navarra.es
Castellano | Euskara | Français | English
Ezagutzera eman
182/1997 Foru Dekretua, ekainaren 30ekoa, jendaurreko salmentarako instalazioetan eskaintzen den automoziorako gasolina eta gas-olioaren hornidura zerbitzuaren kontsumitzaile eta erabiltzaileen eskubideak arautzen dituena
(Testu bateratua. Jatorrizkoa 1997ko 88. NAOn argitaratua, uztailaren 23an. Aldaketak: 69/1998 Foru Dekretua, martxoaren 2koa)
Atarikoa
Kontsumitzaileen eta Erabiltzaileen Defentsarako uztailaren 18ko 26/1984 Legeak kontsumitzaile eta erabiltzaileentzat ezartzen dituen oinarrizko eskubideen artean haien legezko interes ekonomikoen babesa dago eta, halaber, zerbitzuei buruzko informazio zuzena ematea, zerbitzu horiek egoki erabil daitezen.
Automoziorako erregaiaren hornidura zerbitzua jarduera ekonomiko garrantzitsua da, kontsumitzaileen interes eta eskubideak ukitzen dituena eta, horregatik, beharrezkoa da zerbitzu horren ezaugarriei buruzko informazio nahikoa izatea, zerbitzua egoki erabil dezaten edo, horrela ez bada, harturiko zerbitzu eskasetik etor litezkeen kalteen konponketa eskatzeko biderik izan dezaten. Sektore horren liberalizazioaren ondotik merkatuaren egungo egoera ikusirik, Administrazioa behartuta dago aipatu 26/1984 Legean kontsumitzaileei aitorturiko eskubideei buruzko alderdiak arautzera, automoziorako gasolina eta gas- olioaren salmenta eta hornidura zerbitzuari dagokionez, zerbitzu hori ematen denean eskubide horiek bermatu eta ez urratzeko.
Halaber, Nafarroako Foru Eraentza Birrezari eta Hobetzeari buruzko abuztuaren 10eko 13/1983 Lege Organikoak, 56.1 artikuluko b) eta d) idazatietan, industriaren eta kontsumitzaile eta erabiltzaileen defentsaren inguruko hainbat eskumen esleitzen dizkio Nafarroako Foru Komunitateari.
Bestalde, 26/1984 Legearen 22. artikuluan ezarritakoarekin bat etorriz, kontsumitzaile eta erabiltzaileen eta enpresarien elkarteen iritzia entzun da.
Horrenbestez, Industri, Merkataritza, Turismo eta Lan kontseilariak proposaturik eta Nafarroako Gobernuak mila bederatziehun eta laurogeita hamazazpiko ekainaren hogeita hamarrean egindako bilkuran harturiko erabakiarekin bat etorriz, dekretatu dut:
1. artikulua. Aplikazio esparrua.
1. Foru Dekretu honen helburua da automoziorako gasolina eta gas-olioa jendeari txikizka saltzeko instalazioen jarduera Nafarroako Foru Komunitatean arautzea, kontsumitzaile eta erabiltzaileen eskubideen inguruko alderdiei dagokienez, deusetan ukatu gabe beste erakunde ofizial batzuei dagozkien eskumenak.
2. Foru Dekretu honen ondorioetarako, automoziorako gasolina eta gas-olioa jendeari txikizka saltzeko instalazioak izanen dira bai hornitegiak, bai hornidura unitateak eta azken kontsumitzaileari saltzeko bestelako saltokiak, horretarako behar den baimena baldin badute.
3. Foru Dekretu honek aipatzen dituen instalazioei atxikitako zerbitzu eta establezimenduak, hots, dendak, jatetxeak, kafetegiak, komunak, auto-garbiketa zerbitzuak, konponketa tailerrak, olioa aldatzekoak, ordezko piezen saltokiak, e.a., arautuko dira aplikatu beharreko arau berariazkoei eta prezioen publizitate eta markaketa arautzen dituzten xedapenei jarraikiz.
2. artikulua. Zerbitzuak ematea.
1. Instalazioen jabea, errenta-hartzailea edo arduraduna behartuta dago gasolina eta gas-olio hornigailuak funtzionamendu eta kontserbazio egoera egokian mantentzera eta erregelamenduzko prezintoak edukitzera, eta metrologiari buruzko arauetan ezarritakoa bete beharko dute.
Gainera, ematen den erregaia behar bezala neurtzen dela begiratuko du, hornigailuek neurketa akatsik izan ez dezaten, metrologiari buruzko arauetan ezarritako tolerantzia mugetatik gaindi.
Hornigailuren batek tolerantzia mugetatik gaindiko neurketak egiten baditu edo matxuratzen bada, bertako erregai-horniketa eten eginen da.
Instalazioetako jabeak, errenta-hartzaileak edo arduradunak hornidura etengabe egiteko behar diren neurriak hartuko ditu eta, hortaz, behartuta dago erregai-eskaera garaiz egitera, behar diren izakinak edukitzeko.
Halaber, behartuta dago erabiltzailearen eskaerari erantzutera, eskakizuna ezarritako ordutegiaren barruan egiten bada.
2. Hornitegiko jabeak, errenta-hartzaileak edo arduradunak aire emateko tresna edo aparatuak ere funtzionamendu egoera onean eduki beharko ditu eta metrologiari buruzko arauak betetzen dituztela begiratuko, tolerantzia mugetatik gaindi egin gabe neurtu dezaten. Haizatzeko tresna duen hornidura unitateko jabe, errenta-hartzaile edo arduraduna ere hortara egonen da behartuta.
3. Ur hornidura kontserbazio eta funtzionamendu egoera egokian izanen da, hala hornitegietan, nola horrelakorik duten hornidura unitateetan.
4. Sua itzaltzeko ekipoak indarra duen arauteriari egokituko zaizkio, homologazio, instalazio eta ikuskapenen maiztasunari dagokienez, eta, halaber, eraikin eta instalazioetako suteen kontrako babes neurriei buruzko xedapenetan zehaztutakoa bete beharko dute.
Hornitegiko jabeak, errenta-hartzaileak edo arduradunak debekatuko du langileek erregaia saltzen den eremuan poxpolu edo metxerorik piztu eta bertan erre dezaten, eta ez die zerbitzatuko erretzen edo poxpoluren bat pizten agertzen diren erabiltzaileei.
Halaber, debekatuta egonen da motorea martxan edo argiak pizturik dituen ibilgailuari hornitzea.
5. Salmenta instalazioetan hornitzen den gasolina eta gas-olioaren kalitateari dagokionez, salmenta mota hori arautzen duten xedapenetan ezarritakoa bete beharko da. Instalazioen jabeak, errenta-hartzaileak edo arduradunak behar diren neurriak hartu beharko ditu, erabiltzaileari eskaintzen zaizkion produktuek arauek eskatu kalitatea izan dezaten.
6. Hornitegi edo hornidura unitateetako jabe, errenta- hartzaile edo arduradunek likidoa ateratzeko sistema (likidoa igotzeko ponpa txikia edo antzekoa) neurtzeko hagatxo bat edo beste baliabide kalibratu bat izan beharko dute eta, horrez gain, ura aurkitzeko orea edo antzeko zerbait.
3. artikulua. Instalazioetan erabiltzaileei eman beharreko informazioa.
Automoziorako gasolina eta gas-olioa txikizka saltzen duten instalazio guztietan jendaurrean jarri beharko dira, etengabe eta ongi agerian, informazio kartel batzuk, ibilgailuaren barrutik irakurtzeko moduko karaktereetan idatziak, gaztelaniaz bederen, honako datuak emanen dituztenak:
1. Erregaia hornitzen duen enpresaren izena edo anagrama edo/eta salmentarako instalazioaren izen komertziala, kasua bada.
2. Eskaintzen den gasolina eta gas-olio mota bakoitzaren litroaren prezioa adierazten duen kartela, oktanajea adieraziz. Kartel horren gutxieneko neurriak 80 bider 60 zentimetrokoak izanen dira eta metro bat eta erditik gora jarri beharko da, gutxienez.
3. Hornigailu bakoitzari lotuta edo itsatsita ongi agerian jarri beharko dira ematen duten erregaiaren izena eta oktanajea. Erregai edo karburante mota bat baino gehiago ematen duten hornigailuetan ongi bereizita agertu beharko dute. Horniketa bi aldeetatik egiterik bada, bi aldeetan agertu beharko da eta horietan erabili beharreko letra 6 zentimetrotik gorakoa izanen da.
4. Onartzen diren ordainbideak.
Segurtasun neurri gisa, hornitegiek edo hornidura unitateek erabakitzen badute gaueko hamarretatik goizeko zazpiak arte, dirurik bueltatu behar ez izateko, kopuru zehatzeko erregai horniketak egitea edo hornitu aurretik dirua eskatzea, neurri horien berri eman beharko zaie erabiltzaileei toki ikusgarrietan jarri beharreko kartelen bidez, hornigailu guztietatik hurbil.
5. Idazki edo piktogramak, erabiltzaileen ondoko eskubide eta betebeharren berri emateko:
-"Debekatuta dago erretzea eta sua piztea".
-"Debekatuta dago erregaia hartzea argiak piztuta edo motorea martxan dagoela".
-"Erreklamazio orriak kontsumitzailearen eskura daude".
-"Horniketaren neurketa egiaztatzeko erregelamenduzko ekipo eta tresnak kontsumitzailearen eskura daude".
-"Jendaurreko salmentarako instalazioetan eskaintzen den automoziorako gasolina eta gas-olioaren hornidura zerbitzuaren kontsumitzaile eta erabiltzaileen eskubideak arautzen duen Dekretuaren kopia kontsumitzaileen eskura dago".
6. Ordutegia. Instalazioak ireki eta ixteko ordutegia ongi agerian jarri beharko da.
7. Gasolina edo gas-olioaren hornigailuren bat matxuratzen bada edo gaizki neurtzen badu, bertako horniketa eteteaz gain, hornigailuaren gainean kartel bat jarri beharko da, honakoa dioena: ".....tik zerbitzutik kanpo" eta bertan eguna eta hilabetea adierazi. Halaber, ura edo airea emateko tresna edo aparatuak matxuratu edo onarturiko tolerantzia mugetatik gaindiko neurketak egiten badituzte, horien berri ere eman beharko da, aparatuetan kasuan-kasuan ondoko testua duten kartelak jarriz: "Ura, ....tik zerbitzutik kanpo" edo "Airea, ....tik zerbitzutik kanpo", eta kasu bietan bertan eguna eta hilabetea adieraziko dira.
8. Autozerbitzua. Horniketa erabiltzaileak berak egin behar baldin badu, horren berri eman beharko da ongi ikusten den toki batean; hornigailu bakoitzean kartel bat(zuk) jarri edo itsatsi beharko d(ir)a, modu irakurterrezean eta nahasmenik ez sortzeko moduan, hornigailuak eskaintzen duen erregai-mota eta erabiltzeko jarraibideak adierazteko.
Autozerbitzuko instalazioetan eskularruak edo antzeko baliabideak jarriko dira bezeroen eskura, banaketa gaiekin kontaktu zuzenik izan ez dezaten.
Modalitate honetako ordainketa egiteko gunean, prezioak ongi ikusteko moduan jarri beharko dira agerian eta, ganbiorako legez indarra dutenez gainera, onartzen diren ordainbideak, gas-olio bonifikatuaren horniketarako dauden arauak deusetan galarazi gabe.
9. Instalazioetan, ordaindu ondoren abian jartzen diren makinak badira, bertan adierazi beharko dira prezioa eta makina ongi erabiltzeko argibideak.
10. Establezimenduaren instalazioak galtzadaren bi aldeetan baldin badaude, artikulu honetan zehaztu den informazioa bietan jarri beharko da.
4. artikulua. Instalazioetako sarbideetan edo sarreretan erabiltzailearentzat jartzen den informazioa.
Hornitegietako sarbideetan erabiltzailearentzat jartzen den informazioa galtzadatik kanpora jarriko da, informazio kartel edo zutabeen gainean, instalazioak hasten direnean eta galtzadaren bi direkzioetan, erabiltzaileak informazio hori jaso dezan gunean sartu beharrik gabe. Informazio kartel edo zutabe horiek, beti ere, toki edo autonomi erakundeek zehazten dituzten arau eta hirigintza-arauak errespetatuko dituzte eta, halaber, segurtasun guneak eta eremu publikoetako menpekotza tarteak.
Informazio kartel edo zutabe horietan derrigorrez eman beharreko gutxieneko informazioa honakoa da:
1. Erregai litro bakoitzaren jendearentzako prezioa, gutxienez hiru karburante garrantzitsuenena, oktanajea adieraziz, eta bestelako gasolina eta gas-olioak ere badirela jakinarazteko adierazpen orokorra.
2. Instalazioak ireki eta ixteko orduak.
3. "Autozerbitzua" adierazpena, horniketa autozerbitzuaren bidez egiten denean.
4. Onartzen diren ordainbide bereziak, horrelakorik bada.
Artikulu honetan bildutako informazioa hartuko duten kartel edo zutabeetan informazioa emateko erabiliko den zatiak 100 bider 80 zentimetrokoa izan beharko du gutxienez eta 2 metrotik gora jarri beharko da gutxienez, non eta hirigintza arauek gutxieneko neurri horiek aldatzea eskatzen ez duten.
Halaber, hornitzaileek eman nahi duen gainerako informazioa ere jar dezakete (zerbitzu osagarriak, ordainbideak, e.a.).
5. artikulua. Ordainagiria.
Hornitzailea behartuta dago egin dituen horniketen ordainagiria edo egiaztagiria ematera, espreski eskatzen duten erabiltzaileei. Ordainagirian edo egiaztagirian agertu beharreko datuei eta betetzeko moduari dagokienez, indarra duten xedapenetan zehaztutakoari men eginen zaio. Horien arabera, faktura edo ordainagirian honako datu hauek agertu beharko dira:
-Zerbitzua eman duen enpresaren izen edo izen soziala, helbidea eta identifikazio fiskaleko zenbakia edo kodea.
-Ordainagiriaren edo egiaztagiriaren zenbakia.
-Emandako erregai mota.
-Emandako litro kopurua.
-Litro bakoitzaren prezioa, BEZa barne.
-Egindako horniketaren zenbatekoa.
-Zein egunetan eta non luzatzen den.
-Ibilgailuaren matrikula, erabiltzaileak eskatzen badu.
Gainera, aurretik ordaindu beharreko kasuetan, kontura emandako zenbatekoen egiaztagiria ere luzatu beharko du.
6. artikulua. Egiaztatzeko neurriak.
Neurketa zehatza eta ematen den erregai kopurua egiaztatzeko asmoz, automoziorako gasolina eta gas-olioa txikizka saltzen duten instalazio guztietan 10 litroko botila bat izanen dute neurketa egiteko, deusetan galarazi gabe, metrologia arauen arabera, hornigailuak egiaztatzeko eska litezkeen gainerako tresnak, edozein dela horien kopurua, mota eta osaera. 10 litroko biltontzi hori ofizialki ziurtatu eta kalibratua egonen da, ezartzen den maiztasunez eginen baita, neurketaren fidagarritasuna bermatzeko asmoz. Horren osagaiez arau zehatzik ez dagoenez, botila erresistentzia mekanikoa duen gai batekoa izanen da, eraso kimikoari aurre egiteko modukoa, erabat gardena eta ehunekoetan edo milimetroetan graduatua, hornigailuetan onartzen diren gorabeherak kontuan izanik, aplikatu beharreko arau metrologikoak betetzen ote diren kalkulatzeko asmoz.
Neurketarako biltontzi hori erabiltzaileen eta Administrazioaren ikuskapen zerbitzuen eskura izanen da.
7. artikulua. Zerbitzua.
Automoziorako gasolina eta gas-olioa jendeari saltzeko instalazio guztietan bertan ematen diren zerbitzuen arduradun batek egon beharko du gutxienez, irekita eta zerbitzua ematen ari diren bitartean etengabe, Foru Dekretu honetan aitorturiko eskubideak bermatzeko asmoz.
8. artikulua. Aukerako zerbitzuak.
Ibilgailuen garbiketa edo auto-garbiketa zerbitzua eskaintzen duten instalazioek honako baldintza hauek bete beharko dituzte:
1. Iragarki kartel batzuk izan beharko dituzte, honakoak adierazteko:
-Funtzionamendu arauak.
-Eskaintzen diren zerbitzuen tarifak.
-Onartzen diren ordainbideak.
2. Kartel horietan agertzen bada erantzukinetatik erabat aldentzen direla, jarrita ez balitz bezala hartuko da, Kontsumitzaileen eta Erabiltzaileen Defentsarako Lege Orokorraren 10. artikuluan adierazitakoari jarraikiz.
9. artikulua. Erreklamazioak.
5. Erabiltzaileek dituzten eskubide eta betebeharren berri zehatza izan dezaten, instalazioetan Foru Dekretu honen kopia irakurgarri bat jarriko da erabiltzaileen eskura, azter dezaten.
10. artikulua. Eskumenak.
Foru Dekretu honetan eta bere garapenerako arauetan ezartzen dena begiratu eta ikuskatzeko ardura, Nafarroako Foru Komunitatean kontsumitzailearen babesaren arloan eskumena duten organoena izanen da.
Aurreko zenbakian aurreikusitako ondorioetarako, automoziorako gasolina eta gas-olioa jendeari txikizka saltzeko instalazio guztiek Ikuskapenen liburu bat izan beharko dute, Industri, Merkataritza, Turismo eta Lan Departamentuak igorriko diena, non Ikuskapen zerbitzuek bisiten emaitzak idatziko dituzten.
11. artikulua. Arau-hausteak eta zehapenak.
1. Xedapen honetan bildutako aginduren bat ez betetzea kontsumitzailearen babesaren kontrako arau-haustea izanen da, Kontsumitzaile eta Erabiltzaileen Defentsarako uztailaren 19ko 26/1984 Lege Orokorraren 34. artikuluan ezarritakoaren arabera, eta horren tipifikazio berariazkoa ekainaren 22ko 1945/1983 Errege Dekretuaren 3 eta 5. artikuluetan dago aurreikusia, horretan arautzen baita Kontsumitzailearen defentsa eta Nekazaritzako elikagaien produkzioaren arloetako arau-hauste eta zehapenak.
2. Artikulu honetan aurreikusten diren arau-hausteak arinak, larriak edo oso larriak izan daitezke, uztailaren 19ko 26/1984 Legearen 35. artikuluan eta ekainaren 22ko 1945/1983 Errege Dekretuaren 6, 7 eta 8. artikuluetan ezarritako irizpideei jarraikiz.
3. Dekretu honek aipatzen dituen arau-hausteengatik, uztailaren 19ko 26/1984 Legearen 36. artikuluan ezarritako graduazioaren araberako isunak jarriko dira.
Xedapen Gehigarri Bakarra
Berogailuetarako gas-olioa hornitzeko zerbitzua, Dekretu honetako aplikazio eremuaren menpeko instalazioetan egiten denean, bertan xedatutakoari lotuko zaio.
Xedapen Iragankor Bakarra
Foru Dekretu honek ukitzen dituen gasolina eta gas- olioa txikizka saltzeko establezimenduek hiru hilabeteko epea izanen dute bertan ezarritakoari egokitzeko, indarra hartzen duenetik aurrera.
Dekretu honek indarra hartzen duenetik urte bateko epea ezartzen da Administrazioak zigilaturiko erreklamazio orriak dituzten hornitegiek eta hornidura unitateek Foru Dekretu honetan ezarritako ereduari egokitu ditzaten.
Azken Xedapenetan Lehena
Ahalmena ematen zaio Industri, Merkataritza, Turismo eta Lan kontseilariari Foru Dekretu hau garatu eta betearazteko behar diren xedapenak eman ditzan.
Azken Xedapenetan Bigarrena
Foru Dekretu honek Nafarroako Aldizkari Ofizialean argitara eman eta biharamunean hartuko du indarra.
I. ERASKINA. Erregaien txikizkako salmentarako instalazioak erreklamazio orria
a) Erreklamazio orri hau automozioko gasolina eta gas-olioa txikizka saltzeko instalazioetako bezeroen eskura jartzen den baliabidea da, zerbitzuarekin dituzten desadostasunak egintza gertatu den tokian berean adieraz ditzaten.
b) Erabiltzaileak izen-abizenak, nortasun agiri nazionalaren edo pasaportearen zenbakia, ibilgailuaren titularrarekin duen harremana eta inprimakian eskatzen diren gainerako datuak adierazi beharko ditu. Horrez gain, argi eta garbi azaldu behar ko du zerk eragin duen erreklamazioa eta zein egunetan egin den.
c) Instalazioak erreklamazio orrian eskatzen diren identifikazio datuak idatzi beharko ditu. Erabiltzaileak erreklamazioaren zergatia adierazi ondoren, erreklamazio orria instalazioko titularrak edo arduradunak sinatu ahalko du eta idatzitakoari buruz egoki juzkatzen duena erantsi, horretarako finkatu den tokian.
d) Egintza gertatzen denetik hasita hilabeteko epearen barruan, erabiltzaileak kontsumo atalera igorriko du erreklamazio orriaren jatorrizkoa (kopia txuria); kopia horia berarentzat gordeko du eta arrosa kolorekoa instalazioko arduradunari eman en dio.
e) Erreklamazio orriaren jatorrizkoarekin batera, bezeroak igorriko ditu egintzak hobeki ezagutzeko behar diren agiri edo frogak, batez ere ordainagiri, aurrekontu eta gordekinak.
Koadro gorri honetako datuak instalazioak idatzi beharko ditu.
(Instalazioaren izena edo izen soziala eta identifikazio fiskaleko zenbakia)
(Helbidea) (Herria) (Telefonoa)
ERREKLAMAZIO EGILEAK BETE BEHARREKOA
199..(e)ko ....aren (e)an. Ordua: .... (aitorpenaren data).
Erreklamazio egilearen izena: .li.........................................
Nazionalitatea: ................. N.A.N. edo pasaportea
Helbidea
(Kalea edo plaza, probintzia edo herria eta telefonoa)
Ibilgailuaren datuak Titularrarekin duen harremana
(marka, modeloa eta matrikula)
Erreklamazioaren zergatiak eta xedea:
(Interesatuaren sinadura)
Hornitzailearen alegazioak:
(Instalazioaren zigilua eta sinadura)
ERREKLAMAZIO EGILEAK hona bidali behar du
jatorrizkoa: KONTSUMO ATALA
Blas de kalea
Fuerte del Principe II. eraikina, 4. oina,
31005 IRUÑA.
NAFARROAKO GOBERNUA
Industri, Merkataritza,
Turismo eta Lan Departamentua
