navarra.es
Castellano | Euskara | Français | English
Ezagutzera eman
224/1994 Foru Dekretua, azaroaren 14koa, Nafarroako Lurraldearen Antolamendu Batzordearen antolaketa eta funtzionamenduari buruzko Erregelamendua onesten duena
(Testu bateratua. Jatorrizkoa 1994ko 143. NAOn argitaratua, azaroaren 28an. Aldaketak: 85/2000 Foru Dekretua, otsailaren 21ekoa; 272/1995 Foru Dekretua, irailaren 4koa)
Atarikoa
Lurraldearen Antolamendu eta Hirigintzari buruzko uztailaren 4ko 10/1994 Foru Legearen 289. artikuluaren bidez, Lurraldearen Antolamendu Batzordea eratu zen, lurraldearen antolamenduaren inguruko gaietan, Nafarroako Foru Komunitateko Administrazioaren koordinazio eta aholkularitza organo gisa.
Bestalde, Foru Lege horren bederatzigarren Xedapen Iragankorraren bidez Nafarroako Hirigintza eta Ingurugiro Batzordea deuseztatu zen. Horren eginkizunak Lurraldearen Antolamendu eta Ingurugiro Kontseilariari esleitu zitzaizkion besterik gabe, Foru Lege honen bidez Lurraldearen Antolamendu Batzordeari esleituko zaizkionak izan ezik.
Sortu berri den Lurraldearen Antolamendu Batzordea Foru Komunitateko Administrazioaren, Udalen eta Estatuaren ordezkariek osatuko dute, baita kasuan‑kasuan Batzordean sartzen ahal diren erakunde eta elkarteen ordezkariek ere. Lurraldearen antolamenduko baliabideak bideratzen arituko da eta Udal Planak behin‑betikoz onesteko ahalmena izanen du, beti ere Nafarroako Gobernuak, Foru Dekretuaren bidez, afera horietarako eratuko den azpibatzordeari eskumen hori ematen badio.
Hirigintza prozedurak ahalik eta gehien errazteko Nafarroako Gobernua egiten ari den lanaren ildotik, egokitzat jo da aipatu Azpibatzordeari ahalmena ematea populazio handiko udalerrietako Udal Planak behin‑betikoz onesteko, eta Lurraldearen Antolamendu eta Ingurugiro Kontseilariaren esku uztea populazio txikiko udalerrietako Udal Planak behin‑betikoz onesteko ahalmena.
Horrenbestez, Lurraldearen Antolamendu eta Ingurugiro Kontseilariak proposaturik eta Nafarroako Gobernuak mila bederatziehun eta laurogeita hamalauko azaroaren hamalauan egindako bilkuran harturiko erabakiarekin bat etorriz, dekretatu dut:
1. artikulua
1. Nafarroako Lurraldearen Antolamendu Batzordearen antolaketa eta funtzionamenduari buruzko Erregelamendua, Eraskinean azaltzen dena, onestea.
2. Nafarroako Lurraldearen Antolamendu Batzordeak, egitura organikoaren ondorioetarako, Lurraldearen Antolamendu eta Ingurugiro Departamentuari atxikiko zaio.
2. artikulua
Lurraldearen Antolamendu eta Hirigintzari buruzko uztailaren 4ko 10/1994 Foru Legearen 289. artikuluaren 3. zenbakiko e) atalean xedatutakoaren ondorioetarako, Nafarroako Lurraldearen Antolamendu Batzordeari ahalmena ematen zaio Udal Planak, Hiri Antolamenduko Plan Orokorrak eta Hirigintza Planeamenduko Arau Subsidiarioak, baita horien berrikuspenak ere, behin‑betikoz onesteko, beti ere udalerri horiek 2.000 biztanle eskubidedun baino gehiago baldin badute eta Iruñerrikoak izaki, 500 baino gehiago.
Behin‑betiko onespena Erregelamenduak aurrikusten duen Hirigintza Azpibatzordeari dagokio eta horren erabakien aurka Nafarroako Gobernuan ohizko helegitea jartzen ahalko da.
Gainerako udalerrietako planeamenduei Lurraldearen Antolamendu eta Ingurugiro Kontseilariak emanen die behin‑betiko onespena, Foru Aginduaren bidez.
Xedapen Gehigarri Bakarra
Lurraldearen Antolamendu eta Ingurugiro Kontseilariari dagokio, kasuan kasuko obra, instalazio edo iharduera egin edo, hala behar balitz, baimentzeko hartuko den ebazpena baino lehen, Ingurugiroaren gaineko Eraginaren Deklarazioa ematea, Ingurugiroaren gaineko Eraginaren Balorazioari buruzko ekainaren 28ko 1302/1986 Errege Dekretu Legegilean horrela aurrikusita baitago. Deklarazio horretan zehaztu beharko da ingurugiroa eta natur baliabideak behar bezala babesteko zein baldintzatan ezarri behar den iharduera hori, hala nola egoki juzkatzen diren oharrak ere.
Horretarako, Lurraldearen Antolamendu eta Ingurugiro Kontseilariak Nafarroako Lurraldearen Antolamendu Batzordeari eskatzen ahalko dio txostena egitea, edo bestela, otsailaren 17ko 1/1993 Foru Legearen bidez eratu zen Nafarroako Ingurugiro Kontseiluari.
Xedapen Iragankor Bakarra
1995. urtean Nafarroako Parlamenturako hauteskundeen ondotik Nafarroako Gobernu berria osatu bitartean, Nafarroako Lurraldearen Antolamendu Batzordearen eta Hirigintza Azpibatzordearen kide izanen dira egun Hirigintza eta Ingurugiro Batzordean eta Hirigintza Planeamenduko Azpibatzordean aritzen diren kide berberak.
Nafarroako Gobernu berria osatu ondoren, Nafarroako Lurraldearen Antolamendu Batzordeko eta Hirigintza Azpibatzordeko kideak berrituko dira.
Xedapen Indargabetzaile Bakarra
Honako xedapen hauek indargabetu dira:
a) Azaroaren 5eko 210/1987 Foru Dekretua, Nafarroako Hirigintza eta Ingurugiro Batzordearen antolaketa eta funtzionamenduaren Erregelamendua aldatu zuena.
b) Abenduaren 10eko 254/1987 Foru Dekretuaren 6, 7. eta 8. artikuluak. Dekretu horren bidez, lurraldearen antolamendu eta ingurugiro arloko eskurantzak Nafarroako Foru Komunitateko Administrazioaren organoen artean banatu ziren.
c) Otsailaren 16ko 50/1989 Foru Dekretua, Nafarroako Hirigintza eta Ingurugiro Batzordearen antolaketa eta funtzionamenduaren Erregelamendua aldatu zuena.
d) Azaroaren 25eko 524/1991 Foru Dekretua, Nafarroako Hirigintza eta Ingurugiro Batzordearen antolaketa eta funtzionamenduaren Erregelamenduaren 3. artikulua aldatu zuena.
e) Azaroaren 16ko 384/1992 Foru Dekretuaren 1. artikulua. Horren bidez, Ingurugiroaren Gaineko Eraginaren Ebaluazioaren inguruko eskurantzak esleitu zituen urriaren 6ko 245/1988 Foru Dekretua aldatu zen.
f) Irailaren 6ko 258/1993 Foru Dekretuaren 2. artikulua. Dekretu horren bidez, hirigintza planeamenduaren eratze eta kudeaketa errazteko neurriak ezarri ziren.
g) Otsailaren 14ko 37/1994 Foru Dekretua, hirigintza planeamenduaren eratze eta kudeaketa errazteko neurriak ezarri zituen irailaren 6ko 258/1993 Foru Dekretua aldatu zuena.
h) Foru Dekretu honetan ezarritakoari kontra egiten dioten lerrun bereko edo baxuagoko xedapen guztiak.
Azken Xedapen Bakarra
Foru Dekretu honek Nafarroako Aldizkari Ofizialean argitara eman eta biharamunean hartuko du indarra.
NAFARROAKO LURRALDEAREN ANTOLAMENDU BATZORDEAREN ANTOLAKETA ETA UNTZIMENDUARI BURUZKO ERREGELAMENDUA
I. TITULUA. IZAERA, ARAUBIDE JURIDIKOA ETA EGINKIZUNAK
1. artikulua
Lurraldearen Antolamendu Batzordea Nafarroako Foru Komunitateko Administrazioari lurraldearen antolamenduaren inguruko gaietan koordinazio eta aholkularitza eskaintzeko organoa da.
2. artikulua
Lurraldearen Antolamendu Batzordea, bere antolaketa eta funtzionamenduari dagokienez, Erregelamendu honetan xedatutakoari lotuko zaio eta, osagarri gisa, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Foru Legean xedatutakoari ere.
3. artikulua
Lurraldearen Antolamendu Batzordeak honako eginkizun hauek izanen ditu:
a) Lurraldearen Antolamenduko Jarraibideei buruzko txostena egitea, Nafarroako Gobernuak Nafarroako Parlamentura bidali aitzin.
b) Eskualdeko Arau Subsidiarioak behin‑betikoz onetsi aitzin, txostena egitea. Aginduzko txosten hau ez da loteslea izanen.
c) Udalez gaindiko Plan eta Proiektu Sektorialak behin‑behinekoz edo behin‑betikoz onetsi aitzin, txostena egitea. Aginduzko txosten hau ez da loteslea izanen.
d) Nafarroako Gobernuak edo Lurraldearen Antolamendu eta Ingurugiro kontseilariak hala eskatzen duen guztietan, aholku emateko txostena egitea; txosten horiek ez dira lotesleak izanen. Halaber, ez badira bat etortzen planeamendu proposamena eta uztailaren 4ko 10/1994 Foru Legearen 115. artikuluko 3. zenbakiko a) eta b) letretan aipatutako txostenak, batzordearen eginkizuna izanen da bat ez etortze horri buruz ebaztea; hori guztia, hala ere, ez da eragozpen izanen kasuan kasuko departamentuak Nafarroako Gobernuari arazo hori igor diezaion, hark ebatzi dezan.
e) 2.000 biztanle eskubidedun baino gehiagoko udalerrien Hiri Antolamenduko Plan Orokorrak eta Hirigintza Planeamenduko Arau Subsidiarioak behin‑betikoz onestea, baita 500 biztanle eskubidedun baino gehiago duten Iruñerriko udalerrietakoak ere. Eginkizun hau Hirigintza Azpibatzordearen esku utziko da.
f) Legez esleitzen zaizkion gainerako eskumenak erabiltzea.
II. TITULUA. ANTOLAKETA
I. KAPITULUA. Osaketa
4. artikulua
Aurreko artikuluaren e) letrak aipatzen dituen udal Planak behin‑betikoz onetsi behar diren kasuetan, Batzordeak, kide guztiak Osoko Bilkuran bildurik edo Hirigintza Azpibatzordearen bidez, ihardungo du.
5. artikulua
1. Batzordeko Osoko Bilkuraren partaide honako hauek izanen dira, hizpidea eta botoarekin:
a) Ingurugiro, Lurraldearen Antolamendu eta Etxebizitza Kontseilaria, Batzordeburu lanetan.
b) Lurraldearen Antolamendu eta Etxebizitza Zuzendari Nagusia, Batzordeburuorde lanetan.
c) Ingurugiro Zuzendari Nagusia, Toki Administrazioko Zuzendari Nagusia; Barne Zuzendari Nagusia; Kulturakoa; Herrilanekoa; Garraio eta Komunikazioetakoa; Nekazaritza, Abeltzaintza eta Landa Sustapenekoa; Industria eta Merkataritzakoa eta Turismokoa.
d) Nafarroako udaletako lau ordezkari, horietako bat Iruñeko Udalekoa eta beste hirurak Lurraldearen Antolamendu eta Ingurugiro Kontseilariak aukeratuak, Nafarroako Udalerri eta Kontzejuen Federazioak proposaturik. Ordezkari horiek Alkate edo Zinegotzi izan beharko dute, 6.1.c) artikuluan adierazitakoa deusetan galarazi gabe.
2. Aurreko horietaz gain, Osoko Bilkura horretako partaide honako hauek izan daitezke, hizpidea bai baina botorik gabe:
a) Estatuko Administrazioaren ordezkari bat, Gobernuak Nafarroako Foru Komunitatean duen Delegatuak aukeratua.
b) Euskalerriko Arkitektoen Elkargo Ofizialaren ordezkaria, Nafarroako Etxegile eta Sustatzaileen Elkartearen ordezkaria eta Nafarroako Merkataritza eta Industri Ganbara Ofizialaren ordezkaria.
c) Batzordeak edo Batzordeburuak bertaratzea eskatuta, gai horretan aditua den beste edozein.
3. Batzordeko Idazkari lanetan, hizpidea bai baina botorik gabe, Lurraldearen Antolamendu eta Ingurugiro Departamentuko Idazkari Teknikoa arituko da.
6. artikulua
1. Hirigintza Azpibatzordeko kideak honako hauek izanen dira, boto eta hizpidearekin:
a) Lurraldearen Antolamendu eta Etxebizitza Zuzendari Nagusia, batzordeburu lanetan.
b) Ingurugiro Zuzendari Nagusia; Toki Administrazioko Zuzendari Nagusia; Kulturakoa; Herrilan, Garraio eta Komunikazioetakoa; eta Industriakoa.
c) Udaletako bi ordezkari, Batzordeko Osoko Bilkuran Udalek dituzten ordezkarien artean, Udalek beraiek aukeratu beharrekoak.
Batzordekideek Batzordeko beste edozein udal ordezkariren esku delegatu ahalko du kasuan kasuko bileran agertzeko beharra. Azpibatzordean aritzeko aukeraturiko kideren bat Iruñeko Udalekoa bada, bere ordezkaritza delegatu ahalko dio, kasuan kasuko bilerarako, aukeratu ez den udal batzordekide bati edo horretarako propio izendaturiko ordezkari bati. Kasu horretan, ordezkariak Zinegotzi edo hirigintza Arloko Zuzendari izan beharko du.
2. Azpibatzordean, hizpidea bai baina botorik gabe, aurreko artikuluko 2. zenbakian aipatu batzordekideetatik bi aritu ahalko dira, Batzordearen Osoko Bilkurak aukeraturikoak.
3. Azpibatzordeko Idazkaria, hizpidea bai baina botorik gabe, Batzordeko Idazkaria izanen da.
7. artikulua
Osoko bilkuraren eta Azpibatzordearen konposizioa Nafarroako Gobernua aldatzearekin batera berrituko da, eta beti ere lau urtetan behin.
II. KAPITULUA. Batzordekideak eta horien eginkizunak
1. atala. Batzordeburua
8. artikulua
1. Osoko Bilkuraren Burua Lurraldearen Antolamendu Batzordeburua izanen da.
2. Hona hemen Batzordeburuaren eginkizunak:
a) Batzordearen ordezkari izatea, beharrezko den ekitaldietan.
b) Batzordearen bilkuretako deialdiak egin, horien buru izan eta amaitutzat ematea, legeak betearazi eta erabaki eta botazioak zilegizkoak direla bermatzea eta, arrazoizkoa den kasuetan, bilkurak bertan behera uztea.
c) Berdinketarik izanez gero, kalitatezko botoaren bidez erabakitzea.
d) Harturiko erabakiak baimentzea, sinadura bidez.
e) Batzordearen eskumenen barrenean dauden gaiak behar bezala lantzeko, bidezko diren barne arauak ematea.
f) Batzordeak burutu behar dituen prozeduren instrukzioa osatuagoa izan dadin, beharrezko jotzen dituen txosten eta agiriak eskatzea.
g) Erregelamendu honen arabera, beste organo batzuen gain propio utzi ez diren eginkizunak.
3. Hirigintza Azpibatzordeko Buruak aurreko zenbakiaren b), c), d), e), f) eta g) ataletan adierazitako eginkizunak izanen ditu bere gain, Azpibatzordeari dagokionean.
2. atala. Batzordeburuordea
9. artikulua
Batzordeburuordearen eginkizunak honako hauek dira:
a) Batzordeburua kanpoan, oporretan edo eri dagonean haren ordez aritzea.
b) Batzordeburuari bere eginkizunak betetzen laguntzea.
c) Batzordeburuak ematen dizkion eginkizunak betetzea.
d) Batzordeburua ordezten ez duenetan, kide gisa aritzea.
3. atala. Batzordekideak
10. artikulua
Batzordekideek honako eginkizun hauek izanen dituzte:
a) Eztabaidetan parte hartzea eta, boto‑eskubidea duten kideen kasuan, erabakiak hartzeko boto ematea.
b) Erabaki proposamenak, ahozko zuzenketak eta Batzordeak harturiko erabakiei buruzko boto partikularrak ematea, Erregelamendu honetan zehazturiko moduan.
11. artikulua
1. Batzordekideek izendapen pertsonalaren bidez erdietsi dute partaide izaera, beraz, beren ordezkapena eta botoa ez dizkiote beste inori esleitzen ahalko.
2. Aurreko artikuluan xedatutakoa gorabehera, Foru Komunitateko Administrazioko Zuzendari Nagusiren batek bilera batera joaterik ez duenean, kide titularrak berak zuzenean izendaturiko beste pertsona batek ordezkatu ahalko du, ordezko izaerarekin, behin‑behinekotasunez eta bilera horretarako soil‑soilik. Ordezko kideak ordezkapena kreditatu beharko du eta, beti ere, administrazio kategoriari dagokionean, Zerbitzuko Zuzendaria izan beharko du.
Halaber, Hirigintza Azpibatzordean Udalek dituzten ordezkariek kasuan kasuko bilerara joateko delegazioa Batzordeko Osoko Bilkuraren kide den beste edozein udal ordezkariren gain utzi ahalko dute. Azpibatzordean aritzeko izendaturiko kideren bat Iruñeko Udaleko ordezkaria baldin bada, bilerara joateko delegazioa ordezkari ez den beste udal batzordekideren gain utzi ahalko du edo bestela, horretarako propio izendaturiko Zinegotzi edo Hirigintza Arloko Zuzendari baten gain.
4. atala. Idazkaria
12. artikulua
1. Idazkariaren eginkizunak honakoak dira:
a) Batzordeburuak hala agindurik, Batzordearen Osoko Bilkura edo Hirigintza Azpibatzordearen bilkuretarako deialdiak eta gai‑zerrendak prestatu eta igortzea.
b) Osoko Bilkura edo Azpibatzordearen eztabaidetan parte hartzea, hizpidea bai baina botorik izan gabe, eta bilkuretako aktak idaztea.
c) Osoko Bilkuretan Batzordeburuari edo Azpibatzordeko Buruari laguntza ematea, horrek ematen dizkion zereginak betetzea eta Batzordearen aferei buruz, Batzordeburuak eskaturik, zuzenbidezko azalpenak ematea.
d) Administrazioaren fede publikoa ematea, harturiko erabakiak sinatu eta akta eta erabakietako ziurtagiriak luzatzea.
e) Batzordeak harturiko erabakiak jakinaraztea eta bete daitezen begiratzea, legeak dioenarekin bat.
f) Batzordearen akta liburuak idatzi eta antolatzea.
g) Antolamendu juridikoak esleitzen ahal dizkion bestelako eginkizunak.
2. Idazkaria kanpoan, oporretan edo eri dagoenean, horren eginkizunak Batzordeburuak hautatzen duen Lurraldearen Antolamendu eta Ingurugiro Departamentuko funtzionario batek hartuko ditu, Zuzenbidean Lizentziatua izan beharko duena.
III. TITULUA. BATZORDEAREN FUNTZIONAMENDUA
I. KAPITULUA. Bilkuren araubidea
13. artikulua
1. Osoko Bilkurak eta Hirigintza Azpibatzordeak Batzordeburuak deialdia egiten duen guztietan eginen dute ohizko bilkura. Batzordeko hiru kidek bederen eskatuta, Batzordeburuak bilkurarako deialdia egin beharko du nahitaez.
2. Hala ere, deia izan ez bada ere, hizpidea eta botoa duten kide guztiak baldin badaude eta eztabaidatu eta erabakiak hartzea aho batez erabakitzen badute, Osoko Bilkura edo Azpibatzordearen bilkura legez osatutzat hartuko da.
14. artikulua
Bileretarako deiak idatziz igorriko dira berrogeita zortzi ordu aurretik, bederen, eta bileraren eguneko gai zerrenda erantsiko zaie.
15. artikulua
1. Osoko Bilkura eta Azpibatzordea legez osatuta izan eta erabakiak hartu ahal izateko, lehen deialdian, hizpidea eta botoa duten kideen kopuruaren erdia gehi batek bertan egon beharko du.
2. Bigarren deialdia automatikoki eginen da, lehenbiziko deialdia hasteko finkaturiko ordutik hasita ordu erdiaren buruan, eta bertan erabakiak hartzen ahalko dira Batzordeburua eta hizpidea eta botoa duten hiru kide, bederen, bertan baldin badaude.
II. KAPITULUA. Espedienteak prestatu eta erabakiak hartzea
16. artikulua
1. Lurraldearen Antolamendu eta Ingurugiro Zuzendari Nagusiak erabakiak hartzeko proposamen orokorrak aurkeztuko ditu, deusetan galarazi gabe beste Departamentuek zuzenean eragiten dituzten gaiak aurkeztu eta horri buruzko erabakiak proposatzeko duten ahalmena, 18. artikuluan xedatutakoari jarraikiz.
2. Azpibatzordean, hirigintza planeamenduari buruzko gaien aurkezlea Lurraldearen Antolamendu eta Hirigintza Zerbitzuko Zuzendaria izanen da.
17. artikulua
1. Erabakiak bertaraturiko kideen arteko gehiengo soilaz hartuko dira.
2. Berdinketak Batzordeburuak ebatziko ditu kalitatezko botoaren bidez eta, halaber, bilkurak irauten duen bitartean, Erregelamendu honen 8. artikuluaren b) atalean zehaztu eginkizunak izanen ditu. Horrezaz gain, haren ekimenaz edo hizpidea eta botoa duten hiru kidek eskatuta, eguneko gai zerrendaren gairen bat bertatik kendu edo azterketa sakonagoa egiteko mahai gainean uztea ebatziko du.
18. artikulua
1. Aktak hurrengo bileran onetsiko dira.
2. Nolanahi ere den, bilkuran erabakitzen baldin bada harturiko erabaki baten behin‑betiko testua orduantxe idaztea, erabaki horrek bilera egunetik bertatik izanen du erabateko balio eta ondorio juridikoa.
19. artikulua
1. Hizpidea eta botoa duten kideek proposamenak idatziz egin ahalko dituzte, eta Batzordeburuak bilera egin aurretik behar den aurrerapenaz hartzen baditu, hurrengo bilkuraren eguneko gai zerrendan sartuko dira.
2. Hala ere, Batzordeburuak proposamena eguneko gai zerrendan sartzeari egoki irizten badio, Osoko Bilkurari edo, hala balitz, Azpibatzordeari horren berri eman beharko dio eta horrek bilera aurretik erabakiko du.
20. artikulua
1. Kide guztiek erabaki proposamenei ahozko zuzenketak egin ahalko dizkiete, gero Batzordean eztabaidatu eta, behar balitz, bozkatu ahalko direnak.
2. Hizpidea eta botoa dituen Batzordekideren bat gehiengoaren iritziaren alde ez badago eta hura erabakian bildu baldin bada, erabakiari idatzizko boto partikularra ematen ahal dio. Horrelakoetan, boto horren berri kasuan kasuko bileraren aktan jasoko da.
3. Halaber, Batzordearen Osoko Bilkurak edo, hala balitz, Azpibatzordeak igortzen diren mozioei buruz eztabaidatu beharko du, gai zerrendan ez izanagatik, beti ere hizpidea eta botoa duten hiru kidek, bederen, sinatu baldin badute.
21. artikulua
Hirigintza Azpibatzordeak harturiko erabakien aurka administrazioarekiko helegitea paratu ahalko da Nafarroako Gobernuan.
Lehen Xedapen Gehigarria
1. Nafarroako Lurraldearen Antolamendu Batzordearen osaketan egindako aldaketak eta Batzordekideen baldintza eta betekizunak Nafarroako Gobernuaren Foru Dekretuaren bidez ezarriko dira, Lurraldearen Antolamendu eta Ingurugiro Kontseilariak proposaturik.
2. Batzordeak barne egitura eta funtzionamendua egokia izateko behar diren erabakiak hartuko ditu, Erregelamendu honetan xedatutakoari jarraikiz.
Bigarren Xedapen Gehigarria
Lurraldearen Antolamendu Batzordea Lurraldearen Antolamendu eta Ingurugiro Departamentuari atxiki zaio. Departamentu honek Batzordeak hartu dituen eginkizunak behar bezala bete ditzan behar dituen giza baliabideak, materiala eta laguntza tekniko eta ekonomikoak emanen dizkio.
Horretarako, Departamentuaren aurrekontuetan eginkizun horiek aurrera eraman ahal izateko kontusailak aurrikusi beharko dira.
Azken Xedapen Bakarra
Lurraldearen Antolamendu eta Ingurugiro Kontseilariari ahalmena ematen zaio Erregelamendu hau aplikatu eta garatzeko behar diren xedapenak eman ditzan.
