Nafarroako Lehendakari Yolanda Barcinak gaur aipatu duenez, hezkuntza da "inbertsiorik onena Nafarroaren etorkizuna diseinatzeko orduan"; izan ere, "hedapen eta garapen ekonomiko eta soziala finkatzeko eta oinarritzeko muina" da. "Eta konfiantza hori islatzen da –adierazi du–, Nafarroako gizarteak ikasle bakoitzak prestatzeko behar duen gastuaren % 85i eustean eta erantzutean".

Yolanda Barcinak adierazpen horiek egin ditu Nafarroako Unibertsitate Publikoko (NUP) 2012-2013 ikasturtearen irekiera ofizialaren ekitaldian. Bertan izan dira, unibertsitateko errektore Julio Lafuente, eta Hezkuntza nahiz Osasuneko kontseilari José Iribas eta Marta Vera, hurrenez hurren, beste agintari politiko, sozial, ekonomiko eta akademikoen artean.

NUPeko ikasturtearen irekiera

El Sarioko eraikineko Fernando Remacha ikasgelan egin den irekiera-ekitaldia segizio akademikoaren desfilearekin eman zaio hasiera, aurretik Miguel Pagola banderaduna zuela. Ondoren, iragan urteko oroitidazkia irakurri du unibertsitateko idazkari nagusi Javier Etxeberriak.

Inaugurazioko irakurketa Zuzenbidearen Historiako katedratiko emeritu Gregorio Monreal-ek eman du, eta "Las Cortes y la Constitución de Cadiz" ("Gorteak eta Kadizko Konstituzioa") izan du hizpide, haren bigarren urteurrena ospatzen dela eta. Ekitaldia Julio Lafuente errektorearen eta Nafarroako Lehendakari Yolanda Barcinaren agerraldiekin amaitu da; Lehendakariak 2012-2013 ikasturtea ofizialki inauguratu du.

Ekitaldian musika entzuteko aukera ere izan da Nafarroako Goi Mailako Musika Kontserbatorioko oboe-taldearen eskutik, Juan Mari Ruizen zuzendaritzapean. Arturo Goldarazenak zuzendutako Unibertsitateko Abesbatzak ere abestu du.