Nafarroako Memoriaren Institutuak  Emakume Borrokalariaren Museo Birtualarekin (MVMC) , www.mujeresenguerra.com -ekin kontratu bat sinatu du. Gonzalo Berger eta Tània Balló ikertzaileek  plataforma hori garatu dute, Estatuko, autonomia-erkidegoetako eta tokiko hainbat artxibotan ikerketa-proiektu bat gauzatzeko, Espainiako Gerra Zibileko emakume borrokalariak,  horietako batzuk nafarrak, aurkitzeko

Era berean, kontratuan emakume horien biografiak zabaltzea aurreikusten da, haien konpromiso eta militantzia sozial eta politikoa, lurralde-mugikortasuna eta errepresioa eta erbestea, gertatu izan balira, oinarri hartuta.  Memoriaren Nafarroako Institutuak proposatutako ikertzaileen parte-hartzea ere kontuan hartuko da akordioan .

Espainiako historia garaikideko gatazka politiko eta sozial handienari buruzko ikerketetan apur bat baztertutako alderdia izan da emakumearen parte-hartzea Espainiako Gerran. Defizit historiografiko hori zuzentzeko eta frankismoaren aurkako borrokan emakumearen parte-hartzea ikusarazteko, proiektu hau espazio birtual bat izango da, hainbat formatu erabiliko dituena erreferentziazko leku bat sortzeko: historikoa, birtuala eta hezitzailea, emakumeek Espainiako Gerran borrokalari gisa izan duten parte-hartzeari dagokionez.

Memoria Demokratikoaren Estatu Idazkaritzak ere parte hartuko duen proiektua, ikerketa historikoko zein dokumentazioko proiektu sakon batean oinarritzen da, borrokalari izandako ahalik eta emakume gehien aurkitzeko.Plataforman artxibo nazionaletan eta nazioartekoetan dagoen informazioa partekatu ondoren, senideek, elkarteek edo ikertzaileek emandako dokumentazio berria sartzeko aukera zabaltzen da. Proiektua 2019an hasi zen, eta, gaur egun, diktadura frankistaren aurka borrokatu ziren emakumeen 3.200 ahots baino gehiago daude.