Nafarroako Gobernuko bigarren lehendakariorde eta Memoria eta Bizikidetzako, Kanpo Ekintzako eta Euskarako kontseilariak, Ana Ollo Hualdek, eta Espainiako Gobernuko Lurralde Politikako eta Memoria Demokratikoko Ministerioko Memoria Demokratikoko estatu-idazkariak, Fernando Martínez Lópezek, negoziazioei ekin diete berriz ere, Nafarroaren eta Estatuaren artean San Kristobaleko gotorlekuaren inguruko protokolo orokor bat sinatzea ahalbidetuko duten oinarriak ezartzeko. Protokolo horrek Ezkaba mendiko gotorlekua Memoriaren Leku izendatzea ahalbidetuko du, eta administrazioen artean eskumen-erantzukizunak banatu eta koordinatuko dira esparruaren zati bat memoria-erabilerarako irekitzeko. Bi arduradunek, aurreko legegintzalditik datorren gai hori indartzeaz gain, berretsi egin dute bi gobernuek memoriaren eta bizikidetzaren politika publikoak mantentzeko eta indartzeko duten konpromisoa eta apustua, legealdi berri honi begira. 

Bi arduradunek bilera bat egin zuten atzo Madrilen, beren lantaldeek lagunduta. Nafarroaren aldetik, Memoria eta Bizikidetzako zuzendari nagusi Martín Zabalza eta Nafarroako Memoriaren Institutuko arduradun José Miguel Gastón ere bertaratu ziren. Lurralde Politikako eta Memoria Demokratikoko Ministerioaren aldetik, estatu-idazkaria Zoraida Hijosa Biktimei Laguntzeko eta Memoria Demokratikoa Sustatzeko zuzendari nagusi berriarekin egon zen. 

Legegintzaldi berriko lehen bilera honek balio izan du, beraz, elkarrizketei berriro ekiteko eta testuinguru horretan kokatzeko eta ebazteke zeuden gaiak berriz bultzatzeko. Besteak beste, gai hauek jorratu ziren: "Hormigoi-mugak" programari buruzko lankidetza (bunkerrei buruzkoa) eta 2022ko Memoria Demokratikoari buruzko Estatuko Legearen eta foru-arauaren beraren garapena, ibilbide luzeagoarekin. Jakina denez, Ministerioa bere lehen "Memoria demokratikoaren aurkako sinbolo eta elementuen katalogoa" eta "Memoria Demokratikoko Lekuen, Sinboloen eta Memoria-lekuen Estatuko Inbentarioa" egiteko prozesuan dago; Nafarroa, berriz, 23 memoria-leku izendatuta ditu eta ia ehun bat memoria-guneren sarea du, eta sinbologia frankistaren errolda ere eguneratzen ari da, sinbolo horiek kentzen jarraitzeko. 

San Kristobalgo gotorlekuaren etorkizunari dagokionez, bi lantaldeak bat etorri ziren bilera honetan, San Kristobalgo gotorlekua memoria-leku gisa aitortu eta erabiltzeko baterako lankidetza-araubide bat sinatu behar dela –tokiko erakundeak ere kontuan hartuta –. Araubide horretan, higiezina erabiltzeko aukera emateko alde bakoitzaren ekintzak eta memoria demokratikoa berreskuratu, babestu eta zabaltzeko jarduera nagusiak zehaztuko dira.

Nafarroako Gobernuak eta Estatuko Gobernuak dokumentazioa trukatzen eta proposamenak zehazten eta gauzatzen jarraituko dute, Memoriaren testuinguruan garrantzi berezia duen enklabe horretan jarduteko protokolo orokorra laster sinatzeko.