Proiektu honetan, halaber, oraingo legealdian gauzatzen hasi diren giltzarrizko bost gai edo apustu bildu dira, Nafarroako gizarte zerbitzuen etorkizun hurbileko osagai nagusiak eta lehentasun estrategikoak zehaztuz:

- Gizarte zerbitzuetako eskaintzaren estaldura eta unibertsalizazio proaktibo eta adimenduna hedatzea eta erabiltzaileein koordainketa pixkanaka-pixkanaka eta modu birdistributiboan murriztea.

- Gizarte zerbitzuetako lehen mailako arreta berrantolatu eta gertuko gizarte zerbitzuak indartzea.

- Gizarte babeseko sistema guztien sektore arteko integrazioa eta gobernantza, gizarte zerbitzuak bultzatzeko esparrutzat.

- Botere publikoen lidergoa eta hirugarren sektorearekiko aliantza estrategikoa.

- Ezagutza eta berrikuntzaren arloko eragile sistemaren beharrezko dinamizazioa Errealitate Sozialaren Behatokiaren laguntzaz, azken hau garrantzi handiko tresna baita gizarte plangintza, ikerketa eta berrikuntzarako.

Planak bukaera eman dio parte-hartze bidezko plangintza prozesuari

Nafarroako Gobernurako 2015-2019 legealdiko Akordio Programatikoak giltzarrizkotzat jotzen zuen “gizarte zerbitzuen plan estrategiko berria lantzea”. Ondorioz, premiak bultzatuta, Eskubide Sozialetako Departamentuak azkenaldian proiekturik ez zuten zenbait eremuren gaineko plangintza sektorialari ekitea erabaki zuen legealdiaren hasieran, ongizate-sistemaren oinarrian finkatzeko moduko benetako gizarte zerbitzu unibertsalen eraikuntza sektoriala bultzatzen lagunduko zuen plan berri bat lantzeko.

Hartara, proiektu berri honekin bukatzen ari den parte-hartze bidezko plangintza prozesuak gizarte zerbitzuen arloan estrategikoak diren planak eta agiriak landu eta onartzea ahalbidetu du; hala nola, Familiari, Haurrei eta Nerabeei Laguntzeko II. Plan Integrala (2017-2023), Nafarroako Gizarteratze Plan Estrategikoa (2018-2021), Nafarroako Ijitoen Garapenerako Estrategia (2019-2022) eta Boluntariotza Plana (2018-2020). Hauei, planarekin batera landu diren 2019-2022ko Desgaitasun Plana eta Nafarroako Gizarte Zerbitzuetako Lehen Mailako Arreta Berrantolatzeko Proiektua gehitu behar zaizkie.

Horren kariaz, plan hau lantzeko prozesuan, aipaturiko dokumentuak baliatu dira, baita bestelako ebaluazio, azterketa, gogoeta eta eztabaida prozesuei loturikoak ere. Horien artean, berariaz nabarmendu behar dira aurreko gizarte zerbitzuen plan estrategikoa, eremu honetako zerbitzu zorroa, mapa, eskaria eta eskaintza, mendekotasunaren arloko plangintza operatiboa eta zahartze aktibo eta osasungarria. Hauei gehitu behar zaizkie Informazio Sistema Integratuarekin, gizarte hitzarmenekin edota Nafarroako gizarte zerbitzuen kudeaketa zuzenarekin zerikusia dutenak, gehienak Errealitate Sozialaren Behatokiak gauzatu eta bildutakoak, baita bestelako plan sektorialak eta zeharkakoak ere.

Planak, halaber, eskaria eta eskaintza doitzeko egin den ahalegina jaso du, baita sistemaren estaldura unibertsalizatzearen aldeko apustua ere. Horretan oinarrituta, argi utzi du arretan izandako orain arteko joerak eta ondoko urteetarako aurreikusita daudenak zerbitzu hauen gaitasun hirukoitzaren isla direla: erantzuteko gaitasuna, estaldura areagotuz eta prestazio eta zerbitzurik ezagunenetan izandako eskariaren hazkundera egokituz, gizarte zerbitzuen sistema publikoa unibertsalizatzeko proiektuari jarraiki; eskaria kudeatzeko gaitasuna, patroiak eta jokaerak aldatzeko eta sistemari etxez etxeko nahiz komunitate giroko abordatze prebentiboagoak egiteko aukerak gehitzeko, kasurik konplexuenak integrazio maila altuko egoitza zerbitzuen bitartez tratatzeari utzi gabe; eta erantzun berritzaile eta iraunkorrak emateko gaitasuna, zerbitzu berrien ereduarekin bat eginik.