navarra.es
Castellano | Euskara | Français | English
Ezagutzera eman
147/2007 Foru Agindua, uztailaren 23koa, Gizarte Ongizate, Kirol eta Gazteria kontseilariak emana, Familia Bitartekotzaren Zerbitzua sailkatzen duena
(2007ko 107. NAOn argitaratua, abuztuaren 29an)
Atarikoa
Nafarroako Foru Eraentza Birrezarri eta Hobetzeari buruzko Lege Organikoaren 44. artikuluaren arabera Nafarroak eskumen osoa du gizarte laguntzaren arloan, eta berariaz haurren, gazteen eta hirugarren adinekoen aldeko politikan, ongintza eta laguntza elkarteen inguruan eta adingabeak babestu eta tutelatzeko eta gizarteratzeko erakunde eta establezimendu publikoen arloan. Gizarteratzearen arloan, Estatuko legeria orokorrari jarraitzen zaio.
Gizarte Zerbitzuei buruzko abenduaren 14ko 15/2006 Foru Legearen xede nagusia da populazioaren gizarte ongizatea lortzea Nafarroako Foru Komunitatearen esparruan, gizarte zerbitzuez baliatzeko eskubide unibertsala bermatuz.
Nafarroako Gobernuari dagozkio, gainera, zerbitzuen plangintza, antolamendua, koordinazioa eta garapenaren zaintza, eta gizarte zerbitzuen arloko araudia betetzen den begiratzea.
Gizarte zerbitzuen arloko baimen, arau-hauste eta zehapenen araubideari buruzko azaroaren 13ko 9/1990 Foru Legeak prestazioen kalitate eta maila hobea erdiestera bideratutako zenbait jarduketa administratibo arautzen ditu, eta, bete ezean, zehatzeko sistema ezartzen du.
Legea garatzeko, maiatzaren 23ko 209/1991 Foru Dekretua onetsi zen, eta horrek, gizarte zerbitzuei loturiko zerbitzuak eta zentroak sailkatzeaz gainera, ezarri ere egiten ditu horietako bakoitzak azpiegiturari, ekipamenduari, langileei eta funtzionamenduari dagokienez bete beharreko baldintzak.
Familia Bitartekotzaren Zerbitzu berri bat sortu behar izateak, maiatzaren 23ko 209/1991 Foru Dekretuaren eranskinean ezarri zirenetako bakar batekin ere ezin baita parekatu, haren bakarkako sailkapena egitera behartzen du, 4. artikuluan aurreikusitako moduan, horrek ezartzen baitu aipatu foru dekretuaren eranskinean ageri ez diren zentro edo zerbitzuak, haietako bakar batekin ere parekatu ezin direnean, bakarka sailkatuko direla, Gizarte Ongizate kontseilariak foru agindu bidez xedaturik.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legeak eta Gizarte Ongizate, Kirol eta Gazteria Departamentuaren egitura organikoa ezartzen duen otsailaren 24ko 46/2005 Foru Dekretuak emandako eskurantzak erabiliz, agindu dut:
Lehena
Gizarte zerbitzuen arloko baimen, arau-hauste eta zehapenen araubideari buruzko maiatzaren 23ko 209/1991 Foru Dekretua garatzea, zerbitzu eta zentroen sailkapenean Familia Bitartekotzaren Zerbitzua sartuz, foru agindu honen eranskinean ageri den moduan.
Bigarrena
Foru agindu hau Nafarroako Aldizkari Ofizialean argitaratzea. Argitaratu eta biharamunean hartuko du indarra.
Hirugarrena
Foru agindu hau Familiaren Zuzendaritza Nagusiari jakinaraztea, behar diren ondorioak izan ditzan.
ERANSKINA
Gizarte zerbitzuen arloko baimen, arau-hauste eta zehapenen araubideari buruzko maiatzaren 23ko 209/1991 Foru Dekretuaren eranskinaren "II. kapitulua.-Zerbitzu eta zentroen sailkapena" garatu egiten da, ondoko puntu hau gehituta:
5.4. Familia bitartekotzaren zerbitzua.
.Definizioa:
Familia Bitartekotza gizarte zerbitzu espezializatu bat da. Zehazki, familiako kideen artean sortzen diren arazoak konpontzeko sistema bat da, isilpeko prozesu boluntario baten bidez, auzitan dauden alderdien arteko komunikaziorako bidea errazten duena, denon onerako konponbide bideragarriak lortzeko eta familia taldearen beharrak bermatzeko. Bitartekotza prozesuaren arduraduna bitarteko profesional bat da, modu neutroan eta alderdikeriarik gabe jokatzen duena.
Familia bitartekotzarako zerbitzu baten helburuak, besteak beste, hauek dira:
-Familiako kideei laguntzea gatazkaren ondorioz izanen dituzten harreman pertsonal eta ekonomikoak gestionatzen eta haiei buruzko erabakiak hartzen.
-Erabakiak hartzeko orduan, bi alderdien lankidetza lortzea.
-Alderdi guztiei aukera ematea gatazkari beren interesak defendatuz heltzeko, nahi izanez gero, familiako kideen arteko auziei buruzko akordioetara iristeko.
-Auzitan dauden alderdiei erantzukizunez jokatu beharra dagoela erakustea, bai seme-alabei buruz har daitezkeen erabakietan, bai litezkeen zuzenbidezko itunetan.
-Bitarteko lanaren bidez, auzitan dauden alderdiei laguntzea etorkizunean beren artean sortzen diren auziak beren kasa konpondu ahal izateko tresnak eskuratzen.
-Alderdien protagonismoa bermatzea eta, orobat, prozesua bitartekotza lanaren printzipioei jarraikiz egiten dela, ahalik eta arintasun eta efikazia handienarekin.
.Erabiltzaileak:
Familia Bitartekotzaren Zerbitzuak ondo egoeraren batean dauden pertsonei lagunduko die:
-Bereizteko erabakia harturik, tramite judizialen bidea hasi gabea duten bikoteak.
-Bereizteko edo dibortziatzeko tramiteetan edo seme-alabak ukitzen dituen beste prozesu batean dauden bikoteak, familia prozesuetan eskumena duten organo judizialetatik bideratuak, akordioren bat itunduz gero prozesua errazagoa izanen delakoan.
-Bereizketa edo dibortzioa lege bidez konponduta ere, krisian segitzen duten bikoteak, lehen ezarritako neurriak berriz ere arautu behar baldin badira.
-Anai-arreben artean eta guraso eta seme-alaben artean sortzen diren familia gatazkak, bitartekotza zerbitzu hau erabil dezaketenak, esate baterako:
Zaharrekin zerikusia duten gatazkak: zaharren zainketa, zaharretxeetan sartzea, ezintasun egoerak, jaraunspenekin zerikusia duten arazoak, ahaideei elikagaiak eman beharra, guraso eta aiton-amonen arteko arazoak, aiton-amonek bilobekin harreman normalizatuak izatea galarazten duten egoerak, belaunaldien arteko gatazkak...
Adingabeekin eta gazteekin zerikusia duten gatazkak: harrera eta adopzioen inguruko arazoak, ezagutzeko eskubideari lotuak, berregindako familietan egiten diren egokitzapen eta doikuntzak, familiak elkartzeko guneak, gazteen emantzipazioa...
Familia bitartekotza ez da orientazio juridiko, sozial edo psikologiko gisa hartu behar, ez eta bikotearendako edo familiarendako terapia gisa ere.
.Langileak:
Familia Bitartekotzaren Zerbitzuko ekipoak diziplinartekoak izanen dira eta gutxienez profesional hauek osatuko dituzte:
-Hiru familia bitarteko.
-Administrari bat.
Bitartekoek lehenengo edo bigarren zikloko prestakuntza unibertsitarioa izanen dute, diplomatura edo lizentziatura bat eta prestakuntza berariazkoa familietan bitarteko lanak egiteko.
Prestakuntza berariazko hori unibertsitateek edo erakundeek aitortutako tituluen bidez egiaztatuko dute. Erakundeen kasuan, Familia Bitartekotzarako Europako Foroak abalatuak izan beharko dira.
.Berariazko baldintza gutxienekoak:
-Administrazio lanetarako bulego bat.
-Bi bulego, bitartekotza prozesuetako harrerak egiteko.
-Itxaron gela bat.
-Komunak.
