Bigarren Sorkuntzako Bioerregaien Zentroa (CB2G) pilotu eskalako saiakuntzen instalazio erdi-industriala da, eta 2. sorkuntzako bioerregaien ekoizpen-prozesuak garatzeko gai da elikadura-industriarekin lehiakorrak ez diren lehengaiak oinarri hartuta (batez ere material lignozelulosikoak, hala nola baso- eta belar-hondakinak), eta bioerregaiak ekoizten ditu hainbat ekoizpen bide erabiliz (termokimikoa, biokimikoa eta/edo entzimatikoa) eta biofindegiko kontzeptuak aplikatuz.

Proiektuaren sustatzaileak Nafarroako Gobernua (Nafarroa 2012 Plana) eta Zientzia eta Berrikuntza Ministerioa izan dira. CENER zentroaren titularrak kudeaketa zientifiko-teknikoa CIEMATekin elkarbanatzen du, zentroaren diseinurako, eraikuntzarako zein kudeaketarako.

CB2G biomasen multzo zabala prozesatzeko (belarrak eta zurak) diseinatuta dago. Biomasetara eta konbertsio prozesuetara egokitutako aurre-tratamenduen sorta zabala biltzen du, 2. sorkuntzako bioerregaien sorta zabala ekoizteko prozesuen garapenerako gaitasuna du eta epe luzeko saiakuntzetan etengabe jardun dezake industria-baldintzak simulatuz. Modu horretan, lortutako emaitzak eta egindako garapenak industria-eskalan estrapolatu daitezke.

Hauek dira CB2G izenekoan egiten diren zerbitzu nagusiak:

-Biomasa eta bioerregai solidoen karakterizazio energetikoa UNE-EN arauaren arabera (bat-bateko analisia, oinarrizko analisia, bero-boterea, banaketa granulometrikoa eta pelet izenekoen iraunkortasuna).

-Zenbait biomasa oinarri hartuta torrefaktatutako eta/edo dentsifikatutako bioerregai solidoen ekoizpenari buruzko ikerketak eta saiakuntzak.

-Biomasa oinarri hartuta, prozesu biokimikoen garapena eta optimizazioa, gasifikazio-prozesua geruza fluidoan eta sintesiko gasaren garbiketa-prozesuak.

-Aholkularitza eta ikerketak 2. sorkuntzako bioerregaien ekoizpen-prozesuetan.

Energia Berriztagarrien Zentro Nazionala kualifikazio handia eta nazioarteko ospea duen zentro teknologikoa da, eta energia berriztagarrien inguruko ikerketa aplikatuan eta garapenean eta sustapenean espezializatuta dago. CENERek 200 ikerlari baino gehiago ditu eta bost kontinenteetan jarduera du.

Zentroak sei lan-arlotan garatzen du jarduera energien esparruan: eguzkiko energia, eguzkiko energia termikoa eta eguzkiko energia fotovoltaikoa, biomasa, arkitektura bioklimatikoa eta energia berriztagarriak sarean integratzea. Egoitza Sarrigureneko Berrikuntzaren Hirian du, baina bulegoak ditu Espainiako hainbat lekutan. Laborategi modernoak eta instalazio teknologiko modernoak ditu, nazioartean erreferentzia direnak, hala nola Aerosorgailuen Saiakuntza Laborategia (Zangozan), bioerregaien laborategia, panel termikoen eta modulu fotovoltaikoen entsegu-laborategia, eta zelula fotovoltaikoen materialen eta prozesuen laborategia. Oraintsu 2. sorkuntzako bioerregaien zentroa jarri da abian.