Nafarroako Zerga Ogasunak 452.786 pertsonaren 321.781 aitorpen izapidetu ditu Pertsona Fisikoen Errenta Zerga (PFEZ) ordaintzeko kanpaina zehar; kanpaina ekainaren 23an itxi zen.

"Itzultzea" atera diren 210.528 aitorpenarekin (aurkeztutakoen %65a) 177 milioi euro osatu dira, eta %95,4a dagoeneko ordaindu da. "Ordaintzea" emaitza, berriz, 111.261 aitorpenak izan dute (aurkeztutakoen %30a), eta, guztira, 155,4 milioi euro bilduko dira. Horrez gain, aitorpenen %5ak "zero" emaitza izan du. Kopuru horiek gaur goizean ezagutzera eman dituzte prentsaurrekoan Ogasun eta Finantza Politikako kontseilaria den Mikel Aranburuk eta Nafarroako Ogasuneko zuzendari kudeatzailea den Luis Esainek. Zergadunei itzuli beharreko kuota garbia (kanpainaren saldoa) 21,5 milioi eurokoa izan da.

Aranburu kontseilariaren arabera, emaitza honetan eragina izan du 2015ean onartutako erreforma fiskalak. Baina, efektua areagotu dute "datu ekonomiko onek eta enpleguaren bilakaerak". Zehazki, lan-errendimenduak %2,93 igo dira, errendimendu profesionalak %4,2 eta enpresa-mailako errendimenduak %6,38.

Nafarroako Zerga Ogasunak gogorarazi du, azterketa sakon bat egin aurretik, datu horiek bat datozela ekainaren 23an aitorpenak aurkezteko amaitutako denboraldi arrunta itxi ondorengo lehen balantzearekin. Datu horiek eguneratzen joango dira datozen hilabeteetan zehar, berrikusiko diren aitorpenak aldatuta edo epez kanpo sisteman sartuko direnak kontuan hartuta. Itzultzeko epe arrunta abenduaren 23an amaituko da.

Aurkezpen-bideari dagokionean, izapidetutako aitorpen gehienak –zehazki, 179.414, hots, %52,4a- bat datoz Ogasunak egindakoekin eta zergadunen eskura kanpaina hasi aurretik jarritakoekin. Horietatik gehienak (%93,09) zergadunek onartu egin dituzte.