko arauak baldintzazkotasunari dagokionez.
2014ko uztailaren 17ko 809/2014 EB Exekuzio Erregelamenduak, 1306/2013 EB Erregelamenduko aplikazio xedapenak ezartzen dituenak, landa garapenerako neurriak eta baldintzazkotasuna kudeatu eta kontrolatzeko sistema integratuari dagokionez, behartzen ditu estatu kideak baldintzazkotasunaren araubidea benetan betetzen dela kontrolatzen duen sistema bat ezartzera. Sistema horretan esku hartuko dute, behar izatera, kontrol agintaritza eskudun batek edo gehiagok, koordinazioaz arduratzen den agintaritza batek eta erakunde ordaintzaileak. 67.2 artikuluak ezartzen du erakunde ordaintzailea izendatua izan daitekeela baldintzazkotasunaren betebehar, arau, ekintza edo esparru batzuk edo guztiak kontrolatzeko ere, baldin eta bermatzen bada kontrolen eraginkortasuna izanen dela kontrolatzeko erakunde edo organo espezializatu batek egiten dituenaren parekoa.
Abenduaren 19ko 1078/2014 Errege Dekretuak, ordainketa zuzenak, landa garapenerako urteko zenbait prima edo mahastizaintzaren sektorearen aldeko zenbait programarengatik egiten diren ordainketak jasotzen dituzten onuradunek bete beharreko baldintzazkotasun arauak ezartzen dituenak, bere 5. artikuluan, zehazten du Nekazaritza, Elikadura eta Ingurumeneko Ministerioari lotutako Nekazaritza Bermatzeko Espainiako Funtsa (NBEF) izanen dela baldintzazkotasunaren kontrolak koordinatzeko sistemaz arduratzen den agintaritza Espainian, eta autonomia erkidegoetako organo eskudunek, zein bere lurraldeko kontrol jardueren arduraduna den aldetik, izendatuko dituztela kontrolatzeko kasuan kasuko erakunde espezializatuak, baldintzazkotasun arauak betetzen direla zaintzeko.
Baldintzazkotasuna kontrolatzeko sistema nekazaritzako politika bateratuaren esparru berrira egokitzeko, bidezkoa da, horrenbestez, eskudun diren organoak izendatzea Nafarroako Foru Komunitatean baldintzazkotasunaren esparruan kontrol eginkizunak betetzeko.
Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz, agindu dut:
1. artikulua. Baldintzazkotasunaren esparruko kontrol agintaritza eskudunak.
1. Nekazaritzako politika bateratuaren arloan, zuzeneko laguntzen, landa garapenerako laguntzen eta mahastizaintzaren sektorearen aldeko zenbait programaren baldintzazkotasunaren esparruan eskumena duten kontrol agintaritzak honako hauek izanen dira:
–Landa Garapeneko, Ingurumeneko eta Toki Administrazioko Departamentua, Nafarroako Foru Komunitatearen erakunde ordaintzaile gisa.
–Abeltzaintza Zerbitzua, kontrolatzeko organo espezializatu gisa.
2. Organo horiek, kontrol agintaritza eskudun diren heinean, haien ardurapeko kontrola egiteko laginak hautatuko dituzte, betekizunen edo arauen kontrolak eta kontrol txostenak eginen dituzte, eta Batzordearen uztailaren 17ko 809/2014 EB Exekuzio Erregelamenduak eta abenduaren 19ko 1078/2014 Errege Dekretuak ezartzen dituzten eginkizunak beteko dituzte.
3. Kontrol agintaritza eskudun bakoitza foru agindu honen I. eranskinean zehazten diren betekizun edo arauez arduratuko da.
2. artikulua. Koordinazio agintaritza.
1. Erakunde Ordaintzailearen Koordinaziorako Zerbitzua izanen da Nafarroako Foru Komunitatean baldintzazkotasunaren kontrolak koordinatzeaz arduratuko den agintaritza.
2. Koordinazio agintaritzak kontrol erakunde espezializatuei kontrolak egiteko behar duten informazioa emanen die, kontrol erakunde espezializatuen kontrol txostenak jasoko ditu, kontrolen foru plana eginen du eta baldintzazkotasuna betetzen den kontrolatzeko ezarritako sistemak behar bezala funtzionatzen duela ziurtatzeko beste edozein eginkizun beteko du.
3. artikulua. Landa Garapeneko, Ingurumeneko eta Toki Administrazioko Departamentuak baldintzazkotasunaren esparruan dituen eginkizunak.
Kontrol agintaritza gisa berezko dituen eginkizunez gain, Landa Garapeneko, Ingurumeneko eta Toki Administrazioko Departamentuak ondoko eginkizun hauek ere izanen ditu, erakunde ordaintzailea den aldetik:
a) Europako Parlamentuaren eta Kontseiluaren abenduaren 17ko 1306/2013 EB Erregelamenduaren 95. artikuluan aipatzen den kudeaketa arloko legezko betebeharren eta nekazaritzako eta ingurumeneko baldintza egokien zerrenda nekazariei ematearen arduraduna izanen da.
b) Baldintzazkotasunaren betetzearen kontrol eraginkorra bermatzeko prozedurak ezarriko ditu, Batzordearen uztailaren 17ko 809/2014 Erregelamenduaren 65. artikuluan ezarritakoari jarraikiz.
c) Kontrolen foru plana onetsiko du.
d) Murrizketa eta bazterketei buruzko ebazpenak eman eta gauzatuko ditu.
Xedapen Indargabetzaile Bakarra. Arauak indargabetzea.
Indarrik gabe gelditzen da Landa Garapen, Industria, Enplegu eta Ingurumeneko kontseilariak apirilaren 4an eman 181/2012 Foru Agindua, nekazaritzako politika bateratuaren arloko zuzeneko laguntzen, landa garapeneko laguntzen eta mahastizaintza sektorearen laguntzen baldintzazkotasunaren esparruan eskumena duten kontrol agintaritzak izendatzen dituena.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
