Nafarroako Parlamentuak Kultura Mezenasgoaren Foru Legea onartu du ostegun honetan, eta baita haren Foru Komunitateko Pizgarri Fiskalak ere. Nafarroako Gobernuak sustatu du, era honetako lehen arau bihurtu da Espainian eta sektorearen garapenean gizarte zibilak parte hartzeko pizgarriak ematen ditu.

Ekarpen pribatuen ekarpena kultura-proiektu eta -ekintzetan areagotzeko xedearekin, Estatu guztiko pizgarri fiskal handienak jasotzen ditu, Pertsona Fisikoen Errentaren gaineko Zergan (PFEZ) % 80 arteko kenkariekin eta % 30 artekoa Sozietate Zergan (SZ). Enpresen kasuan, gainera, ekarpenak ken daitekeen partidaren izaera izango du eta, beraz, dohaintzaren onura emandakoaren % 50 inguru izango da. Ekarpenak 2015eko urtarrilaren 1etik aurrera egin ahalko dira.

Bestalde, legeak mezenasgoko ekintzen onuradun izan daitezkeen pertsona eta erakundeen igoeraren alde egiten du: helbide fiskala Nafarroan duten pertsona fisikoak eta era ohikoan jarduera artistikoak egiten dituztenak; fiskalki helbidea Nafarroan duten irabazi-asmorik gabeko erakundeak; Nafarroako egoitzak, zentroak eta etxeak, eta erakunde horien federazioak; eliza katolikoa eta Estatu espainiarrarekin lankidetza-akordioak izenpetuta dituzten elizak edo aitorkizunak; Nafarroako administrazio eta unibertsitate publikoak eta haren mendeko erakunde nahiz fundazioak.

Horretarako, garatuko dituzten proiektu eta ekintzek gizarte-intereseko adierazpena lortu beharko dute, ‘Mecna’ izena hartuko duena. Administrazio eta unibertsitate publikoek antolatutakoek eta babestutakoek automatikoki lortuko dute.

Urtero, adierazpena eskatzeko bi aldi zabalduko dira, urrian eta maiatzean. Hala, mezenasgoko foru-lege horren lehen kanpaina urriaren 1etik 31ra burutuko da. Ekimenak Nafarroako Kultura Kontseiluak ebaluatuko ditu, eta azken horrek Kultura, Turismo eta Erakundeekiko Harremanetarako Departamentuari dagokion adierazpena proposatuko dio. ‘Mecna’ proiektu eta ekintzen zerrenda abenduaren erdialdera argitaratuko dela aurreikusten da.

Etorkizuneko kultur mezenas eta eragileek prozedura eta baldintzei buruzko oinarrizko informazioa honako webgune honetan topa dezakete: www.mecna.es. Foru-legea arauaren barnean garatu ahala, informazioa zabaldu egingo da (‘Mecna’ gizarte-intereseko adierazpena duten proiektuak nahiz ekintzak; agiriak deskargatzea; izapideetarako loturak eta abar). Etorkizunean, Nafarroako Gobernuaren webguneak funtsen ekarpenak eta haiek erakartzea bideratuko ditu, mikro-dohaintzak, esate baterako.