Terapiaren bidez, pertsona horiek berrezi eta errehabilitatu nahi dira, beren jarrerak, jokaerak eta pentsamoldeak aldatzeko.
Programaren iraupena bi urte ingurukoa da. Epe horretan, pentsamenduarekin, emozioekin eta jarrerarekin lotutako alderdiak lantzen dira, banakako eta taldekako saioetan. Erasotzaileek beren burua kontrolatzeko estrategiak gara ditzatela, beren komunikatzeko gaitasunak hobe ditzatela eta beren egintzen erantzukizuna har dezatela lortu nahi da.
Kasu gehienetan, epai judizial bidez ezartzen da programa honetara sartu beharra, baina erasotzaileak bere borondatez ere erabaki dezake, profesionalek bideratu eta kasua baloratu ondoren.
Terapiak arrakasta izan dezan, garrantzitsua da arazo bat dagoela aitortu eta hura aldatzeko borondatea edukitzea.