navarra.es
Castellano | Euskara | Français | English
Ezagutzera eman
196/1996 Foru Dekretua, apirilaren 29koa, animalien babesari buruzko maiatzaren 31ko 7/1994 Foru Legea garatzetik heldu diren eskumenak Ingurugiro, Lurraldearen Antolamendu eta Etxebizitza Departamentuaren eta Osasun Departamentuaren esku uzten ...
196/1996 FORU DEKRETUA, apirilaren 29koa, animalien babesari buruzko maiatzaren 31ko 7/1994 Foru Legea garatzetik heldu diren eskumenak Ingurugiro, Lurraldearen Antolamendu eta Etxebizitza Departamentuaren eta Osasun Departamentuaren esku uzten dituena
(1996ko 62. NAOn argitaratutako testua, maiatzaren 22an)
Atarikoa
Animalien babesari buruzko maiatzaren 31ko 7/1994 Foru Legeak bera aplikatzetik heldu diren hainbat eginkizun eta zerbitzu ezartzen ditu eta kasu batzuetan Nafarroako Administrazio Publikoen esku uzten dira eta, beste batzuetan, Foru Komunitateko Administrazioko Departamentu eskudunaren esku.
Eginkizunak eskuordetzea eta, era berean, Foru Lege horren Lehen Xedapen Iragankorrean xedatutakoarekin bat eraginkortasun osoa lortzeko burutu beharreko arauen garapena, gehienetan modu orokorregian aipatzen da Foru Lege honetan eta adierazi gabe etxeko eta laguntzako animaliak modu egokienean babesteko eginkizunak zehazki zein organori dagozkion.
Beraz, maiatzaren 31ko 7/1994 Foru Legearen xedapenen esparruan bidezko da haren garapenetik heldu diren administrazio eginkizunetan zein diren Departamentu eskudunak zehaztea. Hortaz Osasun Departamentuaren esku uzten dira osasun publikoa babestearekin zerikusia duten animalien babeserako iharduketak, zoonosiaren kontra eta, oro har, gizakietan etxeko eta laguntzako animaliekiko kontaktuarekin gertatzen diren eritasun kutsakorren kontra, zeinak Osasunari buruzko azaroaren 23ko 10/1990 Foru Legearen 13.a) artikuluan xedatutakoaren arabera osasun administrazioei baitagozkie. Alde horretatik, Osasun Departamentua elkar lanean arituko da toki entitateekin animalien babesaren arloan dituzten eskumenetan, osasuna babesteko programen garapenerako lagungarri izan daitezkeen guztietan.
Era berean, komenigarria dela juzkatzen da esperimentazioan, ikerketa zientifiko edo hezkuntzakoan erabiltzen diren animaliak babesteko eginkizunak Departamentu beraren esku uztea, helburu behinenak eritasuna ezagutzea, osasun arloko irakaskuntza edo esperimentazioa direnean, prozedura diagnostikoak, aurrea hartzekoak edo terapeutikoak ebaluatzeko xedearekin eta, beti ere, gizakia helburu dutela.
Bestalde, Ingurugiro, Lurraldearen Antolamendu eta Etxebizitza Departamentuaren esku uzten dira animalien babesari buruzko Foru Legea garatzetik heldu diren eginkizun guztiak, besteak beste, arlo honetan Nafarroako Foru Komunitateko Administrazioari dagokion zehapen ahalmena.
Horrenbestez, Ingurugiro, Lurraldearen Antolamendu eta Etxebizitza kontseilariak eta Osasun kontseilariak proposatuta, eta Nafarroako Gobernuak mila bederatziehun eta laurogeita hamaseiko apirilaren hogeita bederatziko bilkuran hartutako Erabakiarekin bat etorriz, dekretatu dut:
1. artikulua
1. Ingurugiro, Lurraldearen Antolamendu eta Etxebizitza Departamentuak animalien babesari buruzko maiatzaren 31ko 7/1994 Foru Legea garatu eta aplikatzetik heldu diren ahalmen eta eginkizun hauek izanen ditu:
a) Giza kontsumorako ez diren animaliak hiltzeari buruzko arauzko xedapenetarako proposamenak prestatzea, bai eta horien kontrola eta exekuzioa ere.
b) Lagun egiteko animaliak hazi edo saltzeko instalazioak erregistratu eta kontrolatzea.
c) Animalien babes eta defentsarako elkarteak erregistratzea, horiek entitate laguntzaile gisa hartzearen ondorioak ere barne direla.
d) Animaliei tiro egiteko lehiaketetan aldez aurreko baimen administratiboa.
e) Baimen administratiboa Nafarroan animaliekin eszenak filmatu aurretik, gero erakustaldietan ikusentzunezko bitartez emateko badira, hala nola zinean, telebistan, bideoan, baldin eta animalienganako krudelkeria, tratu txarra edo sufrimendua badakarte.
f) Jaso diren animaliak alojatzeko baimentzen diren establezimenduak erregistratzea, horiek aldian behin kontrolatzea eta lagun egiteko animalien aldi baterako mantenimendurako instalazioen titularrek eta animalien haztegi eta saltokietakoek Erregistroan zein datu bete behar dituzten zehaztuko duten erregelamenduen proiektuak prestatzea.
g) Arau haustearen xede izan diren animaliak bahitzea, bai eta animalien babesaren arloan egin arau hausteetan erabilitako ehizarako edo harrapatzeko tresnak ere.
h) Iharduketa subsidiarioa Udalerriei dagokienez, begiratze eta ikuskapeneko zereginetan, animalien babesari buruzko maiatzaren 31ko 7/1994 Foru Legearen 23.1 artikulua aplikatuz.
i) Estatu espainolean indarrean diren hitzarmen eta itun nazioartekoek babespeko edo galtzeko arriskuko deklaratu dituzten fauna autoktono eta aloktonoaren espezieak bahitzea eta ondoren zaindu eta ingurune naturalean askatzea edo, ezin baldin bada, legez baimenduta dauden erakunde zoologiko zientifikoen esku uztea.
j) Animalia babestuak beren ingurune naturalean askatzea luzaroan toki itxian edukitzea arriskutsua baldin bada haien bizirako.
k) Maiatzaren 31ko 7/1994 Foru Legea aplikatuz ireki behar diren zehapen espedienteen instrukzioa eta ebazpena, zuzenean fauna aloktonoaren babesbidearen kontrako arau hausteetan edo Foru Komunitateko Administrazioaren baimen administratiborik gabe aritzeagatik edo horiek hausteagatik, edo modu subsidiarioan, Udalek iharduten ez badute animalia etxekoen eta lagun egitekoen kontra egindako arau hausteetan.
l) Administrazio zehapenen eguneratzea, animalien babesaren arloan.
m) Artikulu honetan ezarritako eskumenen arloan animaliak babestu eta defenditzeko elkarteekiko harremanak.
n) Maiatzaren 31ko 7/1994 Foru Legea aplikatzetik heldu diren beste eginkizunetatik edozein, nahiz eta ondoko artikuluan ez aipatu.
2. Aurreko zenbakian aipatzen diren eginkizun administratibo eta exekuziozkoak Ingurugiro Zuzendaritza Nagusiak burutuko ditu.
2. artikulua
1. Osasun Departamentuak animalien babesari buruzko maiatzaren 31ko 7/1994 Foru Legea garatu eta aplikatzetik heldu diren ahalmen eta eginkizun hauek izanen ditu:
a) Giza kontsumorako animaliak hiltzeari buruzko arauzko xedapenetarako proiektuak prestatzea, bai eta horien osasun kontrola eta exekuzioa ere.
b) Esperimentazioan, ikerketa zientifiko eta hezkuntzakoan animaliak erabiltzeari buruzko arauzko xedapenetarako proiektuak prestatzea, horien helburu behinenak eritasunak ezagutzea, osasun arloko irakaskuntza edo entsegu klinikoak eta esperimentazioa direnean, prozedura diagnostikoak, aurrea hartzekoak edo terapeutikoak ebaluatzeko xedearekin eta, beti ere, gizakia helburu dutela.
c) Lagun egiteko animaliei txertoak jartzeko edo derrigorrezko tratamendurako kanpainen antolamendua eta antropozoonosiaren kontrako aurreneurriak hartzeko programak garatzea, eta iharduketa horien kontrola.
d) Arlo honetan Administrazio Publikoek dituzten betebeharren esparruan, udalekiko edo pertsona fisiko nahiz juridikoekiko adostasuna eta lankidetza, abandonatutako edo administratiboki bahitutako lagun egiteko animaliak jasotzeko, edukitzeko eta zaintzeko.
e) Animalien babes eta defentsarako elkarteekiko harremanak, artikulu honetan ezarri eskumenen esparruan.
f) Zakurren udal zentsu eta identifikazioaren gaineko arauen garapena, arlo horretan udalekin izan beharreko koordinazioa eta Nafarroako Foru Komunitatean identifikatutako zakurren erregistroa.
g) Arauak garatzeko proposamena egitea eta lagun egiteko animalien isolamendua, bahitura edo dekomisoa agintzeko ahalmena izatea, baldin eta gizakiarentzako gaitz kutsakorrak dutelako susmoa badago edo diagnostiko hori egin bazaie, dela obserbazioan jartzeko diagnosia egitearren edo tratamendu sendagarri egokia emateko, dela hiltzera emateko, beharrezkoa bada edo hala agintzen bada.
2. Artikulu honen aurreko zenbakian aipatzen diren eginkizun administratibo eta exekuziozkoak Osasun Zuzendaritza Nagusiak burutuko ditu.
Azken Xedapenetako Lehena
Ahalmena ematen zaie Ingurugiro, Lurraldearen Antolamendu eta Etxebizitza kontseilariari eta Osasun kontseilariari Foru Dekretu honen garapenerako beharrezkoak diren xedapenak eman ditzaten nork bere eskumenen esparruan.
Azken Xedapenetako Bigarrena
Foru Dekretu honek indarra hartuko du Nafarroako Aldizkari Ofizialean argitaratu eta hurrengo egunean.
