Eskubide Sozialetako Lehendakariordetzak bere ikuskapen-plana argitaratu du, eta haren berrikuntza garrantzitsuena gizarte-zerbitzuetako kontrolak aurten aurrez abisatu gabe egingo direla da.

Gogora ekarri behar da iragan legealdian Nafarroako Gobernuak zentro horiei ikuskapena egin baino 20 egun lehenago abisatzen ziela, zer aztertuko zuten esaten ziela eta zer dokumentazio izan behar zuten prestatuta.

Ikuskapen horien helburu nagusia arretaren kalitatean eta erabiltzaileen eskubideen errespetuan sakontzea da. Kontrol arruntak, urtean behin, egingo dira, edo baita aurrez aurkeztutako salaketa, kexa edo erreklamazio baten ondorioz egindakoak ere. Adineko, mendekotasun, buruko gaitz edo desgaitasuna duten pertsonen egoitzatan egingo dira, bai eta adingabe nahiz gizarte-bazterkeriako pertsonen egoitzetan ere.

Bisitak lanegun eta jaiegunetan egin ahalko dira, egunez nahiz gauez. Ikuskatzaileek zentro eta zerbitzuetako instalazio guztietan sartu ahal izango dute, eta behar duten dokumentu nahiz informazioa eskuratu ahalko dute.

Beste esparru batzuen artean, gizarte-zerbitzuen zentroak kudeatzen dituzten erakundeek erabiltzaileen eskubideak errespetatzeari lotuta egingo dira ikuskapenak. Zehazki, barne-araubidearen araudiak berrikusiko dira erabiltzaileen autonomiaren eskubideei nahiz partaidetzako kontseiluen funtzionamenduari dagokienez. Halaber, indarrean dagoen araudia betetzen den egiaztatuko da eusgarrietan eta beste alor batzuetan, protokolo, erregistro eta banakako arreta planetan, esaterako.

Pertsonen Autonomiarako eta Garapenerako Nafarroako Agentziaren eta baliabideak kudeatzen dituzten erakundeen artean izenpetutako itunen baldintza teknikoak ere berrikusiko dira. Neurri horrekin, Eskubide Sozialetako Lehendakariordetzak ziurtatu nahi du erakunde horiek emandako zerbitzuak eta Foru Gobernuak finantzatutakoak direnak, behar bezalako baldintzetan ematen direla eta eskatutako kalitate-maila betez. Gainera, eskatutako langileen ratioak betetzen direla interes bereziarekin ikuskatuko da, bai eta langile teknikoaren eta zuzeneko arretako langileen kualifikazioa ere.

Azkenik, gogora ekarri behar da legealdi honetarako programa-akordioak ondorengo beharra jasotzen duela: gizarte-zerbitzuetako zentro guztien "langile eta kalitate teknikoaren ikuskapenak areagotzea, kontrol ekonomikoa indartuz".