Nafarroako Gobernuko Osasun kontseilari Fernando Domínguezek Sanferminetako entzierroetan zabaldu den osasun-arretarako zerbitzu bereziaren funtzionamendu egokia egiaztatu du gaur goizean Nafarroako Ospitaleguneko (NOG) Larrialdi Zerbitzuan. Uztailaren 7tik 14ra bitartean, 08:00etan hasita, espezialistek eta larrialdietako medikuek osatutako lantalde zabal batek, osasun-langileekin eta laguntzaileekin batera, lanean dihardu goizero, entzierroetan zauritu eta osasun-zentrora eraman dituzten pertsonak artatzeko.

Kontseilariak, Osasunbideko gerente Óscar Moracho eta NOGeko gerente Antonio Merinorekin batera, 2018ko Sanferminetako lehen entzierroaren zuzeneko emankizuna ikusi du telebistaz, eta eskerrak eman dizkie bertan bildutako osasun arloko profesionalei egindako lanagatik, jai zoriontsuak eta lasaiak desiratuz asintentziei dagokienez, eta ahal dela, ezbeharrik gabekoak.

NOGeko Larrialdi Zerbitzuko profesionaez gain, entzierroko zaurituak artatzeko zerbitzu berezia osatu da, honako baliabide hauekin: arreta sanitarioko 9 postu hesietan, medikuekin, erizainekin eta sorosleekin, beste 8 laguntza-puntu, sorosleekin, eta zezen-plazako erizaindegia. Entzierroak 848,6 metroko ibilbidea du eta 50 metrotik 50 metrora gutxi gorabehera asistentzia-gune bat du. Arreta zerbitzu guztia SOS Nafarroa 112 zentroan koordinatzen dute.

Sorospen guneak leku hauetan kokatu dira: Santo Domingoko aldaparen hasieran (Hezkuntza departamentuaren egoitzan), Nafarroako Museoko eskaileretan, Santiago plazan (udaletxearen atzealdean), San Saturnino kaleko eskaileretan, udaletxean (2), Mercaderesen (2), Xabierko jaitsieran (2) Espoz eta Mina zeharkalean, Telleria kalean, Ahumada dukearen kalean, Labriteko jaitsieran, Amaya ("Telefonica" edo hegoaldeko kailejoian), Hemingway pasealekuan (iparraldeko kailejoian) eta Zezen Plazan (sorosleen postuan).

Garraio sanitarioari dagokionez, 15 anbulantzia medikalizatu ibili ohi dira entzierroaren ibilbidean zehar. Horietako 2, Gazteluko plazan egoten dira laguntza gisa, SOS Nafarroako 112 Zentroa medio ibilbidean osasun-garraio gehien behar duen gunera eramateko.

Normalean, laguntza-zerbitzu horretan, gutxienez, 9 mediku, 9 erizain, 21 garraio-teknikari, 47 sorosle, 9 komunikazio-langile eta 8 postu-koordinatzaile aritu ohi dira.

Ibilbideko arreta Gurutze Gorriaren (78), DYAren (30) eta Osasunbideko baliabide eta langile sanitarioekin egiten da. Horrela arreta-postuetan bertan ematen dute laguntza eta dagokien sektoretik NOGera eramaten dute zauritua. Bestalde, SOS Nafarroako 112 Zentro Koordinatzaileari informazioa ematen diote denbora errealean artatutako pertsonen zauriei eta lesioei buruz.

SOS Nafarroa da laguntza sanitarioa antolatzearen eta zauriak osasun-zentroetara eramatearen arduraduna, zauritu larrienak NOGera edo larrialdien koordinazio-zentroak adierazitako osasun-zentrora eramaten diren lehenak izan daitezen. Horretarako, aurreko urteetan dagoeneko ezarri zenez, hesietan bertan dagoeneko artatutako zauritu arinak, zauritu larriak ospitalera eraman ondoren eramango dira ospitalera.

Osasun Departamentuak prentsa-areto bat prestatu du NOGeko Larrialdien eraikinean eta bertatik emango die komunikabideei entzierroan zauritu eta osasun-zentroetara eramaten diren pertsonei buruzko informazioa.

Kazetariek entzierroa prentsa-aretoan ikusi ahal dute, hala nahi izanez gero, izan ere, telebistako pantaila bat jarri dute han. Gainera, egunero bi unetan informazioa ematen da: lehenengo aldiz, 08:20an, goiz horretan izandako zaurituen lehen aurrerapena eskainiz; eta 08:40an prentsaurrekoa, egun horretako zaurituei buruzko informazio guztia emateko.