Nafarroako 700 bat emakumek jasoko dute aurten beren trebakuntza eta enplegurako aktibazioa hobetzeko diru-laguntzen deialdi berri bat. Nafar Lansare Nafarroako Enplegu Zerbitzuak, Eskubide Sozialen Departamentuaren mendekoak, 1.766.301 euroko guztizko aurrekontuarekin abiarazi ditu laguntza horiek 2022rako, Europako MRR funtsekin bultzatutako Berreskurapen, Eraldaketa eta Erresilientzia Planaren barruan, zehazki, landa-eremuetan eta hiri-eremuetan emakumeei laguntzeko programaren barruan.

Deialdia Nafarroako toki-erakundeentzat eta irabazi asmorik gabeko erakundeentzat da, eta horren helburua da lan-munduan sartzeko ibilbide indibidualizatuak eta pertsonalizatuak garatzea; besteak beste, enplegurako orientazioa, prestakuntza zeharkako gaitasunen indartzea eta lan-praktika konbinatuko dira, enplegua eskuratzeko, aldi berean, berdintasun eraginkorra eta diskriminazio eza bultzatzearekin batera.

Ekintza horiek hiru ildotara bidera daitezke: gaitasun eta enplegu digitalak garatzea, gaitasun eta enplegu berdeak garatzea –gehienez 80 parte-hartzaile programa bakoitzeko- edo 5.000 biztanletik beherako udalerrietan programak garatzea –gehienez 30 parte-hartzaile programa bakoitzean-.

Programan parte hartu ahal izango dute prestakuntza- edo lanbide-kualifikazioko edo birkualifikazioko premiak dituzten emakumeek. Gainera, langabezian egon beharko dute eta NEZ-NLren agentzietan enplegu-eskatzaile bezala izena emanda.

Eskubide Sozialetako kontseilari Mª Carmen Maeztuk nabarmendu du honako hau bezalako deialdiek duten “garrantzia”; izan ere, “langabeziaren eta emakumeek jasaten duten soldata-arrakalaren aurka borrokatzeko” aukera ematen dute, eta “landa-ingurunea oso kontuan hartzen dute. Horrela, Gobernu hau hainbeste kezkatzen duen despopulazioari aurre egin dakioke”.

Enpleguaren bilaketa aktiboa

Programan lan-orientazioaren ekintzak eta parte-hartzaile bakoitzaren banakako profilaren diagnostikoa konbinatuko dira, enplegurako haren ibilbide espezifikoa diseinatze aldera. Ibilbide horretan, aukera profesionalak, prestakuntza-ekintzak eta enplegua aktiboki bilatzeko jarduerak sartuko dira.

Horrez gain, tutore edo orientatzaile batek akonpainamendu pertsonalizatua emango du, eta lan-mugikortasuna kudeatzeko laguntza emango da. Ibilbidean kualifikazio eta birkualifikazio profesionaleko prestakuntza-ekintzak egon daitezke, batez ere Foru Komunitateko merkatuak eskatzen dituen eremu eta jarduera profesionalekin loturiko edukiei buruzkoak: digitala, berdea, ekonomia zirkularra, hondakinen tratamendua, aurrezpen edo eraginkortasun energetikoa, energia berriztagarriak, garraioa eta mugikortasun iraunkorra, uraren kudeaketa, birgaitze eta eraikuntza iraunkorrak, basogintzako eta nekazaritzako aprobetxamenduak.

Ibilbide bakoitza gutxienez sei hilabetekoa izango da eta gehienez zortzi hilabetekoa. Parte hartzen duten emakumeen %20ak gutxienez lortu beharko du lan-munduan sartzea.

Eskaerak egiteko epea jada irekita dago, eta xehetasun guztiak deialdiaren oinarrietan kontsulta daitezke esteka honen bitartez.