Nafarroako Gobernuak ondorengo adierazpen instituzionala onartu du ostegunean, urriaren 15ean, izango den Landa-eremuko Emakumeen Nazioarteko Eguna dela-eta:

“Nafarroako Gobernuak, urriak 15 honetan, Landako Emakumeen Nazioarteko Egunean, landa-eremuko emakumeen funtzio eta ekarpen erabakigarriak aitortu nahi ditu nekazaritza eta landa-eremuaren garapena sustatzeko, elikagaien segurtasuna hobetzeko eta landa-pobrezia desagerrarazteko, NBEk ospakizun hau ezartzean adierazitako moduan.

Landa-eremuko emakumeek funtsezko papera betetzen dute aurrean ditugun aldaketa sozialen, ingurumen-arlokoen eta ekonomikoen erronkei aurre egiteko; hau da, azken finean, Nafarroako Gobernuak 2030 estrategiatik sustaturiko iraunkortasunaren erronka.

Aitortu behar da gizarteak zorra duela landa-eremuko emakumeekin; izan ere, ikusezin bihurtu ditu haien jarduera nahiz zenbait zailtasun gainditzeko egin behar duten ahalegin osagarria, tartean, lana eta bizitza pertsonala uztartzea, lan-merkatuan sartzea, zerbitzuak eskuratzea, mugikortasuna, baliabideak,…, landa-eremuan horiek larriagotu egiten dira-eta. Ondorioz, gure Berdintasun Legean (17/2019 Legea), landa eta hiri ingurune ezberdinetan dauden aldeak landu behar direla azpimarratzen da, genero-berdintasunetik eta ahalduntzearen eta zeharkakotasunaren bitartez; estrategia eraldatzaile horiek Beijingo Konferentzian ezarri ziren (1995).

Klima-aldaketa edo despopulazioa bezalako erronken aurrean, lanean jarraitu behar da landa-eremuko emakumeen premiei, lehentasunei eta ekarpenei erantzuna ematen diegula ziurtatzeko, edozein politika publikok konpromisoa izanik kontuan hartzeko landa-eremuko emakumeen ikuspegia eta emakumeek politika horietan modu aktiboan parte hartzeko duten aukera”.