(Edukira Joan)

navarra.es

Castellano | Euskara | Français | English

Kartografia :
- 1320/1998 Foru Agindua, apirilaren 2koa, Herrilan, Garraio eta Komunikazio kontseilariak emana, euskarri digitaleko informazio kartografikoaren erabilera arautu eta Kartografiaren Ohiko Erabiltzaile kategoria ezartzen duena

Edukirako tresnak

Ezagutzera eman

1320/1998 Foru Agindua, apirilaren 2koa, Herrilan, Garraio eta Komunikazio kontseilariak emana, euskarri digitaleko informazio kartografikoaren erabilera arautu eta Kartografiaren Ohiko Erabiltzaile kategoria ezartzen duena

(1998ko 56. NAOn argitaratutako testua, maiatzaren 11n)

Atarikoa

Herrilan, Garraio eta Komunikazio Departamentuari dagokio, urtarrilaren 12ko 2/1998 Foru Dekretuan agindutakoaren arabera, Herrilan Zerbitzuak prestatzen duen euskarri digitaleko informazio kartografikoa erabiltzeko baldintzak ezartzea.

Informazioa erabiltzeko esparru orokorra honakoek ezarritakoa izanen da: Jabetza Intelektualaren Legea, apirilaren 12ko 1/1996 Legegintzako Errege Dekretuak onetsitako testu bategina eta, zehazkiago, Foru Agindu honek zehaztutakoa.

Herrilan Zerbitzuak azaldu eta proposatutakoari jarraikiz, eta Nafarroako Foru Komunitateko Gobernua eta Administrazioa arautzen dituen Foru Legearen 36.2 artikuluak emandako ahalmenak erabiliz, agindu dut:

Lehenbizikoa

Herrilan, Garraio eta Komunikazio Departamentuaren euskarri digitaleko informazio kartografikoa erabiltzerakoan, ondoko idazati hauetan xedaturikoa bete beharko da:

1. Jabetza eta ustiapenerako eskubideak.

Nafarroako Foru Komunitateko Administrazioari dagokio Herrilan, Garraio eta Komunikazio Departamentuak prestatutako euskarri digitaleko informazio kartografikoaren jabetza intelektuala, bai eta datuena eta horiei dagozkien datu-baseen diseinuarena ere.

Herrilan, Garraio eta Komunikazio Departamentuak soilik izanen ditu eskubideak euskarri informatikoetan -edozein eratan- agertzen den informazio kartografikoa ustiatzeko eta, bereziki, kopiatze, banaketa, jendaurreko komunikazio eta eraldaketa eskubideak. Ustiapen hori Departamentuaren baimenarekin soilik egin ahalko dute hirugarren batzuek.

2. Kartografiaren erabiltzailea eta ohiko erabiltzailea.

Kartografia digitalaren erabiltzaile da, oro har, Herrilan, Garraio eta Komunikazio Departamentuak prestatutako euskarri informatikoko kartografikoa dokumentuak, entrega edo ordainaren bidez, eskuratu dituen pertsona fisiko edo juridikoa.

Erabiltzaile kontzeptuaren barnean sartzen da Kartografiaren Ohiko Erabiltzailearen kategoria, hots, pertsona fisiko edo juridikoa edo Nafarroako Gobernuaren unitate administratiboa, kalifikazio hori lortu eta dagokion agiria sinatu duena (1 eta 2 Eranskinak). Sinaturiko agiri horren bidez, urtero, dagokion kartografiaren eguneratzeak aditzera emanen zaizkio, agiri horretan eta Foru Agindu honen 5. idazatian ezarritakoaren arabera.

Kartografiaren Ohiko Erabiltzailearen kalifikazioa lortzeko, Herrilan, Garraio eta Komunikazio Departamentuan aurkeztu beharko da datu hauek azalduko dituen eskaria:

a) Nafarroako Gobernuaren unitate administratiboak badira:

-Departamentua

-Eskaera egin duen Zuzendaritza Nagusia

-Harremanetarako pertsona edo unitatea

-Kartografia zein jardueratan erabiliko den

-Eskatu nahi den kartografia

b) Gainerakoetan:

-Eskatzailearen izena eta bi deitura

-Ordezkatzen duen enpresa edo entitatea

-IFZ

-Helbidea

-Harremanetarako pertsona

-Kartografia zein jardueratan erabiliko den

-Eskatu nahi den kartografia

Eskabide horretan oinarriturik eta dagokion Zerbitzuaren txostena ikusirik, Herrilan zuzendari nagusiak, bidezkoa bada, Ebazpena emanen du, Kartografiaren Ohiko Erabiltzailearen kalifikazioa emateko interesatuari; kasu horretan dagokion agiria sinatuko da (Foru Agindu honen 1 eta 2 Eranskinak).

3. Euskarri digitaleko informazio kartografikoa erabiltzeko baldintzak.

Informazioaren erabilera arautzen dutenak, oro har, Jabetza Intelektualaren Legea, apirilaren 12ko 1/1996 Legegintzako Errege Dekretuak onetsitako testu bategina eta, zehazki, honako baldintza hauek dira:

a) Erabiltzaileak, Herrilan, Garraio eta Komunikazio Departamentutik eskuratu edo jasotzen duen euskarri informatikoko informazio kartografikoa modu mugatu, besterenezin eta ez-esklusiboan erabil dezake.

b) Erabiltzaileak ezin izanen du, inolaz ere, eskuraturiko informazio osoaren edo zatiren baten kopia, erreprodukzio edo lagapenik egin, ez berak zuzenean ez hirugarren baten bidez ere, bere jarduerarendako behar- beharrezkoa denean izan ezik. Azken kasu honetan, egindako kopietan jarri beharko du marka erregistratua, "Copyright" oharra edo eskuraturiko euskarri informatikoetan azaltzen den legezko beste edozein ohar, eta horixe bera egiten dituen segurtasun kopia guztietan ere.

c) Erabiltzaileak hitz ematen du ez dizkiela hirugarren baimendu gabeei emanen paperean edo beste euskarri fisiko batean egindako kopiak, bere jardueraren garapenak eskatzen dituenak izan ezik, aurreko letran ezarritakoaren arabera.

Halaber, erabiltzaileak ez die hirugarren batzuei errentan eman, utzi, partekatu edo besterenduko informazio kartografikoa, euskarri informatikoetan edo kopietan, baldin eta hirugarren horiek Herrilan, Garraio eta Komunikazio Departamentuaren baimenik ez badute.

d) Erabiltzailea izanen da Nafarroako Foru Komunitateko Administrazioaren jabetza intelektuala beti babesteko beharrezkoak diren neurriak hartzearen erantzule. Halaber, beretzat lan egin, zuzendu edo kontrolatzen dituen pertsona guztiei jakinarazi edo aditzera eman beharko dizkie erabilerako baldintzetan dauden mugak.

Informazio kartografikoari erabilera okerra eman eta Nafarroako Foru Komunitateko Administrazioaren jabetza intelektualeko eskubideak urratzen badira edo horiendako arrisku argia sortzen bada, erabiltzaileak horren berri eman beharko dio, berehala, Herrilan, Garraio eta Komunikazio Departamentuari.

e) Erabiltzaileak izanen du erantzukizuna toki seguruan gorde eta zaintzeko Herrilan, Garraio eta Komunikazio Departamentuak emandako euskarri informatikoak, bai eta egiten dituen segurtasun kopiak ere.

Euskarri informatikoak ebatsi edo galdu egiten badira, erabiltzaileak horren berri eman beharko dio, berehala, Herrilan, Garraio eta Komunikazio Departamentuari.

f) Herrilan, Garraio eta Komunikazio Departamentuak emandako informazio kartografikoan oinarriturik egiten diren txosten, azterlan eta proiektuetan, egilea departamentu hori dela aipatu beharko du erabiltzaileak.

4. Erabilera baldintzak ez betetzea.

Azaldu diren baldintzak betetzen ez badira, Nafarroako Foru Komunitateko Administrazioak, Herrilan, Garraio eta Komunikazio Departamentuaren bitartez, hauetarako eskubidea izanen du: kalte eta galeren ondoriozko kalteordaina eskatzeko; agintari eskudunei eskatzeko zilegi ez den jarduera uzteko agindua eman dezaten, bai eta indarra duen legerian jabetza intelektualaren kontrako delituetarako aurreikusita dauden kautelazko neurriak hartu eta zigorrak ezar ditzaten ere.

5. Eguneratzeak.

Urtero, martxoaren 30a baino lehen, Herrilan Zerbitzuak Kartografiaren Ohiko Erabiltzaileei aditzera emanen dizkie sinaturiko kalifikazio agiriaren arabera beren interesekoak diren arloetan aurreko urtean egin diren eguneratzeak.

Kartografiaren Ohiko Erabiltzaileak, apirilaren 30a baino lehen, aditzera eman beharko du eguneratze hori osorik edo horren zati bat jasotzeko ados dagoen; hala bada, indarra duten prezioen zenbatekoa ordaindu beharko du.

Eskatutako eguneratzeak maiatzaren 30aren aurretik eskuratu ahalko ditu.

6. Erantzukizunen mugak.

Emandako dokumentazioan Herrilan, Garraio eta Komunikazio Departamentuari egozten ahal zaion akatsik izanez gero, horren erantzukizuna beste bertsio bat ematea soilik izanen da, beti ere erabiltzaileak akatsa duen dokumentua itzultzen badu eman zitzaion egunetik hasita 60 eguneko epean.

Erabiltzaileak atzeman eta jakinarazitako akatsa funtsezkoa bada, eta ezin bada konpondu dokumentazioa itzuli eta 90 eguneko epean, erabiltzaileak eskubidea izanen du egindako erosketaren zenbatekoa itzul dakion.

Bigarrena

Foru Agindu honetan kartografia digitalaren horniketa eta erabilerari buruz ezarritako araubide horixe aplikatuko zaio, halaber, Herrilan, Garraio eta Komunikazio Departamentuarekin banaketarako hitzarmena duten beste Kartografi Zerbitzu batzuek prestaturiko informazio kartografiko digitalari. Kasu horretan, Kartografi Zerbitzuak hartuko du Herrilan, Garraio eta Komunikazio Departamentuaren posizioa, Foru Agindu honen ondorioetarako.

Hirugarrena

Euskarri digitaleko Kartografiaren Ohiko Erabiltzailearen kalifikaziorako inprimaki ereduak onestea (Foru Agindu honen 1 eta 2 Eranskinak).

Laugarrena

Foru Agindu hau Nafarroako Aldizkari Ofizialean argitaratzea. Argitaratu eta biharamunean hartuko du indarra Foru Agindu honek.

1. ERANSKINA

Herrilan, Garraio eta Komunikazio Departamentua

Herrilan Zerbitzua

Kartografi Atala

KALIFIKAZIO AGIRIA

KARTOGRAFIAREN OHIKO ERABILTZAILEA

Erabiltzailearen datuak

Izena eta bi deitura:

Enpresa edo Entitatea: ............................. NAN / IFZ

Helbidea ......................... Herria ................... Probintzia

Harremanetarako pertsona:

Kartografia zein jardueratan erabiliko den:

KARTOGRAFIA DIGITALA

Dokumentazio kartografikoa

Erabiltzaileak adierazten du euskarri digitaleko informazio kartografikoa erabiltzeko baldintzen berri baduela, onartzen dituela eta bete ere eginen dituela. Baldintza horiek Herrilan, Garraio eta Komunikazio kontseilariak emandako Foru Aginduaren bidez onetsi dira eta Foru Agindu horren testua inprimaki honi erantsia dago.

(Sinadura)

Iruñean, .......(e)ko .......... aren .......(e)an

2. ERANSKINA