Deialdiei dagokienez, horiek Nafarroako Gobernuak onetsiko ditu. Hala ere, Nafarroako Lanbide Heziketaren Kontseiluan dauden sindikatuen eta enpresen erakundeek deialdi espezifikoak egitea eskatu ahal izango dute enpresa, sektore profesional eta produktibo zein laneratzeko zailtasun bereziak dituzten kolektibo jakinen premiei erantzuteko. Aukera hori profesionalen edo enpresen elkarteek ere izango dute, eta eskaerak aipatutako kontseiluan ordezkari diren eragile ekonomiko eta sozialen bidez bidaliko dituzte.

Parte hartzeko prozesua

Testuan zehaztutakoaren arabera, egiaztagiria eskuratu nahi dutenek aurrez izena emateko eskaera aurkeztu beharko dute, prozedura gauzatzeko baldintzak betetzen dituztela ziurtatzen duten agiriekin batera. Eskaera ebaluatu egingo da eta, hala dagokionean, onarpen-batzorde batek onartuko du. Prozesuan sartu ondoren, parte-hartzaileak hiru fase burutu beharko ditu: Aholkularitza, lanbide-gaitasunaren ebaluazioa eta erakutsitako gaitasunen egiaztapena eta erregistroa.

Lehen fasea derrigorrezkoa izango da, eta helburua hautagaia bideratzea izango da: dokumentazio egokia prestatzen edo prestakuntza-aukerei buruz aholkuak ematen lagunduko zaio. Horretarako, taldeko zein banan-banako aholkularitza-saioak eskainiko dira.

Ebaluazio-fasean, batzorde arduradunak eskatzaileak aurkeztutako agiriak eta lehen faseko aholkulariaren txostena aztertuko ditu. Horiek onetsiz gero, interesdunak prestakuntzan eskatzen den lanbide-gaitasuna baduela eguaztatzeko ebaluazioa egingo da. Amaitzeko, proba hori gainditzen duten hautagaiek lanbide-gaitasunaren egiaztagiria eskuratuko dute.

Interesa dutenei laguntzeko, informazio- eta orientazio-zentroen sarea sortuko da ebaluazio-prozeduraren ezaugarriak eta faseak, prozeduran sartzeko modua, probak eta abar jakitera emateko. Sare horren parte izango dira LHko zentro integratuak eta enplegu-agentziak, eta LHko beste zentro batzuk, helduentzako ikastetxeak, NEZek edo beste organismo batzuek akreditaturiko prestakuntza-zentroak ere izendatu ahal izango dira.

Prozeduraz arduratzen diren unitateak

Azkenik, foru-dekretuak prozeduraz arduratzen den antolaketa-egitura ere zehazten du. Nafarroako Enplegu Zerbitzua (NEZ), Zentro Berekien eta Esperientziaren bidezko Egiaztapenerako Atalaren bidez, prozedura antolatu, koordinatu eta kudeatzen duen organo arduraduna izango da. Egitekoa burutzeko, NEZen beste bi unitateren laguntza teknikoa jasoko du: Nafarroako Lanbide Kualifikazioen Institutua eta Prestakuntza Garatzeko Atala. Gainera, egiaztapen-batzorde bat eratuko da, kontsulta-emailea, Nafarroako Gobernuko arduradunek eta Nafarroako LHko Kontseiluan ordezkaritza duten erakunde sozial eta ekonomikoetako ordezkariek osaturikoa. Gaitasunak egiaztatzeko deialdiak antolatu, gainbegiratu eta jarraitzeaz arduratuko da batzordea.

Amaitzeko, foru-dekretuaren proiektuak ebaluazio-zentroak eta ebaluazioak egiteko ardura duten batzordeak arautzen ditu, baita prozeduraren lehen fasean parte hartzen duten aholkularien jarduteko modua ere.