navarra.es
Castellano | Euskara | Français | English
Ezagutzera eman
Foru Agindua, 2000ko uztailaren 3koa, Nekazaritza, Abeltzaintza eta Elikadura kontseilariak emana. "Tuterako Orburua" delako Adierazpen Geografiko Babestuaren Erregelamendua onesten du, zeina aldi baterakoa izanen baita, Europako Komunitatearen ...
FORU AGINDUA, 2000ko uztailaren 3koa, Nekazaritza, Abeltzaintza eta Elikadura kontseilariak emana. "Tuterako Orburua" delako Adierazpen Geografiko Babestuaren Erregelamendua onesten du, zeina aldi baterakoa izanen baita, Europako Komunitatearen 2081/92 (EEE) Erregelamenduko 5.5. artikuluak agindu bezala
(Testu bateratua. Jatorrizkoa 108. NAOn argitaratua, irailaren 6an. Aldaketak: 2001eko martxoaren 19ko Foru Agindua)
Atarikoa
Tuterako Orburu Hazitzaileen Elkartea eta enpresaburu talde batek eskatu dute "Tuterako Orburua" delako Adierazpen Geografiko Babestua inskribatzea Europako Elkartearen Jatorrizko Izendapen Babestuen eta Adierazpen Geografiko Babestuen Erregistroan.
Nekazaritzako Elikagai Industrien eta Elikaduraren Zerbitzuak txostena eman du, zeinak aditzera ematen baitu espedienteak Kontseiluaren uztailaren 14ko 208/92 (EEE) Erregelamenduak agintzen dituen pauso guztiak bete dituela (nekazaritzako produktuen eta elikagaien adierazpen eta jatorrizko deiturak babestu beharrari buruzkoa) eta bai urriaren 22ko 1643/1999 Errege Dekretuak agintzen dituenak ere (arautzen du zer prozeduraren bidez tramitatuko diren Europako Elkartearen Jatorrizko Deitura Babestuen eta Adierazpen Geografiko Babestuen Europako Erregistroan inskribatzeko eskaerak). Dagoeneko jakinarazi du Nekazaritza, Arrantza eta Elikadura Ministerioak eskaera Europako Batzordera bidali duela; bidezko da, beraz, Adierazpen Geografiko Babestuari 2081/92 (EEE) Erregelamenduko 5.5. artikuluak agintzen duen babes nazional aldi baterakoa ematea.
Hori horrela, eta Nafarroako Foru Komunitatearen Gobernua eta Administrazioa Arautzeari buruzko apirilaren 11ko 23/1983 Foru Legeko 36.2 b) artikuluak ematen dizkidan ahalmenak erabiliz, agindu dut:
Artikulu Bakarra
Onestea "Tuterako Orburua" delako Adierazpen Geografiko Babestuaren Erregelamendua, zeina aldi baterakoa izanen baita, Europako Komunitatearen 2081/92 Erregelamenduko 5.5. artikuluak agindu bezala. Foru Agindu honen eranskinean ageri da.
Azken Xedapenetako Lehenbizikoa
Baimena ematen zaio Nekazaritzako Elikagai Industrien eta Elikaduraren Zerbitzuari Foru Agindu hau bidaltzeko Nekazaritza, Arrantza eta Elikadura Ministerioko Kalitate Deituren Azpizuzendaritza Nagusiari, haren berri izan eta berretsi dezan.
Azken Xedapenetako Bigarrena
Foru Agindu hau "Tuterako Orburua" delako Adierazpen Geografiko Babestua sustatu duen elkarteari ere helaraziko zaio.
Azken Xedapenetako Hirugarrena
Foru Agindu honek Nafarroako Aldizkari Ofizialean argitaratu eta biharamunean indar hartuko du.
ERANSKINA. "Tuterako orburua" delako adierazpen geografiko babestuaren eta haren kontseilu arau-emailearen erregelamendua
I. KAPITULUA. Xedapen orokorrak
1. artikulua. Babesaren lege oinarria.
Kontseiluaren uztailaren 14ko 2081/92 (EEE) Erregelamendua (Kontseiluaren martxoaren 17ko 535/97 (Enpresari Elkarte) Erregelamenduak aldatua), abenduaren 2ko 25/1970 Legea, eta martxoaren 23ko 825/1972 Dekretuak onetsitako haren Erregelamendua, apirilaren 11ko 830/1984 Errege Dekretua eta uztailaren 8ko 728/1988 Errege Dekretua. Arau horiek honako orburuak babesten dituzte "Tuterako Orburua" delako Adierazpen Geografiko Babestuaren azpian: Erregelamendu honetan definitzen diren ezaugarriak dituzten eta kasuko baldintza pleguak eta kasurako diren beste legeek agintzen dituzten baldintzak betetzen dituzten orburu fresko nahiz kontserbako guztiak.
2. artikulua. Babesaren eremua.
"Tuterako Orburua" delako Adierazpen Geografiko Babestua ezin aplikatuko zaio Erregelamendu honek definitzen duen orburu motari baizik, eta ez da zilegi izanen inolako hitz, esapide, marka edo zeinurik erabiltzea fonetikaz edo grafiaz antzekoak izateagatik babestekoekin nahasgarri izan daitekeenik, nahiz eta horiekin batera "antzekoa", "estilokoa", ...-an egina", "...-an maneatua", "...-an fabrikatua" edo antzekoren bat agertu.
3. artikulua. Organo eskudunak.
1. Adierazpen Geografiko Babestua defendatzeko, haren Erregelamendua aplikatzeko, Erregelamendua bete dadin begiratzeko eta bai, halaber, babespeko orburua sustatu eta haren kalitatea kontrolatzeko lana, honako erakundeei egozten zaie: Adierazpen Geografiko Babestuaren Kontseilu Arau-emailea, Nekazaritza, Abeltzaintza eta Elikadura Departamentua, Nekazaritza, Arrantza eta Elikadura Ministerioa, eta Europako Komunitateen batzordea, zein bere eskumenen arloan.
2. Kontseilu Arau-emaileak hartzen dituen erabakiak Nafarroako Gobernuaren Nekazaritza, Abeltzaintza eta Elikadura Departamentuak onetsi beharko ditu, baldin eta inskribatuen eskubide eta betebeharretan eragina badute.
4. artikulua. Kalitate-manuala.
Kontseilu Arau-emaileak kalitate eta prozedura manual bat itxuratuko du, EN-45011 Araua aplikatzeko, zeinak zehazten dituen zer irizpide orokor hartu behar dituen aintzat zertifikazio organo batek produktuak zertifikatzeko. Manual hori agintari eskudunek errebisatuko dute eta Adierazpen Geografiko Babestuan inskribatu direnen esku jarriko.
II. KAPITULUA. Produkzioaz
5. artikulua. Produkzio eremua.
1. "Tuterako Orburua" delako Adierazpen Geografiko Babestuak babesten duen orburuaren produkzio eremua, Nafarroan dauden eta Kontseiluak behar adinako kalitateko orburua produzitzeko ontzat jotzen dituen terrenoek osatzen dute, honako herri hauetan: Ablitas, Andosilla, Arguedas, Azagra, Barillas, Buñuel, Cabanillas, Cadreita, Cárcar, Cascante, Castejón, Cintruénigo, Corella, Cortes, Falces, Fitero, Fontellas, Funes, Fustiñana, Lodosa, Marcilla, Mendabia, Milagro, Monteagudo, Murchante, Peralta, Ribaforada, San Adrián, Sartaguda, Tutera, Tulebras, Valtierra eta Villafranca.
2. Kontseiluak kalifikatu ditu terrenoak produkzio eremuan sartzeko ala ez sartzeko, eta nahitaez Plantazioen Erregistroko planoetan hala jasoko da erregistro hori osatzen den heinean.
3. Kontseilu Arau-emaileak zilegi izanen du Nekazaritza, Abeltzaintza eta Elikadura Departamentuari proposatzea produkzio eremua beste herri batzuetara zabaltzea.
6. artikulua. Babespeko produktua.
"Tuterako Orburua" delako Adierazpen Geografiko Babestuak babesten dituen orburuak, Cynara scolymus espezieko "Blanca de Navarra" delakoa haztetik sortzen diren buruak dira. Zilegi izanen da freskoan nahiz kontserban merkaturatzea betiere baldin legeek, Baldintza Pleguak eta Erregelamendu honek eskatzen dituzten baldintzak betetzen badituzte.
7. artikulua. Hazkuntza metodoa.
1. Hazkuntza hau urtebetekoa izanen da, hau da: urtero udako geldialdian landareak errotik atera eta berri batzuk landatuko dira. Baldintza hau ezinbestekoa da Kontseilu Arau-emaileak freskoan merkaturatu eta kontsumitzeko orburua babestuko badu. Kontserbarako, ordea, bi urteko hazkuntza ere zilegi izanen da, hau da, bigarren urteko udako geldialdian landarea erauziz.
2. Hazkuntza moduak tradizionalak izanen dira. Abuztuan landatuko da orburua, urtebeteko zueketatik heldu den materiala erabiliz, hektareako 8.000tik 12.000ra bitarte landare landatuz. Udako geldialdia ekain erdialdean eginen da eta uztailean erauziko landareak. Landagaiak nahitaez hazien eta mintegiko landareen produktore, merkaturatzaile eta inportatzaileen Erregistro Ofizialean inskribatutako mintegi batetik ekarriak izanen dira.
3. Behar bezalako ura, ongarria eta tratamendu fitosanitarioak emanen zaizkie landareei, onik eta gaitz edo eritasunik gabe edukitzeko moduan.
4. Zilegi izanen da produkzioa berretzeko berrikuntzak proposatzea hazkuntza metodoetan, Kontseilu Arau-emaileak juzkatzen badu ez dutela produktuaren kalitatea makaltzen.
8. artikulua. Bilketa.
1. Produktua bildu eta, hala tokatzen bada, eraldaketa zentroetara eramateko, arretarik handiena jarriko da, eginahalean orburuak ihartzen eta ondorioz zailtzen utzi gabe.
2. Kontseilu Arau-emaileak kontrolatuko du zer produkzio egiten den lurzatiko eta hartarako zilegi izanen du Adierazpen Geografiko Babestuan dauden pertsona fisiko nahiz juridikoei agintzea beren salmenta kontratuak erakusteko edo, orburuak zuzenean merkaturatzen badituzte, salmenta deklaratzeko, babespeko nekazaritza produktuak eta babestu gabekoak bereizi ahal izateko.
III. KAPITULUA
1. atala. Freskoan jateko orburua
9. artikulua. Fruituak hautatzeko modua.
Adierazpen Geografiko Babestuaren pean sartu beharreko orburuak arreta handiz hautatu beharko dira enbalatu baino lehen, ezarritako kalitate eta kalibre arauak betetzen ez dituzten fruituak kenduz.
10. artikulua. Kategoria komertzialak.
1. Adierazpen Geografiko Babestuak "Extra" eta "I" direlako kategoria komertzialak baizik ez ditu babestuko, batzordearen maiatzaren 7ko 962/98 (EE) Erregelamenduko II. Eranskinak agintzen duenaren arabera, zeinak hainbat arau finkatzen baititu gizakiek freskoan jateko diren orburuak merkaturatzeko.
2. "Extra" kategoriako orburuekin arreta handiko hautaera eginen da, kalitate handiko produktua lortzeko. Ongi formatuak eta barietate honen kolore bereizgarrikoak izanen dira. Itxura fresko eta gotorra izanen dute, batere ximeldu gabekoa.
Orburuak trinkoa eta gotorrak izanen dira. Erdiko brakteak, bereziki, inolako akatsik gabeak izanen dira eta hondoko zainetan batere ihartu gabekoak. Onik egonen dira, inolako gaitz edo eritasunik gabe; herdoil, usteldura, zorri eta izozte arrastorik ez dutela. Garbirik eta usain-zapore arrotzik gabe.
Kategoria honetakoak nahitaez kalibratu behar dira. Aurkezpena ere oso zaindua beharko du eta ontziko edukia homogeneoa barietate, kalitate eta kalibreari dagokionez.
3. "I" kategoriako orburuak kalitate onekoak izanen dira eta barietatearen forma bereizgarrikoak. Orburuak behar adina konpaktoak izanen dira eta erdiko brakteak estuak.
Zilegi izanen da honako akatsak izatea:
-Forma akats txikia.
-Izotzagatik pixka bat aldaturik.
-Mailatu arinak.
Hondoko zainak batere zaildu gabekoak behar dute.
Kategoria honetako orburuak nahitaez kalibratu behar dira. Aurkezpena zaindua izanen da eta ontziko edukia homogeneoa barietate, kalitate eta kalibreari dagokionez.
4. Kontseilu Arau-emaileak zilegi izanen du orburu freskoaren komertzializazioa geldiaraztea produktuaren ezaugarriengatik hala komeni denean.
11. artikulua. Produktua aurkezteko moduak.
Zilegi izanen da Adierazpen Geografiko Babestuaren peko orburua bi aurkezpen diferentetan merkaturatzea:
a) Zurten eta hostoekin. Zilegi izanen da buruek 18 zentimetroko zurtena eta bizpahiru hosto oso izatea erantsita.
Aurkezpen modu hau dozenetan etiketatu eta salduko da, tradiziozko moduan, eskutaraka.
b) Zurtenik gabe. Gehienez ere buruek 10 zentimetroko zurtena izanen dute erantsia, hostorik gabe.
Aurkezpen modu honetan orburua kiloka etiketatu eta salduko da, kategoriak eskatzen dituen baldintzetan, lurrik, zaborrik eta tratamenduetako hondakinik gabe.
12. artikulua. Ontziak.
1. Babespeko orburuak Kontseilu Arau-emaileak ontzat emandako enbalajeetan etorriko dira, hark baimendutako estalki edo lokarriekin.
2. Kontseilu Arau-emaileak zilegi izanen du, merkatuaren egoera zein den, ontzi eta aurkezpen eredu berriak baimentzea, betiere ontziratze do aurkezpen sistema horien materialek ez badute produktua barrenez nahiz kanpoz aldatzen.
Nolanahi ere, ontzi bakoitzeko edukia homogeneoa izanen da, kategoria, kolore eta kalibre bat bereko orburuak dituztela.
13. artikulua. Saltokietarako bereizgarriak.
Gutxikako saltokietan zilegi izanen da Adierazpen Geografiko Babestuaren bereizgarria bistan egotea babespeko produktua bertan saltzen den bitartea.
2. atala. Orburuaren kontserba
14. artikulua. Kontserbarako orburuaren ezaugarriak.
1. Kontserbarako orburu guztiak Blanca de Tudela barietatekoak izanen dira.
2. Kontserbarako orburuek, beroan esterilizatutako eta zuzenean kontsumitzeko landare kontserbentzako kalitate araua bete beharko dute, eta berariaz Gobernuko lehendakaritzaren 1984ko azaroaren 21eko Ministerio Aginduko 12. Eranskina osatzen dutenak, orburu kontserben gainean ari baita.
3. Nolanahi ere, Kontseilu Arau-emaileak zilegi izanen du horrez gain kalifikazio eta sailkapen arauak ezartzea, kalitatea hobetu edo kontsumitzailearen gustoetara moldatzeko modukoak.
15. artikulua. Maniatzeko moduak.
1. Honako moduetan maneatutako orburuek izanen dute Adierazpen Geografiko Babestua:
-Orburu-bihotz osoak.
-Orburu-bihotz erdiak, aurkezpena horrelakoa denean; hala eman beharko da aditzera etiketetan.
2. Orburu bihotza da burua osorik edo erregularki moztua, zurtenik edo kanpoko braktea zailik gabe maneatua.
Mozturak garbiak eta erregularrak izanen dira, brakteak enborrari sendo loturik uzteko moduan eginak.
3. Orburua azidifikatu gabe maneatu beharko da, hau da, azidulanterik edo mikaztasuna zuzentzekorik erabili gabe produktuaren fabrikazio aldietan. Horrela bermatu eginen da produktu maniatuaren pH produktu freskoarena bera izatea, betiere gutxienez 5,0.
16. artikulua. Produktua kontserban prestatzeko modua.
1. Kasu bietan onartzen diren kategoria komertzialak, landare kontserbentzako Kalitate Arauko 12. Eranskinak (orburuaren gainekoa) agintzen duenaren arabera ezartzen dituenak izanen dira.
2. Kontseilu Arau-emaileak, produktua itxuraz ere homogeneoa izan dadin, zilegi izanen du kalibre eskala bat ezartzea bete beharrekoa, eta finkatzea, gainera, zenbat unitate ontzira daitezkeen formato bakoitzean, ezaugarri eta formatoen gaineko orain dauden arauak ezertan galarazi gabe.
3. Erabili beharreko ontzia beti kristalezkoa izanen da.
IV. KAPITULUA. Erregistroak
17. artikulua. Kontseilu Arau-emailearen erregistroak
1. Kontseilu Arau-emaileak honako erregistroak izanen ditu:
a) Landaketen erregistroa.
b) Freskoan merkaturatzen edo almazenatzen dituztenen erregistroa.
c) Industrien erregistroa.
2. Inskripzio eskaerak Kontseilu Arau-emaileari zuzenduko zaizkio, haiekin batera kasuan kasuan xedapen eta arau indardunek eskatzen dituzten datuak, dokumentuak eta ziurtagiriak aurkeztuz, Kontseilu Arau-emaileak ezartzen dituen inprimakietan.
3. Kontseilu Arau-emaileak ukatu eginen ditu Erregelamendu honek, baldintza pleguak eta kalitate manualak agindutakoei men egiten ez dieten inskripzioak.
4. Erregistro horietan inskribatzeak ez die kentzen interesatuei oro har ezarrita dauden erregistroetan inskribatu beharrik.
5. Ez da zilegi izanen artikulu honetako 1. idatz-zatiak aipatzen dituen deklarazioak ematea eta argitaratzea oro har baizik, norbanakorik ezertarako aipatu gabe.
18. artikulua. Plantazioen erregistroa.
1. Plantazioen erregistroan urtero inskribatuko dira, urriaren 30 baino lehen, produkzio eremukoak izan eta Adierazpen Geografiko Babestua beretu nahi duten lurzati guztiak, Kontseilu Arau-emaileak ezarritako epeetan hala eskatu badute.
Borondatezko baja hartzen bada, non eta titularra aldatzen ez den, gutxienez hamabi hilabete iragan beharko dira kasuko lurzatia berriz inskribatzeko.
2. Inskripzioan jabearen izena ageriko da, eta ustiategiak alokatzailerik edo titularrik baldin badu, harena; ustiategia zer parajetan, zer herritan, katastroko zein poligonotan eta lurzatitan dagoen, zer azalera duen jasoko da, eta erabat ongi kokatu eta sailkatzeko behar diren beste datu guztiak ere bai. Plantazioen erregistroak inskribatu zaizkion lurzatiak atzemateko sistema grafikoren bat izan beharko du.
3. Inskribatu den nekazari bakoitzak, kanpaina bakoitzean liburuxka batean jasoko ditu orburu partiden salmentak eta bai nori saldu zaizkion ere.
19. artikulua. Freskoan merkaturatzen edo almazenatzen dituztenen erregistroa.
1. Freskoan merkaturatzen edo almazenatzen dituztenen erregistroan inskribatuko dira produkzio eremukoak izan eta Adierazpen Geografiko Babestuak babesten dituen orburuak merkaturatzen dituzten guztiak.
2. Inskripzio horretan enpresaren izena ageriko da, zer herritan dagoen, zenbateko manipulazio gaitasuna duen, zer instalazio dituen eta enpresa garbi identifikatzeko behar diren beste datu guztiak. Orburuak merkaturatzeko erabiltzen duen etiketaren eredua ere ageriko da.
3. Almazenek epez epe aditzera emanen dute zenbateko kopurua erosi eta merkaturatu duten "Tuterako Orburua" delako Adierazpen Geografiko Babestuaren pean.
20. artikulua. Industrien erregistroa.
1. Industrien Erregistroan inskribatuko dira Nafarroan egon, Adierazpen Geografiko Babestuak babestutako orburuak eraldatzen eta saltzen aritu eta Kontseilu Arau-emaileak ezarritako epeetan hala eskatu duten industria guztiak.
2. Inskripzioan enpresaren izena ageriko da, zer herritan dagoen, zer gaitasun duen orburua eraldatzeko, instalazioen plano edo krokis xehetua eta enpresa ongi identifikatzeko behar diren beste datu guztiak.
3. Eraldatze enpresek aditzera emanen diote Kontseilu Arau-emaileari kanpaina bakoitza bukatzean, babesteko moduko zenbateko orburu kopurua jaso den eta bermezko kontraetiketa eramateko eskubidea duen zenbateko produktu eraldatua sortu.
21. artikulua. Inskripzioen indarraldia eta berritzea.
1. Erregistroetako inskripzioek indar izanen badute, ezinbestekoa da edozein unetan kapitulu honek ezartzen dituen baldintzak betetzea, eta zein ere aldaketa gertatuko baita inskripzioan emandako datuetan, denak adierazi beharko zaizkio Kontseiluari. Horrenbestez, Kontseilu Arau-emaileak zilegi izanen du inskripzioak eten edo ezeztatzea, haien titularrak ez badituzte betetzen.
2. Kontseilu Arau-emaileak epez epe ikuskaldiak eginen ditu, konprobatzeko aurreko lerroaldean agindu den guztia betetzen den ala ez.
3. Plantazioen erregistroko inskripzioak urtero berrituko dira; gainerako erregistroetan egindakoa, berriz, lau urtetik.
V. KAPITULUA. Eskubide-betebeharrak
22. artikulua. Eskubideen titularrak.
1. Inork ez du "Tuterako Orburua" delako Adierazpen Geografiko Babestua erabiltzeko eskubiderik izanen Kontseiluaren erregistroetan inskribatu titularrek baizik.
2. Honako orburuari soilik aplikatuko zaio "Tuterako Orburua" delako Adierazpen Geografiko Babestua: plantazio inskribatuetakoak diren, Erregelamendu honetako arauen arabera manipulatu edo maneatu diren eta haien ezaugarri bereizgarriak dituzten orburuak.
3. Adierazpen Geografiko Babestuaren izena eta logotipoa propagandan, publizitatean, dokumentazioan eta etiketetan erabiltzeko eskubidea Kontseiluaren erregistroetan inskribatutako enpresek izanen dute, eta ez beste inork.
4. Kasuko erregistroetan inskribatze hutsagatik inskribatu direnak beharturik daude Erregelamendu honetako, Baldintza Pleguko, Kalitate Manualeko xedapenak eta bai Nafarroako Gobernuko organo eskudunek zeinek bere eskumenen arloan ematen dituzten erabakiak betetzera eta tokatzen zaizkien zergak pagatzera.
5. Erregelamendu honek ematen dituenetako edozein eskubide erabiltzeko edo Kontseiluak ematen dituzten zerbitzuak hartu ahal izateko, beren plantazioak edo instalazioak inskribatu dituztenek eguneraturik eduki beharko dituzte beren eginbehar fiskalak.
23. artikulua. Babestu gabeko produktutik bereiz.
1. Plantazioen erregistroan inskribatu plantazioen terrenoetan ez da zilegi izanen orburu partidarik sartu edo edukitzea Adierazpen Geografiko Babestua eramateko eskubiderik ez duten lurzatietakorik.
2. Erregistroetan inskribatutako manipulazio edo maniatze instalazioetan zilegi izanen da Adierazpen Geografiko Babestuan ez dauden eremuetako herri edo plantazioetatik datozen orburuak, freskoak nahiz kontserbakoak, sartu, manipulatu, prestatu, almazenatu eta merkaturatzea, aurretiaz Kontseilu Arau-emaileari horren berri emanik eta betiere inoiz ere nahasi gabe Adierazpen Geografiko Babesturako eskubidea duen orburuarekin. Kontseilu Arau-emaileak Kalitate Manualean ezarriko du zer arau orokorreko berariazko segitu behar diren kasu horietarako eta arau horiek egoki bete daitezen begiratuko.
3. Orburua almazenatzeko instalazioak inskribaturik dituzten enpresek -orburu freskoa, manipulatua edo eraldatua izan-, aditzera eman beharko dute zein lokaletan, edo lokaletako zein partetan, behar bezala banandua, almazenatuko den Adierazpen Geografiko Babestuaren peko produktua. Almazenatze hori lokal horiexetan baizik ez da zilegi izanen. Kalitate-manualak ezarriko du zer arau begiratu behar diren produktu horien kontrol erabatekoa izateko.
24. artikulua. Izen komertzialak.
Adierazpen Geografiko Babestua aipatzen duten marka, izen komertzial edo sozietate izenak ezin dira erabili, ez bada Erregelamendu honek ezarritako baldintzak espresuki betetzen dituzten produktuak merkaturatzeko edo iragartzeko eta, betiere, Kontseilu Arau-emaileak espresuki baimendurik.
Baimen horrek balio izateko, Kontseilu Arau-emaileari eskatu beharko diote, hark eskatzen dizkien egiaztagiri guztiak aurkeztuz. Espresuki emanen dute aditzera beren gain hartzen dutela izen hori Adierazpen Geografiko Babestuaren peko orburuetan erabiltzeko erantzunbehar guztia.
25. artikulua. Etiketak eta bereizgarria.
1. Zein ere ontzitan banatzen diren, jateko diren orburuek beren etiketa izanen dute, Kontseilu Arau-emaileak ematen duen kontraetiketa numeratuaz gain. Etiketa hori produktua banatu baino lehen jarri beharko zaio Kontseilu Arau-emaileak kalitate manualean ezartzen dituen arauen arabera.
2. Produktua jendarteratu aurretik, Kontseilu Arau-emaileak eman beharko die baimena etiketa komertzialei, Erregelamendu honetan agintzen direnak betetzeko. Ukatu eginen da baimen hori baldin etiketa bat kontsumitzailearentzat nahasgarria izan badaiteke. Zilegi izanen ere da lehendik emandako baimena kentzea, haren jabe den enpresaren inguruabarrak aldatu badira, aurrez enpresa interesatuari entzunaldia emanik.
3. Salgai prestatuak (manipulatuak nahiz eraldatuak) beste prestatzaile bati saldu bazaio, saltzaile inskribatuak hala eman beharko dio aditzera Kontseilu Arau-emaileari.
Produktu prestatua beste prestatzaile inskribatu bati saldu bazaio, salgaiarekin batera nahitaez saltzaileari dagozkion kontraetiketak ere eman beharko dira.
Pilako salmenta hori izendapenaz landarako prestatzaile bati egiten bazaio, Kontseilu Arau-emaileak abisatuko dio saltzaile inskribatuari kasuko kontraetiketak Kontseilu Arau-emaileari itzuli behar dizkion ala zilegi duen oraindik kontraetiketarik eman ez zaien beste partida batzuetan erabiltzea.
4. Kontseilu Arau-emaileak enblema edo logotipo bat hartu eta erregistratuko du Adierazpen Geografiko Babestuaren sinbolotzat.
Halaber, Kontseilu Arau-emaileak zilegi izanen du agintzea nahitaez jarri behar dela instalazio inskribatuen kanpoaldean eta ageri-agerian, instalazioa halakoa dela adierazten duen plaka bat.
26. artikulua. Logotipoa banaketan erabiltzeko baimena.
Zilegi izanen da erregistroetan inskribatu prestatzaileei baimena ematea logotipoa banaketan erabiltzeko, aurrez Kontseilu Arau-emaileari eskaera eginik eta egoki erabiltzeko jartzen diren baldintzak onarturik.
27. artikulua. Kontrolak.
1. Kontseilu Arau-emaileak kanpaina bakoitzean begiratuko du erregistroetan inskribatu enpresa bakoitzak zenbateko orburu kopurua banatzen duen Adierazpen Geografiko Babestuaren pean, kontuan harturik zenbat orburu heldu diren plantazio inskribatuetatik, bereak nahiz besterenak, zenbateko existentzia duten eta zenbateko kopurua erosi zaien beste enpresa inskribatuei.
2. Erregistroetan inskribatu ondasunen titular diren pertsona fisiko nahiz juridikoek bide eman beharko diote Kontseilu Arau-emaileari beren ustiategi, instalazio eta produktuen gaineko ikuskapena egin diezaien, konprobatzeko "Tuterako Orburua" delako Adierazpen Geografiko Babestua ageri duten orburuek Erregelamendu honetako baldintzak betetzen dituztela.
3. Kontrolak egiteko baratze-ustiategiak, industriak eta merkaturatzeko edo freskoan almazenatzeko instalazioak ikuskatuko dira, dokumentazioa errebisatuko eta produktua aztertuko.
4. Inoiz atzematen bada orburuek ez dituztela betetzen Erregelamendu honetako baldintzak edo akats edo oker nabariak badituzte, ez da zilegi izanen horiek "Tuterako Orburua" delako Adierazpen Geografiko Babestuaren pean merkaturatzea, Erregelamendu honetako VII. kapituluan jasotzen den zehapen erregimena aplikatzea ezertan galarazi gabe.
28. artikulua. Inskribatuen deklarazioak, kontrolerako.
1. Orburuen produkzioa, prestaera eta banakuntza, eta bai existentzien zenbatekoa ere kontrolatu ahal izateko, eta bai babespeko orburuen jatorria eta kalitatea frogatzeko behar den beste guztia, plantazio eta instalazioen titular diren pertsona fisiko nahiz juridikoak beharturik egonen dira honakoak hauek betetzera:
a) Inskribatutako plantazioen titularrek, Kontseilu Arau-emaileak hala eskatzen duenean, aurkeztuko dituzte, orburu partiden salmenta erregistroak eta hartzaileak zehazten dituen liburuxka aurkeztuko dituzte. Nekazari industria eta elkarteek zilegi izanen dut dokumentuok beren kideen eta hornitzaileen izenean tramitatzea.
b) Erregistroetan inskribatu enpresa guztiek deklaratu beharko dute Kontseilu Arau-emaileak hala eskatuta, zenbateko produktu manipulatu edo prestatu daukaten, formatoak, kategoriak eta kalibreak bereiziz, eta bai zenbateko babespeko produktua saldu den. Jatorria eta kantitatea ere jaso behar dira. Existentziak dauden artean, Kontseilu Arau-emaileak eskatzen dion aldiro deklaratu beharko du zer salmenta egin dituen.
2. Ez da zilegi izanen artikulu honetako 1. idatz-zatiak aipatzen dituen deklarazioak ematea oro har baizik, norbanakorik ezertarako aipatu gabe.
VI. KAPITULUA. Kontseilu Arau-emailea
29. artikulua. Zer den eta zer eskumen dituen.
1. Kontseilu Arau-emailea organo kolegiatua da, Nekazaritza, Abeltzaintza eta Elikadura Departamentuaren menpekoa. Erabakitzeko ahalmena du Erregelamendu honetan egozten zaizkion eginkizunetan, xedapen indardunek agintzen dutenaren arabera.
2. Honako faktoreek xedatzen dute haren eskumenen irispidea:
a) Lurraldez, produkzio eta prestatze eremua.
b) Produktuei dagokienez, Adierazpen Geografiko Babestuak babesten dituenak, edozein produkzio, zirkulazio, manipulazio, prestatze eta merkaturatze alditan.
c) Pertsonei dagokionez, erregistroetan inskribatuak.
30. artikulua. Eginkizunak.
1. Kontseiluaren 2081/92 (EEE) Erregelamenduaren arabera, Kontseilu Arau-emailearen eginkizuna da, "Tuterako Orburua" delako Adierazpen Geografiko Babestua kontrolatzeko egitura den partez, bermatzea Adierazpen Geografiko Babestu hori daukan produktuak baldintza pleguko baldintzak betetzen dituela.
Kontseilu Arau-emailearen beraren eginkizun nagusia da, halaber, Erregelamendu honetako aginduak aplikatzea eta bete daitezen begiratzea. Hartarako, aipatu 25/1970 legeko 87. artikuluak eta lege xedapen osagarriek oro har Kontseilu Arau-emaileei esleitzen dizkieten eginkizunak izanen ditu, eta bai, halaber, Erregelamendu honetan espresuki adierazten direnak eta "Tuterako Orburua" delako Adierazpen Geografiko Babestuaren Baldintza Pleguan ageri direnak.
2. Kontseilu Arau-emaileak zilegi izanen du Erregelamendu eta baldintza plegua errebisatzea eta egoki deritzan bezalako aldaketak proposatzea babespeko produktuaren ezaugarriak begiratu edo hobetzeko.
31. artikulua. Osaera.
1. Kontseilu Arau-emaileak honako kideak izanen ditu:
a) Kontseiluburu bat, Nekazaritza, Abeltzaintza eta Elikadura kontseilariak izendatua, Kontseiluak berak proposatu ondoren.
b) Zortzi kontseilukide; lau, prestatze eta merkaturatze sektorearen ordezkariak, eta lau produkzio sektoreenak, denak demokratikoki hautatuak gai honi buruzko legeen arabera erregistroetan inskribatu pertsona fisiko nahiz juridikoen artetik.
c) Nekazaritza, Abeltzaintza eta Elikadura Departamentuak izendatutako kide bat eta beste bat Industria, Merkataritza, Turismo eta Lan Departamentuak izendatua.
Kontseilu Arau-emailearen osoko bilkurak zilegi izanen du buruorde bat izendatzeko proposatzea. Nekazaritza, Abeltzaintza eta Elikadura Departamentuak izendatuko du.
2. Zilegi izanen da bai kontseiluburua, bai buruordea, edo biak, sektoreen ordezkari diren kideen artetik izendatzea. Horretara, utzitako hutsunea ez da beteko.
3. Kontseilu Arau-emailearen kide bakoitzarentzat ordezko bat izendatuko da, titularra bezala hautatua.
4. Kideen karguak lau urtetik berrituko dira, eta zilegi izanen da berriz lehengo berak hautatzea.
5. Kide batek edozergatik kargua uzten badu, finkatuta dagoen moduan izendatuko da ordezkoa, baina kide berriaren kargualdiak Kontseilua hurrena berritzen den arte baizik ez du iraunen.
6. Kideek gehienez hilabeteko epea izanen dute karguaz jabetzeko hautatu edo izendatzen dituztenetik.
7. Kide batek bere kargualdian Erregelamendu honen arautzepeko gaietan arau-hauste larria egin (berak edo bere enpresak) eta horren zehapena jasotzen badu, kargua utziko du, eta bai ere justifikaziorik gabe Kontseilu Arau-emailearen hiru bilkura hutsegiten baditu segidan edo guztira hamar bilkura, edo Adierazpen Geografiko Babestuaren erregistroetan baja hartzen badu.
32. artikulua. Kontseilukideen lotura.
1. Aurreko artikuluko 1. puntuko a) eta b) letrek aipatzen dituzten Kontseilu Arau-emaileko kideek lotura izan behar dute beren sektoreekin, dela zuzenean dela ordezkatzen dituzten jardueretan aritzen diren sozietateetako zuzendaritzan aritzeagatik. Hala ere pertsona fisiko nahiz juridiko batek, erregistro bat baino gehiagotan inskribatua bada ere, ez du zilegi izanen ordezkaritza bikoitza izatea Kontseilu Arau-emailean, bat produkzio sektorean eta beste bat prestatze eta merkaturatze sektorean, ez zuzenean eta ez enpresa filialen bidez edo enpresa horietako kideen bidez.
2. Enpresa inskribatu bateko zuzendaritzan aritzeagatik hautatutako kontseilukideek kargua utziko dute enpresa horretako zuzendaritzakoa uzten dutenean, nahiz eta, beste enpresa batera pasatu direla-eta, sektore berean jarraitu.
33. artikulua. Kontseiluburuaren eginkizunak.
1. Kontseiluburuari dagokio:
Lehena. Kontseilu Arau-emailearen ordezkari izatea: ordezkaritza hau Kontseiluko edozein kideri uzten ahal dio espresuki, beharrezkoa baldin bada.
Bigarrena. Lege eta Erregelamendu mailako arauak betearaztea.
Hirugarrena. Kontseiluaren sarrerak eta fondoak administratu eta ordainketak agintzea.
Laugarrena. Kontseiluaren bileretarako deia egin eta buru-eginkizunetan aritzea: eguneko gai zerrenda prestatu, bere eskumeneko gaiak erabakigai jarri eta hartutako erabakiak gauzatu.
Bosgarrena. Kontseiluaren barne-araudia antolatu.
Seigarrena. Kontseiluko langileak kontratatu, kontratuak behin-behinekoz etenda utzi edo berritzea.
Zazpigarrena. Zerbitzuak antolatu eta zuzentzea.
Zortzigarrena. Ekoizpenean eta merkatuan gertatzen diren gorabeheren berri Nekazaritza, Abeltzaintza eta Elikadura Departamentuari ematea.
Bederatzigarrena. Nafarroako Gobernuko Nekazaritza, Abeltzaintza eta Elikadura kontseilariari bidaltzea Kontseiluak Erregelamendu honek ematen dizkion eskumenak erabiliz hartzen dituen erabaki orokorrak, eta baita beren garrantzia dela-eta ezagutu beharrekoak iruditzen zaizkionak ere.
Hamargarrena. Kontseilu honek erabakitzen dituen edo Nafarroako Gobernuko Nekazaritza, Abeltzaintza eta Elikadura kontseilariak ematen dizkion gainerako eginkizunak.
2. Kontseiluburuaren kargualdia lau urtekoa izanen da, eta berriro hauta daiteke.
3. Kontseiluburuak bere kargua utziko du bere kargualdia amaitzen denean; berak hala eskaturik, kargu uztea onartu eta gero; Nekazaritza, Abeltzaintza eta Elikadura kontseilariak hala erabakita; legeetan onartutako gainerako arrazoiengatik.
4. Kontseiluburuaren kargu-gabetzea, uztea edo heriotza gertatuz gero, Kontseilu Arau-emaileak, hutsunea gertatzen denetik hilabeteko epean, beste hautagai bat izendatzeko proposamena eginen du.
5. Buruordeari dagokio, hala tokatzen bada, buru-lanetan aritzea delako burua lekuturik edo eriturik baldin badago.
34. artikulua. Barne araudia.
1. Kontseilu Arau-emailearen bilerak kontseiluburuak deiturik eginen dira, hark bere kabuz edo kontseilukideen erdiek hala eskatuta dei eginik, eta, betiere, nahitaezkoa izanen da hiru hilean behin gutxienez biltzea.
2. Kontseiluaren bilerak gutxienez lau egun lehenago deia eginik eginen dira, eta deiari bilerako gai zerrenda erantsi behar zaio, bileretan aldez aurretik adierazitako gaiak baizik ez baitira aztertuko. Premiazko kasuetan edo kontseiluburuaren ustez gaiaren laster-beharrak hala eskatzen duenean, telegramaz edo faxez dei eginen zaie kideei, gutxienez hogeita lau ordu lehenago. Dena dela, Kontseiluaren bilera baliozkoa izanen da kontseilukide guztiak bertan izanik aho batez horrela erabakitzen badute.
3. Kide titularra lekuturik edo eriturik dagoenean eta oro har behar adinako arrazoi tarte delarik, zilegi izanen da, ordezkorik baldin badago, bera etortzea bilerara Kontseilu Arau-emailearen kide titularraren partez.
Titularrak edo ordezkoak bilerara agertzerik ez duenean, bere ordezkaritza beste kontseilukide bati uzten ahal dio, baina kontseilukideek ezin dituzte bi ordezkaritza baino gehiago izan, berena barne.
4. Kontseilu Arau-emailearen erabakiak bertan agertu diren kideen gehiengoaz hartuko dira eta balio izateko, Kontseilua osatzen dutenen erdiak baino gehiagok beharko dute bertan.
5. Tramitezko kontuak ebazteko edo hala behar dela juzkatzen denean, zilegi izanen da Batzorde Iraunkor bat eratzea, honako osakideekin: Kontseiluburua, Buruordea eta bi kide, sektore bakoitzeko bat, Kontseiluaren osoko bilkurak izendatuak. delako Batzordea eratzea erabakitzen den bilkuran, erabakiko ere da zer eginkizun berariazko izanen dituen. Batzorde Iraunkorrak zein ere erabaki hartuko baititu, denak Kontseilu Arau-emailearen Osoko Bilkurari jakinarazizko zaizkio hurrengo bilkuran.
6. Kontseilu Arau-emaileak egiten duen bilkura bakoitzean akta bat eginen da, Idazkariak idatzia eta sinatua, Kontseiluburuaren oniritzia duela. Orobat eginen da, hala tokatzen bada, Batzorde Iraunkorraren bileretan.
35. artikulua. Administrazio egitura.
1. Bere helburuak betetzeko, Kontseilu Arau-emaileak behar dituen langileak izanen ditu eta plantilla horri dirutza bat emanen zaio Kontseilu Arau-emailearen aurrekontuetan.
2. Eginkizun teknikoak egiteko, Kontseilu Arau-emaileak zilegi izanen du behar dituen zerbitzuak izatea, zeinen zuzendaritza lana tekniko trebatu bati emanen zaion.
3. Kontrol eta zainketa zerbitzuetarako, bere ikuskatzaile edo behaketa-arduradunak izaten ahal ditu. Ikuskatzaile horiek Kontseiluak hautatuko ditu eta Nekazaritza Abeltzaintza eta Elikadura kontseilariak gaituko; honako ikuskatze eskumen hauek izanen ditu:
a) Produkzio eremuan inskribatu hazkuntza lurzatiak.
b) Inskribatutako prestatze edo eraldatze instalazioak.
c) Adierazpen Geografiko Babestuaren eremuan babespeko diren produktuak.
4. Eginkizun tekniko, administratibo eta kontroleko guztietarako, Kontseilu Arau-emaileak zilegi izanen du kanpoko zerbitzuak kontratatzea, hala komeni dela juzgatzen badu.
36. artikulua. Idazkaria.
Kontseilu Arau-emailearen idazkariak kontseiluaren egitura administratibo eta teknikoaren funtzionamendua eta kontrol eta zertifikazio sistemena izanen ditu bere gain. Bere menpeko langileen buru ere izanen da. Kontseiluak izendatuko du, kontseiluburuak proposatuta.
Honako eginkizun berariazkoak izanen ditu:
a) Kontseiluaren lanak prestatu eta hark erabakitakoa gauzatzeko tramiteak egitea.
b) Bileretan egotea hitza bai baina botorik ez duela, bilera-deiak bidaltzea, aktak egitea eta Kontseiluaren liburu eta dokumentuak gordetzea.
c) Kontseilu Arau-emaileko buruarekin solidario, entitatearen fondoak eta sarrerak administratzea, edozertariko kontratuak egitea haren izenean eta ordainketak agintzea.
d) Ziurtagiri sistema zuzendu, koordinatu eta kudeatzea, eta kontsulta, irizpen eta hartutako erabakiei buruzko ziurtagiriak ematea.
e) Kontseilukideen komunikazio egintzak eta, beraz, jakinarazpenak, datu-eskaerak, zuzenketak edo jakin beharreko beste edozein idazki jasotzea.
f) Kontseiluko langile guztien burutza bere gain hartzea, eta langileok kontratatzeko behar diren hautaera prozesuak egitea.
g) Kontseilu Arau-emaileak edo kontseiluburuak esleitzen dizkion beste eginkizun guztiak.
37. artikulua. Ziurtapen Batzordea
1. Ziurtapen Batzordea ziurtapen jardueran Kontseilu Arau-emailearen alderdikeriarik eza bermatzeko aholkularitza-organoa da, eta horretarako ziurtapen sistemaren eduki eta funtzionamenduan eragina duten interesen parte-hartzea bultzatuko du.
Ziurtapen Batzordea honako ordezkari hauek osatuko dute, Kontseilu Arau-emailearen burua eta buruordeaz gain:
-Nekazaritza, Abeltzaintza eta Elikadura Departamentua.
-Industria, Merkataritza, Turismo eta Lan Departamentua.
-Nafarroako Unibertsitate Publikoa.
-Nafarroako Merkataritza eta Industria Ganbera Ofiziala.
-Nafarroako Nekazari Kooperatiben Batasuna.
-Nafarroako Kontsumitzaile elkarteak.
Kontseilu Arau-emailearen buruak eta buruordeak kargu horiexek izanen dituzte Ziurtapen Batzordean ere.
2. Ziurtapen Batzordeari dagokio, kasu bakoitzean, Kontseilu Arau-emaileak babestutako produktuaren ziurtapenari buruzko erabaki eta jarduerei buruzko txostenak egitea; txosten hori Kontseiluak berak eskatu behar du honako hauetarako:
a) Kalitate politikaren ildoak eta babestutako produktuen aurkezpen, etiketatze eta iragarkietako irizpideak erabakitzea.
b) Kalitate Manualaren eta ziurtapen egituraren jardunbidearen edukia.
c) Ziurtapen eta deskalifikazio jardunbideari buruzko erreklamazio eta errekurtsoak.
d) Barne auditoretzak eta kalitate sistemaren aldizkako berrikusketak.
Ziurtapen Batzordeak funtzionamenduko barne-araudia idatzi eta onetsiko du.
3. Ziurtapen Batzordeak eskatzen badio, Kontseilu Arau-emaileak ziurtapenari buruz gauzatutako jarduketak arrazoituko ditu, eta haren esku jarriko du behar den dokumentazioa.
4. Ziurtapen Batzordeak emandako txostenei Kontseilu Arau-emaileak entzungor egiten badie, hark zilegi du Nafarroako Gobernuko Nekazaritza, Abeltzaintza eta Elikadura Departamentura jotzea.
38. artikulua. Diru erregimena.
1. Kontseilu Arau-emailearen betebeharrak honako baliabide hauen bitartez finantzatuko dira:
Lehena. 25/1970 Legeko 90. artikuluan finkatzen diren urteko ordainarazpen parafiskalek emandakotik, honako tasa hauek aplikatuko baitzaizkie, gehienez ere:
a) Erregistroetan inskribatutako plantazioen ordainarazpenen oinarriaren gaineko ehuneko bat. Oinarria honako hau izanen da: interesatu bakoitzak bere izenean duen hektarea kopurua x aurreko kanpainan hektarea baten batez besteko produkzioaren pezetetako balioa.
b) Erregistroetan inskribatu Plantazioen oinarriaren gaineko ordainarazpenaren ehuneko bat koma bost (% 1,5). Oinarria honakoa izanen da: babespeko produktuaren unitate bakoitzak batez beste duen prezioa x saldutako zenbatekoa.
c) Ehun pezeta, egiten den ziurtagiri edo faktura-bisatu bakoitzeko eta emandako etiketa edo kontraetiketen kostuaren prezioaren bikoitza.
Ordainarazpen hauetako bakoitzaren subjektu pasiboak honako hauek dira: plantazioen gaineko ordainarazpenetan, erregistroan inskribatutako produkzio lurzatien titularrak; babespeko orburuen gaineko ordainarazpenean, erregistroetan inskribatutako orburu freskoa manipulatu edo merkaturatzeko zentroen titularrak eta elaborazio industrien titularrak; c) idatz-zatikoetan, ziurtagiriak, fakturen bisatuak eta etiketa edo kontraetiketak eskuratzeko eskaerak egiten dituztenak.
Bigarrena. Jasotzen dituen dirulaguntzak, legatuak eta dohaintzak.
Hirugarrena. Kontseilu Arau-emaileari edo ordezkatzen dituen interesei egindako kalte eta galeren kalte-ordain gisa jasotako zenbatekoak eta Erregelamendu honetako arauak hausteagatik ezarritako zehapenenak.
Laugarrena. Bere ondarea osatzen duten ondasunak eta horren emaitzak eta salmentenak.
2. Aurrekontuetan jasotzen diren sarrerak eta gastuak kudeatzea Kontseilu Arau-emaileari dagokio.
3. Aipatutako ordainarazpenak ordaintzen ez badira, premiamendu bidea erabiliko da, bidezkoak izan daitezkeen zehapenak galarazi gabe.
39. artikulua. Erabakiak, publizitatea eta errekurtsoak.
Kontseiluaren erabakiak, partikularrak ez badira eta subjektu bat baino gehiagoren gainean eragina izaten badute, agerian paratutako zirkularren bidez jakinaraziko dira Kontseilu Arau-emailearen bulegoetan, produkzio eremuko udaletan diren eskualde Bulegoetako lokaletan eta produkzio eremuko udaletan, eta baita Nafarroako Aldizkari Ofizialean argitaratuz ere.
Kontseilu Arau-emaileak hartzen dituen erabaki eta ebazpenen aurka bidezko da Nafarroako Gobernuko Nekazaritza, Abeltzaintza Eta Elikadura Departamentuari gora jotzeko errekurtsoa zuzentzea, hilabeteko epean, azaroaren 26ko 30/1992 Legearen arabera.
40. artikulua. Sekretutasuna.
Kontseilu Arau-emaileak, haren osakideek eta kontrol, kudeaketa eta ziurtapen organo guztiek, eta organo hortako kide guztiak, beharturik daude erabateko sekretuan edukitzera beren kudeaketa, kontrol eta ziurtapen jardueretan jaso edo ezagutu dituzten informazio eta datuak.
VII. KAPITULUA. Arau-hausteak, zehapenak eta zehapen prozedura
41. artikulua. Legezko oinarria.
1. Zehapen espedienteen arloan egin beharreko ekintza guztiak Erregelamendu honetako arauei lotuko zaizkie, eta baita ere beste hauei ere: Mahastiaren, Ardoaren eta Alkoholen Estatutuaren abenduko 2aren 25/1970 Legea, eta bere Erregelamendua, martxoaren 23ko 835/1972 Dekretuaz onetsia; ekainaren 22ko 1945/1983 Errege Dekretua, kontsumitzailearen defentsaren arloko eta nekazaritzako elikagaien ekoizpenareneko arau-hausteak eta zehapenak arautzen dituena; Administrazio Publikoen Araubide Juridikoari eta Guztientzako Administrazio Prozedurari buruzko azaroaren 26ko 30/1992 Legea, urtarrilaren 13ko 4/1999 Legeak aldatua; 369/1997 Foru Dekretua, abenduaren 9koa, nekazaritzaren, abeltzaintzaren eta nekazaritzako elikagaien arloetan zehapenak ezartzeko administrazio prozedura onesten duena; eta, horren osagarri, abuztuaren 4ko 1393/1993 Errege Dekretua, zehapen ahalmena gauzatzeko prozedurari buruzko Erregelamendua onesten duena; eta gai honi buruz indarrean diren gainerakoak.
2. Aurreko arauak aplikatzeko, kontuan hartuko da nekazaritza, abeltzaintza eta mendi arloan Estatuko Administrazioak Nafarroako Foru Komunitateari eginkizunak eta zerbitzuak eskualdatzeari buruzko abenduaren 18ko 2654/1985 Errege Dekretuak esaten duena.
42. artikulua. Zehapen motak.
"Tuterako Orburua" delako Adierazpen Geografiko Babestuaren erregistroetan inskribatu pertsonek Erregelamendu honetan, kasurako diren beste arauetan eta haien osagarrizko xedapenetan agintzen dena ezertan betetzen ez badute, hori administrazio arau-haustetzat hartuko da. Arau-hausteak arinak, larriak edo oso larriak izan daitezke.
A) Administrazio arau-hauste arinak dira, oro har deklarazioetan, nahitaezko kontrol dokumentuetan eta produktuaren kalitatea bermatzeko beste dokumentuetan datu okerrak jartzeari buruzkoak; bereziki, kasu hauek:
1. Erregistroetan kasu bakoitzean beharrezkoak diren datu eta egiaztagirietan datu okerrak ematea edo behar direnak ez ematea.
2. Kontseilu Arau-emaileari berehala ez adieraztea erregistroetan inskribatzean emandako datuetan gertatutako edozein aldaketa.
3. Produktuen ekoizpenari edo mugimenduari buruzko daturik ez ematea edo datu okerrak ematea.
4. Etiketetan, iragarkietan edo bestelako dokumentuetan datu oker edo debekaturik jartzea.
5. Ikuskatze lana trabatzea.
Honakoak hartzen dira trabatze egintzatzat:
a) Ikuskatzaileei finkan edo establezimenduan sartzea edo gelditzea ukatzea.
b) Dokumentazioa aurkeztu nahi eza, edo salgaiak, makinak, prozesuko produktuak, instalazioak edo ikuskatu beharreko beste edozein elementuren aztertzea trabatu edo galaraztea.
c) Ikuskatze lanerako interesatuen edozein ez-egite edo erresistentzia.
6. Beste edozein formazko ez-betetze, arau-hauste larritzat edo oso larritzat hartzen ahal ez bada.
B) Honakoak hartuko dira babespeko orburuak manipulatzearen, prestatzearen eta ezaugarrien gaineko Erregelamenduak agintzen duenaren kontrako administrazio arau-hauste larritzat:
1. Produktua manipulatu, prestatu, kontserbatu eta garraiatzearen gaineko higiene arauak ez betetzea.
2. Erregelamenduak espresuki debekatu dituen jardunbideak erabiltzea.
3. Eremu baimenduaz landara produzitu orburuak erabiltzea, edo erregistrokoak ez beste lurzati batzuetakoak, babespeko orburuak merkaturatu edo prestatzeko.
4. Urtebetean arau-hauste arin bat baino gehiago egitea.
C) Administrazio arau-hauste oso larritzat hartuko dira Adierazpen Geografiko Babestuaren erabilera okerra eta deitura horri kaltea edo izen-galtzea ekartzeko moduko egintzak.
1. Adierazpen Geografiko Babestuari dagozkion sozietate izen, izen komertzial, marka, sinbolo edo enblemak erabiltzea babesaz kanpoko orburuak merkaturatzeko, edo lege indardunek eta Erregelamendu honek ezarri dituzten arauen arabera produzitu ez diren orburuetan edo nahitaez eduki behar dituzten ezaugarri eta baldintza organoleptikoak ez dituztenetan.
2. Babespeko orburuak Erregelamenduak onetsi dituenak ez bezalako ontzi edo formetan banatu, kaleratu edo merkaturatzea.
3. Kontseilu Arau-emaileak onetsi gabeko izen komertzialak, markak edo etiketak erabiltzea.
4. Adierazpen Geografiko Babestuaren dokumentuak, etiketak, zigiluak eta abar bidegabezki eduki, negoziatu edo erabiltzea, eta bai faltsutzea ere.
5. Ontzietan edo merkaturatze bideetan aipatzen den kalitatekoak ez diren orburu fresko nahiz kontserbakoak merkaturatzea.
6. Babespeko produktuak etiketatzea kasuko erregistrokoak ez beste lokal batzuetan.
7. 38.1.1. artikuluak aipatzen dituen ordainarazpen parafiskalak, ordainarazpen horietako bakoitzaren Subjektu pasiboek ez pagatzea.
8. Urtebetean arau-hauste larri bat baino gehiago egin izana.
9. Oro har, Erregelamendu honek agintzen dionari edo Kontseilu Arau-emailearen erabakiei kontra egiten dien edozer egintza, Adierazpen Geografiko Babestuari kaltea edo izen-galtzea ekarri edo erabilera okerra sortzen diona.
43. artikulua. Zehapenak.
Aurreko artikuluan tipifikatu arau-hausteak honela zehatuko dira:
a) Arau-hauste arinek, ohartarazpena edo isuna hartuko dute, 38. artikuluan plantazioetarako eta produktu fresko nahiz prestatuetarako finkatzen duen oinarriaren % 1etik %10era bitartekoa, haustea zeren gainekoa izan den.
b) Arau-hauste larriek isuna hartuko dute, kasuko produktuen balioaren %2tik %20ra bitartekoa; produktu bukatua baldin bada, produktua bahituko da.
44. artikulua. Zehapenen mailaketa.
Aurreko artikuluetan aurrez ikusitako zehapenak aplikatzeko, honako arau hauek hartuko dira kontuan:
1. Behereneko mailakoak ezarriko dira.
a) Erregelamendua betetzean egindako oker txikiak direnean, kontsumitzaileentzat zuzeneko ondoriorik ez dutenean edo arau-hausleari etekin berezirik ematen ez diotenean.
b) Asmo txarrik ez dela izan frogatzen bada.
2. Bitarteko mailakoak ezarriko dira:
a) Arau-hausteak kontsumitzailearentzat zuzeneko ondorioa duenean edo arau-hausleari etekin bereziak ematen dizkionean.
b) Arau-haustea zabarkeriagatik eta Kontseilu Arau-emaileak espresuki erabakitako jokabide-arauak ez betetzeagatik gertatzen denean.
c) Behereneko eta goreneko mailako zehapenak aplikatzea bidezko ez den kasu guztietan.
Goreneko mailan ezarriko dira:
a) Asmo txar argia frogatzen denean.
b) Ikuskatze prozedurak edo ikuskatzaileen lana trabatzen direnean.
c) Arau-haustearen ondorioz kalte handiak sortzen badira kontsumitzaileentzat, Adierazpen Geografiko Babestuarentzat edo bertan inskribatuentzat.
4. Zilegi izanen da salgaia bahitzea zehapen bakartzat, edo osagarrizko zehapentzat, kasua kasu.
Salgaia ezin denean bahitu, zehapenaren ordez isuna jarriko da, bahitu behar ziren salgaien balio berekoa.
5. Nekazaritza, Abeltzaintza eta Elikadura Departamentuak zilegi izanen du Nafarroako eta Estatuko Aldizkari Ofizialetan argitaratzea ezarritako zehapenak, ororen ikasgarri.
45. artikulua. Berriro eginiko arau-hausteak.
1. Arau-haustea berriro egiten bada, Erregelamendu honetan xedatzen diren gehieneko isunen % 50ean gehitutako isunak jarriko dira, lege indardunek agintzen dituzten zehapenak ezertan galarazi gabe.
2. Arau-haustea berriro egin duenak, handik aurrera, gehiagotan egiten baditu arau-hausteak, zilegi izanen da isunak gehieneko horien halako hirukoak izatea.
3. Arau-hauste bat berriro egina dela juzgatuko da hauslea Erregelamendu honetako arau-hauste batengatik aurreko urtean ebazpen irmo baten bidez zehapena hartutakoa bada..
4. Arau-hauslea industria bat izan bada eta 2. puntuak aipatzen dituen inguruabarrak gertatzen badira, zilegi izanen da Adierazpen Geografiko Babestua erabiltzeko eskubidea etetea gehienez urtebeterako.
46. artikulua. Espedienteak irekitzea.
1. Zehapen espedientea irekitzea eta instrukzioa egitea Kontseilu Arau-emaileari dagokio, arau-hauslea haren erregistroetakoren batean inskribatua baldin bada.
2. Erregelamendu honetan xedatutakoaren kontra egindako arau-hausteak Nafarroako Foru Komunitateko lurraldean egoitza duten eta Kontseilu Arau-emailearen erregistroetan inskribatuak ez diren enpresek egiten badituzte, Nekazaritza, Abeltzaintza eta Elikadura Departamentuari dagokio espedientea irekitzea eta haren instrukzioa egitea.
47. artikulua. Espedienteen ebazpena.
1. Irekitako espedienteen ebazpena Kontseilu Arau-emaileari dagokio bere esparruan, zehapena 50.000 pezetatik gorakoa ez bada. Gainerako kasuetan, bai eta zehatua erregistroetan inskribatua ez badago ere, Kontseilu Arau-emaileak Nekazaritza, Abeltzaintza eta Elikadura Departamentuari haren berri emanen dio eta jarduketak hari igorriko.
Produktuen behin betiko bahitzearen erabakia espedientea ebazteko ahalmena duenari dagokio.
2. Arau-haustea Adierazpen Geografiko Babestuaren erabilera bidegabea bada, Kontseilu Arau-emaileak, bidezko diren jarduketak eta ondorengo zehapen administratiboak ezertan galarazi gabe, Auzitegira jo dezake, jabetza industriala babesteko legerian onartutako akzio zibil eta penalak gauzatzeko.
48. artikulua. Preskripzioa.
Erregelamendu honen kontrako arau-hausteek bost urteren buruan preskribitzen dute. Hortaz, babespeko produktuen gaineko dokumentazio guztia kontserbatu egin beharko da epe horretan.
