navarra.es
Castellano | Euskara | Français | English
Ezagutzera eman
279/1990 Foru Dekretua, urriaren 18koa, nafarroako administrazio lokalari buruzko 6/1990 foru legea, nafarroako entitate lokalen egintza eta erabakien inpugnazioari dagokionean, garatzen duena
(Testu bateratua. Jatorrizkoa 1990eko 131. NAOn argitaratua, urriaren 29an. Aldaketak: 173/1999 Foru Dekretua, maiatzaren 24koa; 57/1994 Foru Dekretua, martxoaren 7koa)
Atarikoa
Uztailaren 2ko Nafarroako Administrazio Lokalari buruzko 6/1990 Foru Legearen 338.1 artikuluak ezartzen duenez, gora jotzeko helegitea Nafarroako Administrazio Auzitegiak izapidatu eta ebatziko du, arautegi bidez erabakitzen den prozeduraren bitartez.
Halaber, aipatu Foru Legeak 345.1 artikuluan dioenez, Nafarroako entitate lokalak beharturik daude Foru Komunitateko Administrazioari, arautegi bidez ezartzen diren epe eta eran, beren egintza eta erabakien kopia edo laburpena igortzera.
Horiek horrela, Administrazio Lokaleko Kontseilariaren proposamenez eta mila bederatziehun eta lauretan hogei eta hamarreko urriaren hemezortziko bilkuran Nafarroako Gobernuak hartu zuen erabakiari jarraikiz, dekretatu dut:
Artikulu bakarra.
Nafarroako Administrazio Lokalari buruzko 6/1990 Foru Legea, Nafarroako entitate lokalen egintza eta erabakien inpugnazioari dagokionean, garatzen duen Arautegia onesten da eta haren testua jarraian erantsi.
NAFARROAKO ADMINISTRAZIO LOKALARI BURUZKO 6/1990 FORU LEGEA, NAFARROAKO ENTITATE LOKALEN EGINTZA ETA ERABAKIEN INPUGNAZIOARI DAGOKIONEAN, GARATZEN DUEN ARAUTEGIA
I. KAPITULUA. Xedapen Orokorrak
1. artikulua
1. Nafarroako entitate lokalen egintza eta erabakiak, jurisdikzio kontentzioso-administratiboaren kontrolari lotuak daudenak, inpugnatzen ahal dira honako bide hauetakoren baten bitartez:
a) Aipatu jurisdikzioko organo eskudunaren aitzinean legeria orokorrean ezarrita dagoen helegite kontentzioso-administratiboa jarriz, birjarpen helegitea paratu ondotik, hala behar denean.
b) Arautegi honen II. Kapituluak aipatzen duen gora jotzeko helegitea Nafarroako Administrazio Auzitegian jarriz.
2. Aitzineko zenbakiko a) atalak aipatzen duen inpugnazio bidea legeria orokorrean xedaturikoaren arabera eginen da.
3. 1 zenbakiko b) atalak aipatzen duen inpugnazio bidea Arautegi honen II. Kapituluan xedaturikoaren arabera eginen da.
2. artikulua
1. Aitzineko artikuluko a) atalaren 1 zenbakiak aipatzen duen helegitea paratzeko legitimaturik dauden subjetuez gain, Foru Komunitateko Administrazioak inpugnatzen ahalko ditu, jurisdikzio kontentzioso-administratiboaren aitzinean, Nafarroako entitate lokalen egintza eta erabakiak:
a) Foru Komunitatearen eskumenei buruzko zenbait gaietako antolamendu juridikoa hausten dutela erizten duenean.
b) Legezko arauak hautsiz, entitate lokalek beren-berenak dituzten eskumenak gainditu, Foru Komunitateko eskumenak gutietsi edo horiek martxan jartzea oztopatzen dutenean.
2. Foru Komunitateko Administrazioak egintza eta erabakien kontra egiten duen inpugnazioa, arestiko zenbakiak aipatua, Arautegi honen III. Kapituluko bigarren Sailean ezartzen duenari lotuko zaio.
3. artikulua
Nafarroako entitate lokalek eman eta jurisdikzio kontentzioso-administratiboaren kontrolari loturik ez dauden egintza eta erabakien aurka, bidezko ekintza edo helegiteak paratu eta erabiltzen ahal dira eskumendun organo eskudunen aitzinean, legeria orokorrari jarraikiz.
II. KAPITULUA Gora Jotzeko Helegitea
Lehen Saila. Printzipio Orokorrak
4. artikulua
1.-Erregelamendu honen 1. artikuluko 1 zenbakiaren b) atalak aipatzen duen gora jotzeko helegiteak aukerako eta dohaineko izaera du.
2.-Gora jotzeko helegitea paratzeko ez da beharrezkoa izanen ez abokatu ez prokuradore baten eskuhartzea. Interesatuak erabili erabiltzen ahalko ditu, baina hala eginez gero, haien ordainsari edo eskubideen pagamendua bere kargura izanen da.
5. artikulua
Gora jotzeko helegitea Nafarroako Administrazio Auzitegiak izapidatu eta ebatziko du Erregelamendu honek zehazten duen prozeduraren bidez.
6. artikulua
1.-Nafarroako Administrazio Auzitegiaren aitzinean agertzeko gaitasuna dute, arau zibilen arabera gaitasun hori daukatenek ezezik baita adingabekoek ere, euren eskubide eta interesak erabili eta defenditzeko, beti ere ordenamendu juridiko-administratiboak horien guraso-botere, tutoretza edo kuratela duen pertsonaren laguntzarik gabe jarduteko baimena ematen badie. Salbuespena izanen da adingabeak ezinduak izanik, gai ez badira beren eskubideak edo interesak defenditzeko.
2.-Gora jotzeko helegitea paratzeko legitimaturik daude, legeria orokorraren arabera toki entitateen egintza eta erabakiak inpugnatzeko legitimaturik daudenak, bai eta herritarrak ere, egintzak edo erabakiak pertsonalki ez ukituagatik ere.
3.-Jarduteko gaitasuna duten interesatuek jardun dezakete ordezkari baten bitartez, eta honekin konponduko dira administrazio jarduketak, non eta interesatuak berariaz kontrakorik ez dioen.
Jarduteko gaitasuna duen pertsona orok jardun dezake beste baten ordez Nafarroako Administrazio Auzitegiaren aitzinean.
4.-Ordezkaritza frogatzen ahal da zuzenbidez baliagarri den edozein bide erabiliz, beti ere modu sinesgarrian jasotzen badu, edo baita interesatua bertaratu eta egindako adierazpenaren bitartez. Tramite soileko egintza eta kudeaketarako aipatu ordezkaritza hori badela suposatu beharko da.
Ordezkaritzarik ez izateak, edo izanda ere behar bezala egiaztatu gabe egoteak, ez du galaraziko egintza egindakotzat hartzea, beti ere hamar eguneko epean ordezkaritza egiaztatzen edo izandako akatsa zuzentzen baldin bada. Epe hori, edo handiagoa hala komeni bada, Administrazio Auzitegiak ezarriko du
7. artikulua
Gora jotzeko helegitea zuzenbidezko ordenamenduaren edozein arau-haustetan paratu ahalko da, boterearen desbideratzea barne.
8. artikulua
1.-Gora jotzeko helegitea jartzeak ez du aldatzen Nafarroako toki entitateen egintzen eta erabakien araubidea, aplikatzekoa den arautegi orokorrari lotuko baitzaio, eta ez du bertan behera utziko inpugnatutako egintza edo erabakiaren exekuzioa.
2.-Gora jotzeko helegitea izapidatzen ari den bitartean Administrazio Auzitegiak ez du helegitearen xede diren egintzen edo erabakien exekuzioa bertan behera uzten ahalko.
Bigarren Saila. Jartzea eta izapidatzea
9. artikulua
Gora jotzeko helegitea, behar denean, egintza edo erabakia argitaratu edo jakinarazi ondoko hilabetearen barrenean jarriko da, egintza edo erabaki hori espresua baldin bada, edo epe berdinean ere, Nafarroako Toki Administrazioari buruzko uztailaren 2ko 6/1990 Foru Legearen 318.2 artikuluak ezartzen duenari jarraikiz, dagokion eskariaren ustezko ukapena gertatutzat hartzen denetik.
10. artikulua
1.-Gora jotzeko helegitea Nafarroako Gobernuaren Erregistro Orokorrean, Administrazio Auzitegiarenean nahiz inpugnatzen den egintza edo erabakia hartu zuen toki entitatekoan aurkezten ahal da, bai eta guztiendako administrazio prozeduraren arau orokorren manuz eskari, idazki eta jakinarazpenak jasotzeko egokitu diren organoen bulego edo erregistroetan ere.
Helegitea inpugnaturiko egintza edo erabakia eman zuen toki entitateari zuzendua aurkezten bada, honek Administrazio Auzitegira igorriko du, besterik gabe, bost egun balioduneko gehieneko epean.
2.-Nolanahi ere, gora jotzeko helegitea Nafarroako Administrazio Auzitegiari zuzendu beharko zaio eta hari jarritakoa dela ulertuko da
11. artikulua
1.-Helegitea paratzeko idazkiak helegilearen izena eta helbidea agertu beharko ditu, jakinarazpenak berari bidali ahal izateko, bai eta helegitea non eta noiz jartzen den ere. Idazkian, halaber, helegiten den egintza edo erabakia zein den zehaztuko da eta helegileak edo haren legezko ordezkariak sinatu beharko du.
2.-Idazkiak, modu zehatz eta sailkatuan, helegitea zein egintzek eragiten duten eta lege aldetik zertan oinarritzen den agertu beharko du. Egiten den eskaria ere agertu beharko du, beti ere helegindako egintza edo erabakiari buruzkoa.
3.-Helegite-idazkiari erantsiko zaizkio helegindako ebazpena, espresua bada, eta ez bada, zuzenbidearen arabera onartzen den edozein frogabide erabiliz isiltasun administratiboa gertatu dela justifikatzea, bai eta helegitea inbokatutako eskubideak justifikatzeko beharrezko irizten diren dokumentu guztiak ere
12. artikulua
1.-Helegite-idazkia jaso ondotik Nafarroako Administrazio Auzitegiak aitzineko artikuluan aipatu diren baldintzak betetzen ote diren aztertuko du. Ez-eginen bat antzematzen badu, hamar laneguneko epea emanen du hura betetzeko. Hala egiten ez bada, ekintzak artxibatzea aginduko du.
2.-Nafarroako Administrazio Auzitegiak, egintzak edo erabakiak zein toki entitatetan helegiten diren, hari bidaliko dizkio berehala helegite- idazkiaren eta horrekin batean doazen dokumentuen kopiak, hilabeteko epean jarduketa hauek burutu ditzan:
a) Espedientea Nafarroako Administrazio Auzitegiari igortzea erabakitzen duen ebazpena jakinaraztea espedientean interesatu gisa azaltzen diren guztiei, hamar laneguneko epea paratzen zaielarik Auzitegian ager daitezen.
b) Administrazio espedientea edo horren kopia eginbidetua igortzea, paratutako epearen jakinarazpenak erantsiz.
3.-Aurreko atalean aipatu den idazkian Auzitegiak Toki Administrazio interesatuari entzute tramitea emanen dio; Administrazio hark espedienteari txosten edo alegazio-idazki bat atxikitzen ahal dio eta orobat, egoki juzkatzen duen dokumentazio osagarria, eta hori ezin aurkeztu ahalko da prozeduran zehar beste ezein momentutan.
13. artikulua
1.-Aitzineko artikuluan ezarri bezala, espedientea igorri beharra betetzen ez bada, eta atzerapenaren egileak izan dezakeen erantzukizuna galarazi gabe, Nafarroako Administrazio Auzitegiak bere jarduketekin aurrera eginen du, eta behar diren neurriak hartuko ditu prozedura tramitatu eta ebazteko.
2.-Toki entitateetako buruek eta, zuzen- zuzenean, Idazkariek izanen dute igorpen beharkizuna betetzeko ardura.
3.-Ez da toki entitatearen alegaziorik behin ere onartuko, helegindako egintza edo erabakiari dagokion espedientea igorri ez badu.
14. artikulua
Nafarroako Administrazio Auzitegiak, ofizioz nahiz alderdiren baten eskariz, prozeduraren edozein unetan helegiteen metaketa erabaki dezake, haien artean funtsezko identitatea edo lotura zuzena baldin bada.
15. artikulua
1.-Nafarroako Administrazio Auzitegiak helegitea bidaliko du eta espedientearen ikusketa emanen die hirugarren interesatuei, hamar egun baliodunetik hamabostera bitarteko epean bidezko juzkatzen dituzten alegazioak egin eta agiriak eta frogagiriak aurkez ditzaten. Horretarako, Auzitegiak beharrezkoak iruditzen zaizkion agerpen deiak eginen ditu, toki entitateak egindakoei osatu gabeak irizten badie.
2.-Auzitegiak kontuan hartu behar badu egitate edo dokumentuak badaudela, bai eta prozedurak planteatzen eta aldeek alegatu ez dituzten auzien gainean erabakia hartu behar duenean ere, interesatuei jakinaraziko zaie, hamar egun baliodunetik hamabostera bitarteko epean bidezko juzkatzen dituzten alegazioak egin eta egokitzat jotzen dituzten agiriak aurkez ditzaten.
3.-Auzitegiak erabaki ahal izanen du, halaber, toki entitateak luzatutako txosten edo alegazio idazkia eta hirugarren interesatuek egindakoak ikusirik, errekurtsoaren egileari jarduketen berri ematea, 16.1.a) artikuluan aurreikusiriko ondorioak izateko.
16. artikulua
1.-Ofizioz edo alderdi baten eskariz, Nafarroako Administrazio Auzitegiak gehienez hogeita hamar eta guttienez hamar egun baliodun irauten ahal duen frogaldi bati hasiera ematea erabaki dezake, bidezko iruditzen zaizkion probak egin ahal daitezen.
Proba-eginbideen proposamena ondokoek egin dezakete:
a) Helegileak helegite-idazkian berean. Errekurtsoaren egileak ere proposatu ahal izanen ditu errekurtsoa aurkeztean kontuan hartzerik ez zuen egitateen inguruko froga diligentziak, arestiko artikuluaren 3. idazatiak aipatzen duen erabakia jakinarazi ondoko bost egun balioduneko epean.
b) Inpugnatutako egintza edo erabakiaren egile den toki entitateak, txosten edo alegazio-idazkian.
c) Eta horietako edozeinek, bai eta interesaturik dauden hirugarrenek, 15. artikuluan entzute tramiterako aurrikusitako kasuetan.
2.-Nafarroako Administrazio Auzitegia erabaki ahal izanen du, ofizioz, frogaldi bati hasiera ematea, hamar egun baliodunetik hogeita hamarrera bitartekoa, ebazpena emateko kontuan hartu beharreko egitateak zehaztu, ezagutu eta egiaztatzeko.
17. artikulua
1.-Auzitegiak aitzinapen askiz jakinaraziko die interesatuei onartutako frogak burutzeko beharrezko diren jarduketen hasiera, haiek non, noiz eta zer ordutan egin behar diren aipatuz, eta, hala behar denean, interesatuek teknikari laguntzaileak izendatzen ahal dituela ohartaraziz.
2.-Interesatuak eskaturik, gastuak ekarriko dituzten frogak egin behar baldin badira, proposatzailearen kargu izatea xedatzen ahal da.
18. artikulua
1.-Nafarroako Administrazio Auzitegiak, zer toki entitateren egintzak edo erabakiak helegiten diren, hari galdatzen ahalko dizkio eta baita Nafarroako Gobernuaren zerbitzu eta dependentziei ere, helegiteak ebazteko beharrezko diren aurretikoak, txosten teknikoak edo jarduketak.
2.-Nolanahi ere, toki entitateen aurrekontuak berdintzeari buruzko gora jotzeko helegiteen ebazpena, Nafarroako Kontu Ganbararen aldez aurreko irizpenaz eman beharko da. Irizpen hori bi hilabeteko epean eginen du, hura arautzen duen Foru Legearekin bat.
Hirugarren Saila. Etsitzea eta nahikundeak ontzat hartzea
19. artikulua
1.-Prozeduraren edozein momentutan, ebazpenaren aitzin, helegiteaz etsitzen ahalko du helegileak.
2.-Helegileak bat baino gehiago baldin badira, helegiteak aitzina eginen du etsi ez duten horiekiko
20. artikulua
1.-Toki entitateen organoek, beren ebazpen edo erabakiek helegiterik hartu baldin badute, Nafarroako Administrazio Auzitegira jotzen ahalko dute, txosten baten bidez adierazitako nahikundeak ontzat hartzeko prest daudela agertzeko. Horretarako emandako ebazpenean zehaztu beharko dute zergatik komeni den iritziz aldatzea helegitea eragin zuenarekiko.
2.-Txostena eskuratuta, Nafarroako Administrazio Auzitegiak behar den ebazpena emanen du helegilearen nahikundeekin bat. Hala ere, Auzitegiak jarraipena emanen dio prozedurari, funtsari buruz ebazpena eman arte:
a) Espedientean interesaturik dauden hirugarrenek parte hartzen badute.
b) Helegindako ebazpenek hirugarrenei eskubiderik aitortu badie.
c) Helegindako ebazpen edo erabakiak agintzaritza edo korporazio bati baino gehiagori badagozkie.
Laugarren Saila. Nafarroako Administrazio Auzitegiaren Erabakiak
21. artikulua
1.-Nafarroako Administrazio Auzitegiaren erabakiak probidentziak nahiz ebazpenak izan daitezke.
2.-Baldintzak ez betetzeagatik jarduketak artxibatzea, 11. artikuluak aipatua, etsitzea edo nahikundeak ontzat hartzea, helegitearen onartezintasuna edo haren funtsari buruzko erabakia, ebazpenak izanen dira.
3.-Gainerako erabakiak probidentziak izanen dira.
4.-Ebazpenek arrazoituak behar dute izan.
5.-Nafarroako Administrazio Auzitegiak ematen dituen ebazpenen kopia igorriko dio Toki Administrazioko Departamentuari.
22. artikulua
1.-Ebazpenak gora jotzeko helegitearen onartezintasuna aldarrikatuko du ondoko kasuetan:
a) Nafarroako Administrazio Auzitegiaren eskumenetik kanpora baldin badago.
b) Gaitasun edo legitimazioren arloko baldintzak betetzen ez baldin baditu.
c) Helegitearen xedea diren egintzak behin betikoak eta irmoak diren lehenagokoen errepikapena direnean, eta denboran eta moduan helegin ez zirelako onartutako egintzak berresten dituztenak direnean.
d) Epaitutako zerbaiten ingurukoa denean.
e) Helegitea aurkezteko epea amaiturik dagoenean.
f) Helegitearen egileak administrazioarekiko auzi-helegitea aurkeztu duela jakina denean, salbu eta etsi baldin badu gora jotzeko helegitea aurkezteko epearen barrenean. Era berean, onartezina dela deklaratuko da helegileak edo interesaturen batek berraztertze helegitea, aukerakoa, aurkeztu duela jakina denean, haren gaineko ebazpen espreso edo ustezkoaren kontra gora jotzeko helegitea jartzeko aukera galarazi gabe. Nolanahi ere, toki entitateak berehala jakinarazi dio Nafarroako Administrazio Auzitegiari errekurtso horietako edozein aurkeztu dela.
g) Helegitearen xede egintza ez-inpugnagarriak baldin badira.
2. Auzitegiak ez du onartuko helegitea beste tramiterik gabe, helegitearen idazkitik eta erantsitako dokumentaziotik ondoriozta daitekeenean, inolako dudarik gabe eta begi bistakoa izanik, eskumenik ez duela edo egintza ezin dela inpugnatu.
23. artikulua
Helegitean planteatutako auziaren funtsari buruz erabakia hartuko duen ebazpenak inpugnatutako egintza edo erabakia berretsi, aldatu edo deuseztatuko du, eta zuzenbidez bidezko dena xedatuko.
24. artikulua
Nafarroako Administrazio Auzitegiak ezagutu beharreko auziei buruzko ebazpena emateko hiru Ataletan eratuko da. Atal bakoitza hiru kidek osatuko dute. Ezespen onetsiaren bidez behin betikoz ukitu gabeak izan beharko duten auzitegiko bi kidek parte hartu gabe ematen diren Ebazpenak balio gabeak izanen dira.
25. artikulua
Atal bakoitzaren barnean ebazpenak botuen gehiengoaz emanen dira. Kideren bat gehiengoarekin bat ez badator, boto partikularra eman dezake. Boto hori ebazpenaren amaieran eta Auzitegian horretarako dagoen liburuan agertaraziko da.
Boskarren Saila. Nafarroako Administrazio Auzitegiaren ebazpenen kontrako helegiteak
26. artikulua
1.-Nafarroako Administrazio Auzitegiaren ebazpenak administrazioarekiko aferen jurisdikzioaren organo eskudunen aitzinean inpugnatzen ahalko dira. Bai halaber, horien exekuzioaren gorabeherak ebazteko ematen diren probidentziak.
2.-Gainerako erabakiak ez dira helegiten ahal izanen, gora jotzeko helegitearen ebazpenaren kontra paratutako administrazioarekiko auzi- helegitean erabaki horiei buruzko auziak berriz ere agertzea deusetan galarazi gabe
27. artikulua
1.-Gora jotzeko helegiteak sei hilabeteko epean ebatzi beharko dira paratu ziren egunetik aitzina.
2.-Gora jotzeko helegitearen ebazpen espresuaren kontra, interesatuak administrazioarekiko auzi- helegitea paratzen ahalko du organo eskudunari zuzendua, jurisdikzio hori arautzen duen legeriak ezartzen duen epearen barrenean. Epe hori ebazpena jakinarazi eta biharamunean hasiko da.
28. artikulua
Aitzineko artikuluko 1 zenbakian ezarritako epea ebazpen espresurik gabe iragaten baldin bada, helegitea ezetsitzat jo daiteke eta interesatuak ustezko ezespen horren kontra administrazioarekiko auzi-helegitea jarri ahal izanen du organo eskudunei zuzendua, jurisdikzio hori arautzen duen legerian ustezko egintzetarako ezarritako epearen barrenean. Halere, geroago ebazpen espresua ematen bada, epea izanen da aurreko artikuluaren 2 zenbakian ezarritakoa
Seigarren Saila. Beteraztea
29. artikulua
1.-Helegiteak planteatutako auziak ebazten dituen Nafarroako Administrazio Auzitegiaren erabakiak betearaztea, helegitearen xede izan den egintza edo erabakia burutu zuen organoari dagokio.
2.-Nafarroako Administrazio Auzitegiak bere ebazpenak betearazteko beharrezko diren jarduketak burutu ditzaten agintzen ahalko die toki entitateei.
3.-Nafarroako Gobernuak, Nafarroako Administrazio Auzitegiak eskatuta, egoki irizten duen guztia egiten ahalko du, baita fondo ekonomikoak burutu eta eskuratzea posible egiten duten eskumenetan besterik gabe subrogatzea ere, aipatu xedapenak betearazi behar dituen organoak hilabeteko epean aurrera eraman ez badu, horretarako egindako errekerimenduaren ondoan.
Zazpigarren Saila. Jakinerazpenak
30. artikulua
Nafarroako Administrazio Auzitegiaren erabakien jakinarazpena, prozedura administratiboari buruzko legeriak ezartzen dituen modu eta epeen arabera eginen da.
III. KAPITULUA. Entitate lokalen ihardueren kontrola Nafarroako Gobernuaren eskutik
Lehendabiziko Saila. Atariko xedapenak
31. artikulua
1. Nafarroako entitate lokalak beharturik daude Foru Komunitateko Administrazioari beren egintza edo erabakien kopia edo, hala behar denean, laburpena igortzera.
2. Arestiko zenbakiak aipatzen duen igortzeko beharkizun horrek entitate lokalen organo kolegiatu nahiz pertsona bakarrekoen egintza eta erabakiak ukitzen ditu.
32. artikulua
1. Egintza edo erabakia Korporazioko Idazkariaren legezkontrakotasunaren oharterazpena edo kontrako txostena tartekoa dela hartu baldin bada, inguruabar hori azpimarkatu beharra dago.
2. Igorpena laburpen bidez egiten baldin bada, gutienez ondoko datuak agertu beharko ditu: egintza edo erabakia burutu duen entitatea zein izan den, egintza edo erabakiaren xedapen atala eta, erabakiak baldin badira, gehiengo arruntaz edo kualifikatuaz hartu ote diren, eta azken kasu honetan zer-nolako gehiengoa izan den ere.
3. Ordenantza, deialdi, baldintza plegu edo antzerako iharduketak onesteko egintza edo erabakien kopia edo laburpenaren igorpenari, haien kopia ere erantsiko zaio.
4. Nolanahi ere, kopia edo laburpenak Korporazioko Idazkariak sinatu beharko ditu eta haren zigilua izan.
33. artikulua
1. Entitate lokalen egintza eta iharduketen kopia edo laburpenak Nafarroako Gobernuaren Administrazio Lokaleko Departamentuari igorri behar zaizkio eta burutu ondoko hogei eta hamar lanegunen epearen barrenean egin behar dira.
2. Igorpen horrek ez du zerikusirik entitate lokalak, indarrean dauden xedapen orokorrei jarraikiz, Estatuko Administrazioari egin behar dionarekin.
34. artikulua
Foru Komunitateko Administrazioak, eskuratutakoaz gain, informazio gehiago eskatzen ahal du. Entitate lokalak hogei laneguneko epean bidali beharko du.
35. artikulua
Foru Komunitateko Administrazioak Nafarroako entitate lokalen iharduerari buruzko informazio zehatza galdatu eta erdiesteko ahalmena du, Nafarroari dagozkion gaietan legeria eraginkorki aplikatzen ote den frogatu beharrez, espedienteak erakusteko eta txostenak igortzeko ere eskatzen ahal duela.
36. artikulua
Sail honek aipatzen duen igorpenaren erantzule Alkatea edo Korporazio Burua eta, zuzen-zuzenean, haren Idazkaria dira.
Bigarren Saila. Inpugnazioa Foru Komunitatearen Administrazioaren eskutik
37. artikulua
Foru Komunitateko Administrazioak erizten badu entitate lokalen baten egintza edo erabakiak zuzenbidezko ordenamendua hausten duela Foru Komunitatearen eskumeneko gaietan, neurri hauetarikoren bat hartzen ahal du:
a) Errekeritu entitate lokalari egintza edo erabaki hori deusezta dezan.
b) Aipatu egintza edo erabakia jurisdikzio kontentzioso-administratiboaren aitzinean zuzenean inpugnatzea, behin jakinerazpena eskuratuz gero.
38. artikulua
1. Foru Komunitateko Administrazioak aitzineko artikuluko a) atalak aipatzen duen errekerimendua erabiltzea erabakitzen duenean, haren formulazioa uztailaren 2ko 6/1990 Foru Legeari atxikiz egin beharko du.
2. Errekerimenduak arrazoitua beharko du izan, zein araudiren kontra doan adierazi, egintza edo erabakia deuseztatzeko eskaria agertu, baita aipatu ere hura burutu zuen entitate lokalak zein epetan egin behar duen deuseztapena.
3. Errekerimendua, egintza edo erabakiaren jakinerazpena eskuratzen denetik, hamabortz eguneko epean egin beharko da. 34. artikuluak xedatutakoari jarraikiz, informazio gehiago eskatzen baldin bada, epearen zenbaketa etenik geldituko da eta horrek berriz ere jarraituko eskatu dokumentazioa biltzen denean.
4. Entitate lokalak, errekerimenduaren indarrez eta horretarako zehaztutako epean, egintza edo erabakia deuseztatu beharko du, behar denean, interesatuei entzutea eman ondoren.
5. Entitate lokalak errekerimenduari kasurik egiten ez badio, Foru Komunitateko Administrazioak inpugnatzen ahalko du egintza edo erabakia jurisdikzio kontentzioso-administratiboaren aitzinean, entitate lokalari igorritako errekerimenduan aipatu epea akitzen den egunaren ondoko bi hilabeteetan, edo epe berdinean entitateak errekerimenduari ezetza ematen diola jakinerazten duenetik.
6. Halaber, aitzineko artikuluko b) atalari jarraikiz, Foru Komunitateko Administrazioak zuzenean eta ez errekiremendurik egin behar ezta aldez aurretik birjarpen helegiterik paratu behar izan gabe inpugnatzen ahalko ditu jurisdikzio kontentzioso-administratiboan entitate lokalen egintza edo erabakiak, Foru Komunitatearen eskumen berarizkoen esparruan ordenamendu juridikoa hausten baldin badute, haien jakinerazpena eskuratu eta biharamunetik, bi hilabeteko epearen barrenean.
39. artikulua
1. 2. artikuluko 1 zenbakiaren b) atalak ezarritakoari jarraikiz, Foru Komunitateko Administrazioaren eskumenak gutietsi edo haien erabilera eragozten dituzten erabakiak zuzenean inpugnatzen ahalko ditu Administrazio horrek jurisdikzio kontentzioso-administratiboan, ez errekiremendurik egin behar ezta aldez aurretik birjarpen helegiterik paratu behar izan gabe, haien jakinerazpena eskuratu eta biharamunetik, hamabortz eguneko epearen barrenean. 34. artikuluak xedatutakoari jarraikiz, informazio gehiago eskatzen baldin bada, epearen zenbaketa etenik geldituko da eta horrek berriz ere jarraituko eskatu dokumentazioa biltzen denean.
2. Inpugnazioaren oinarria zehaztu beharko da, kaltea zein den edo, hala behar denean, eskumenen mugak zertan gainditu diren eta zeintzu diren urratutako legezko arauak ere aipatuko direla. Horretaz gain, inpugnaturiko egintza edo erabakia bertan behera uzteko eskari espresua izaten ahal du, komunitatearen ukituriko interesaren osotasun eta eraginkortasunaren izenean.
Entitate lokalaren eskariz eta Foru Komunitateko Administrazioari entzunda, Auzitegiak edozein momentutan deusezten ahalko du bertan behera uzteko erabakia, osorik edo zati batean, baldin eta haren ondorioz inpugnazioan argudiatzen diren komunitatearen interesak justifikatzen ez duen interes lokalarendako kalterik eratortzen bada.
Lehen Xedapen Gehigarria
1. artikuluko 1 zenbakiaren b) atalean eta Arautegi honen III. Kapituluan xedatua, Estatuko edo Foru Komunitateko Administrazioak delegatutako eskumenak erabiliz entitate lokalek burututako egintza edo erabakien kontra bidezko diren helegiteak eta Administrazio delegatzaileak haiei buruz ematen duen ebazpena deusetan galerazi gabe ulertu behar da.
Bigarren Xedapen Gehigarria
Bide administratiboa nahiz judiziala erabiliz, Nafarroako entitate lokalen egintza eta erabakiak inpugnatzeko ahalmena, 2. artikuluak aipatzen duena, Administrazio Lokaleko Departamentuari dagokio.
Hirugarren Xedapen Gehigarria
Entitate lokalen ihardueren interesgarritasuna kontrolatzeko ahalmena, gaiaren eta legeria sektorialaren indarrez Foru Komunitatean zen organori dagokien, haiek erabiliko dute.
Xedapen Derogatzailea
Indarrik gabe gelditzen da abuztuaren 1eko 194/1986 Foru Dekretua.
Azken xedapenetan Lehena
Administrazio Lokaleko Kontseilariari baimena ematen zaio Arautegi hau exekutatu eta garatzeko beharrezko diren xedapen guztiak emateko.
Azken xedapenetan Bigarrena
Arautegi honek Nafarroako Aldizkari Ofizialean argitaratu eta biharamunean hartuko du indarra.
