navarra.es
Castellano | Euskara | Français | English
Ezagutzera eman
49/2004 Foru Agindua, uztailaren 27koa, Lehendakaritza, Justizia eta Barne kontseilariak emana, Nafarroako Justizia Administrazioaren zerbitzuko lanpostuak betetzeko aldi baterako langileak kudeatzeko arauak ezartzen dituena
(2004ko 104. NAOn argitaratutako testua, abuztuaren 30ean; akats zuzenketa, 2004-09-20)
Zioen Azalpena
Botere Judizialari buruzko uztailaren 1eko 6/1985 Lege Organikoak 471. artikuluan ezartzen duenez, abenduaren 23ko 19/2003 Lege Organikoak emandako idazketari jarraikiz, Justizia Administrazioaren zerbitzuko langile guztiei -aurreko artikuluan sartutakoei- buruzko eskumenak Justizia Ministerioari edo, hala denean, Autonomi Erkidegoei dagozkie, beren Estatutuko eta araubide juridikoko arlo guztietan, barne direla hautapena, hasierako eta etengabeko prestakuntza, destinoa hartzea, igoerak, egoera administratiboak, lanaldia, lan ordutegia eta diziplina araubidea.
Maiatzaren 14ko 812/1999 Errege Dekretuaren bitartez, Nafarroako Foru Komunitateak Justizia Administrazioaren zerbitzuko langileen arloko eginkizunak eta zerbitzuak jaso zituen eta, hortaz, Nafarroako Foru Komunitateko Administrazioari dagokio Nafarroako Justizia Administrazioko organo judizial eta fiskalen zerbitzuko lanpostuak beteko dituzten aldi baterako langileei buruzko arauak eman eta izendapena egitea.
Bitarteko langile funtzionarioei dagokienez, Justizia Administrazioaren zerbitzuko bitarteko langile funtzionarioak izendatu eta kargutik kentzeko arau orokorrak, hala nola izendatuek bete beharreko baldintzak eta haien eskubide eta betebeharrak, otsailaren 16ko 249/1996 Errege Dekretuaren 59. artikuluan ezarririk daude.
Foru agindu honen xedea da errege dekretu hori garatzea, eta, horretarako, behar diren baliabideak ezartzea Nafarroako Foru Komunitateko organo judizialen zerbitzuko lanpostuak beteko dituzten bitarteko funtzionarioak izendatzeko, eta hori bizitasunez eta arintasunez egiteko, funtzio publikoan sartzea arautzen duten berdintasun, merezimendu eta gaitasun printzipioei jarraikiz.
Horiek horrela, Funtzio Publikoaren Zuzendaritza Nagusiaren adostasun txostena ikusirik, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeak ) artikuluan eta Botere Judizialari buruzko uztailaren 1eko 6/1985 Lege Organikoak 489. artikuluan (abenduaren 23ko 19/2003 Lege Organikoak emandako idazketari jarraikiz) ezarritakoari jarraikiz, sindikatuekin negoziatu ondoren, agindu dut:
1. artikulua. Eskumena eta kasuak.
Nafarroako Justizia Administrazioaren bulegoen eta zerbitzuen premiak ezin direnean bete Auzitegiko Medikuen, Kudeaketa Prozesal eta Administratiboen, Izapide Prozesal eta Administratiboen eta Justiziako Laguntzaileen Kidegoetako funtzionarioen bitartez, Lehendakaritza, Justizia eta Barne kontseilariak bitarteko funtzionario izendatu ahalko ditu horretarako hautatzen diren pertsonak, ondoren azaltzen diren kasuetarako:
a) Hilabete baino gehiagoko erregelamenduzko absentziak daudenean.
b) Plantillan lanpostu hutsak daudenean, lanpostuak betetzeko arauzko sistemaren arabera bete bitartean.
c) Arazo larri eta premiazkoak daudenean, behar bezala justifikatuak, Justizia Zuzendaritza Nagusiak horrelakotzat hartuak.
2. artikulua. Xedapen orokorrak.
Aldi baterako langileak deialdi irekiaren bidez hautatuko dira, eta deialdi horretan beti bermatuko dira berdintasun, merezimendu, gaitasun eta publizitate printzipioak.
Aldi baterako langileak hartzeko hautapen prozedurek bermatu beharko dute lanpostuak ahalik eta azkarren betetzen direla.
3. artikulua. Izangaien zerrendak.
1. 1. artikuluan ezarritakoa betetzeko, izangaien bi zerrenda osatuko dira ondoren azaltzen diren kidego bakoitzeko.
a) Auzitegiko Medikuen Kidegoa.
b) Kudeaketa Prozesal eta Administratiboaren Kidegoa.
c) Izapide Prozesal eta Administratiboaren Kidegoa.
d) Laguntza Judizialeko Kidegoa.
Zilegi izanen kidego ezberdinetako izangaien zerrenda batean baino gehiagotan aldi berean egotea.
2. Aurreko atalean aipatutako kidego bakoitzean izangaien ondoko zerrenda hauek osatuko dira:
a) Zerrenda bat euskara merezimendu gisa baloratzekoa duten lanpostuak betetzeko, Lanpostuen Zerrendetan ezarritakoarekin bat. Zerrenda horri "Euskara-merezimendua zerrenda" izena emanen zaio.
b) Beste zerrenda bat gainerako lanpostuak betetzeko. Zerrenda horri "Zerrenda orokorra" izena emanen zaio. Zerrenda hori osatzeko ez da kontuan hartuko eranskineko D2 atalari dagokion puntuazioa.
Zerrenda horiek guztiak ofizioz osatuko ditu Justizia Zuzendaritza Nagusiak, izangaiek alegatutako merezimenduen arabera.
3. Zerrendek iraupen mugagabea izanen dute, eta indarrik gabe geldituko dira zerbitzuaren premiak direla-eta zerrenda berriak osatzen direnean.
4. artikulua. Izangaien zerrendak osatu eta berrantolatzeko deialdia.
1. Nafarroako Gobernuko Lehendakaritza, Justizia eta Barne Departamentuari dagokio izangaien zerrendak osatu eta berrantolatzea; horretarako deialdia argitaratuko du Nafarroako Aldizkari Ofizialean.
2. Deialdia bulego eta zerbitzu judizialetara igorriko da bertan ikusgai egoteko.
5. artikulua. Zerrenden berrantolaketa eta izangai berrien onarpena.
1. Lehendakaritza, Justizia eta Barne Departamentuak merezimendu lehiaketarako deia eginen du urtero, foru agindu honetako 3. artikuluan aipatutako zerrendetan dauden izangaiek foru agindu honen eranskineko baremoaren arabera egindako azken balorazioaren ondoren hobetutako merezimenduak eguneratu ditzaten.
2. Orobat, urtero izangai berriak onartuko dira zerrendetan; foru agindu honen eranskineko baremoa aplikaturik lortzen duten puntuazioaren hurrenkeran sartuko dira.
6. artikulua. Zerrendetan sartzeko baldintzak.
1. Zerrendetan agertzeko, interesatuek hurrengo ataletan azaltzen diren baldintzak bete behar dituzte eskabideak aurkezteko epea bukatzen den egunean.
Baldintza horiek Administrazioak zerbitzu emateko deitzen dien unera arte bete behar dira, baita kontratatua zerbitzu ematen aritzen den denboran ere
2. Kidego guztietarako baldintza orokorrak:
a) Espainiarra eta adinez nagusia izatea, erretiroko adina ez izatea eta hartara ez ailegatzea hautapen prozesuak irauten duen bitartean, jabetza hartu arte.
b) Doluzko delitu batengatik kondenatua ez izana eta horregatik prozesatua edo erruduntzat joa ez izatea, non eta ez den errehabilitazioa lortu edo auzian artxibatze autoa izan.
c) Eginkizun publikoetan aritzeko ezgaitua ez egotea.
d) Diziplina-prozeduraren bitartez edozein administrazio publikoren zerbitzutik baztertua ez izatea eta eginkizun publikoetan aritzeko desgaitua ez izatea, diziplina-prozeduraz nahiz bide judizialetik, birgaitua izan denean izan ezik.
e) Lanpostuko eginkizunetan aritzea ezintzen dion gorputz nahiz gogo akatsik ez izatea.
3. Kidego guztietarako berariazko baldintza izanen da bakoitzari dagokion titulazioa izatea, edo eskabideak aurkezteko epea bukatu baino lehen eskuratzeko moduan egotea. Tituluak ondoko hauek dira:
a) Auzitegiko Medikuen Kidegoa: Medikuntzako lizentziatura.
b) Kudeaketa Prozesal eta Administratiboaren Kidegoa: Unibertsitateko diplomatua, ingeniari teknikoa, arkitekto teknikoa edo baliokidea.
c) Izapide Prozesal eta Administratiboaren Kidegoa: Batxilergoko titulua edo baliokidea.
d) Laguntza Judizialeko Kidegoa: DBHko graduatu titulua edo baliokidea.
4. Gainera ondoko baldintza hauek eskatuko dira:
a) Izapide Prozesal eta Administratiboaren Kidegoko zerrendetarako, mekanografia jakitea; hori frogatzeko ondoko bide hauetako bat erabili ahalko da:
a1) Azken bost urteetan eskuratutako diploma edo ziurtagiria, interesatuak minutuko 220 pultsazio dituela frogatzen duena.
a2) Administrazio kudeaketako erdi mailako heziketa zikloko titulua, Administrazioko eta Finantzetako goi mailako heziketa ziklokoa edo Idazkaritzako goi mailako heziketa ziklokoa, edo eskabideak aurkezteko epea bukatu baino lehen eskuratzeko moduan egotea.
Orobat, Administrazio arloko teknikari laguntzailearen (LH-1) eta Administrazio arloko teknikari espezialistaren (LH-2) titulua izatea.
a3) Administrazio publiko baten ziurtagiria, aurreko bost urteetan egindako hautapen prozesu batean mekanografia proba bat gainditu duela frogatzen duena.
a4) Administrazio publiko baten ziurtagiria, aurreko bost urteetan Justiziako laguntzaile lanpostuan, Izapide Prozesal eta Administratiboaren Kidegoko lanpostu batean edo administrari laguntzaile nahiz administrari ofizialarenean zerbitzuak eman dituela frogatzen duena.
Baldintza hori frogatzeko, bost urte horiek eskabideak aurkezteko azken eguna arte kontatuko dira.
b) Lanpostu Zerrendaren arabera euskaraz jakitea nahitaezkoa duten lanpostuak betetzeko, EGA titulua, Hizkuntza Eskola Ofizial batek emandako euskararen gaitasun agiria edo baliokidea den titulazio bat.
c) Lanpostu Zerrenden arabera titulu jakin bat beharrezkoa duten lanpostuak betetzeko, dagokion titulua.
7. artikulua. Izangaien lehentasun-hurrenkera.
1. Izangaiak foru agindu honen eranskineko baremoa aplikaturik lortzen duten puntuazioaren arabera sartuko dira zerrenda bakoitzean, ezertan galarazi gabe abuztuaren 30eko 251/1993 Legegintzako Foru Dekretuaren bidez onetsiriko Nafarroako Administrazio Publikoen zerbitzuko langileen estatutuaren testu bateginaren zazpigarren xedapen gehigarrian ezarritakoa (maiatzaren 31ko 16/2002 Foru Legean emandako idazketaren arabera).
2. Berdinketak hausteko, baremoko atal bakoitzean lortutako puntuazioa izanen da kontuan, lehen ataletik hasita betiere. Berdinketak irauten badu, puntuaziorik altuena lortu duen izangaiaren alde ebatziko da, atal bakoitzean gehienez eskuratzen ahal diren puntuetan mugarik ez badago.
8. artikulua. Merezimenduen kreditazioa.
1. Foru agindu honetako deialdietako parte hartzaileek, behar bezala betetako eskabidearekin batera, eranskineko baremoan aipatutako merezimenduen ziurtagiriak aurkeztuko dituzte. Ziurtagiri horiek jatorrizkoak izanen dira, edo, bestela, fotokopia konpultsatu edo kautotuak.
2. Baremoko A atalean araututako merezimenduen ziurtagiriak ofizioz emanen ditu Justizia Zuzendaritza Nagusiak.
3. B atalean araututako merezimenduen ziurtagiriak ofizioz emanen ditu Justizia Zuzendaritza Nagusiak, Nafarroako bulego edo zerbitzu judizialetan egindako lanak direnean.
9. artikulua. Izangaiak nola deitu.
1. Araubide orokorra.
Foru agindu honen 1. artikuluan aipatzen diren kasuetako bat gertatzen denean, izangaiei dei eginen zaie dagokien zerrendan duten hurrenkeraren arabera, eta parte hartzaileak eskabidean hautatutako eskualdeei jarraikiz, alegia, ondokoetatik bat edo batzuk:
a) Iruña eta Agoizko barruti judizialak.
b) Iruña eta Lizarrako barruti judizialak
c) Iruña eta Tafallako barruti judizialak.
d) Iruña eta Tuterako barruti judizialak.
e) Tutera eta Tafallako barruti judizialak.
f) Lizarra eta Tafallako barruti judizialak.
g) Barruti judizial guztiak.
Dei egiteko, interesatuek harremanetarako hiru telefono zenbaki jarri ahalko dituzte gehienez parte hartzeko eskabidean, eta zenbaki horiek edonoiz eguneratu ahalko dira, dagokion zerbitzuan eskabidea aurkeztuta.
Deitzen den izangaia aurkitzerik ez bada, zerrendako hurrengoa deituko da.
2. Euskaraz jakin beharra eta euskararen balorazioa.
a) Lanpostu Zerrendan ezarritakoaren arabera euskara merezimendu gisara baloratzekoa duten lanpostuak betetzeko, "Euskara-merezimendua" izeneko zerrenda erabiliko da.
b) Lanpostu Zerrendan ezarritakoaren arabera euskaraz jakitea nahitaezko baldintza duten lanpostuak betetzeko, "Zerrenda orokorra" erabiliko da, hurrengo ataleko d) letran ezarritakoari jarraikiz.
3. Salbuespenak.
a) Zerrenda bat baino gehiagotan dagoen izangai bat bitarteko funtzionario izendatzen baldin bada horietako batean, beste zerrendetan lanean ari dela aipatuko da, izendapena irauten duen bitartean.
b) Bitarteko funtzionario batek bulego edo zerbitzu judizialean baja ematen duenetik kidego bereko beste izangai bat bertan lan egiteko dei egiten zaion arte sei hilabete baino gutxiago pasatzen baldin badira, pertsona bera izendatu ahalko da, behin bakarrik, bulego edo zerbitzuaren arduradunak hala eskatzen baldin badu.
c) Lanpostu Zerrenden arabera titulu jakin bat izatea nahitaezko baldintza duten lanpostuak betetzeko, dagokion titulua dutela frogatzen duten izangaiei eginen zaie deia, zerrendan ageri diren hurrenkerari jarraikiz.
d) Lanpostu Zerrenden arabera euskaraz jakitea nahitaezko baldintza duten lanpostuak bete behar direnean, EGA titulua, Hizkuntza Eskola Ofizial batek emandako euskararen gaitasun agiria edo baliokidea den titulazio bat dutela frogatzen duten izangaiei deituko zaie, zerrendan ageri diren hurrenkerari jarraikiz.
10. artikulua. Uko egite justifikatua.
1. Lanposturako izendapenari uko egin eta izangaien zerrendako ordena ez galtzeko arrazoi justifikatuak honako hauek izanen dira:
a) Aldi baterako ezintasuna.
b) Amatasuna.
c) 3 urte baino gutxiagoko haur bat izatea bere kontu, berea izan nahiz seme-alabatzakoa, harrera iraunkorrekoa edo adopzioaren aurrekoa.
d) Bere kargura dagoen odoleko edo ezkontza bidezko ahaideren bat zaintzea, bigarren gradu artekoa -hori barne-, baldin eta adinagatik edo istripu edo eritasun baten ondorioz bere kasa bizitzeko gauza ez bada eta lansaridun jarduerarik egiten ez badu.
e) Pertsona interesatuaren gogoz kontrako beste edozein arrazoi, behar bezala egiaztatua, Justizia Zuzendaritza Nagusiak onartua.
2. Arrazoi horietako batengatik uko egiten duen pertsonak behar diren frogagiriak aurkeztu beharko ditu hiru egun naturaleko epean, uko egiten duenetik hasita.
3. c), d) eta e) letretan ezarritako arrazoiengatik izendapen bati uko egiten diotenei ez zaie uko egin dutenetik hiru hilabete igaro arte berriz deituko, eta orduan ere interesatuak eskatzen badu.
4. Artikulu honetako a) eta b) letretan aipatutako kasuetan, arrazoia desagertzen denean, hiru egun naturaleko epea egonen da horren berri emateko, desagertzen denetik hasita.
5. Aurreko atalean aipatutako dokumentazioa ezarritako epean aurkezten ez duten izangaiak dei egin zaien kidegoko zerrendatik kenduko dira.
11. artikulua. Izendapenen iraupena.
1. Nafarroako Gobernuak bitarteko funtzionarioekin duen lotura juridiko eta ekonomikoa jabetza hartzean hasten da.
2. Lanpostu bat betetzeko deitzen diren pertsonek 4 egun balioduneko epean hartu beharko dute jabetza, dei egiten zaien egunetik hasita.
3. Proposatzen diren pertsonek ezin izanen dute jabetza hartu edo lanpostuaren eginkizunak bete, Lehendakaritza, Justizia eta Barne Departamentuak izendapena jakinarazten ez dien bitartean.
4. Nafarroako Gobernuak bitarteko funtzionarioekin duen lotura juridiko eta ekonomikoa funtzionarioak lanpostutik kentzen direnean bukatuko da.
12. artikulua. Kargu uztea.
1. Bitarteko funtzionarioek kargua utziko dute ondoko kasu hauetako bat gertatzen denean:
a) Lanpostua dagokion funtzionario titularrak edo karrerako funtzionario batek betetzen duenean, erregelamenduz ezarritako bideren baten bitartez.
b) Izendapenaren epea bukatzen denean.
c) Bitarteko funtzionario bat hartzeko arrazoi izan ziren zerbitzu beharrak bukatzen direnean.
d) Lanpostua desagertzen denean.
e) Betetzen ari den lanpostuari uko egiten dionean.
f) Izangaien zerrendan sartzeko baldintzetakoren bat falta bada edo baldintzetakoren batean edo alegatutako merezimenduetan hasieran edo gerora datu faltsuak ematen badira.
g) Hutsegite oso larriari dagokion zehapen irmoa dagoenean, kidego bakoitzeko Erregelamendu Organikoaren arabera.
h) Gaitasun edo errendimendurik ez duela nabarmen ikusten denean.
i) Botere Judizialari buruzko Lege Organikoaren 492.3. artikuluan ezarritako adina betetzen denean.
2. Aurreko atalaren h) letran ezarritakoa betetzeko, honela jokatuko da: bulego edo zerbitzu judizialeko arduradunak, arrazoiak emanda, kargu uztea proposatuko dio Lehendakaritza, Justizia eta Barne Departamentuari, nahi dituen frogak erabilita. Interesatuari proposamen horren berri igorri eta hamar eguneko epea emanen zaio alegazioak egin edo bidezkotzat jotzen duen dokumentazioa aurkez dezan. Sindikatuei espediente osoa igorriko zaie eta alegazioak egin ahalko dituzte. Tramite horiek egindakoan, hamar eguneko epean ebatziko da.
13. artikulua. Izangaiak zerrendatik ateratzea.
1. Deia sortu deneko kidegoko zerrendetatik kenduko dira ondoko egoera hauetako batean dauden izangaiak:
a) Justifikatutako arrazoirik izan gabe izendapena ez onartzea.
b) Jabetza hartzera justifikatu gabeko arrazoiren batengatik ez agertzea
c) Gaitasun edo errendimendurik ez dutela nabarmen ikustea. Kasu horretan 12. artikuluaren bigarren atalean ezarritako prozedura aplikatuko da.
d) Kargu uztea 12.1 artikuluaren e), f) eta h) letretan ezarritako arrazoietako batengatik gertatzea.
2. 12.1 artikuluaren g) eta i) letretan aipatzen diren kasuetako batean dauden izangaiak zerrenda guztietatik kenduko dira.
3. Artikulu honetan aurreikusten diren kanporaketak Justizia Administrazioaren zerbitzuko langileen kudeaketan eskumenak dituen organoak erabakiko ditu; organo hori Estatuko Administrazioak Nafarroako Foru Komunitatera Justizia Administrazioaren zerbitzuko giza baliabideen gaineko eginkizunak eta zerbitzuak eskualdatzeko maiatzaren 14ko 812/1999 Errege Dekretuan aipatzen da.
14. artikulua. Parte-hartzea eta informazioa.
Maiatzaren 14ko 812/1999 Errege Dekretuan aipatutako lekualdatzeek ukitutako funtzionarioen Langileria Batzordean ordezkaritza duten sindikatuek izangaien zerrendak osatzeko hautapen prozesuan parte hartzeko, interesatuek alegatutako merezimenduak barematuko dituzte, foru agindu honetan ezarritakoari jarraikiz.
Lehen Xedapen Gehigarria
Kidego bakoitzaren zerrendetan izangairik ez badago, lan bila dabiltzanen zerrenda bat eskatu ahalko zaio Nafarroako Enplegu Zerbitzuari lanpostuak betetzeko. Horren berri emanen zaie sindikatuei.
Bigarren Xedapen Gehigarria
Foru agindu honek indarra hartu eta hiru hilabeteko epean, Justizia Zuzendaritza Nagusiak merezimendu lehiaketarako deia eginen du, 3. artikuluan aipatutako izangaien zerrendak osatzeko.
Lehenbiziko Xedapen Iragankorra
Bigarren xedapen gehigarrian aipatutako izangaien zerrenda berriak onetsi arte, indarra izaten segituko dute irailaren 24ko 304/2001 Foru Aginduaren bidez osatu zirenek. Foru agindu horren bidez Nafarroako Justizia Administrazioaren zerbitzuko lanpostuak betetzeko aldi baterako langileak hautatzeko oinarriak ezarri ziren.
Abenduaren 23ko 19/2003 Lege Organikoaren hamahirugarren xedapen iragankorrean ezarritakoarekin bat, zerrenda hauek lege horrek berak sortutako kidegoetako lanpostuak betetzeko erabili ahalko dira, ondoko korrespondentziari jarraikiz:
Ofizialen Kidegoa Kudeaketa Prozesal eta Administratiboaren Kidegoa
Laguntzaileen Kidegoa Izapide Prozesal eta Administratiboaren Kidegoa
Agenteen Kidegoa Laguntza Judizialeko Kidegoa
Bigarren Xedapen Iragankorra
Abenduaren 23ko 19/2003 Lege Organikoaren laugarren eta hamahirugarren xedapen iragankorrekin bat, foru agindu honen bigarren xedapen gehigarrian aipatzen den merezimendu lehiaketaren ondorioz osatzen diren zerrendak ofizialen, laguntzaileen eta agenteen kidegoetako lanpostuak betetzeko erabili ahalko dira, aurreko xedapen iragankorrean ezarritako korrespondentziari jarraikiz.
Hirugarren Xedapen Iragankorra
Botere judizialari buruzko uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoak sortutako Justizia Administrazioko Kidegoetan sartzeko lehenbiziko hautapen prozesua bukatu arte, Justizia Zuzendaritza Nagusiak foru agindu honi jarraikiz deitzen dituen merezimendu lehiaketetan ez da aplikatuko foru agindu honen eranskinean onetsitako merezimenduen baremoaren A atalean ezarritakoa. Xedapen honi eta hurrengoari jarraikiz osatzen diren zerrendek aldi bateko indarra izanen dute.
Laugarren Xedapen Iragankorra
Botere judizialari buruzko uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoak sortutako Justizia Administrazioko Kidegoetan sartzeko lehenbiziko hautapen prozesua bukatu arte, ez da aplikatuko foru agindu honen eranskinean onetsitako merezimenduen baremoaren B atalean ezarritako puntuazioaren muga, eta, beraz, izangaiei eman dituzten zerbitzu guztiak kontatuko zaizkie, atal horri jarraikiz.
Bosgarren Xedapen Iragankorra
Foru agindu honetako 5. artikuluan ezarritakoa ez da aplikatuko harik eta foru agindu honen hirugarren eta laugarren xedapen iragankorretan aipatutako Justizia Administrazioko Kidegoetan sartzeko lehenbiziko hautapen prozesua bukatzen den arte.
Xedapen Indargabetzaile Bakarra
Indarrik gabe gelditu da Lehendakaritza, Justizia eta Barne kontseilariak irailaren 24an emandako 304/2001 Foru Agindua, Nafarroako Justizia Administrazioaren zerbitzuko lanpostuak betetzeko aldi baterako langileak hautatzeko oinarriak ezartzen dituena.
Azken Xedapen Bakarra
Foru agindu honek Nafarroako Aldizkari Ofizialean argitaratu eta biharamunean hartuko du indarra.
ERANSKINA. Merezimenduen baremoa
A) Hautapen prozesuen puntuazioa.
Baremoaren atal honetako puntuazioa ateratzeko, lortutako azken puntuazioa 40rekin biderkatuko da, eta biderketa horren emaitza hautapen prozesuan atera daitekeen gehieneko puntuazioarekin zatituko.
Horretarako, erreferentziako hautapen prozesua ebatzi den azkena izanen da.
B) Lanbide esperientzia: 15 puntu gehienez.
-Justizia Administrazioan Kidego berean bitarteko funtzionario gisa egindako zerbitzuak: 0,25 puntu zerbitzuko hilabete oso bakoitzeko.
-Justizia Administrazioan beste edozein Kidegotan bitarteko funtzionario gisa egindako zerbitzuak: 0,15 puntu zerbitzuko hilabete oso bakoitzeko.
-Beste Administrazio Publiko batean, eskuratu nahi den kidegoaren maila bereko lanpostuetan emandako zerbitzuak, 0,05 puntu zerbitzuko hilabete oso bakoitzeko.
Atal honetako baremazioa lehenbiziko xedapen iragankorrean ezarritako korrespondentziari jarraikiz eginen da.
Egiaztagiriak: atal honetako merezimendu guztien ziurtagiriak aurkeztuko dira, zerbitzuak Nafarroako Foru Komunitateko organo judizialetan eman direnean izan ezik. Ziurtagiri guztietan zerbitzuak hasi eta bukatu zireneko data zehatzak aipatuko dira.
C) Informatika jakitea: Gehienez hiru puntu.
Administrazio Publiko batek antolatu edo homologatutako ikastaroak, eskabideak aurkezteko epea bukatu aurreko bost urteetan ziurtatuak. Honela baloratuko dira:
-20tik 40 ordu bitarteko ikastaro bakoitzagatik: 0,5 puntu.
-41etik 80 ordu bitarteko ikastaro bakoitzagatik: 1 puntu.
-81etik 100 ordu bitarteko ikastaro bakoitzagatik: 2 puntu.
-100 ordu baino gehiagoko ikastaro bakoitzagatik: 3 puntu.
Egiaztagiriak: horien ziurtagiriak aurkeztuko dira, zenbat ordu egin diren edo kreditu kopurua adieraziko dutenak. Horretarako kreditu bakoitzak 10 orduren balioa izanen du.
D) Hizkuntzak jakitea.
1) Europako Batasuneko hizkuntza ofizialak jakitea (frantsesa, ingelesa edo alemana): 2 puntu gehienez bakoitzagatik.
2) Euskaraz jakitea:
-Eremu mistoan, euskara jakiteagatik gehienez ere 2,10 puntu emanen dira.
-Eremu euskaldunean, euskara jakiteagatik gehienez ere 2,20 puntu emanen dira.
Egiaztagiriak: hizkuntza eskola ofizial batek luzaturiko gaitasun agiria edo ofizialki baliokidea den titulua aurkeztuko da. Euskararen kasuan, EGA titulua, Hizkuntza Eskola Ofizial batek emandako euskararen gaitasun agiria edo baliokidea den titulazio bat.
Titulurik eduki ezik, Hizkuntza Eskola Ofizialean gaindituriko maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.
