Nafarroako turismoko establezimenduetan 199.495 bidaiari izan dira 2016ko lehen hiruhilekoan, 2015ean epe berean izan zena baino % 16,6 gehiago. Igoera horretan, Aste Santuak eragin du, aurten martxoan ospatu baita eta iaz, apirilean.

Datua Espainiako autonomia erkidegoetako batez bestekoa baino handiagoa da (% 15,65), Nafarroako Turismo Behatokiak jakinarazi duenez. Zifra horiei turismoko aterpetxeetan ostatu hartutako 3.050 pertsonak gehitu behar zaizkie; datu hori duela hilabete batzuetatik jasotzen da, eta beste autonomia erkidego batzuetan ez da ematen.

Lehen hiruhilekoko 20.000 bidaiarietatik, % 66 hoteletan izan ziren; % 15 hostal eta pentsioetan; % 9 landetxetan; % 5 kanpinetan –% 77 gehiago– eta % 5 turismoko apartamentuetan.

Gaualdiei dagokienez, Nafarroako turismoko ostatuek 410.531 gau fakturatu dute lehen hiruhilekoan, % 24 gehiago, autonomia erkidegoen batez bestekoaren gainetik (+% 14,7). Aste Santuak adierazle hori martxoan % 42,3 haztea lagundu zuen. Gaualdien % 59 hoteletan izan ziren, % 13 hostaletan eta pentsioetan, % 12 landetxetan, % 8 kanpinetan eta beste % 8 turismoko apartamentuetan. Landetxetan (% 33,9), kanpinetan (% 91,3) eta apartamentuetan (% 66,7) igo ziren bereziki.

Turisten eta gaualdien kopurua igotzeaz gain, egonaldiak ere gehitu ziren, 2015ean epe berean izandakoak baino % 6 luzeagoak (Aste Santuari esker ere). 2,1 gaueko batez bestekoa da: hoteletako 1,8 gaueko batez bestekotik apartamentuetako 3,5ekora.

Bidaiarien % 86 Espainian bizi ziren (% 17,3 EAEn; % 16,5 Madrilen; % 14 Nafarroan eta % 11,6 Katalunian), eta % 14 atzerrian (% 10,6 EBn, % 20 gehiago). Madrilgo Erkidegotik eta Kataluniatik etorritako bisitari-kopuruaren igoera azpimarratu behar da, % 60 inguru eta % 23 gehiago, hurrenez hurren.

Nafarroak nazioarteko turisten kopuru gehien handitzen den autonomia erkidegoetako bat izaten jarraitzen du: hiruhileko honetan % 22,1 hazi da, eta Espainian, berriz, % 14,8. Estatu mailako eskaera ere handitu da (2015ean baino % 15,7 gehiago), Espainiako batez bestekoaren parean (2015ean baino % 16,3 estatuko bidaiari gehiago), EINek aipatu duenez.

Turismo-bulegoei dagokienez, 60.232 pertsonak jaso dute informazioa aurrez aurre, iaz baino % 77,3 gehiagok. Iruñean eta Erriberrin pilatzen dira kontsultak; bien artean arreta guztien % 41,3 batzen dute.

Jarraipen bat egiten zaien baliabide bisitagarriek 86.235 bisitari jaso dituzten gaur arte, 2015ean baino % 70,9 gehiago. Erriberriko Errege Jauregia eta Xabierko Gaztelua daude ranking horretan buru, bisita guztien % 44 eta % 20rekin, hurrenez hurren. Gainerakoak dira: Bertizko jaurerria, Uzta eta Ardoaren museoa, Iruñeko katedrala, Orreagako Kolegiata, Arellanoko Hiri Erromatarra, Andelosko Hiri Erromatarra, Radako Harresien Barrutia eta Nafarroako museoa.

Azkenik, lehen hiruhilekoan, Orreagan 3.487 erromesek beren txartela zigilatu dute, 2015ean bainio % 21,7 gehiago. Espainian bizi diren erromesak % 40 dira, eta % 25,1 gehitu dira 2015arekin alderatuz. Nazioartekoak % 60 dira, eta % 19,6 gehitu dira iazko datuekin alderatuz, aterpetxearen arabera.