Foru Gobernuak gaurtik aurrera, salbuespen modura, Nafarroako iparraldeko zenbait gunetan sua erabiltzea galarazi du suteak sortzeko dagoen arriskuagatik, eta gaur egungo meteorologia-baldintzak aldatzen ez diren bitartean.

Zehazki, urak Kantauri aldera isurtzen duten arro hidrografikoen barnean dauden iparraldeko guneetako baso-lurrei eragiten die, 22 udalerriri zehazki: Arano, Goizueta, Leitza, Areso, Ezkurra, Eratsun, Saldias, Zubieta, Ituren, Doneztebe-Santesteban, Urrotz, Donamaria, Beintza-Labaien, Sunbilla, Etxalar, Arantza, Igantzi, Lesaka, Bertizarana, Baztan eta Luzaide/Valcarlos.

Neguko kanpaina honetako meteorologiaren ezaugarriak honako hauek dira: lehorte-epe luzea, garai honetarako tenperatura altuak, hezetasun-indize txikiak eta hegoaldeko haizeak; horrek guztiak basoko suteen arriskua oso handia izatea dakar.

Debeku hori jarri da sastrakak, mozte eta inausketen hondakinak erre ez daitezen eta basoko beste lan batzuk ez egiteko.

Hala jasotzen da Landa Garapeneko, Ingurumeneko eta Toki Administrazioko kontseilari Isabel Elizaldek gaur sinatutako foru agindu batean, Nafarroako Aldizkari ofizialean datozen egunotan argitaratuko dena.

Aipatu behar da ere, egunotan zaintza-lanak areagotu direla Basozaintza, Foruzaingoa eta Sepronaren artean koordinatuz.