navarra.es
Castellano | Euskara | Français | English
Ezagutzera eman
Foru Agindua, 1998ko ekainaren 17koa, Industria, Merkataritza, Turismo eta Lan Kontseilariak emana, ekainaren 17ko 188/1988 Foru Dekretuan Nafarroako eskulangintza enpresendako aurreikusitako dirulaguntzak emateko prozedura eta irizpideak ...
FORU AGINDUA, 1998KO EKAINAREN 17KOA, INDUSTRIA, MERKATARITZA, TURISMO ETA LAN KONTSEILARIAK EMANA, EKAINAREN 17KO 188/1988 FORU DEKRETUAN NAFARROAKO ESKULANGINTZA ENPRESENDAKO AURREIKUSITAKO DIRULAGUNTZAK EMATEKO PROZEDURA ETA IRIZPIDEAK EZARTZEN DITUENA
(Testu bateratua. Jatorrizkoa 1998ko 92. NAOn argitaratua, abuztuaren 3an. Aldaketak: 110/2002 Foru Agindua, urriaren 17koa; 90/2001 Foru Agindua, abuztuaren 2koa)
Atarikoa
Nafarroako Eskulangintza Sektorea arautzen duen ekainaren 17ko 188/1988 Foru Dekretuak 10. artikuluan ezartzen duenez, Industria, Merkataritza eta Turismo Departamentuak eskulangintza enpresei dirulaguntzak emateko ahalmena du, enpresa horiek egitura, errentagarritasuna, kudeaketa edo merkatuko lehiakortasuna hobetzeko jarduerak burutu ditzaten.
Aipatu Foru Dekretuaren Azken Xedapenetan Lehenak ahalmena ematen dio Industria, Merkataritza eta Turismo kontseilariari, hura burutu eta garatzeko behar diren xedapenak emateko.
Eskurantza horiek erabiliz, Industria, Merkataritza, Turismo eta Lan kontseilariaren 1992ko maiatzaren 12ko Foru Aginduaren bidez, dirulaguntzak emateko prozedura eta irizpideak eman ziren. Orain, azken urteotako esperientzia ikusita, egoki da irizpideak aldatu eta egokitzea.
Horrenbestez, Industria, Merkataritza, Turismo eta Lan kontseilariak, agindu du:
1. artikulua.
Foru Agindu honen xedea da ekainaren 17ko 188/1988 Foru Dekretuaren 10. artikuluan aurreikusi eskulangintza enpresendako dirulaguntzen araubidezko garapena ezartzea, enpresek egitura, errentabilitatea, kudeaketa eta lehiakortasuna hobe ditzaten.
2. artikulua.
1. Foru Agindu honen bidez diruz lagundu daitezkeen jarduera eta inbertsio proiektuak honako hauek dira:
a) Aktibo finkoetako inbertsioak.
b) Ferietan parte hartzea.
c) Promozioko materiala argitaratzea.
d) Artisauen lanbide hobekuntzako eta oinarrizko prestakuntza enpresarialeko ikastaroetan parte hartzea.
2. Aurreikusitako dirulaguntzak honelakoak izan daitezke:
a) Aktibo material finkoetan egindako inbertsioetarako, korritu-tasetan hobariak, horri buruzko legeetan zehazten diren baldintzen menpean eta inbertsioaren izaeraren arabera, alegia, industriala edo merkataritzakoa.
b) Gainontzeko jardueretan fondo galdurako dirulaguntzak.
3. Aktibo finkoetan inbertsioak egiteko laguntzak 1998ko aurrekontuko "Inbertsioak finantzatzeko transferentziak" izeneko kontusailaren 30380-5 lerroaren kargura finantzatuko dira; ferietara joateko eta promozioko materiala argitaratzeko laguntzak "Nafarroako eskulangintza sustatzeko ekintzak" izeneko kontusailaren 30360-0 lerroaren kargura eta ikastaroetan parte hartzekoak "Artisauen profesionalizazioa" izeneko kontusailaren 30370-8 lerroaren kargura edo hurrengo ekitaldietako aurrekontuetan onartzen diren antzeko jardueretarako kontusailen kargura.
3. artikulua.
1. Aktibo finkoetako inbertsioengatik Nafarroan kokaturiko finantza eta leasing entitateek mailegu eta errentamendu finantzarioko eragiketetan korrituen ehuneko batzuk finantzatzen ahalko dituzte, haiek eta Industria eta Teknologia, Merkataritza, Turismo eta Lan Departamentuak izenpeturiko lankidetza hitzarmenen arabera. Hobari hori gehienez ere ehuneko bostekoa izanen da. Hala ere, korritu tasaren hobaria ezin izanen da eragiketa gauzatzeko korritu-tasa nominala baino handiagoa, finantza entitateekin izenpeturiko lankidetza hitzarmenetan xedaturikoarekin bat.
2. Nolakoa den inbertsioa oinarritzat harturik, hau da, industriala edo merkataritzakoa, dirulaguntzak banatuko dira urtarrilaren 24ko 27/1986 eta urtarrilaren 31ko 35/1986 Foru Dekretuetan xedatutakoaren arabera, PYME industrialen kasuetarako, eta, merkataritzako enpresa txikientzat, berriz, urtarrilaren 16ko 4/1995 Foru Dekretuan xedatutakoari jarraikiz, edo, kasua balitz, horiek ordezkatuko dituzten arauen arabera.
4. artikulua.
1. Ferietan, gunea alokatu, postua muntatu eta materiala garraiatzeko gastuak diruztatzen ahalko dira. Atzerriko ferietan, bidaia eta ostatua ere pagatuko dira.
2. Gastuen % 50 pagatuko da, gehienez ere 500.000 pezeta (3.005,06 euro) feria bakoitzean, eta enpresa bakoitzari gehienez ere 800.000 pezetako (4.808,10 euroko) dirulaguntza emanen zaio ekitaldi bakoitzean.
5. artikulua.
1. Zabalkundeko materiala: katalogoak, bideoak eta oro har zabalkundeko materiala egiteko gastuak eta webguneak (domeinua prestatu, sortu eta kontratatzeko hasierako gastuak) ere bai.
2. Sartzen ahal diren gastuen % 50 izaten ahalko da dirulaguntzaren xede gehienez ere. Urtean 300.000 pezeta (1.803,04 euro).
6. artikulua.
1. Lanbide hobekuntzako eta enpresarako oinarrizko prestakuntzako ikastaroak: eskulangintza lanbideen zerrendan aipatzen diren jardueretan lanbidea hobetzea xede duten prestakuntza jardueretara joateko dirulaguntzak emanen dira. Zentro ofizialek antolatu edo diruztatu beharko dituzte. Halaber, enpresarako oinarrizko prestakuntzako ikastaroetarako dirulaguntzak emanen dira eskulangintza lantegiak hobeki kudeatu ahal izateko.
2. Ikasketetako eta joan-etorrietako gastuak diruztatuko dira, eskatzailearena ez den herri batean eginiko jardueren kasuan. Nafarroako Foru Komunitatetik kanpo eginiko jardueretan, gainera, egonaldiko eta mantenuko gastuak ere pagatuko dira.
3. Nafarroan egiten diren prestakuntza jardueretarako, ikasketetako kostuen % 100 pagatuko da gehienez ere eta joan-etorrietako gastuen % 50 gehienez ere.
Prestakuntza ekintzetarako dirulaguntzen gehieneko zenbatekoa 300.000 pezetakoa (1.803,04 eurokoa) izanen da enpresa bakoitzerako eta ekitaldi bakoitzean.
7. artikulua.
Dirulaguntzaren onuradunak izan daitezke:
1. 188/1988 Foru Dekretuan xedaturikoaren arabera eskulangintza enpresatzat jotzen diren enpresa eta elkarteak.
2. Lanbide Batasunen Erregistroan izena emanak dauden eskulangile elkarteak, eskulagintza enpresatzat jotzen diren enpresetan sartuak badaude. Horiek zabalkundeko materiala prestatzeko 5. artikuluan aipatzen diren laguntzak eskatzen ahalko dituzte.
8. artikulua.
1. Fondo galdurako dirulaguntza jasotzeko eskariak eskabide orokorrean aurkeztu beharko dira, enpresaren legezko ordezkariak edo pertsona baimenduak sinatuak, dirulaguntza zein jardueratarako aurkezten den, hura burutu eta hurrengo hilabetearen barruan, honako agiri hauekin batera:
a) Eskatzailearen nortasun agiria, identifikazio fiskaleko txartela eta, kasua bada, transferentzia bidez ordaintzeko eskariaren inprimakia.
b) Udalak emandako ziurtagiria, Jarduera Ekonomikoen gaineko Zergaren ordainketan egunean dagoela adierazten duena.
c) Foru Ogasunarekiko zerga betebeharretan egunean dagoela adierazten duen ziurtagiria.
d) Egin beharreko jarduerak azaltzen dituen memoria, gutxienez, honako hauek bilduko dituena: jardueraren aurretikoak, helburuak, burutzeko epeak eta gastuen zerrenda.
e) Egindako gastuen ziurtagiriak eta dagozkien ordainketa-agiriak.
f) Eskaria sendotzeko egoki irizten diren bestelako agiriak.
2. Korrituetan hobariak jasotzeko eskaerak inbertsioak egin baino lehen aurkeztuko dira, lankidetza hitzarmena sinatu duen finantza entitate baten bidez.
3. Industri, Merkataritza, Turismo eta Lan Departamentuak informazio gehiago jasotzeko egoki juzkatzen dituen agiri osagarriak eskatu ahalko ditu.
9. artikulua.
Aurkezten diren eskaerak baloratu ondoren, ebazpen proposamena emanen da hiru hilabeteko epearen barruan. Epe horretan ebazpen espresik ematen ez bada, laguntza ukatu dela ulertuko da.
10. artikulua.
1. Eskaturiko dokumentazioa aurkezten ez bada, emandako laguntza bertan behera utziko da.
2. Industri, Merkataritza, Turismo eta Lan Departamentuak behar den ikuskapen lana eginen du, diruz lagundutako jarduera burutu dela eta fondoak eman ziren helburuetarako erabili direla egiaztatzeko.
11. artikulua.
Foru Agindu honen aurka helegite arrunta jarri ahalko da Nafarroako Gobernuari zuzendua, Nafarroako Aldizkari Ofizialean argitara eman eta hilabeteko epearen barruan.
Xedapen Iragankor Bakarra
1998ko ekitaldian, dirulaguntzetarako ezarri diren mugak kalkulatzeko, kontuan hartuko dira Foru Agindu honen arabera eta Industri, Merkataritza, Turismo eta Lan kontseilariaren 1992ko maiatzaren 12ko Foru Aginduaren arabera emandako dirulaguntzak.
Xedapen Gehigarri Bakarra
Foru Agindu honetan aurreikusitako laguntzak Europako Batasuneko "minimis" arauaren menpe egonen dira. Hortaz, lehenbiziko "minimis" laguntza ematen denetik hurrengo hiru urteetan jaso daitezkeen "minimis" laguntza guztien batura ezin da 100.000 ecu-tik gorakoa izan.
Xedapen Indargabetzaile Bakarra
Indarrik gabe utzi da Industri, Merkataritza, Turismo eta Lan kontseilariak 1992ko maiatzaren 12an emandako Foru Agindua, haren bidez ezarri baitziren Nafarroako Eskulangintzako enpresendako ekainaren 17ko 188/1988 Foru Dekretuan aurreikusitako dirulaguntzak emateko prozedura eta irizpideak.
Azken Xedapen Bakarra
Foru Agindu honek Nafarroako Aldizkari Ofizialean argitara eman eta biharamunean hartuko du indarra.
