Entrenatzaileen titulazioa, gurasoen jokabide desegokien zehapena eta jokalariek kirol-klubekin duten loturaren iraupena dira, adingabeentzako kirol-ekintza publikoen foru-dekretuan arautuko diren zenbait alderdi. Foru-dekretu hori Nafarroako Gobernua ari da lantzen lehiaketa horien segurtasuna eta hezkuntza-alderdia bermatzeko asmoz.

Nafarrek arau honen zirriborroari beren iradokizun eta ekarpenak egin diezazkiekete azaroaren 4ra arte; zirriborro hori honako webgune honetan dago eskuragarri kontsultatu ahal izateko: www.deporte.navarra.es.

Bestalde, Nafarroako Kirol eta Gazteria Institutua foru-dekretu honen proiektua inplikatutako eragileei aurkezten ari zaie egunotan Iruñean egindako lan-saio batzuetan: kirol-federazio, kiroletako udal-teknikari edo klubei, esaterako.

Arau honek Nafarroako Kirolaren Plan Estrategikoan jasotako ekintzetako bati erantzuten dio, 2010ean Parlamentuan onartutakoa. Hiru helburu nagusi ditu: kirol-ekintza horiek segurtasun-baldintza egokietan egitea, adingabeen garapen orekatuaren alde egitea eta beren maila, gaitasun eta hezkuntza-beharrei egokituta izatea.

Nafarroako Gobernuak onartu aurretiko aldaketak izan ditzakeen foru-dekretu horren zirriborroak, aurreikusten du adingabeen kiroletako entrenatzaile edo begiraleek titulazio zehatz batzuk izango dituztela zeregin horiek erabateko bermeekin egin ahal izateko.

Gainera, dekretu horrek arau-esparru bat finkatuko du eta, hari esker, adingabeen kirol-ekintzetako guraso edo ikusleak zehatu ahalko dira jokabide desegokiak, neurrigabeak badituzte edo bilatu nahi den hezkuntza-espirituaren aurkakoak badituzte. Pertsona bera (kirol-bidea erabiliz) nahiz haren kluba edo harremana duen kluba, hala badagokio, zehatu ahal izatea jasotzen da.

Arauak adingabeek beren kirol-klubekin duten loturaren gehieneko iraupena ere finkatuko du; oro har urtebetekoa izango da, 14 urtetik gorakoa bada salbu eta klubaren eta gurasoen edo legezko tutoreen arteko berariazko izenpetutako itun bat ez badago behintzat; itun horren arabera, konpromisoa bi denboralditarako izango zen (ez gehiago).

Foru-dekretuak beste gai batzuk ere arautuko diru, esaterako: prestakuntzako ekintzen publizitatea (kirol-eskolak, udako campusak…), eta kirolari ezagunen irudia ezingo dute erakargarritasun modura erabili, baldin eta iragartzen duten ekimenarekin inplikatu ez badaude; kirol-ekintza publikoak praktikatzen dituzten adingabeen osasun-laguntza; eta haiek borroka-kiroletan parte hartzea norbere babeserako elementuak erabiltzen ez badira.