Eta egoera horien aurrean, emakumeek egiten duten lana garrantzitsua dela nabarmendu du. “Gertatzen ari diren aldaketak –azpimarratu du- haien eskubideak errekonozitzearen eta aldarrikatzearen aldeko borroka-prozesuaren emaitza dira. Afrikako emakumeak mobilizatu egiten dira, eta testuinguru ezberdinetan modu aktiboan hartzen dute parte. Hori dela-eta, Afrikako kontinentean, gaur egun funtsezko motoreak dira garapen ekonomikoa lortzeko, berdintasun sozial eta politikoa sustatzeko eta gatazka-motaren bat oraindik ere duten lurraldean bakea lortzeko”.

Afrikako kontinentetik munduko ikuspegira igarota, Lehendakariak ziurtatu du emakumeak erantzukizuneko postu altuetan ez badaude, toki-mailan, estatu-mailan edota mundu-mailan, “ez dela posible izango gizateriaren erronka nagusiak gainditzea; alegia, gizateria erdia baino gehiagoren pobretzea, indarkeria, eskubide sozialen abusua, botere-gehiegikeria eta dauden baliabideen kudeaketa bidegabea”.

Bestalde, Laparra lehendakariordeak ondorengoa baieztatu du: “edizio honetan, epaimahaiak Saria hautagaitza desberdin bati eman dio, sariaren bidez Afrikako kontinenteko garapen iraunkorrean emakumeek betetzen duten papera saritu baita”. Horretarako, Afrika Etxea instituzioak proposatuta, “lau emakume bikain hauen bizimoduetan oinarritu gara”, nabarmendu du lehendakariordeak.

Azkenik, Laboral Kutxako lehendakari Txomin Garcíak ondorengoa nabarmendu du: “pertsonen arteko solidaritateak, herrien arteko solidaritateak, nazioen arteko solidaritateak, oso beharrezkoa izaten jarraitzen du. Mundu globalizatu honetan, zenbait balio eta horien praktika zaintzen ez badira, desberdintasunek amildegia gero eta gehiago handitzen dute eta injustiziak gehitzen dira”. Halaber, honako hau gehitu du: “injustiziak aldatzeko eta bizi-baldintzak duin egiteko egiten duten lanak definitzen ditu lau emakume hauek, eta, ondorioz, saritzea merezi dute.

Lau aktibista emakumeen, haurtzaroaren eta bakearen alde

Saritutako lau emakume afrikarrek emakumeen eskubideen, haurtzaroaren eta gatazketako bakearen arloetan egiten dute lan. Era berean, haien gizartea duin bihurtzeko borrokatzen dute, eta, horretarako, mundu hobea, zuzenagoa eta eskubide sozialak urratzen ez diren mundua errazten duten aldaketa sozialak bultzatzen dituzte.

Malauiko Theresa Kachindamoto Dezdako gobernadorea da, herrialdean biztanle gehien bizi den barrutikoa, eta haurren ezkontza errotik kentzeko borrokan lan egiten du. Bere hitzaldian jasotako golardoa eskertu du.“Sari honek nire lana eta nire herrialdean haur guztiak batera mantentzeko, beste lekuetara mugitu behar izan gabe eta nesken kasuan ezkondu beharrik izan gabe, goi mailako ikasketak izan ditzaten borroka egin duten guztion lana goraipatzen du”, aipatu du bere hitzetan.

Bigarren sariduna, Senegalgo Hulo Guillabert haurtzaroaren defendatzailea da, batik bat adin txikikoak-eskaleak (talibesak), gizakien salerosketaren eta haien herrialdean pertsona helduen ustiapen ekonomikoaren biktimak. “Sari hau jasotzen dut, gizarte guztien eta giza eskubideen sehaska den Afrikak, bere gizatasun ederra berreskuratu dezan eta biolentzia amaitu dadin”, nabarmendu du.

Bestalde, Ugandako Victoria Nyanjurak gerrak eragindako haurrei laguntzen die Justizia eta Adiskidetzea (JPR) Proiektuko laguntzaile bezala eta Emakumearen Defentsa Sarearen koordinatzaile gisa. Afrikar honek bere hitzetan, “nire herrian bortxaketak jasan ditugun emakumeok isilik jarraitu ez dezagun”, eskatu nahi izan du eta gainera, “sari honek nire herrian bakea topatu ez dutenek bakea lor dezaten balio izatea espero dut”, gehitu du.

Azkenik, Maliko Oumou Sall-Seck-ek, herrialdearen egungo enbaxadoreak Alemanian, Mali berreraikitzeko konpromisoa hartu du, yihadisten okupazio-urteen ondoren, eta lan horretan, emakumeak gizartean eta politikan duen funtsezko papera azpimarratzen du. Bere adierazpenetan jasotako animoak eskertu ditu eta saria, “okupazio yihadistak eragindako ondorioak jasaten ari diren Maliko emakume guztiei eta nire herriko politikan lan egiten dutenei eskaini nahi diet. Izan ere gauzak aldatu nahi badira, erabakiguneetan egotea ezinbestekoa da”.  

Bihar, azaroak 21, lau sarituek bi ikastetxe bisitatuko dituzte, Nafarroako ikasleei haien errealitateen berri emateko: Hulo eta Oumou Plaza de la Cruz BHIra joango dira eta Theresa eta Victoria Hezitzaileen Eskolako Zentro Integratura, biak ere Iruñean.