Nafarroako Gobernuak, Nafarroako Datu Berezien Azpiegitura (IDENA) bidez, Foru Komunitatearen informazio geografiko desberdina duten 504 geruza ikusteko aukera eskaintzen du gaur egun.

2012an zehar 98 geruza berri erantsi dira eta beste batzuk eguneratu egin dira. Iaz erantsitako geruzen artean laborantza eta aprobetxamenduen sorta historikoa nabarmentzen dira, 2012ko berria barne, ortoargazki bizkorra eta behin betikoa 2012koa; 2012ko SIGPAC; sateliteko hainbat irudi (LANDSAT eta DEIMOS); fosen mapa; 2012rako baliozkoak ziren ehiza-barrutiak; arrain-hazkuntzaren tramifikazioa eta erregimen bereziko urak; ortoargazkien hegaldien datak 2006tik aurrera; eta hondakin guneak nahiz degradatutako espazioak, garrantzitsuenetako zenbait aipatzearren.

Hala ondorioztatzen da 2012ko SITNAren jarduera jasotzen duen memoriatik (Nafarroako Lurralde Informazio Sistema), eta aste honetan onartu dena Nafarroako Jauregian haren koordinazio-batzordeak egindako bilkuran. Lehendakaritza, Justizia eta Barne kontseilari Javier Morrás izan da ekitaldiaren buru, eta honako erakunde hauetako ordezkarien parte-hartzea izan da: Nafarroako Gobernuko Departamentu guztiak, Nafarroako Udal eta Kontzejuen Federazioa, Iruñako Udala, Iruñerriko Mankomunitatea eta Tracasa enpresa publikoa.

Azpimarratu behar da ere 2012an SITNAren barruko bi webguneek (Nafarroako Geoataria eta IDENA) 70 milioi datu-eskaera baino gehiago jaso zutela, aurreko urtean baino % 45 gehiago, eta 3,5 megabyte transferitu zirela, 2011. urtearekin alderatuz % 40 gehiago.

2013rako jarduketa-plana

Koordinazio-batzordeak erabakitakoaren arabera, Nafarroako Gobernuak informazio geografikoaren arloan 2013an garatuko dituen jarduketa-lerro nagusien artean, SITNAren iraunkortasun ekonomikoaren azterketa azpimarratu behar da. Horretarako, sortzen duen aurreztea kontuan hartuko da eta hura ez existitzearen ondorioz sortutako kostua, egindako inbertsioaren itzulkinak eta aurrekontuz kanpoko finantzaketa-iturriak lortzea ekarriko duen negozio-eredua.