Nafarroako Gobernuak Sphera aldizkariaren hamargarren alea argitaratu du, eta bertan Solidaritaterako Nafarroako Nazioarteko Sariaren lehen hamar edizioak jorratu dira; sari hori Foru Exekutiboak ematen du Euskadiko Kutxaren laguntzarekin, eta iaz Vianako Printzearen Solidaritate Saria izena ezarri zitzaion.

Hamar ediziotan saritutakoak aipatzen dira: Muhhamad Yunnus, mikrokredituen sortzailea (2002); Karitateko Ahizpa Misiolarien Kongregazioa, Kalkutako Ama Teresak sortua (2003); Errefuxiatuentzako Jesuita Zerbitzua (2004); Uganda Network of Aids Service Organisations, Ugandan GIB/HIESaren aurka egindako lanarengatik (2005); Fe y Alegría, Latinoamerikan kalitateko hezkuntza izatearen aldeko mugimendua (2006); San Joan Jainkoarenaren Ordena Ostalaria, gaixoak artatzera zuzendua 50 herrialde baino gehiagotan (2007); Mama Samateh eta Wassu Gambia, emakumeen mutilazio genitalaren aurkako borrokarengatik (2008); Vicariato Apostólico de Aguarico-Ekuadorreko Misio Kaputxinoa, jatorrizko herrien eskubideen alde egindako lanarengatik (2009); Creative Handicrafts, Indiako Mumbai hirian emakumeen duintasuna eta independentzia sustatzeagatik (2010); eta Manuel Elkin Patarroyo, infekzio-gaixotasunak errotik kentzeko lan egiten duen zientzilaria (2011).

Gainera, aldizkarian, azken sarituari, Manuel Elkin Patarroyori, egindako elkarrizketa ageri da. Malariaren aurkako borrokan aitzindaria da, eta %30 inguruko eraginkortasuna duen inokulantea aurkitu du. Horren patentea Osasunaren Mundu Erakundeari eman zion Gizateriaren onurarako.