Nafarroako Gobernuak, Juan Luis Sánchez de Muniáin bere eledunaren bitartez, adierazi du "terrorismoaren amaierako historia biktimek idatziko dutela, inoiz ez ETAren hiltzaileek", biktimak baitira "Nafarroan, EAEn eta Espainian, demokraziaren eta askatasunaren benetako bultzatzaileak".

Kontseilari-eledunak baieztatu du atzo Donostian egin zen konferentziaren antzeko ekimenekin "ETAk nahi duena da bere amaiera erakunde armatuaren ondare bihurtu, terrorismo etarrari buruzko bere bertsio guztiz zitala uzteko". Nolanahi ere, adierazi duenez, "hori egiten duen aldi guztietan, demokrata guztiok eta haien ordezkariek interes horri uko egingo diogu".

Sánchez de Muniáin-ek baieztatu duenez, "ETAren amaieraren aurrean gaude, eta amaiera hori Espainiako gizarte osoaren ahaleginari esker gertatu da eta, batez ere, Estatuko segurtasun-indarrek, epaileek, demokraziak, hauteskundeek, legeek eta, bereziki biktimek egindako ahaleginari esker".

Horregatik, aipatu duenez, "Gobernuak eta Espainiako nahiz Nafarroako gizarteak ez dute ETAri ezer eskertu beharrik hiltzeari utzi izanagatik, ez diote ezer zor", eta azpimarratu du Nafarroako Gobernuak ETA talde armatuarengatik espero duen gauza bakarra hura desegitea dela, armak entregatzea eta, batez ere, sortu dituen milaka biktimak aitortzea eta barkamena eskatzea.