Erakunde horrek (haren hautagaitza Garapen Solidariorako Erakundeen Sareak aurkeztu du) hain kaltetuak ez diren zonalde batzuetan ere talde ahulei arreta ematen die, esaterako: buruko gaixotasunak dituztenei, desgaituei, gaitz kronikoak dituztenei, drogazaletasuneko arazoak dituztenei edo beste baztertze-egoera batzuetan daudenei.

Juan Ciudadek dituen helburuen arabera, bere ekintza lau jarduera-eremuren bidez antolatzen du. Honako hauek dira: osasun-azpiegiturak eraiki nahiz hornitzea; laguntza humanitarioa bidaltzea herri kaltetuenei osasun-arreta emateko; sentsibilizazio-proiektuak eta garapenerako hezkuntza; eta boluntariotzako programak.

Saria Ekuatore Gineako Paciencia Melgar ahizpak jasoko du Iruñean. 47 urte ditu eta Inmaculada Concepción Misiolarien kongregaziokoa da, eta hamaika urtez erizain aritu da Monroviako (Liberia) San Joan Jainkoarenaren Anaien ospitalean, hildako Miguel Pajares aitarekin batera, baliabide gutxiko gaixoak artatzen. Osasun-zentro horretan, ebolak kutsatutako pertsonak artatu dira azken hilabeteotan, eta han kutsatu zen birusarekin. Gaitza gainditu ondoren, haren seruma Teresa Romero erizaintzako laguntzailearen tratamenduan erabili da.

"Nafarroa" Nazioarteko Saria 2001ean sortu zen Laboral Kutxaren laguntzarekin, eta haren helburua da, garapenerako nazioarteko lankidetzako edozein arlotan beren ibilbideagatik nabarmendutako gobernuz kanpoko erakundeek eta pertsona fisikoek egindako lana saritzea da eta, bereziki, Milurteko Garapen Helburuak betetzen lagundu dutena.

Sari horrekin ere nafarrak kontzientziatu eta sentsibilizatu nahi dira, ikus dezaten herrialde eta herri txirotuetako sektore sozial kaltetuenen alde borondatezko lan solidarioak zer garrantzi duen.

Laboral Kutxa sariaren finantzaketa guztiaz arduratzen da, 27.000 euro; 15.000 sarirako eta 12.000 kudeaketa-gastuetarako. Aldiz, Gizarte Politiken Departamentuak honako hauei lotutako lanak betetzen ditu: sariaren zabalkundea, epaimahaia osatu eta antolatzea, hautagaitzak jaso eta aztertzea eta saria banatzeko ekitaldia.

Aurtengo edizioan 14 hautagaitza aurkeztu dira, eta haietatik epaimahaiak lau finalista aukeratu ditu, Juan Ciudad Fundazio sarituaz gain. Gainerako finalistak Anna Ferrer, Barraquer Fundazioa, Alta Verapazko Pastoal eta The Citizens Foundation izan dira.

Aurreko edizioetan honako hauek jaso dute sari hori: Martha Pelloni argentinarrak (2013), Mama Tunza keniarrak (2012), Manuel Elkin Patarroyo zientifikoak (2011), Creative Handicrafts GKEak (2010), Aguaricoko Bikariotza Apostolikoak (2009), Mama Samateh Saidy eta Wassu Gambia Kafo GKEak (2008), San Joan Jainkoaren Anaiak (2007), Fe y Alegría mugimenduak (2006), UNASO erakundeak (2005), Errefuxiatuentzako Jesuita Zerbitzuak (2004), Karitateko Ahizpa Misiolariak (2003) eta Muhhamad Yunnus-ek (2002).

Miguel Indurain txirrindulari profesional ohia izan da epaimahaiburu eta epaimahaia honako hauek osatu dute: Gizarte Politiken kontseilari Iñigo Allik; Nafarroako Laboral Kutxako lurralde- zuzendari Javier Cortajarenak; Nafarroako Medicus Mundiko sortzaileetako bat den Miguel Ángel Argalek; Nazio Batzuen Milurteko Kanpainaren Tokiko Hiri eta Gobernuekin (Europa) harremanak izateaz arduratzen den Xavier Longanek; garapenerako hezkuntzako aditu María Luz Ortegak; eta Nafarroako UNICEFeko koordinatzaile Maider Gabilondok. Idazkari-lanak, berriz, Pertsonak Garatu eta Gizarteratzeko Arreta Zerbitzuko zuzendari Andrés Carbonerok egin ditu.