navarra.es
Castellano | Euskara | Français | English
Ezagutzera eman
73/2012 Foru Dekretua, uztailaren 25ekoa, Gizarte Politiketako Departamentuaren oinarrizko egitura organikoa ezartzen duena
(Testu bateratua. Jatorrizkoa 2012ko 150. NAOn argitaratua, uztailaren 31n; akats zuzenketa, 2012-08-7. Aldaketak: 111/2012 Foru Dekretua, urriaren 17koa; 40/2014 Foru Dekretua, maiatzaren 14koa)
Atarikoa
Nafarroako Foru Komunitateko Administrazioari buruzko abenduaren 3ko 15/2004 Foru Legean xedatutakoari jarraikiz, Nafarroako Gobernuari dagokio departamentu bakoitzaren egitura organikoa onestea.
Ekainaren 22ko 11/2012 Nafarroako Foru Komunitateko Lehendakariaren Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen.
Era berean,uztailaren 2ko 35/2012 Foru Dekretuaren bidez, Gizarte Politiketako Departamentuaren oinarrizko egitura organikoa ezarri zen.
Bidezko da, beraz, Foru Komunitateko Administrazioaren departamentu bakoitzaren egitura behar bezala garatzea.
Foru dekretu honen xedea da Gizarte Politiketako Departamentuaren egitura organiko berria garatzea.
Hori horrela, Gizarte Politiketako kontseilariak proposaturik, eta Nafarroako Gobernuak 2012ko uztailaren 25ean egindako bilkuran hartutako erabakiarekin bat,
I. KAPITULUA. Xedapen orokorrak
1. artikulua. Gizarte Politiketako Departamentuaren eskumenen esparrua.
Gizarte Politiketako Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: familia, kontsumoa, adingabeen babesa, kirola, gazteria, gizonen eta emakumeen arteko berdintasun politikak, garapenerako nazioarteko lankidetza, gizarte gaiak, immigrazio politiken koordinazioa, bai eta indarra duten xedapenek ematen dizkioten gainerako eskudantziak ere.
2. artikulua. Gizarte Politiketako kontseilaria.
1. Gizarte Politiketako kontseilariak, Departamentuko titularra baita, eta foru dekretu honen 1. artikuluan definitutako eskumen esparruari loturik, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan ezarritako eskudantziak erabiliko ditu.
Bereziki, Gizarte Politiketako Departamentuaren aurrekontuen kargura emanen diren diru-laguntzen deialdiak onestea dagokio.
2. Orobat, Gizarte Politiketako kontseilariaren zeregina da, departamentuaren titularra den aldetik, kide anitzeko organo hauetako buru izatea:
a) Nafarroako Gizarte Ongizatearen Kontseilua.
b) Nafarroako Adinekoen Kontseilua.
c) Nafarroako Desgaitasunaren Kontseilua.
d) Gizarte Zerbitzuen Administrazioen arteko Kontseilua.
e) Nafarroako Garapenerako Lankidetzaren Kontseilua.
f) Nafarroako Kontsumoaren Kontseilua.
g) Nafarroako Adingabearen Kontseilua.
h) Nafarroako Kirol eta Gazteriaren Institutuko Gobernu Kontseilua.
i) Nafarroako Berdintasunerako eta Familiarako Institutuko Gobernu Kontseilua.
3. Departamentuan bada Kontseilariaren Kabinete bat, Gizarte Politiketako kontseilariari laguntza politikoa eta teknikoa emateko; kabinetea Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluan ezarritakoari loturik dago, eta kontseilariaren mendean dago zuzenean.
3. artikulua. Gizarte Politiketako Departamentuaren antolaketa orokorra.
1. Gizarte Politiketako Departamentuak, bere titularraren goi zuzendaritzapean, organo hauek ditu bere egituran:
a) Gizarte Politikako eta Kontsumoko Zuzendaritza Nagusia.
b) Departamentuko Idazkaritza Tekniko Nagusia.
2. Orobat, Gizarte Politiketako Departamentuari atxikirik geldituko dira erakunde autonomo hauek:
a) Nafarroako Kirol eta Gazteriaren Institutua.
b) Nafarroako Familiarako eta Berdintasunerako Institutua.
3. Nafarroako Mendekotasunerako Agentzia erakunde autonomoa Gizarte Politikako eta Kontsumoko Zuzendaritza Nagusiari atxikirik geldituko da.
4. artikulua. Gizarte Politikako eta Kontsumoko Zuzendaritza Nagusiaren eskumenen esparru materiala eta eskudantziak.
1. Gizarte Politikako eta Kontsumoko Zuzendaritza Nagusiak foru dekretu honetan aurreikusten diren eskudantziak erabiliko ditu arlo hauetan:
a) Gizarte gaiak.
b) Garapenerako nazioarteko lankidetza.
c) Immigrazio politiken koordinazioa.
d) Kontsumoa.
Halaber, departamentuaren eskumenen esparruaren barrenean dauden fundazioen babesle lanak eginen ditu, baita indarra duten xedapenek Gizarte Politiketako Departamentuari zuzendaritza nagusiaren eremuan esleitzen dizkioten beste eginkizunak ere.
2. Foru dekretu honen 2. artikuluan ezarritakoa galarazi gabe, Gizarte Politikako eta Kontsumoko Zuzendaritza Nagusiak, kontseilariaren goi zuzendaritzapean eta aurreko atalean adierazitako esparru materialean, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluan eta azken xedapenetako lehenbizikoan ezarritako eskudantziak izanen ditu eta, horietaz gainera, indarra duten xedapenek esleitzen dioten edo Gizarte Politiketako Departamentuko kontseilariak agintzen dion beste edozein, eta horretarako behar diren ebazpenak emanen ditu.
5. artikulua. Idazkaritza Tekniko Nagusiaren eskudantziak.
1. Gizarte Politiketako Departamentuko Idazkaritza Tekniko Nagusiak, foru dekretu honen 1. artikuluan zehaztu diren eskumenen esparruan, eta Gizarte Politiketako kontseilariaren goi zuzendaritzapean -berari atxikita baitago zuzenean-, Nafarroako Foru Komunitateko Administrazioari buruzko abenduaren 3ko 15/2004 Foru Legearen 23. artikuluan aurreikusitako eskudantziak eta Idazkaritza Tekniko Nagusiak arautzen dituen Erregelamenduan ezarritakoak erabiliko ditu, baita indarra duten xedapenek emandakoak edota Gizarte Politiketako kontseilariak agintzen dizkion guztiak ere, eta horretarako behar diren ebazpenak emanen ditu.
2. Horrez gain, aipatu araudiari jarraituz bere dituen eskudantzia juridikoak, tekniko-administratiboak eta aurrekontuaren kudeaketari buruzkoak, departamentuan diren erakunde autonomoen gainean, bakoitzaren estatutuetan ezarritakoa ezertan ukatu gabe.
3. Langileen arloan, dagozkion eginkizunak beteko ditu, Nafarroako Foru Komunitateko Administrazioko eta haren erakunde autonomoetako organoen arloan eskudantziak zehazten dituen araudiari jarraikiz, bai Gizarte Politikako eta Kontsumoko Zuzendaritza Nagusiari eta Idazkaritza Tekniko Nagusiari atxikitako langileei dagokienez, bai Nafarroako Mendekotasun Agentziako langileei dagokienez, erakunde autonomo horren mendeko egoitzetako langileak izan ezik, baita Nafarroako Berdintasunerako eta Familiarako Institutuko langileei dagokienez ere.
4. Orobat, Idazkaritza Tekniko Nagusiari dagozkio genero berdintasunaren arloko departamentu arteko koordinazio eginkizunak, eta, zehazki, ondokoak indarreko araudiarekin bat egiten direla ikuskatzea eta egiaztatzea: araudiko genero eraginaren ebaluazio txostenak, datuak sexuaren arabera bereiztea eta oro har estatistikak egokitzea, aurrekontuan generoaren azterketa sar dadila, eta klausula eta irizpide berriak sar daitezela, emakumeen eta gizonen arteko berdintasunarekin loturik, diru-laguntza eta kontratazio publikoetan, bai eta departamentuak egiten dituen azterlanetan ere. Eginkizun horiek Nafarroako Familiarako eta Berdintasunerako Institutuarekin koordinaturik eginen dira.
6. artikulua. Zerbitzuen eskudantziak.
Zerbitzuek jarraian adierazten diren eginkizunak izanen dituzte, departamentuko goragoko organoen zuzendaritzapean eta zerbitzu bakoitzari foru dekretu honetan ezartzen zaion esparru material edo funtzionalean: euren menpeko atal edo unitate organikoen jarduera planifikatzea, koordinatzea, zuzentzea eta kontrolatzea; prozedurak azkartzea, arrazionalizatzea eta erraztea bultzatu eta sustatzea; eta indarreko xedapenek berariaz ezarritakoak eta departamentuko organo eskudunek banatzen edo eskuordetzen dizkietenak.
7. artikulua. Atalen eskudantziak.
Atalek jarraian adierazten diren eginkizunak izanen dituzte, departamentuko goragoko organoen zuzendaritzapean eta atal bakoitzari foru dekretu honetan ezartzen zaion esparru material edo funtzionalean: euren esparru materialeko gaien txostenak egitea, hierarkian euren gainetik dagoenari ekintzak proposatzea eta haiek burutzea; euren menpeko bulegoen jarduerak koordinatzea, zuzentzea eta kontrolatzea; eta departamentuko organo eskudunek agintzen dizkieten eginkizun guztiak.
II. KAPITULUA. Gizarte Politikako eta Kontsumoko Zuzendaritza Nagusia
1. atala. Gizarte Politikako eta Kontsumoko Zuzendaritza Nagusiaren egitura
8. artikulua. Gizarte Politikako eta Kontsumoko Zuzendaritza Nagusiaren egitura.
1. Gizarte Politikako eta Kontsumoko Zuzendaritza Nagusiak zerbitzu hauek ditu bere egituran:
a) Plangintza, Kalitate eta Ikuskapen Zerbitzua.
b) Garapenari Arreta Emateko eta Pertsonak Gizarteratzeko Zerbitzua.
c) Kontsumo eta Arbitraje Zerbitzua.
2. Era berean, Nafarroako Mendekotasunerako Agentzia erakunde autonomoa Gizarte Politikako eta Kontsumoko Zuzendaritza Nagusiari atxikirik geldituko da.
2. atala. Plangintza, Kalitate eta Ikuskapen Zerbitzua
9. artikulua. Plangintza, Kalitate eta Ikuskapen Zerbitzuaren eskumenen esparru material eta funtzionala eta haren egitura.
1. Plangintza, Kalitate eta Ikuskapen Zerbitzuak, gizarte gaien, kontsumoaren, adingabeen babesaren eta familiaren eta emakumeen eta gizonen arteko berdintasun politiken esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Gizarte zerbitzuen plan estrategikoak, plan sektorialak, kalitate planak eta gizarte zerbitzu orokorren zorroa egitea, jarraitzea eta ebaluatzea.
b) Gizarte zerbitzuen eskaerari eta gizarte zerbitzuen hartzaileei buruzko azterlanak eta ikerketak egitea.
c) Arloko ikerketa jarduerak bultzatzea.
d) Gizarte zerbitzuetarako programak prestatu, jarraitu eta ebaluatzeko lanetan parte hartzea, kasuan kasuko unitate teknikoekin batera.
e) Plangintzari buruzko azterlan eta dokumentuak prestatu, zabaldu eta argitaratzea.
f) Gizarte zerbitzuen kudeaketa, antolamendua eta haietan ematen den laguntza hobetzeko proposamenak prestatzea.
g) Departamentuaren unitate organikoen eta erakunde autonomoen arteko lankidetza eta koordinaziorako proposamenak egitea, eta departamentu hori beste departamentu eta erakunde batzuekin lankidetzan aritu eta koordinatzeko proposamenak egitea, dauden baliabideak optimizatzeko.
h) Gizarte zerbitzuetako profesionalendako prestakuntza planak diseinatzea.
i) Departamentuaren funtzionamenduan eta helburuak erdiesteko, kalitate- eta kostu-sistemak sustatzea eta ezartzea, zerbitzuen eragimen eta erabiltzaileen asetasun parametroen pean.
j) Gizarte zerbitzuen sistemako zerbitzuen kalitatea hobetzeko sustapena.
k) Zerbitzuen homologazio administratiborako baldintzak prestatu, aztertu eta berrikustea.
l) Homologazio administratiboa duten sistemako zerbitzuen zerrenda argitaratu eta zabaltzea.
m) Sistemako zerbitzuen kalitatearen ebaluazioa argitaratu eta zabaltzea.
n) Kalitate prozesuetarako prestakuntza programak koordinatu, kudeatu, kontrolatu eta ebaluatzea, gizarte zerbitzuetan, oro har, diren profesionalendako.
ñ) Gizarte zerbitzuen etengabeko hobekuntzaren eta bikaintasunaren sustapena.
o) Ikuskapen planak prestatzea, gizarte zerbitzuen sistemako zerbitzuetarako, eta ikuskapen jarduera kontrolatu eta koordinatzea.
p) Gizarte Zerbitzuen Erregistroa kudeatzeko jarduketak bultzatu eta koordinatzea.
q) Fundazioen Babesletza kudeatzea.
r) Azaldutako eginkizunen antzekoa edo osagarria izanik, beste administrazio unitateren bati espresuki esleitu ez zaiona, eta eskuordetzen edo agintzen zaion beste edozein eginkizun.
2. Plangintza, Kalitate eta Ikuskapen Zerbitzuak atal hauek ditu bere egituran:
a) Plangintza eta Ikerketa Atala.
b) Kalitatearen eta Fundazioen Babesletzaren Atala.
c) Ikuskapen Atala.
10. artikulua. Plangintza eta Ikerketa Atalaren eskumenen esparru material eta funtzionala.
Plangintza eta Ikerketa Atalak, gizarte gaien, familiaren eta adingabeen babesaren esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Gizarte zerbitzuen plan estrategikoak, plan sektorialak, kalitate planak eta gizarte zerbitzu orokorren zorroa teknikoki gauzatzea, jarraitzea eta ebaluatzea.
b) Gizarte zerbitzuei buruzko argitalpenak prestatzea.
c) Planak eta programak gauzatzeko baliabide-beharrak baloratu eta haien kostu ekonomikoa ebaluatzea.
d) Lege-arauak eta erregelamenduak egiteko laguntza teknikoa ematea.
e) Gizarte prestazioen ereduen definizioak proposatzea unitate teknikoei.
f) Topaketak, kongresuak, jardunaldiak eta bestelako ekitaldi profesional eta/edo zientifikoak antolatzea eta haietarako laguntza ematea.
g) Beharren, egoeraren eta baliabideen azterketak egitea, jarduketa plan eta programetarako jarraibideak eman ahal izateko.
h) Ikerketa proposamenak egitea eta Nafarroako Foru Komunitatean egiten den ikerketari laguntzea.
i) Gizarte Zerbitzuen Maparen beharrak eta hura hornitzeko zerbitzuen azterketa.
j) Departamentuetan planei buruzko informazioa biltzea errazteko baliabideak koordinatu eta haien jarraipena egitea.
k) Europa, Espainia, erkidego autonomo eta toki mailako iturrietan eskuratzen ahal den informazioa bildu eta aztertzea, haren esparruko gaiei dagokienez.
l) Gizarte zerbitzuen sistemako prestazioen eskaria, eraginkortasuna eta eragimena aztertu eta ebaluatzea.
m) Bere eskumenen esparruko espedienteak kudeatu eta artxibatzea.
11. artikulua. Kalitatearen eta Fundazioen Babesletzaren Atalaren eskumenen esparru material eta funtzionala.
Kalitatearen eta Fundazioen Babesletzaren Atalak, gizarte gaien, kontsumoaren, familiaren, adingabeen babesaren eta emakumeen eta gizonen arteko berdintasun politiken esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Kalitate planetan aurreikusitako neurriak bultzatu eta gauzatzea.
b) Kalitate sistema homologagarrien proposamenak prestatzea departamentuaren funtzionamendurako.
c) Zerbitzuen kartak prestatzea.
d) Homologazio administratiboak kudeatu eta tramitatzea.
e) Kalitatea hobetu eta homologazio administratiboa eskuratzeko diru-laguntzen deialdiak prestatu, kudeatu eta haien gaineko jarraipena egitea.
f) Kalitate planetan ezarritako adierazle kuantitatibo eta kualitatiboak ebaluatzea.
g) Kalitate planak aztertu, ebaluatu eta gauzatzea.
h) Gizarte Zerbitzuen Erregistroa kudeatzea.
i) Fundazioen Erregistroari jakinaraztea eratzen ari diren fundazioen xedeak egokiak diren eta horretarako hornidura egokia duten.
j) Eratzen ari diren fundazioei aholku ematea.
k) Gizarte Politikako eta Kontsumoko Zuzendaritza Nagusiaren babesletzaren pean dauden fundazioei aholku ematea haien xedeak erdiesteko garatzen duten edozein jarduerari buruz, eta beharrezkoa den laguntza ematea.
l) Fundazioen xedeak betetzen direla zaintzea, fundatzailearen asmoarekin bat eta interes orokorra aintzat hartuta.
m) Bere eskumenen esparruko espedienteak kudeatu eta artxibatzea.
12. artikulua. Ikuskapen Atalaren eskumenen esparru material eta funtzionala.
Ikuskapen Atalak, gizarte gaien, familiaren, adin txikikoen babesaren eta emakumeen eta gizonen arteko berdintasun politiken esparruan, foru dekretu honetan ezarritako eskurantzak izanen ditu. Bereziki, hurrengo eskurantzak izanen ditu:
a) Gizarte zerbitzuen sistemako zerbitzuak ematen dituztenek eta horiek hartzen dituztenek gizarte zerbitzuak erregulatzen dituzten arauetan xedatutakoa betetzen ote duten kontrolatu eta ikuskatzea, departamentuko gainerako unitate organikoekin elkarlanean.
b) Gizarte zerbitzuen sistemako zerbitzuen baimen administratiboak kudeatu eta tramitatzea.
c) Bere eskumenen esparruko espedienteak kudeatu eta artxibatzea.
3. atala. Garapenari Arreta Emateko eta Pertsonak Gizarteratzeko Zerbitzua
13. artikulua. Garapenari Arreta Emateko eta Pertsonak Gizarteratzeko Zerbitzuaren eskumenen esparru material eta funtzionala eta haren egitura.
1. Garapenari Arreta Emateko eta Pertsonak Gizarteratzeko Zerbitzuak foru dekretu honetan aurreikusitako eskudantziak izanen ditu gizarte zerbitzuen, garapenerako nazioarteko lankidetzaren eta immigrazioko politiken koordinazioaren esparruetan, bereziki, honako hauek:
a) Gizarte Zerbitzuen Zentroak ezartzea, bai eta zentro horien kudeaketa eta zentro horietan integratuta dauden profesional anitzeko taldeak koordinatzea ere, Nafarroako Familiarako eta Berdintasunerako Institutuarekin koordinaturik.
b) Oinarrizko Gizarte Zerbitzuak kudeatzeko ardura duten toki entitateekin koordinatzea eta elkarlanean aritzea.
c) Plangintza, Kalitate eta Ikuskapen Zerbitzuarekin lankidetzan aritzea departamentuaren planak eta programak diseinatu, ebaluatu eta jarraitzeko.
d) Oinarrizko gizarte zerbitzuetako langileendako prestakuntza programak, Plangintza, Kalitate eta Ikuskapen Zerbitzuak diseinatzen dituenak, koordinatu, kudeatu, kontrolatu eta ebaluatzea.
e) Gizarteratzeko programa eta prestazioak koordinatu, kudeatu, kontrolatu eta ebaluatzea.
f) Bestelako unitate, departamentu eta erakundeekin koordinatzeko egiturak bultzatzea, gizarteratzeko programak gauzatzeko.
g) Garapenerako nazioarteko lankidetzaren arloan jarduketa programak prestatzea eta immigrazioko politikak koordinatzea, departamentuak finkatzen dituen helburu eta jarduketa-ildoetatik abiatuta.
h) Garapen bidean diren herrialdeei Nafarroako Gobernuak ematen dien laguntza ofiziala kudeatzea.
i) Nafarroako Foru Komunitateko Administrazioak garapenerako nazioarteko lankidetzaren arloan finantzatzen dituen proiektuak ebaluatu eta jarraitzeko programak prestatu eta gauzatzea.
j) Departamentua beste departamentu, administrazio publiko eta erakunde batzuekin koordinatzeko neurriak har daitezen proposatzea, garapenerako nazioarteko lankidetzaren arloan eta immigrazioko politiken koordinazioaren arloan dauden baliabideak optimizatzeko.
k) Garapenerako nazioarteko lankidetzaren eta immigrazioko politiken arloetan Nafarroako Aurrekontu Orokorren kargura finantzatzen diren proiektu eta ekintzak kontrolatzea.
l) Immigrazioari buruzko politika publikoak, planak eta programak sustatu eta koordinatzea, bikoizketak saihestuz eta erabilgarri dauden baliabideak egiazki arrazionalizatuz.
m) Immigrazioaren Behatoki Iraunkorra.
n) Atzerriko herritarrei informazioa eta arreta ematea.
ñ) Azaldutako eginkizunen antzekoa edo osagarria izanik, beste administrazio unitate bati espresuki esleitu ez zaion beste edozein eginkizun, eta eskuordetzen edo agintzen zaizkionak.
2. Garapenari Arreta Emateko eta Pertsonak Gizarteratzeko Zerbitzuak atal hauek ditu bere egituran:
a) Oinarrizko Laguntzaren Atala.
b) Gizarteratze Atala.
c) Garapeneko eta Ekintza Humanitarioko Programen Atala
d) Immigraziorako Atala.
14. artikulua. Oinarrizko Laguntzaren Atalaren eskumenen esparru material eta funtzionala.
Kalitatearen Atalak, gizarte gaien, adingabeen babesaren eta emakumeen eta gizonen arteko berdintasun politiken esparruan, foru dekretu honetan ezarritako eskudantziak izanen ditu. Bereziki, honako hauek:
a) Oinarrizko laguntzaren sarean garatu beharreko programak eta oinarrizko prestazioak diseinatzen laguntzea.
b) Oinarrizko Gizarte Zerbitzuei eta haiek sartuak dauden udalei aholku teknikoa ematea.
c) Bere eskumeneko gaietan, koordinazio eta ebaluaziorako dispositiboetan parte hartzea.
d) Oinarrizko laguntzaren arloan, departamentuen edo erakundeen arteko lantalde teknikoetan parte hartzea.
e) Oinarrizko Gizarte Zerbitzuen finantzazioari buruzko espedienteak kudeatu eta tramitatzea.
f) Bere eskumeneko arloetan boluntario-lana sustatzea.
g) Bere eskumenen esparruko espedienteak kudeatu eta artxibatzea.
15. artikulua. Gizarteratze Atalaren esparru material eta funtzionala.
Gizarteratze Atalak, gizarte gaien esparruan, foru dekretu honetan ezarritako eskudantziak izanen ditu. Bereziki, honako hauek:
a) Gutxieneko Diru-sarreren Programa kudeatu, tramitatu, jarraitu eta kontrolatzea.
b) Departamentuan gizarteratzeko ezarritako bestelako programa eta prestazioak kudeatu, tramitatu, jarraitu eta kontrolatzea.
c) Gizartean eta lan-munduan sartzeko ekipoak kudeatu eta koordinatzea.
d) Gizarteratze alorrean koordinazio eta ebaluaziorako dispositiboetan parte hartzea.
e) Gizarteratze arloan, departamentuen edo erakundeen arteko lantalde teknikoetan parte hartzea.
f) Kotizazio gabeko pentsio eta laguntzen espedienteak tramitatu, jarraitu eta kontrolatzea.
g) Alargun-pentsioak jasotzeagatik Pertsona Fisikoen Errentaren gaineko Zergan kenkaria aldez aurretik ordaintzeko espedienteak tramitatu, jarraitu eta kontrolatzea.
h) Bere eskumenen esparruko espedienteak kudeatu eta artxibatzea.
16. artikulua. Garapenerako Nazioarteko Lankidetzaren eta Immigraziorako Zerbitzuaren eskumenen esparru material eta funtzionala eta haren egitura.
1. Garapenerako Nazioarteko Lankidetzaren eta Immigraziorako Zerbitzuak, garapenerako nazioarteko lankidetzaren eta immigraziorako politiken koordinazioaren esparruetan, foru dekretu honetan aurreikusitako eskudantziak izanen ditu. Bereziki, honako hauek:
a) Bere arloko programak prestatzea, departamentuak ezarritako helburu eta jardunbideak abiapuntutzat harturik.
b) Garapen bidean diren herrialdeei Nafarroako Gobernuak ematen dien laguntza ofiziala kudeatzea.
c) Nafarroako Foru Komunitateko Administrazioak garapenerako nazioarteko lankidetzaren arloan finantzatzen dituen proiektuak ebaluatu eta jarraitzeko programak prestatu eta gauzatzea.
d) Departamentua beste departamentu, administrazio publiko eta erakunde batzuekin koordinatzeko neurriak har daitezen proposatzea, dauden baliabideak hobetzeko.
e) Nafarroako Aurrekontu Orokorren kargura finantzatutako proiektu eta ekintzak kontrolatzea.
f) Immigraziorako politika publikoak, planak eta programak sustatu eta koordinatzea, bikoizketak saihestuz eta erabilgarri dauden baliabideen arrazionalizazioa gauzatuz.
g) Immigrazioaren Behatoki Iraunkorra.
h) Atzerriko herritarrei informazioa eta arreta ematea.
i) Azaldutako eginkizunen antzekoa edo osagarria izanik, beste administrazio unitateren bati espresuki esleitu ez zaiona, eta eskuordetzen edo agintzen zaion beste edozein eginkizun.
2. Garapenerako Nazioarteko Lankidetzaren eta Immigraziorako Zerbitzuak atal hauek ditu bere egituran:
a) Garapeneko eta Ekintza Humanitarioko Programen Atala.
b) Immigraziorako Atala.
17. artikulua. Garapeneko eta Ekintza Humanitarioko Programen Atalaren eskumenen esparru material eta funtzionala.
Garapeneko eta Ekintza Humanitarioko Programen Atalak, garapenerako nazioarteko lankidetzaren esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Garapenerako lankidetzan egin beharreko esku-hartzeak programatzea.
b) Garapenerako lankidetzan egindako politikak ebaluatzea.
c) Garapen bidean diren herrialdeetan gizarte intereseko proiektuak kudeatu, tramitatu, jarraitu eta kontrolatzea.
d) Nafarroako Aurrekontu Orokorren kargura finantzatuta garapenerako lankidetzan egiten diren esku-hartzeak jarraitu eta ebaluatzea.
e) Bere eskumenen esparruko espedienteak kudeatu eta artxibatzea.
18. artikulua. Immigraziorako Atalaren eskumenen esparru material eta funtzionala.
Immigraziorako Atalak, immigraziorako politiken koordinazio eta arretaren esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Foru Administrazioko departamentuekin koordinatzea etorkinen etorrerak haietako bakoitzaren eskumen esparruan duen eragina azter dadin eta, orobat, etorkinak gure erkidegora egokitzeko eta erkidego hartzaileak haiek onartzeko neurriak abian jar daitezen.
b) Toki entitateekin koordinatzea etorkinak gizarteratzeko jarduketak ezarri eta, beharrezkoa bada, egokitu daitezen.
c) Immigrazioaren arloan jarduten duten gizarte ekimeneko entitateekin koordinatzea etorkinei arreta emateko eta kulturen arteko elkarbizitza sustatzeko zerbitzu eta/edo neurriak abian jar daitezen.
d) Etorkinen elkarteekin lankidetzan aritzea eta arlo horretako asoziazionismoari laguntzea.
e) Berez edo beste administrazio batzuekin lankidetzan garatzen dituen gizarte programak kudeatu eta koordinatzea.
f) Koordinazio eta ebaluaziorako dispositiboetan parte hartzea, hala nola bere eskumeneko arloarekin zerikusia duten lantalde teknikoetan.
g) Bere eskumeneko programei lotutako gastu eta aurrekontuen jarraipena egitea.
h) Bere eskumenen esparruko espedienteak kudeatu eta artxibatzea.
i) Antzeko eginkizunak edo horien osagarriak, Garapenerako Nazioarteko Lankidetzaren eta Immigraziorako Zerbitzuak esleitzen badizkio.
4. atala. Kontsumo eta Arbitraje Zerbitzua
19. artikulua. Kontsumo eta Arbitraje Zerbitzuaren eskumenen esparru material eta funtzionala eta haren egitura.
1. Kontsumo eta Arbitraje Zerbitzuak, kontsumoaren esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Kontsumitzaileen babesa.
b) Kontsumo arloko informazioa, hezkuntza eta prestakuntza.
c) Merkatuko diziplinarekin lotutako jarduketak, bai eta lehiaren defentsarekin eta sustapenarekin lotutakoak ere.
d) Kontsumitzaile eta erabiltzaileen elkarteak sustatzea.
e) Bitartekotza eta arbitrajea, kontsumo gaietan.
f) Hipoteketako bitartekotza.
g) Azaldutako eginkizunen antzekoa edo osagarria izanik, beste administrazio unitateren bati espresuki esleitu ez zaiona, eta eskuordetzen edo agintzen zaion beste edozein eginkizun.
2. Kontsumo eta Arbitraje Zerbitzuak atal hauek ditu bere egituran:
a) Merkatua Kontrolatzeko, Sustapenerako eta Lehiaren Defentsarako Atala.
b) Kontsumitzaileen Babeserako eta Kontsumoko Arbitrajerako Atala.
3. Era berean, Kontsumoko Arbitraje Batzordea Kontsumo eta Arbitraje Zerbitzuari atxikirik geldituko zaio.
20. artikulua. Merkatua Kontrolatzeko, Sustapenerako eta Lehiaren Defentsarako Atalaren eskumenen esparrua.
Merkatua Kontrolatzeko, Sustapenerako eta Lehiaren Defentsarako Atalak, kontsumoaren esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Merkatua zaindu eta ikuskatzea, kontsumoaren arloan.
b) Ikuskapen jarduera gauzatzean atzemandako administrazioko arau-hausteen ondoriozko zehapen-espedienteetan ezarritako zehapenen jarraipena egitea eta betetzen direla kontrolatzea.
c) Beltzarantzeko Zentroen Erregistroaren kudeaketa eta prestakuntza zentroen homologazioa.
d) Merkatuak ikertzea eta zaintzea, eta lehiaren defentsaren arloan zehapen eta baimen espedienteak instruitzea.
e) Merkatuetan benetako lehia izan dadila sustatzea.
f) Kontsumoaren eta merkatuaren kontrolaren arloetan indarrean den araudia aplikatzeko egokitu dakizkiokeen gainerako eginkizunak.
g) Bere eskumenen esparruko espedienteak kudeatu eta artxibatzea.
h) Azaldutako eginkizunen antzekoa edo osagarria izanik, beste administrazio unitateren bati espresuki esleitu ez zaiona, eta eskuordetzen edo agintzen zaion beste edozein eginkizun.
21. artikulua. Kontsumitzaileen Babeserako eta Kontsumoko Arbitrajerako Atalaren eskumenen esparrua.
Kontsumitzaileen Babeserako eta Kontsumoko Arbitrajerako Atalak, kontsumoaren esparruan, foru dekretu honetan aurreikusitako eskudantziak izanen ditu. Bereziki, honako hauek:
a) Kontsumitzaile eta erabiltzaileen babeserako informazio, prestakuntza eta hezkuntza ekintzak burutzea.
b) Kontsumitzaile eta erabiltzaileen kontsultei, kexei eta erreklamazioei arreta ematea.
c) Bitartekotza sustatzea.
d) Indarrean den araudiak kontsumoko arbitrajeari eta kontsumitzaileen babesari dagokionez esleitutako eginkizunak betetzea.
e) Nafarroako Kontsumitzaile eta Erabiltzaileen Elkarteen Erregistroa kudeatzea.
f) Nafarroako Kontsumoaren Kontseiluari laguntza ematea bere eginkizunak gauzatu ditzan.
g) Nafarroako Foru Komunitatean ezgaitasunaren ondoriozko aukeren berdintasunaren, bazterketa ezaren eta irisgarritasunaren arloan kexak eta erreklamazioak jartzeko arbitraje sistema ezartzen laguntzea eta, kasua bada, hori kudeatzea.
h) Kontsumitzaileei arreta ematea, hipoteketarako bitartekotzaren arloan.
i) Bere eskumenen esparruko espedienteak kudeatu eta artxibatzea.
j) Azaldutako eginkizunen antzekoa edo osagarria izanik, beste administrazio unitateren bati espresuki esleitu ez zaiona, eta eskuordetzen edo agintzen zaion beste edozein eginkizun.
III. KAPITULUA. Idazkaritza Tekniko Nagusia
22. artikulua. Idazkaritza Tekniko Nagusiaren egitura.
Idazkaritza Tekniko Nagusiak atal hauek ditu:
a) Ekonomia eta Aurrekontuak Kudeatzeko Atala.
b) Gizarte Politikako Araubide Juridiko-administratiboaren Atala.
c) Berdintasun, Familia, Kirol, Gazteria eta Kontsumoko Araubide Juridiko-administratiboaren Atala.
d) Sistemen Kudeaketarako Atala.
e) Informazio eta Modernizazio Atala.
23. artikulua. Ekonomia eta Aurrekontuak Kudeatzeko Atalaren eskumenen esparru material eta funtzionala.
Ekonomia eta Aurrekontuak Kudeatzeko Atalak foru dekretu honetan aurreikusitako eskudantziak izanen ditu. Bereziki, honako hauek:
a) Aholkularitza ematea Gizarte Politikako eta Kontsumoko Zuzendaritza Nagusiari, Nafarroako Mendekotasun Agentziari eta departamentuko gainerako erakunde autonomoei epe ertainera departamentuaren aurrekontuen eta plan ekonomikoaren aurreproiektua prestatzeko.
b) Departamentuko aurrekontuen aurreproiektua koordinatu eta tramitatzea.
c) Departamentuko aurrekontuen kudeaketari buruzko informazioa beti eguneraturik edukitzea.
d) Gizarte Politikako eta Kontsumoko Zuzendaritza Nagusiko, Nafarroako Mendekotasun Agentziako eta Nafarroako Familiarako eta Berdintasunerako Institutuko ordaintzeko aginduak, justifikatu beharrekoak, kudeatu, jarraitu eta justifikatzea, eta kutxako aurrerakinen kontuak kudeatu eta kontrolatzea.
e) Gizarte Politikako eta Kontsumoko Zuzendaritza Nagusiaren, Nafarroako Mendekotasun Agentziaren eta Nafarroako Familiarako eta Berdintasunerako Institutuaren jarduera ekonomikoen kontabilitate orokorra eta aurrekontuena.
e) Gizarte Politikako eta Kontsumoko Zuzendaritza Nagusiari, Nafarroako Mendekotasun Agentziari eta Nafarroako Familiarako eta Berdintasunerako Institutuari dagozkien diru-sarrera eta gastuen espedienteen kontabilizazioa.
g) Azterlan ekonomikoak egitea.
h) Bere eskumenen esparruko espedienteak kudeatu eta artxibatzea.
i) Idazkari tekniko nagusiak bere eskumenen esparruan agintzen dion beste edozein.
24. artikulua. Gizarte Politikako Araubide Juridiko-administratiboaren Atalaren eskumenen esparru material eta funtzionala.
Gizarte Politikako Araubide Juridiko-administratiboaren Atalak, gizarte gaien, garapenerako lankidetzaren eta immigraziorako politiken koordinazioaren esparruetan, eginkizun hauek izanen ditu:
a) Kontseilariak Nafarroako Gobernuari igortzen dizkion espedienteak, departamentuaren eta haren erakunde autonomoen aferei buruzkoak, koordinatu eta gainbegiratzea.
b) Kontseilariak ebatzi behar dituen departamentuaren eskumeneko espedienteak koordinatu eta gainbegiratzea, onetsiak izan daitezen.
c) Departamentuko organoei aholkua eta laguntza juridikoa ematea.
d) Aginduzko txosten juridikoak eta departamentuko organoek eskatzen dizkioten txostenak egitea.
e) Gizarte Politiketako kontseilariak onetsitako foru aginduak erregistratu, artxibatu eta gordetzea, bai eta Gizarte Politikako eta Kontsumoko zuzendari nagusiak eta departamentuko erakunde autonomoen titularrek onetsitako ebazpenak ere, haien estatutuetan kontrakoa adierazten ez bada.
f) Gizarte Politikako eta Kontsumoko Zuzendaritza Nagusiak eta Nafarroako Mendekotasunerako Agentziak dituzten lan metodoak hobetzeko aldaketak proposatu eta sustatzea, modurik arinen eta eraginkorrenean jokatu ahal izateko, administrazioa modernizatu eta prozedurak erraztearen arloan eskumena duten unitate organikoekin koordinatuta eta haiek ezarritako gidalerroei jarraikiz.
g) Txosten juridikoak prestatzea departamentuak ematen dituen egintzen aurka jartzen diren errekurtso administratiboei buruz.
h) Gizarte Politiketako kontseilariak, bide jurisdikzional zibil eta sozialera jo aurretik, ebatzi behar dituen erreklamazioetan behar diren txosten juridikoak prestatzea.
i) Arauak bildu eta eguneratzea eta, orobat, horren gaineko jurisprudentzia, doktrina eta interes juridikoa dituen informazioa bildu, hedatu eta haren segimendua egitea.
j) Ondarearen gaineko erantzukizunaren prozedurak tramitatzea.
k) Erabiltzaileek zerbitzu publikoen gainean aurkezten dituzten kexa eta aholkuak kudeatu eta tramitatzea.
l) Bere eskumenen esparruko espedienteak kudeatu eta artxibatzea.
m) Idazkari tekniko nagusiak bere eskumenen esparruan agintzen dion beste edozein.
25. artikulua. Berdintasun, Familia, Kirol, Gazteria eta Kontsumoko Araubide Juridiko-administratiboaren Atalaren eskumenen esparru material eta funtzionala.
Berdintasun, Familia, Kirol, Gazteria eta Kontsumoko Araubide Juridiko-administratiboaren Atalak, familiaren, kontsumoaren, adingabeen babesaren, kirolaren, gazteriaren eta gizonen eta emakumeen arteko berdintasun politiken esparruetan, eginkizun hauek izanen ditu:
a) Kontseilariak Nafarroako Gobernuari igortzen dizkion espedienteak, departamentuaren eta haren erakunde autonomoen aferei buruzkoak, koordinatu eta gainbegiratzea.
b) Kontseilariak ebatzi behar dituen departamentuaren eskumeneko espedienteak koordinatu eta gainbegiratzea, onetsiak izan daitezen.
c) Departamentuko organoei aholkua eta laguntza juridikoa ematea.
d) Aginduzko txosten juridikoak eta departamentuko organoek eskatzen dizkioten txostenak egitea.
e) Nafarroako Berdintasunerako eta Familiarako Institutuak eta Nafarroako Kirol eta Gazteriaren Institutuak dituzten lan metodoak hobetzeko aldaketak proposatu eta sustatzea, modurik arinen eta eraginkorrenean jokatu ahal izateko, administrazioa modernizatu eta prozedurak erraztearen arloan eskumena duten unitate organikoekin koordinatuta eta haiek ezarritako gidalerroei jarraikiz.
f) Txosten juridikoak prestatzea departamentuak ematen dituen egintzen aurka jartzen diren errekurtso administratiboei buruz.
g) Arauak bildu eta eguneratzea eta, orobat, horren gaineko jurisprudentzia, doktrina eta interes juridikoa dituen informazioa bildu, hedatu eta haren segimendua egitea.
h) Ondarearen gaineko erantzukizunaren prozedurak tramitatzea.
i) Bere eskumenen esparruko espedienteak kudeatu eta artxibatzea.
j) Idazkari tekniko nagusiak bere eskumenen esparruan agintzen dion beste edozein.
26. artikulua. Sistemen Kudeaketarako Atalaren eskumenen esparru material eta funtzionala.
Sistemen Kudeaketarako Atalak foru dekretu honetan aurreikusitako eskudantziak izanen ditu. Bereziki, honako hauek:
a) Telekomunikazio eta informazio sistemen inguruan diren premiak identifikatzea, eta departamentuko unitate administratiboek gai horren gainean egiten dituzten eskaerak bideratzea.
b) Erabiltzaileen errekerimenduak eta asetzeko xedeak bildu, definitu eta lehenestea, hori guztia Gobernu Irekiaren eta Teknologia Berrien Zuzendaritza Nagusiarekin elkarlanean, informazio sistemak eta aplikazio informatikoak eratu eta ezartzeko, auditoretzarako eta kontrolerako, informazioaren segurtasunari dagokionez, departamentuetakoak edo korporatiboak izan.
c) Enpresa kontratatuek egindako lanen kontrola eta plangintza, bere jarduketa-esparrukoak direnean.
d) Ekipoak eta aplikazioak behar bezala erabiltzeko prestakuntza programak antolatu eta garatzen parte hartzea.
e) Departamentuaren "multimedia" tresneriaren kontrola egitea.
f) Bere eskumenen esparruko espedienteak kudeatu eta artxibatzea.
g) Idazkari tekniko nagusiak bere eskumenen esparruan agintzen dion beste edozein.
27. artikulua. Informazio eta Modernizazio Atalaren eskumenen esparru material eta funtzionala.
Informazio eta Modernizazio Atalak foru dekretu honetan ezarritako eskudantziak izanen ditu, eta, bereziki, honako hauek:
a) Herritarrei Gizarte Politiketako Departamentuaren jarduerez informazio orokorra emateko modua koordinatu eta bultzatzea, ikuspegi korporatibo batetik, gaur egun dauden eta geroan izan daitezkeen baliabideen bitartez, Gobernu Irekiaren eta Teknologia Berrien Zuzendaritza Nagusiarekin elkarlanean eta horrek ematen dituen jarraibideen arabera.
b) Gizarte Politiketako Departamentuko informazio sistema garatu eta mantentzea, departamentuaren erakunde autonomoen estatutuetan erakunde horiei esleitzen zaizkien eskumenak ezertan galarazi gabe.
c) Gizarte Politiketako Departamentuaren argibideak eta agiriak kudeatu eta koordinatzea, departamentuaren erakunde autonomoen estatutuetan erakunde horiei esleitzen zaizkien eskumenak ezertan galarazi gabe.
d) Gizarte Politiketako Departamentuaren programa informatikoak koordinatzea.
e) Aginte-koadroa prestatu eta eguneratzea.
f) Gizarte Politiketako Departamentuaren urteko memoria egitea.
g) Urteko kudeaketa plan integratu bat ezarri eta haren jarraipena egitea, emaitzei eta planaren beraren ebaluazioari begira.
h) Departamentuaren web orria prestatzea, mantentzea eta eguneratzea, haren mendeko erakunde autonomoekin eta Gobernu Irekiaren eta Teknologia Berrien Zuzendaritza Nagusiarekin elkarlanean.
i) Bere eskumeneko gaietan Gizarte Politikako eta Kontsumoko Zuzendaritza Nagusiari eta gainerako erakunde eta unitateei laguntzea.
j) Gizarte Politiketako Departamentuko erregistro eta artxibo administratiboak antolatzeko irizpideak ezartzea eta haiek koordinatzea, gai horietan eskumena duten gainerako unitate organikoekin elkarlanean.
k) Bere eskumenen esparruko espedienteak kudeatu eta artxibatzea.
l) Idazkari tekniko nagusiak bere eskumenen esparruan agintzen dion beste edozein.
Lehenbiziko Xedapen Gehigarria. Eskumenak banatzeko betebehar orokorrak.
Indarra duten arauek organo bati ematen dizkioten eskumenak hierarkian menpeko diren beste organo batzuen artean banatzen ahal dira, Nafarroako Aldizkari Ofizialean argitaratuko den xedapen orokor baten bitartez, eskumenak esleitzeko arauetan finkatutako baldintzak bete beharra galarazi gabe.
Gizarte Politiketako kontseilariak eraginik gabe uzten ahalko du xedapen gehigarri honetan aipatzen den eskumenen banaketa, foru agindu baten bidez. Foru agindu hori Nafarroako Aldizkari Ofizialean argitaratu beharko da.
Bigarren Xedapen Gehigarria. Eskumenen deskontzentrazioa.
1. Indarra duen araudiak kontratazioaren arloan kontseilariari ematen dizkion eskudantzia administratiboak Gizarte Politikako eta Kontsumoko zuzendari nagusiak bereganatu eta erabiliko ditu bere esparru materialean, eskudantzia hau izan ezik: departamentuari atxikitako erakunde autonomoetako zuzendari kudeatzaileei 750.000 eurotik gorako kontratuak egiteko baimena ematea.
2. Indarra duen araudiak, zehapen espedienteak hasi, tramitatu eta ebazteko, Gizarte Politiketako kontseilariari ematen dizkion eskudantzia administratiboak Gizarte Politikako eta Kontsumoko zuzendari nagusiak bereganatuko ditu.
Hirugarren Xedapen Gehigarria. Unitateen iraupena.
Foru dekretu hau garatzeko neurriak hartu bitartean, atalarena baino maila txikiagokoak diren unitate organikoek berdin segituko dute eta oraingo izenari eta eginkizunei eutsiko diete. Behin-behinekoz egitura berriko organoei atxikiko zaizkie, orain arte betetzen zituzten eginkizunen arabera.
Laugarren Xedapen Gehigarria. Genero-berdintasuna.
Zenbait pertsona, kargu edo lanposturi buruz ari denean foru dekretu honek genero gramatikal mugatuko izenak erabiltzen dituen kasu guztietan (gaztelaniazko "consejero", "director", "presidente", "secretario" eta abar) ulertu behar da adierazpideen ekonomia hutsagatik jokatzen dela horrela, eta postu horiek orokorrean hartzen dituela hizpide, haiek bai emakumezkoek bai gizonezkoek betetzen dituztela ere, erabateko berdintasun-baldintzetan, ondorio guztietarako.
Bosgarren Xedapen Gehigarria. Izendapenen berrespena.
Garapenerako Nazioarteko Lankidetzaren Zerbitzuko buruaren alde egindako izendapena berresten da, hura egin zen baldintza beretan (zerbitzuari izena aldatu zaio eta Garapenerako Nazioarteko Lankidetzaren eta Immigraziorako Zerbitzua da izen berria).
Orobat, Immigraziorako Bulegoko Programak Kudeatu eta Koordinatzeko Ataleko buruaren alde egindako izendapena berresten da, hura egin zen baldintza beretan (atalari izena aldatu zaio eta Immigraziorako Atala da izen berria).
Azkenik, Nafarroako Berdintasunerako eta Familiarako Institutuko zuzendari kudeatzailearen alde egindako izendapena berresten da, hura egin zen baldintza beretan (institutuari izena aldatu zaio eta Familiarako eta Berdintasunerako Institutua da izen berria).
Xedapen Indargabetzaile Bakarra. Arauak indargabetzea.
Indarrik gabe gelditzen dira Gizarte Politika, Berdintasun, Kirol eta Gazteria Departamentuaren egitura organikoa ezartzen duen abuztuaren 24ko 136/2011 Foru Dekretua eta foru dekretu honetan xedatutakoaren aurkakoak diren maila bereko edo apalagoko xedapen guztiak.
Halaber, indarrik gabe gelditzen da Immigraziorako Bulegoa sortu zuen abenduaren 18ko 91/2006 Foru Dekretua.
Azken Xedapenetan Lehena. Oinarrizko egitura organikoaren aldaketa.
Uztailaren 2ko Gizarte Politiketako Departamentuaren oinarrizko egitura organikoa ezartzen duen 35/2012 Foru Dekretua aldatzen da, eta honela geldituko da:
1. Artikulu bakarraren 2. idatz-zatiak testu hau izanen du:
"2. Orobat, Gizarte Politiketako Departamentuari atxikirik geldituko dira erakunde autonomo hauek:
a) Nafarroako Kirol eta Gazteriaren Institutua.
b) Nafarroako Familiarako eta Berdintasunerako Institutua."
2. Lehenengo xedapen gehigarriak testu hau izanen du:
"Immigrazio politikak koordinatzearen arloko eskumenak Gizarte Politikako eta Kontsumoko Zuzendaritza Nagusiak hartuko ditu bere gain.
Gainera, adingabeen babesaren arloko eskumenak Nafarroako Berdintasunerako eta Familiarako Institutuak hartuko ditu bere gain (institutuari izena aldatu zaio eta Familiarako eta Berdintasunerako Institutua da izen berria).
Azkenik, Nafarroako Gazteriaren Institutuak eta Nafarroako Kirolaren eta Jarduera Fisikoaren Institutuak orain arte zituzten eskumenak azken horrek hartuko ditu bere gain hemendik aurrera (institutuari izena aldatu zaio eta Nafarroako Kirol eta Gazteriaren Institutua da izen berria)."
Azken Xedapenetan Bigarrena. Aurrekontu aldaketak.
Ahalmena ematen zaio Ekonomia eta Ogasuneko kontseilariari foru dekretu honetan ezarritakoa betetzeko beharrezkoak diren aurrekontu aldaketak egin ditzan.
Azken Xedapenetan Hirugarrena. Garatzeko ahalmenak.
Gizarte Politiketako kontseilariari ahalmena ematen zaio foru dekretu honetan ezarritakoa garatzeko behar diren xedapenak eman ditzan.
Azken Xedapenetako Laugarrena. Indarra hartzea.
Foru dekretu honek Nafarroako Aldizkari Ofizialean argitaratzen den egunean hartuko du indarra.
