LAP horietan ezarritako ildo nagusien bidez, jasangarritasuna, lurralde-kohesioa, lurraldearen erabilera arrazoizko eta orekatua, natura-balioen eta ondare historikoaren babesa bermatu eta hiri-inguruaren kalitatea hobetu nahi da. Horretarako, estrategiak hiru bloke tematikotan banatzen dira:

- Natura- eta kultura-ondarea: inguru fisikoa, paisaia, ondare arkeologikoa, arkitektonikoa eta hirikoa, intereseko ibilbideak, etab. Inguru fisikoa arautzea plan estrategikoa da Nafarroako lurzoru ez-urbanizagarrirako. Era berean, paisaiaren antolamendua arautu eta Nafarroako Paisaiaren Plana egitea planteatu da.

- Hiri-sistema: egoitza-asentamenduak, ekipamenduak eta zuzkidurak, ekonomia- eta ekoizpen-sistema, etab. LAPetan Moderna Plana jaso, Nafarroarako sektore estrategikoak identifikatu eta orientazio-izaerako lurralde-oinarria ematen zaie.

- Azpiegiturak: garraioa (mugikortasuna eta inguru logistikoak) eta komunikabideak, energia, hornikuntza eta saneamendua, hondakinen bilketa eta tratamendua, hidraulikoak, etab.

LAP bakoitzean lurralde bakoitzerako jarduera-ildo nagusiak eta proiektu estrategiko giltzarriak jaso dira, Nafarroa osorako interesgarriak direnak. Horien artean, besteak beste, Nafarroa 2012 Planera bildutakoak nabarmendu behar dira.

1. LAP Pirinioei lotutakoa da eta Erro, Aezkoa, Zaraitzu eta Erronkari ibarretan kokatutako 39 udalerrik eta Irunberri eta Agoitz Pirinioen aurreko arroek osatzen dute. Eremu honek Foru Komunitatearen ia %20 barruan hartzen du, baina bertan Nafarroako biztanleen %2 soilik bizi da. 1. LAPren bidez biztanleria hori finkatu eta mantendu nahi da. Espazio hori inguru natural bakarra da, eta ondare arkitektoniko eta artistiko baliotsua du. Antolamendu-planak lurraldea berrorekatzea proposatzen du, biztanlegune nagusiak indartuz eta haien artean osagarriak izan daitezen lortuz. Horren bidez, herritarrek zerbitzuak eskura izatea bermatu nahi da, errepideko komunikabideen bidez, eta landako bizimodu-ereduari balioa gehitu nahi zaio, garapen jasangarria sustatuz, esparru sozial, ekonomiko eta ingurumenekoan.

2. LAPen Nafarroa Atlantikoa jorratu da. Inguru honetan, kultura- eta ingurumen-balioei eta jarduera ekonomikoen aniztasunari dagokienez uniformetasuna duten lekuak sartzen dira. Ipar-mendebaldeko 44 udalerrik eta 35 kontzejuk osatzen dute (ardatz horretan, besteak beste, Altsasu, Leitza eta Elizondo sartzen dira). Inguru honetan 50.000 biztanle inguru bizi dira. Egon dauden azpiegiturak, komunikabideak eta lurraldearen potentzialtasuna aprobetxatuz, biztanleak ezartzea eta enplegua sortzea lortu nahi da. Hori dela eta, ekoizpen-sektoreak dibertsifikatu nahi dira, hainbat jarduera barruan hartuta, besteak beste, telekomunikazioak, ikerketa, teknologia berria, turismoa, nekazaritza eta abeltzaintza espezializatuak.

3. LAPek inguru zentrala (Iruñerria) barruan hartzen du. Biztanle gehien hartzen ditu, ia 315.000. 57 udalerrik osatzen dute. Barruti honetan, erronka hiri- eta landa-lurraldeen arteko loturak optimizatzea da, periferian kokatutako landa-izaerako nukleoek landa-izaera eta –paisaia galdu ez ditzaten, egon dagoen metropolizazio-prozesua gorabehera. LAPen bidez, hiri- eta lurralde-garapen orekatua lortu nahi da, metropoliaren zabalkundea kontrolatuz eta inguruan tokiko garapen-poloak bultzatuz. Horretarako, jasangarritasun-irizpideekin beti, lurraldea eskualde-ikuspegitik gobernatu nahi da, udalez gaindiko espazioen, azpiegituren eta ekipamenduen kudeaketa bermatuta.

4. LAPek Erdialdea barruan hartzen du. Estellerriko eta Nafarroaren erdialde-ekialdeko 88 udalerrik osatzen dute, Tafalla-Erriberri eta Zangoza inguruak barne hartuta. Inguru hau zenbait esparruren arteko bitarteko lurraldea da, eta enplegua eta herritarren ezarpena bultzatzen duten aukerak aprobetxatzea proposatzen da. Era berean, barruko bide-azpiegiturak hobetzea, aniztasuna eta konektibitate ekologikoa bermatzea, hiri-sistema hiru gune nagusien inguruan (Lizarra, Tafalla-Erriberri eta Zangoza) indartzea eta ongizatearen gizartea hedatzeko bitarteko nukleoen sarea sendotzea planteatu da.

Amaitzeko, 5. LAPek, Ebroren Ardatzari lotutakoak, 44 udalerri eta biztanleen %25 barruan hartzen ditu. Unitate geografiko berezitua da, lurraldeari dagokionez homogeneoa, eta lotura estua du auzoko autonomia-erkidegoekin. Espazio estrategikoa izango da eta jarduerak eta garapen ekonomikoa sortuko ditu. Hori guztia baliabide hidrikoen babesari, energia-baliabideen arrazoizko erabilerari eta hiri-ondarea berreskuratzeari uko egin gabe.

LAP horiek formula egokia izan nahi dute lurralde-planifikazioa lurralde guztien garapen-aukerak identifikatzeko esparrua izan dadin, hiri-inguruei zein landa-inguruei dagokienez. Xede nagusia herritarren bizi-kalitatea hobetzea izango da.