navarra.es
Castellano | Euskara | Français | English
Ezagutzera eman
109/2007 Foru Agindua, apirilaren 16koa, Nekazaritza, Abeltzaintza eta Elikadura kontseilariak emana, nekazariak eta nekazaritzako langileak lehenago erretiratzeko laguntzei buruzko arauak ezartzen dituena, Landa Garapenerako 2007-2013 urteetarako...
109/2007 FORU AGINDUA, apirilaren 16koa, Nekazaritza, Abeltzaintza eta Elikadura kontseilariak emana, nekazariak eta nekazaritzako langileak lehenago erretiratzeko laguntzei buruzko arauak ezartzen dituena, Landa Garapenerako 2007-2013 urteetarako Programaren barruan
(Testu bateratua. Jatorrizkoa 2007ko 61. NAOn argitaratua. maiatzaren 16an. Aldaketak: 461/2009 Foru Agindua, irailaren 14koa)
Atarikoa
Nafarroako Foru Komunitatea, bere foru araubideari esker, eskumen osoaren titularra da nekazaritza eta abeltzaintza gaietan, ekonomiaren antolamendu orokorraren arabera, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 50.1.a) artikuluak onartzen duenez.
Nafarroako Foru Eraentza Berrezarri eta Hobetzeari buruzko Lege Organikoaren 56.1.a) artikuluan xedaturikoaren arabera, orotariko ekonomiaren oinarriekin eta haren antolaketarekin bat, Nafarroako Foru Komunitateari dagokio erabateko eskumena Nafarroaren barruan jarduera ekonomikoa planifikatu eta garapen ekonomikoa sustatzeko.
Kontseiluaren 2005eko irailaren 20ko 1698/2005 Erregelamenduak, Nekazaritza aldeen garapenerako Nekazaritzaren Europako Funtsa-FEADERen bitartez kudeatzen diren nekazaritzaren garapenerako laguntzei buruzkoa baita, neurri bat ezartzen du nekazariak eta nekazaritzako langileak lehenago erretiratzeko.
Nafarroako Landa Garapenerako programak neurri horiek barne hartzen ditu 2007-2013 urteetarako. Neurri horiek zehazterakoan Nafarroako Nekazaritzarako Plan Estrategikoko jarraibideak hartu dira kontuan, gehienbat honakoari dagokionean: 1. ardatza, L.1.1 jarduketa lerroa "Belaunaldi aldaketarako eta giza baliabideak benetan sartzeko laguntzak, lehenago erretiratzeko laguntza barne".
Foru agindu hau urriaren 2ko 67/2006 Foru Dekretuaren azken xedapenetako bigarrenaren babesean eman da. Dekretu horretan, Nekazaritza Bermatzeko Europako Funtsa-FEAGAren eta Nekazaritza Aldeen Garapenerako Nekazaritzaren Europako Funtsa-FEADERren bidez finantzatzen diren gastuak Nafarroako Foru Komunitatean ordaintzen dituen erakundea onetsi eta horren antolamendua eta funtzionamendua ezarri zen. Dekretuaren azken xedapenetako bigarrenak baimena eman zion Nekazaritza, Abeltzaintza eta Elikadura kontseilariari, bere eskumenen barruan, behar diren xedapen guztiak emateko foru dekretua garatu eta betearazteko, bereziki, nekazaritzarako Europako funtsekin osorik edo hein batean finantzatzen diren dirulaguntzei buruzko arauak ezartzeko.
Foru agindu honen bidez arautzen diren neurriei Nekazaritza, Abeltzaintza eta Elikadura kontseilariak otsailaren 8an eman 30/2007 Foru Agindua aplikatzekoa zaie. Agindu horren bidez FEADERek kofinantzatzen dituen nekazaritza aldeen garapenerako laguntzak kudeatzeko prozedura ezarri zen.
Nafarroako Gobernuak, 2007ko martxoaren 6ko Erabakiaren bidez, "lehenago erretiratzeko" neurrirako banakako ebaluazioko araubideko laguntzak baimendu zituen.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz, agindu dut:
1. artikulua. Xedea.
Foru agindu honen xedea nekazariak eta nekazaritzako langileak lehenago erretiratzeko laguntzak ezartzea da, Nafarroako Landa Garapenerako 2007-2013 urteetarako Programaren barruan, Kontseiluak irailaren 20an eman 1698/2005 EE Erregelamenduaren 23. artikuluaren arabera. Erregelamendu horren bidez landa garapenerako laguntza ezarri zen, Landa Garapenerako Nekazaritzaren Europako Funtsa-FEADERen bidez.
2. artikulua. Definizioak.
Foru Agindu honen ondorioetarako, Europar Batasuneko araudian eta Nekazaritzako Ustiategien Erregistroari buruzko Foru Legearen Testu Bateginean, uztailaren 2ko 150/2002 Legegintzako Foru Dekretuak onetsian, bildutako definizioez gain, honako hauek aplikatuko dira:
1. Mendialdeak eta eskualde behartsuak: Nekazaritza, Abeltzaintza eta Elikadura kontseilariak 2002ko maiatzaren 15ean eman Foru Aginduan aipatzen direnak.
2. "Lagatzailea": bizilekua eta ustiategia Nafarroan dituen eta helburu komertzialeko jarduera guztiak behin lagatzen dituen nekazaria.
3. "Langileak": nekazariari laguntzen dioten familikideak eta lagatzaileak ustiategia laga baino lehen bertan zeuden soldatadunak.
4. "Nekazaritzako lagapen-hartzailea": Nafarroan bizilekua duen eta lagatzailearen ordez ustiategia bere esku hartzen duen pertsona fisikoa edo, Nafarroako ustiategi baten titularra izanik, bere ustiategia zabaltzeko, partez nahiz osorik beretzen dituena lagatako lurrak.
3. artikulua. Onuradunak.
Foru agindu honetan aurreikusitako laguntzak honako hauek jasoko dituzte:
a) Nekazaritzako jarduera utzi eta haren ustiapena beste nekazariei lagatu nahi dieten nekazariak.
b) Nekazaritzako lana, haren ustiapena lagatu eta gero, behin betiko utzi nahi duten nekazaritzako langileak.
4. artikulua. Lagatzaileen betebeharrak.
Laguntzak hartu ahal izateko, nekazaritzako lagatzaileek betebehar hauek izanen dituzte:
a) Nafarroan edukitzea bizilekua eta Nafarroan dagoen nekazaritza ustiategi baten titular izatea, Nafarroako Nekazaritza Ustiategien Erregistroan inskribitua.
b) Berrogeita hamabost urte beterik edukitzea eta hirurogeita bost urte beteak ez izatea.
c) Eskaera egin aurreko hamar urteetan nekazaritza jardueran aritua izatea, ogibide nagusiko nekazari gisa aritu ere azken bost urteetatik gutxienez hirutan, azken ekitaldia barne dela.
Eskaeraren aurreko hamar urte horietan lagatzaileak kidetua egon behar zuen Gizarte Segurantzako Nekazarien Araubide Berezian bere kontura ari den langile bezala edo langile autonomoen Araubide Berezian, bere nekazaritza jardueragatik. Kidetu dela egiaztatuta, ulertuko da nekazaritzako jarduera burutzen dela kideturik dagoen bitartean.
d) Gizarte Segurantzako edozein araubidetan kotizatutakoa izatea, hirurogeita bost urte betetzean gutxienez hamabost urteko kotizazioa osatzeko bezain luzaro.
e) Eginbehar fiskalak eta Gizarte Segurantzarekikoak bete izana.
5. artikulua. Langileen betebeharrak.
Onuradun izateko, langileak behin betiko utzi beharko du nekazaritza jarduera oro eta laguntza eskatzen duen denboran honako baldintzak bete:
a) Berrogeita hamabost urte beterik edukitzea eta hirurogeita bost urte beteak ez izatea.
b) Lana utzi aurreko bost urteetan gutxienez bere lan denboraren erdia nekazaritzan emana izatea, dela familiako langile gisa dela soldatadun gisa.
Nekazaritzan aritu den epe horretan langileak kidetua egon behar zuen Gizarte Segurantzako Nekazarien Araubide Berezian bere kontura ari den langile bezala edo langile autonomoen Araubide Berezian, bere nekazaritza jardueragatik. Kidetu dela egiaztatuta, ulertuko da nekazaritzako jarduera burutzen dela kideturik dagoen bitartean.
c) Gizarte Segurantzako Nekazarien Araubide Berezian kidetua egotea eta hirurogeita bost urte betetzean gutxienez hamabost urteko kotizazioa osatzeko moduko epean bertan kotizatutakoa izatea. Horietatik azken bost urteek jarraikoak beharko dute. Kotizazioak ordainduak izatea eta bere eginbehar fiskalak beteak.
d) Lagatzailearen ustiategian lan egitea eta hori gutxienez lanaldi osoko bi urte adinako denboran, lagatzailearen lehenagoko erretiroaren aurreko lau urteetan.
6. artikulua. Lagapen-hartzailea.
Lagapen-hartzaileak pertsona fisikoa beharko du izan eta ondoko baldintzak bete:
a) Hasten den nekazari gaztea izatea.
b) Ogibide nagusiagatik nekazaria izatea, berrogeita bost urte baino gutxiagokoa. Lagatzaileak lagatako nekazaritzako ustiategia hartzen du, horrela handitzeko berea den ustiategia. Azken horren titular izan beharko du eskaera egin aurreko urtetik, gutxienez ere.
7. artikulua. Konpromisoak.
1. Lagatzailearen konpromisoak:
a) Hartzaile bati edo batzuei osorik eskualdatzea ustiategia, eta horretan barna lurra, azienda, mahastien eskubideak, esne kuota, abeltzaintzako primen eskubideak edo bestelako edozein, merkatuko antolakunde bateratuek, Nafarroakoek zein beste autonomia erkidegoetakoek, arautuak.
b) Helburu komertzialeko nekazaritzako jarduera oro behin betiko uztea. Zilegi izanen du, hala ere, zenbait eraikin erabiltzen segitzea eta nekazaritza ez komertzialean aritzea, Batasunaren nekazaritza politikatik dirulaguntzarik izan gabe.
c) Xede bera duten bestelako dirulaguntza publikoak eskatu edo jaso baditu, edo foru agindu honen 17.2 artikuluak aipatzen dituen pentsioetako edozein jaso badu, horren berri ematea Nekazaritza, Abeltzaintza eta Elikadura Departamentuari.
d) Foru agindu honetan arautzen diren laguntzak hartzen diren epean, hartzaileen egoera Gizarte Segurantzan tokatzen zaien araubidean kideturik baleude bezalakoa izanen da eta beraz kotizatu beharra izanen dute.
2. Lagapen-hartzailearen konpromisoak
a) Ustiategianogibide nagusi gisa nekazaritzan aritzea eskualdatu denetik gutxienez bost urtez eta, epe gutxieneko horretan, lagatzailearen lurren jabetza ez eskualdatu eta ez alokatu, apartzerian eman edo nola ere den inori uztea.
b) Epe horretan ez eskualdatzea lagatzaileak aldez aurretik eskualdatu zizkion produkzio eskubide edo kuotak.
c) Nekazari gazteen kasuan, Gizarte Segurantzan kidetzea nekazaritzan aritzeagatik eta ustiategi berria Nafarroako Nekazaritzako Ustiategien Erregistroan inskribitzea, lehenbiziko instalazioa egin eta gero.
3. Langilearen konpromisoak:
a) Nekazaritzako langileak behin betiko utzi beharko du nekazaritzan burutzen duen lan eta lanbide jarduera oro.
b) Foru agindu honetan arautzen diren laguntzak hartzen diren epean, haren egoera Gizarte Segurantzan tokatzen zaion araubidean kideturik balego bezalakoa izanen da eta beraz kotizatu beharra izanen du.
4. Lagatzaileen, lagapen-hartzaileen eta langileen konpromisoak, oro har.
a) Behar diren kontrolak onartzea eta Nekazaritza, Abeltzaintza eta Elikadura Departamentuari bide ematea eskatzen zaion adina ikuskatze, datu, eta irizpen gaiak egiteko, espedientea tramitatu eta hartutako konpromisoak benetan gauzatu dela eta bete direla egiaztatu ahal izateko.
b) Lagatutako ustiategiko teknika, ekonomia, lan eta gizarte arloetako kontuei buruz behar diren argibideak ematea, baita neurri honen esparruan harturiko laguntzei buruz ere, haren jarraipena eta ebaluazioa bideratzeko adierazleak prestatzeko.
8. artikulua. Eskualdaketaren baldintzak.
1. Zilegi izanen da zuhaitz landaketako azalera ez kontatzea ustiategiaren nekazaritza azaleran.
2. Ustiategiaren araubidea zein den, honela eginen da ustiategia eskualdatu:
a) Lagatzaileak bere duen azalera jabetzan edo alokairuan eta gutxienez hamar urtetarako eskualdatuko da, non eta artikulu honen 1. ataleko salbu-kasua gertatzen ez den.
b) Lagatzailea alokatzailea bada, zilegi izanen du jabeari lur librea eskualdatzea, betiere alokairua eten eta lagapen-hartzaileari lotutako baldintzak betetzen badira eta bai foru agindu honetan arautzen diren beste baldintzak ere.
c) Lagatzailearena ez den ustiategi zatia alokairuan edo antzeko modu batean eskualdatzen bazaie jabea ez beste lagapen-hartzaile batzuei, jabearen adostasuna frogatzeko agiria aurkeztu beharko da. Jabearen adostasuna jaso ezean, lagatzaileak hautsi beharko ditu jabearekin dituen kontratuak.
d) Jabetzan egiten den eskualdaketa eskritura publikoan eginen da eta kasuko erregistroan erregistratuko. Alokairuan egiten den eskualdaketa Nafarroako Lur Alokairuen Erregistro Berezian erregistratuko da.
3. Ez dute eskubiderik izanen Foru Agindu honetan ezartzen diren laguntzak hartzeko ezkontideen arteko eskualdaketek.
4. Lagatzailearen eta lagapen-hartzailearen artean lehen edo bigarren graduko ahaidetasuna badago, jabetzan eskualdatu beharko da gutxienez lagatzailearen familiarenak diren hektarea tipoen %60. Ustiategiko gainerako azalera zilegi izanen da gutxienez hamabost urteko alokairuan edo usufruktuan eskualdatzea.
5. Lagatzailearen ustiategian mahasti azalerarik badago edo mahatsa birlandatzeko eskubiderik, bai batzuk eta bai besteak kasuko erregistroetan inskribituko dira lagapen-hartzailearen izenean.
9. artikulua. Laguntzen mota eta zenbatekoa.
1. Nekazariak eta nekazaritzako langileak lehenago erretiratzeko laguntzak behin bakarrik emanen dira, urteko prima finkoaren moduan eta gehienez ere hamar urterako. Prima hori ez da eguneratuko.
2. Lagatzaileendako urteko prima 12.000 eurokoa izanen da eta mantenduko da ustiategia eskualdatzen denetik onuradunak hirurogeita bost urte bete arte edo foru agindu honen 17.2 artikuluan biltzen diren egoeretako bat gertatu arte.
Ustiategi bat hainbat lagatzailek eskualdatzen dutenean, lehenago erretiratzeko laguntza osoa izanen da lagatzaile batentzat ezarritako zenbatekoa, ez gehiago.
3. Nekazaritza jardueratik lehenago erretiratzen diren langileentzako laguntza izanen da urteroko 4.000 euroko kalteordaina, hirurogeita bost urte bete arte edo foru agindu honen 17.2 artikuluak biltzen dituen egoeretako bat gertatu arte.
Gehienez ere ustiategiko bi kalteordain emanen dira.
4. Urte osagabeak kontatzeko, kalkulatu prima zenbatekoa den eguneko (prima/365), eta egun kopuruaz biderkatuko da.
10. artikulua. Laguntzen mugak.
Administrazio Publiko batek edo Gizarte Segurantzak aldian-aldiko prestazio bat ordaintzen badiote lagatzaileari, aldi baterako ezintasuna, ezintasun iraunkorra edo bestelako egoerak gertatzeagatik, foru agindu honen 17.2 artikuluan biltzen ez badira, lehenago erretiratzeko jaso behar dituen laguntzetatik kenduko dira prestazio horiek.
11. artikulua. Dirulaguntza emateko modua.
Nekazariak eta nekazaritzako langileak lehenago erretiratzeko laguntzak bananako ebaluazioko prozeduraren bidez emanen dira.
12. artikulua. Eskatutako betebeharrak frogatzeko modua.
1. Eskatzaileari eskatutako betebeharrak frogatzeko, eskaerarekin batera agiri hauek aurkeztuko dira:
a) NANaren fotokopia.
b) Laguntzak tramitatzeko Nekazaritza, Abeltzaintza eta Elikadura Departamentuan eta Ingurumen, Lurraldearen Antolamendu eta Etxebizitza Departamentuan dauden datu baseak kontsultatzeko baimena.
c) Gizarte Segurantzarekiko eginbeharrak eta zerga arlokoak beterik daudela egiaztatzeko baimena.
d) Erroldatze agiria, dagokion udalak emana, Nafarroan bizi dela egiaztatzeko.
e) Jabetza erregistroaren ziurtagiria, eskriturak edo zuzenbidearen arabera onargarria den beste edozein agiri, eskualdatu nahi den finken jabetza frogatzeko.
f) Landa Errentamenduen Erregistrokoan diren errentamenduen kontratuak, Udalaren ziurtagiria, herrilurrak esleituz gero edo eskualdatu beharreko lurzatiak, lagatzailearenak ez direnak, ustiatzeko eskubidea frogatzen duten bestelako agiriak.
g) Dirulaguntzei buruzko azaroaren 9ko 11/2005 Foru Legean onuradun izateko ezarritako ezein debekutan ez dagoela dioen ardurapeko adierazpena.
h) Eskatzaileak laguntzak lehenbizikoz hartu behar dituenean edo laguntzak kobratzeko kontua aldatu nahi duenean, laguntzaren eskaerarekin batera transferentzia bidez kobratzeko eskaera aurkeztu beharko du, behar bezala beterik.
i) Erantzukizunpeko adierazpena, xede bererako beste edozein laguntza eskatu edo jaso izanari buruzkoa.
2. Lagapen-hartzaileari eskatutako betebeharrak frogatzeko, eskaerarekin batera agiri hauek aurkeztuko dira:
a) NANaren fotokopia.
b) Laguntzak tramitatzeko Nekazaritza, Abeltzaintza eta Elikadura Departamentuan eta Ingurumen, Lurraldearen Antolamendu eta Etxebizitza Departamentuan dauden datu baseak kontsultatzeko baimena.
c) Gizarte Segurantzarekiko eginbeharrak eta zerga arlokoak beterik daudela egiaztatzeko baimena.
3. Langileari eskatutako betebeharrak frogatzeko, eskaerarekin batera agiri hauek aurkeztuko dira:
a) NANaren fotokopia.
b) Laguntzak tramitatzeko Nekazaritza, Abeltzaintza eta Elikadura Departamentuan dauden datu baseak kontsultatzeko baimena.
c) Gizarte Segurantzarekiko eginbeharrak eta zerga arlokoak beterik daudela egiaztatzeko baimena.
d) Dirulaguntzei buruzko azaroaren 9ko 11/2005 Foru Legean onuradun izateko ezarritako ezein debekutan ez dagoela dioen ardurapeko adierazpena.
e) Eskatzaileak laguntzak lehenbizikoz hartu behar dituenean edo laguntzak kobratzeko kontua aldatu nahi duenean, laguntzaren eskaerarekin batera transferentzia bidez kobratzeko eskaera aurkeztu beharko du, behar bezala beterik.
f) Erantzukizunpeko adierazpena, xede bererako beste edozein laguntza eskatu edo jaso izanari buruzkoa.
4. Laguntzen eskaera aurkeztuz gero, esan nahi du onuradunek eta lagatzaileak foru agindu honen 7. artikuluan ezarririko konpromisoak onartzen dituztela.
13. artikulua. Eskaerak aurkeztu, tramitatu eta ebaztea.
1. Foru agindu honetan aipatzen diren laguntzen eskaerak Nekazaritza, Abeltzaintza eta Elikadura Departamentuko Erregistroan, Nafarroako Gobernuko beste erregistroetan edo Administrazio Publikoen Araubide Juridikoari eta Guztientzako Administrazio Prozedurari buruzko azaroaren 26ko 30/1992 Legearen 38.4 artikuluan, urtarrilaren 13ko 4/1999 Legeak aldatu baitzuen, adierazitako tokietan aurkezten ahalko dituzte interesdunek.
2. Zilegi izanen da eskaerak kasuko aurrekontu ekitaldiak irauten duen guztian aurkeztea. Nolanahi ere, ustiategiaren eskualdaketa bukatu aurretik aurkeztuko dira.
3. Laguntzen eskaerak eredu normalizatuetan aurkeztuko dira. Eredu horiek Nekazaritza, Abeltzaintza eta Elikadura Departamentuko Erregistroan, nekazaritza bulegoetan eta Nafarroako Gobernuaren www.navarra.es webguneko atariko zerbitzuen katalogoan eskuratzen ahal dira.
4. Eskaerak harturik, eskatzen diren agiri guztiak ote dauden egiaztatuko da. Bestela, interesdunari eskatuko zaio haiek osatzeko, gehienez ere hogeita hamar eguneko epean, eta ohartaraziko, hala egin ezean, eskaera bertan behera uzten duela ulertuko dela eta artxibatzeko ebazpena eman eta jakinaraziko zaiola.
5. Eskaera osorik egon ondoren, egiaztatuko da eskatzen diren betebeharrak betetzen dituela. Horretarako behar diren kontrolak eginen dira. Gero, ebaluatu eginen dira. Laguntzaren zenbatekoa onuradun motaren arabera zehaztuko da.
6. Ebaluazioa bukaturik, kudeaketa unitateak laguntza emateko ebazpen proposamena aurkeztuko du, non eskatzaileak bete beharreko baldintza eta betebeharrak zehaztuko baitira. Interesdunari sei hilabeteko epean jakinaraziko zaio, eskaera aurkezten duenetik hasita. Epe hori iragan eta ebazpena jakinarazi ez bada, interesdunak zilegi izanen du eskaera ukatu dela ulertzea.
Organo eskudunak argibideak eta agiri osagarriak eskatuz gero, epea eten eginen da, errekerimenduaren jakinarazpenetik hasi eta dagokionak eskatutakoa betetzen duen arte, edo, bestela, ematen den epea bukatu bitarte.
7. Dirulaguntzak emateko ebazpenean onuradunari ezartzen zaizkion baldintzak eta bete beharrekoak izanen dira, besteak beste, lagatzaileak lagapen-hartzaileei ustiategia eskualdatzeko gehieneko epeari buruzkoak; epe hori ez da sei hilabetekoa baino luzeagoa, laguntzak ematen diren egunetik hasita. Kasu berezietan, Nekazaritza, Abeltzaintza eta Elikadura Departamentuak luzapen bat ematen ahal du, arrazoitutako eskaera aldez aurretik eginez gero betiere.
8. Ebazpenaren aurka bidezko izanen da gora jotzeko errekurtsoa paratzea, Nekazaritza, Abeltzaintza eta Elikadura kontseilariari igorria, jakinarazi eta biharamunetik hilabeteko epean.
14. artikulua. Laguntzen ordainketa.
1. Urteko prima 12 hilekotan ordainduko da. Lehenbiziko ordainketa ustiategia lagapen-hartzaileei eskualdatu zaiela zertifikatu ondoren eginen da.
2. Nekazaritzako Elikagai Industrien eta Nekazaritzako Ustiategien Zerbitzuak behar adina kontrol eginen ditu onuradunak hartutako konpromisoak betetzen direla egiaztatzeko. Kontrolen emaitzak ikusirik, bidezko diren ordainketak baimendu eta dirulaguntzen ordainketaren gaineko ebazpen proposamena prestatuko du.
15. artikulua. Ez-betetzeen mailakatzea, murrizketak eta salbuespenak.
1. Espediente egoki baten bidez egiaztatzen bada onuradunak nahita gezurrezko adierazpen bat egin duela, onarturiko laguntzak indargabetu, eta haiengatik pagaturiko zenbateko guztiak berreskuratuko dira. Gainera, onuraduna neurri horretarako laguntzetatik baztertuko da, ekitaldi horretan eta hurrengoan, Diru-laguntzei buruzko azaroaren 9ko 11/2005 Foru Legean ezarririko zehapenak deusetan galarazi gabe.
2. Lagatzaileak 7. artikuluko 1. eta 4. idatz-zatietan ezarritako konpromisoak betetzen ez baditu, laguntzak itzuli beharko dira.
Horri dagokionez, lagapen-hartzailearen ukoa, desagerpena edo beste arrazoi bat dela kausa, lagatzaileak errentan utzi edo eskualdatu dituen lurrak jaso eta lagapen-hartzaile izateko baldintzak betetzen dituen beste pertsona bati eskualdatzen badizkio, eskualdaketa hori ez da ez-betetzetzat hartuko.
Lagatzaileak Landa Garapeneko eta Ingurumeneko Departamentuari jakinarazi beharko dio lurrak berreskuratu dituela eta justifikatu beharko du beste lagapen-hartzaile bati eskualdatu dizkiola.
Lagatzailea Nafarroako Nekazaritza Ustiategien Erregistroan ofizioz egindako inskripzio baten bidez inskribatua baldin badago, ez da penalizaziorik izanen, betiere lagatzailea ez bada merkataritza helburuekin aritzen nekazaritza jardueran.
3. Nekazaritzako langileak 7. artikuluko 3. eta 4. idatz-zatietan ezarritako konpromisoak betetzen ez baditu, laguntzak itzuli beharko dira.
4. Lagatzaileak 7. artikuluko 2. eta 4. idatz-zatietan ezarritako konpromisoak betetzen ez baditu, arau hauek aplikatuko dira:
a) Eskualdaketa egiten denetik hasi eta hurrengo bost urteetan gutxienez, ustiategia nekazaritza jardueretarako erabiltzeko konpromisoa betetzen ez bada, lagatzaileak laguntzak galduko ditu, neurria kudeatzen duen unitateak ez-betetzea gertatu dela egiaztatzen duen egunetik.
b) Eskualdaketa egiten denetik hasi eta hurrengo bost urteetan gutxienez, ustiategian nekazaritzan aritu eta ogibide nagusia nekazaritza izateko konpromisoa betetzen ez bada, lagatzaileak laguntzak galduko ditu, neurria kudeatzen duen unitateak ez-betetzea gertatu dela egiaztatzen duen egunetik.
Ogibide nagusia nekazaritza izateari eskualdaketa egin eta hiru urte igaro ondoren uzten bazaio, ez da konpromisoaren ez-betetzetzat hartuko.
Ogibide nagusia nekazaritza izateari nekazaritzaren ondoriozko diru-sarrerak murrizteagatik uzten bazaio, ez da konpromisoaren ez-betetzetzat hartuko, betiere ekoizpenerako baliabideak (hektareak edo AzLUak) edo ustiategiaren egiturazko baliabideak murriztu ez badira.
c) Eskualdaketa egiten denetik bost urte igaro arte gutxienez, lagatzen diren lurrak, eskubideak edo kuotak ez eskualdatzeko konpromisoa betetzen ez bada, lagatzaileak laguntzak galduko ditu, neurria kudeatzen duen unitateak ez-betetzea gertatu dela egiaztatzen duen egunetik.
Eskualdaketa lagapen-hartzailea izateko baldintzak betetzen dituen pertsona bati egiten bazaio edo lagatzen diren lurrak, eskubideak edo kuotak ez badira lagatzaileak guztira eskualdatutakoaren %20 baino gehiago, ez da konpromisoaren ez-betetzetzat hartuko.
d) Lagatzaile batek, laguntza emateko ebazpenaren ondotik, aukeratzen badu nortasun juridikoa duen entitate bat sortzea edo horrelako batean sartzea bere ustiategi osoa edo zati bat ekarriz, eta horren barnean lagatzaileak eskualdatutako zatia baldin badago, ez da konpromisoaren ez-betetzetzat hartuko, lagapen-hartzaileak entitatean duen partaidetzak eskubidea ematen badio titularkide izateko eta enpresa kudeaketari buruzko erabakiak hartzeko
16. artikulua. Onuradunen betebeharrak.
Foru agindu honetan aurreikusten diren laguntzen onuradunek ondokoa bete behar dute:
a) Eman eta hartutako dirulaguntzak direla eta, Nekazaritza, Abeltzaintza eta Elikadura Departamentuak egiten dituen egiaztapen ekintzak oro onartzea.
b) Helburu bereko beste dirulaguntza publiko batzuk eskatu edo jaso izanaren berri ematea Nekazaritza, Abeltzaintza eta Elikadura Departamentuari.
17. artikulua. Bateraezintasunak.
1. Foru Agindu honetan ezartzen diren laguntzak bateraezinak dira nekazaritzako jarduerarekin lotutako zuzeneko gainerako edozein laguntzarekin, edo jarduera horiek diruz laguntzeko xede dutenekin, salbu eta Nekazaritza, Abeltzaintza eta Elikadura Departamentuko dirulaguntza jaso dezaketen pentsio planak.
2. Foru Agindu honetan ezartzen diren laguntzak bateraezinak dira onuraduna erretiroko nahiz erabateko ezintasun iraunkorreko edo ezintasun handiko pentsiodun izatearekin.
18. artikulua. Itzulketak, arau-hausteak eta zehapenak.
1. Foru agindu honetan aipatzen diren laguntzei buruzko itzulketak, arau-hausteak eta zehapenak, Europar Batasuneko arautegian xedaturikoa galarazi gabe, Dirulaguntzei buruzko azaroaren 9ko 11/2005 Foru Legean xedaturikoarekin bat etorriko dira.
2. Arau-hausteak zehazteko eta zehapenak ezartzeko zehapen prozedura administratiboa abenduaren 9ko 369/1997 Foru Dekretuan ezarritakoa izanen da, haren bidez onetsi baitzen nekazaritza, abeltzaintza eta elikadura arloetako zehapenak jartzeko administrazio prozedura.
19. artikulua. Emandako dirulaguntzen publizitatea.
Emandako dirulaguntzak argitaratuko dira Dirulaguntzei buruzko azaroaren 9ko 11/2005 Foru Legea garatzen duen arautegian ezarritako moduan.
Lehen Xedapen Gehigarria. 2007ko urtarrilaren 1a baino lehen aurkeztutako eskaerak.
1. Ekainaren 19ko 227/2000 Foru Dekretuaren babesean 2007ko urtarrilaren 1a baino lehen aurkezturiko eskaerak, egun horretan ebazpenik jaso ez badute, foru agindu honetan arautzen diren laguntzen xede ezin izan badira, ezetsi eta artxibatuko dira. Dekretu hartan nekazaritza-abeltzaintza lanetik muga baino lehen gelditzeko laguntzak arautzen ziren, Nafarroako nekazaritza garatzeko 2000-2006 programaren esparruan.
2. Ekainaren 19ko 227/2000 Foru Dekretuaren arabera nekazaritza jarduera uzteko laguntzak dituzten onuradunek aipatu foru dekretuan ezarritakoari jarraikiz jasoko dituzte.
Bigarren Xedapen Gehigarria. Aurrekontuko kredituak.
Foru agindu honen aplikazioak dakartzan gastuak Nafarroako Aurrekontu Orokorretako "Nekazaritza jarduera aldez aurretik uztea PDR (FEADER)" izeneko kontusailaren kargura ordainduko dira.
Hirugarren Xedapen Gehigarria
Foru agindu honetan xedaturikoa aplikatu ahal izateko, Europako Batzordeak Nafarroako Foru Komunitateko Landa Garapenerako 2007-2013 urteetarako Programako "Nekazariak eta nekazaritzako langileak lehenago erretiratzea" izeneko neurria onetsi beharko du. Europako Batzordearen eskakizunak aintzakotzat hartzeko neurri horretan egin beharreko edozein aldaketak, foru agindu honetako laguntzei buruzko arauen egokitzapena ekarriko du.
Xedapen Indargabetzaile Bakarra. Arau indargabetuak.
Indarrik gabe geldituko dira foru agindu honetan ezarritakoari aurka egiten dioten maila bereko edo beheragoko xedapen guztiak. Hain zuzen ere, indarrik gabe geratzen da Nekazaritza, Abeltzaintza eta Elikadura kontseilariaren irailaren 25eko foru agindua. Haren bidez ezartzen ziren eskaera eredua eta aurkeztu beharreko agiriak eta hainbat alderdi zehazten ziren, ekainaren 19ko 227/2000 Foru Dekretuan nekazaritza aldez aurretik uzteko laguntzei buruzkoak. Nafarroako Foru Eraentza Berrezarri eta Hobetzeari buruzko Lege Organikoaren
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
