Herritarrekiko eta Erakundeekiko Harremanetako kontseilari Ana Ollok memoriak jokatu beharreko zeregina aldarrikatu du gaur goizean "gizarte justuago eta etikoago bat eraikitzeko"; horretarako, "kontaketa justu eta zehatza egin behar da indarkeria bidegabea eta giza eskubideen urraketa jasan zutenekiko erreparazioa egite aldera".

Hala adierazi du 1936ko kolpe militarreko identifikatu gabeko hamabi biktimaren gorpuzkien hobiratzean, eta jadanik duela zenbait urte lurpetik atera zirenak Urtzanten eta Añezkarren. Ekitaldia Iruñeko hilerrian egin da, udalarena den panteoi batean, eta bertan izan dira Joseba Asiron alkatea, Bake, Bizikidetza eta Giza Eskubideen zuzendari nagusi Alvaro Baraibar eta Nafarroako Fusilatuen Senideen Elkarteko (AFFNA 1936) lehendakari Olga Alcega.

"Egia, erreparazioa, justizia" hitzekin gorpuzkien aurrean lore-eskaintza bat egin ondoren, Ollo kontseilariak adierazi du gainera, "memorik, egiak eta justiziak herrialde bat nahasketa, zinismo eta ahanzturaren espiral batean harrapatuta ez geratzea uzten dutela", eta "egia, justizia eta biktimei dagokien erreparazioa egiteko eskubidean aurrera egiteko" garaia dela, "memoriaren bidez senideei erreparazioa egiteko garaia".

Ekitaldia Iruñeko Udalarekin dagoen lankidetza-konpromisoaren barnean sartzen da, Memoria Historikoaren Foru Legean jasoa, desagertutako pertsonak hobiratzeko eta hobitik ateratako baina beren senideek erreklamatu gabekoak, duintasunez nonbaiten atseden hartzeko toki bat izateko xedearekin, harik eta identifikatuak diren arte. DNA aztertuz aurkitutako gorpuzkiak norenak diren jakiten denean, familiei jakinaraziko zaie, eta haiek erabakiko dute gorpuzkiak nora eraman.