Maria Chivite Nafarroako Lehendakaria, Remirez eta Aierdi lehendakariordeak talde parlamentarioekin bildu dira gaur goizean, Ukrainako krisiaren eraginagatik Nafarroak hartuko dituen neurrien berri emateko. Bileran, Chivitek eskatu du bi erakundeek, Nafarroako Gobernuak eta Parlamentuak, dagokion “mailan gaudela eta erantzuten dugula erakutsi behar dugula”, eta adieraziz “parte-hartzetik eta ekarpenetik gauzak hobeto egin ditzakegula”.

Lehendakariak nabarmendu du, Errusiak Ukraina inbaditu ondoren sortutako egoerari dagokionean eta hori “Nafarroan ere eragin humanitarioa, soziala eta ekonomikoa izaten ari dela kontuan hartuta”, Gobernua “dagokigun hartan inplikatuko da eta eraikitzaileak izango gara foroetan eta maila guztietan”. Lankidetza aipatu du “egoera larri horrek pertsonentzat, familientzat, enpresentzat eta ekonomiarentzat oro har sortzen dituen ondorioak arintzera edo gutxiagotzera laguntzen duten erabaki onenak hartzeko” tresna gisa.

Neurriak energiaren eta lehen sektorean

Chivitek talde parlamentarioei azaldu die Foru Exekutiboak jada egin zituela zenbait proposamen Presidenteen Konferentzian, eta Espainiako Gobernua prestatzen ari den Plan Nazionalean ere ekarpenak egingo dituela, Ukrainaren inbasioaren inpaktuak eragindako krisiari erantzuna ematearren. Ekarpen horiek, halaber, EGK-ko kideek ere egingo dituzte. Eta hori guztia energiaren kostua merkatzeko, gehien kaltetutako sektoreak eta familia ahulenak artatzeko eta berriztagarrien proiektuak bultzatzeko egingo da. Era berean, egoera honen ondorioz jarduera geratu edo murriztu behar duten langile eta enpresei estaldura emateko mekanismoak aktibatzeko eskatuko da. Horrez gain, lehen sektoreari dagokiona modu espezifikoan planteatuko da, energiari nahiz zerealaren produkzioa gehitzeari dagokionean, eta lehengaien etorrera eta sektorearen beste zenbait gai espezifiko erraztu ahal izango dira.

Lehendakaria kezkatuta agertu da inflazioarengatik, %7,7koa baita, eta egungo energia egoera eta lehengaien eta horniduren eskasiarengatik; izan ere, industriak Foru Komunitateko BPGdaren %30era iristen da, eta “industria-jardueraren gaineko eragin guztiek inpaktu negatiboa dute bai kaltetutako adarretan, bai ekonomia osoan, oro har”, esan du.

Fiskalitateari dagokionean, Chivitek honela adierazi du: “neurri ekonomikoak testuinguruetara egokitu behar dira, baina kontuan izanik diru-bilketarik gabe ezin zaiela zerbitzu publikoei eta prestazioei eutsi edota herritarrak behar bezala artatu”. Hori dela-eta, zergak masiboki jaistearen aldekoa ez dela esan du.

Errefuxiatuei harrera egin eta haiek artatzeari dagokionean, Lehendakariak gogorarazi du Exekutiboaren barruan lantalde bat aktibatu dela eta bulego espezifiko bat sortu ekimenak eta elkartasuna bideratu eta egoerak koordinatzeko. Halaber, lanean ari dira administrazio eta egiaztatutako erakunde guztiekin, tartean Gurutze Gorria eta CEAR, jarduerak eta protokoloak kudeatzeko, eta Ukrainako elkarteekin ere bai.

Bileran, Chivitek talde parlamentarioei azpimarratu die une zail hauetan “beti jarri behar ditugula aurretik Nafarroa, herritarrak, enpresak eta iristen ari diren eta iritsiko diren errefuxiatuak”. Ildo horretan, Nafarroako Gobernuak nahiz Parlamentuak “konpromisoarekin erantzun behar diote” bizitzea egokitu zaigun beste erronka honi.