María Chivite, Nafarroako Lehendakariak, foru Gobernuak hezikidetzarekin eta SKOLAE programarekin duen konpromisoa azaldu du gaur Madrilen emakumeen aurkako indarkeria desagerrarazteko Nazioarteko Eguneko ekitaldi instituzionalean. Ekitaldian, Isabel Celaá, jarduneko ministroak, Chivite Lehendakariari, Lehendakaritzako, Gorteen Harremanetarako eta Berdintasunerako Ministeritzak “genero indarkeriaren aurkako heziketa eta sentsibilizazio” kategorian SKOLAEri eskainitako saria eman dio.

Nafarroako Gobernuaren izenean han izan dira, baita ere, Hezkuntzako kontseilaria, Carlos Gimeno, eta Hezkuntza Departamentuko Inklusio, Berdintasun eta Bizikidetza zerbitzuaren burua, Mará José Cortés.

Ekitaldia gaur goizean izan da Madrilgo Matadero zentroan, Zinetekako Azkona aretoan, eta Lehendakariak eskerrak eman dizkio Ministerioari "positiboan egindako eta eraikitako eta geratzeko sortutako programa" dela-eta emandako sariarengatik; halaber, plana idatzi duen eta egun zabaltzen aritzen den profesional-taldea eskertu du. Horrez gain, honela azpimarratu du: “SKOLAE hezikidetzarekin dugun konpromisoa da, indarkeria matxistarik eta sexu-abusu eta -erasorik gabeko berdintasunezko gizartearekin dugun konpromisoa. Gizarte askeagoa eta zuzenagoa nahi dugu, horrelakoa baita berdintasunean hezten, hazten, garatzen eta bizitzen den gizartea”.

Chivite Lehendakariak adierazi du Nafarroako Gobernuak konpromisoa hartua duela funts publikoak jasotzen dituzten zentro guztietara programa hedatzeko. “Hezikidetza, hezkuntza afektibo sexuala eta sexu-osasuneko hezkuntza programa honi erresistentzia jartzen ari diren sektoreek ere ulertu eta onartu behar dute”; erresistentzia hori ezin dugu aintzakotzat hartu gabe utzi, emakumeen aurkako indarkeriari buruzko datu kezkagarrietan hezkuntzak duen eragina ukatzea errealitatea ez ikusi nahi izatea baita”.

SKOLAE programak urtean 250.000 euroko aurrekontua du, eta horren helburua da ikasle guztiek beren bizi-proiektua hautatu ahal izateko lan egitea, askatasunetik eta aukera-aniztasunetik, genero-baldintzarik gabe, desberdintasunak identifikatzen eta haien kontra borrokatzen ikasiaz. Hezkuntza Departamentuak bultzatutako hezikidetza proiektua 2017-18 ikasturtean jarri zen abian Nafarroako 16 ikastetxe publikotan pilotajea eginez, eta, egun, 163 ikastetxetan aplikatzen da programa. Gainera, 2.000 ikasle prestakuntza garatzen ari dira, eta 45 pertsonak tutorizatzen dituzte programa garatzen duten irakasleak.

Sarituak

Berdintasun Ministerioak genero-indarkeria desagerrarazteko konpromisoa hartutako erakundeak eta pertsonak saritzen ditu urtero, eta aurtengo XVI. edizioan honako erakunde hauek ere saria jaso dute: Médicos del Mundo, “Emakumeen aurkako bestelako indarkeriak” kategorian, emakumeen genitalen mutilazioaren aurka egiten duen lanarengatik; RTVE eta EFE agentzia “Matxismoaren aurkako kazetaritza” kategorian, "Erahildako mila emakume" proiektu interaktiboarengatik; Gijongo Malva Etxea “Genero-indarkeriaren biktimak artatzeko eredu-proiektua” kategorian, biktimak eta haien seme-alabak artatzeko proiektu aitzindariarengatik; eta Jordi Casanovak sortutako eta Miguel del Arcok zuzendutako “La Jauría” antzezlana, “Kultura genero-indarkeriaren aurka” kategorian.

Horrez gain, Amelia Tiganus, emakumeen salerosketatik bizirik irtendako errumaniarra, egun Euskal Herrian bizi dena, gainditze-mailan saritu dute. Azkenik, Concha Velascok berdintasunarekin eta genero-indarkeriaren aurkako borrokarekin konprometitutako karrera profesional osoaren sari berezia jaso du.

Ekitaldira joandakoak

Calvo ministroaz gain, ekitaldian honako hauek izan dira: Barneko jarduneko ministroa, Fernando Grande-Marlaska; Hezkuntza eta Lanbide Heziketako jarduneko ministroa, Isabel Celaá; Kultura eta Kiroleko jarduneko ministroa, José Guirao; Osasun, Kontsumo eta Gizarte Ongizateko jarduneko ministroa, María Luisa Carcedo; Berdintasuneko Estatu Idazkaria, Soledad Murillo; Genero Indarkeriarako Gobernuaren delegatua, Rebeca Palomo; Emakumearen Institutuko zuzendari nagusia, Rocío Rodríguez; eta Etxeko Indarkeriaren eta Genero Indarkeriaren Behatokiko (egoitza Botere Judizialeko Kontseilu Nagusian duena) lehendakaria, Ángeles Carmona. Horiez gain, bertan izan dira Estatuko Segurtasun Indarren eta Kidegoen ordezkariak, genero-indarkeriaren aurkako borrokan inplikaturiko profesionalak eta genero-indarkeriaren aurkako borrokarekin loturiko gobernuz kanpoko erakundeak.