navarra.es
Castellano | Euskara | Français | English
Ezagutzera eman
375/2004 Foru Agindua, apirilaren 2koa, Ingurumen, Lurraldearen Antolamendu eta Etxebizitza kontseilariak emana, ehizarako animaliek Nafarroako errepideetako istripuetan eragindako kalteak ordaintzeko prozedura arautzen duena
(Testu bateratua. Jatorrizkoa 2004ko 63. NAOn argitaratua, maiatzaren 26an. Aldaketak: 400/2005 Foru Agindua, ekainaren 7koa)
Atarikoa
Nafarroan maiz aski gertatzen da ehizarako animaliek istripua eragin eta ibilgailuei kalte egitea.
Istripu horien erantzule kasuko ehiza barrutiaren kudeaketa esleitua duena da, hau da, gehienbat tokian tokiko ehiztari elkarteak, betiere istripua barruti barrenean gertatu bada eta istripua sortu duen espeziea kasuko Ehiza Antolatzeko Planean araututa badago. Horrela interpretatu behar da martxoaren 5eko 2/1993 Foru Legearen 31. artikuluko 4. idatz-zatiaren arabera (Basa fauna eta haren habitatak babestu eta kudeatzeari buruzko Foru Legea).
Ekainaren 13ko 18/2002 Foru Legearen bidez 2/1993 Foru Legearen artikulu batzuk aldatu dira, besteak beste 31. artikuluko 4. idatz-zatia, eta azken horretan Nafarroako Gobernuari esku eman zaio horrelako istripuek eragindako kalteak ordain ditzan, aldez aurretik kaltearen erantzulea eta kaltetua ados jartzen baldin badira.
Ondorioz, aitortzen diren kalteak ordaintzeko prozedura ezarri beharra dago.
Horrenbestez, Basa fauna eta haren habitatak babestu eta kudeatzeari buruzko martxoaren 5eko 2/1993 Foru Legearen 31. artikuluko 4. idatz-zatian xedatutakoarekin bat (ekainaren 13ko 18/2002 Foru Legearen 1. artikuluak emandako idazkeran), agindu dut:
1. artikulua
Foru Agindu honetan ezarritako prozedura erabiliko da Nafarroan ehizarako animaliek errepideetako istripuetan eragiten dituzten kalteak ordaintzeko.
2. artikulua
Lege zibilen arabera erantzule direnek ordainduko dituzte ehizarako basa animaliek eragindako kalteak. Hala ere, Nafarroako Gobernuak, erantzulearekin eta kaltetuarekin ados jarrita, azken horri zuzenean ordainduko dizkio ehizarako animaliek errepideko istripuan eragindako kaltea.
3. artikulua
1. Istripuan kaltetuak, edo haren izenean legez subrogatzen denak, ezbeharra gertatu ondorengo urte beteko epean ordainketa eskaera aurkeztuko du Ingurumen, Lurraldearen Antolamendu eta Etxebizitza Departamentuan, dokumentu hauekin batera:
a) Adostasun dokumentua, Ingurumen, Lurraldearen Antolamendu eta Etxebizitza Departamentuak ordaindu beharreko kalte-ordainei buruz kaltetuak eta erantzukizuna duen ehiza ustiategiaren titularrak egina. Aipatu dokumentua aurkezten ez bada, Ingurumen, Lurraldearen Antolamendu eta Etxebizitza Departamentuak ehiza ustiategiaren titular interesatuari galdetuko dio ea ados dagoen aurkeztutako eskaerarekin eta, halakorik izanez gero, asegururik ba ote dagoen.
b) Poliziaren atestatua, zeinean agerraraziko baita kaltea zalantzarik gabe ehizarako basa faunak sortu duela, bai eta ezbeharra non gertatu den eta egindako ikuskapenaren datu guztiak ere, edo, hori izan ezean, Zuzenbidean onartutako beste bideren bat, modu sinesgarrian kaltea badagoela egiaztatzen duena, zerk sortu duen eta non.
c) Aseguruaren frankizia ordaintzeko erreklamazioa egiten bada, aprobetxamenduaren titularraren aseguru polizaren kopia.
d) Ibilgailuaren titulartasunaren egiaztagiria.
e) Istripuan izandako kalteen peritu-tasazioa, horretarako eskumena duen peritu-tasatzaile batek egina.
f) Konponketaren faktura.
g) Ordainketa transferentzia bidez egiteko eskaera, nahi izanez gero.
2. Ordaindu beharreko kalte-ordainak pagatzeko eskaera ehiza aprobetxamenduaren titularrak aurkezten badu, 1. idatz-zatiko b), c) eta f) letretan adierazi dokumentuak aurkeztu beharko dira.
3. Kalte-ordainak pagatzeko eskaera ebazpen judizial baten sorburu denean, dokumentu judizialaren kopia aurkeztuko da, 1. idatz-zatiko a), b), d) eta f) letretako dokumentuen ordez.
4. artikulua
Betekizun guztiak beterik aurkezten diren eskaerak 6 hilabeteko epean ebatziko ditu Ingurumen, Lurraldearen Antolamendu eta Etxebizitza Departamentuak. Epe hori ebazpenik eman gabe iragaten bada, eskatzaileak ezezkoa eman zaiola ulertu ahalko du.
Peritu-tasatzaileak egindako ebaluazioaren zenbatekoa hartuko da oinarritzat kalteak ordaintzeko, edo bestela kalteen konponketaren faktura hartuko da oinarri, honen zenbatekoa txikiagoa bada. Betiere Ingurumen, Lurraldearen Antolamendu eta Etxebizitza Departamentuak kontraesanezko tasazioa egin ahalko du egoki iruditzen bazaio.
5. artikulua
Ibilgailuaren gidariari zirkulazio arauak hautsi izana egotzi ahal izatea kalteen ordaina ukatzeko adinako arrazoia izanen da, baldin eta errepidean ehizarako animalia zapalduta ibilgailuak izan dituen kalteak gidariari egozten zaion arau-haustearen ondoriotzat hartu ahal badira.
Xedapen Gehigarri Bakarra
Kalteak ordaintzea ala ez, betiere aurrekontuan kreditua egotearen mende egonen da, bai eta eskaerari buruzko administrazio ebazpena ematen den unean Nafarroako Foru Komunitateko Administrazioak dituen baliabide ekonomikoen mende ere.
Xedapen Iragankor Bakarra
Foru Agindu honek indarra hartu baino lehenago istripuek eragindako kalteak 449/2001 Foru Aginduan ezarritako prozedurari jarraikiz ordainduko dira (449/2001 Foru Agindua, apirilaren 17koa, Ingurumen, Lurraldearen Antolamendu eta Etxebizitza kontseilariak emana, Dirulaguntzen araubide iragankorra ezartzen duena ehizarako basa animaliek errepideetako istripuetan egindako kalteetarako).
Xedapen Indargabetzaile Bakarra
Indarrik gabe utzi da 449/2001 Foru Agindua, apirilaren 17koa, Ingurumen, Lurraldearen Antolamendu eta Etxebizitza kontseilariak emana, Dirulaguntzen araubide iragankorra ezartzen duena ehizarako basa animaliek errepideetako istripuetan egindako kalteetarako.
Azken Xedapen Bakarra
Foru agindu honek Nafarroako Aldizkari Ofizialean argitaratu eta biharamunean hartuko du indarra.
