navarra.es
Castellano | Euskara | Français | English
Ezagutzera eman
144/2008 Foru Agindua, apirilaren 11koa, Landa Garapeneko eta Ingurumeneko kontseilariak emana, nekazaritzako politika bateratuaren arloko zuzeneko laguntzen eta landa garapeneko laguntzen baldintzazkotasunaren esparruan eskumena duten kontrol ...
144/2008 FORU AGINDUA, apirilaren 11koa, Landa Garapeneko eta Ingurumeneko kontseilariak emana, nekazaritzako politika bateratuaren arloko zuzeneko laguntzen eta landa garapeneko laguntzen baldintzazkotasunaren esparruan eskumena duten kontrol agintaritzak esleitzen dituena.
Kontseiluaren irailaren 29ko 1782/2003 (EE) Erregelamenduak nekazaritzako politika bateratuaren esparruan zuzeneko laguntzak jasotzeko araubideei aplikagarri zaizkien xedapen komunak ezartzen ditu. Erregelamendu horretan adierazten da zuzeneko ordainketak jasotzen dituzten nekazari eta abeltzain guztiek erregelamendu haren III. eranskinean aipatzen diren kudeaketa arloko legezko betebeharrak eta IV. eranskinean jasotzen diren nekazaritzako eta ingurumeneko baldintza egokiak bete behar dituztela.
Batzordearen 2004ko apirilaren 21eko 796/2004 (EE) Erregelamenduaren 9. artikuluak Kontseiluaren 1782/2003 (EE) Erregelamenduan ezarritako baldintzazkotasuna, modulazioa eta kudeaketa eta kontrol sistema integratua aplikatzeko xedapenak ezartzen ditu. Artikulu hari jarraikiz, estatu kideek baldintzazkotasunaren betetzearen kontrol eraginkorra bermatzen duen sistema ezarri behar dute. Sistema horretan esku hartuko dute, behar izatera, kontrol agintaritza eskudun batek edo gehiagok, koordinazioaz arduratzen den agintaritza batek eta erakunde ordaintzaileak. Kontrol agintaritza eskudunari dagokionez, erregelamenduaren 42. artikuluak ezartzen du kontrol erakunde espezializatu bat izaten ahalko dela, edo erakunde ordaintzailea bera, baldin eta azkeneko horrek berma badezake kontrol horiek kontrol erakunde espezializatu batek egiten dituenean bezain eraginkorrak izanen direla.
Kontseiluaren 2005eko irailaren 20ko 1698/2005 (EE) Erregelamenduak, landa garapenari Landa Garapeneko Nekazaritzako Europako Funtsaren bidez (LGNEF) laguntzekoak, ezartzen duenez, 36. artikuluko a) letrako i) ataletik v) atalera eta b) letrako i), iv) eta v) ataletan ezarritako laguntzen onuradunek 1782/2003 (EE) Erregelamenduaren 4. eta 5. artikuluetan eta III. eta IV. eranskinetan ezarritako nahitaezko baldintzak bete beharko dituzte ustiategi osoan.
Batzordearen 2006ko abenduaren 7ko 1975/2006 (EE) Erregelamenduak, Kontseiluaren 1698/2005 (EE) Erregelamendua aplikatzeko xedapenak ezartzen dituenak, landa garapenari laguntzeko neurriak kontrolatzeko prozedurari eta haien baldintzazkotasunari dagokienez, ezartzen du baldintzazkotasuntzat joko direla landa garapeneko programetan zehazten diren ongarri eta gai fitosanitarioen erabileraren gaineko gutxieneko betekizunak, 1782/2003 (EE) Erregelamenduaren III. eta IV. eranskinetan aipatzen diren kudeaketa arloko legezko betekizunez eta nekazaritzako eta ingurumeneko baldintza egokiez gain.
Nekazaritzako politika bateratuaren esparruko zuzeneko laguntzen baldintzazkotasuna aplikatzeari buruzko abenduaren 23ko 2352/2004 Errege Dekretuak ezartzen duenez, Nekazaritza Bermatzeko Espainiako Funtsa arduratuko da baldintzazkotasun kontrolen koordinazio sistemaz eta autonomia erkidegoetako organo eskudunek izendatuko dituzte, beren lurraldean kontrolaz arduratzen diren agintariak diren aldetik, kasuan kasuko kontrol organo edo erakundeak.
Urtarrilaren 17ko 10/2005 Foru Dekretuaren bidez, Nafarroako Foru Komunitatean banatu ziren nekazaritzako politika bateratuaren zuzeneko laguntzen baldintzazkotasuna kontrolatzeko eskumenak eta organo eskuduntzat ezarri ziren Nekazaritza, Abeltzaintza eta Elikadura Departamentua eta Ingurumen, Lurraldearen Antolamendu eta Etxebizitza Departamentua.
Nafarroako Gobernuko lehendakariak abuztuaren 16an eman zuen 12/2007 Foru Dekretuaren bidez, departamentuen egitura berria ezarri zen. Haren arabera, Ingurumen, Lurraldearen Antolamendu eta Etxebizitza Departamentua eta Nekazaritza, Abeltzaintza eta Elikadura Departamentua desagertu, eta Lurraldearen Antolamendu eta Etxebizitza Departamentua eta Landa Garapeneko eta Ingurumeneko Departamentua sortu ziren.
Abuztuaren 20ko 57/2007 Foru Dekretuak ezarritako Landa Garapeneko eta Ingurumeneko Departamentu berriaren oinarrizko egituraren barnean dago, besteak beste, Ingurumenaren eta Uraren Zuzendaritza Nagusia. Zuzendaritza horrek lehengo Ingurumen, Lurraldearen Antolamendu eta Etxebizitza Departamentuko Ingurumeneko Zuzendaritza Nagusia ordezkatu, eta haren eskumenak bere gain hartu ditu.
Baldintzazkotasunaren esparruko eskumenak banatzeari buruzko urtarrilaren 17ko 10/2005 Foru Dekretua inplizituki indargabetuta dago, 57/2007 Foru Dekretuaren xedapen indargabetzaile bakarrean xedatutakoari jarraikiz. Hortaz, bidezko da nekazaritzako politika bateratuaren arloko zuzeneko laguntzen eta landa garapeneko laguntzen baldintzazkotasunaren esparruan eskumena duten kontrol organoak esleitzea.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak eman dizkidan eskumenak erabiliz,
AGINDU DUT:
1. artikulua. Baldintzazkotasunaren esparruko kontrol agintaritza eskudunak.
1. Batzordearen 796/2004 (EE) Erregelamenduaren 42. artikuluaren arabera, hauek dira nekazaritzako politika bateratuaren arloko zuzeneko laguntzen eta landa garapeneko laguntzen baldintzazkotasunaren esparruan eskumena duten kontrol organoak:
-Nekazaritza Zerbitzuko Ikuskapen Atala.
-Nekazaritza Zerbitzuko Landareen Ekoizpen eta Osasun Atala.
-Abeltzaintza Zerbitzua.
-Biodibertsitatea Zaintzeko Zerbitzua.
2. Organo horiek, kontrol agintaritza eskudun diren heinean, haien ardurapeko kontrola egiteko laginak hautatuko dituzte, betekizunen edo arauen kontrolak eta kontrol txostenak eginen dituzte, eta Batzordearen 796/2004 (EE) Erregelamenduak eta abenduaren 23ko 2352/2004 Errege Dekretuak ezartzen dituzten eginkizunak beteko dituzte.
3. Kontrol agintaritza eskudun bakoitza foru agindu honen eranskinean zehazten diren betekizun edo arauez ardutatuko da.
2. artikulua. Koordinazio agintaritza.
1. Nekazaritza Zerbitzuak koordinatuko ditu Nafarroako Foru Komunitateko baldintzazkotasun kontrolak, Kontseiluaren 1782/2003 (EE) Erregelamenduaren 23.3 artikuluak ezarri bezala.
2. Koordinazio agintaritzak kontrol organo espezializatuei kontrolak egiteko behar duten informazioa emanen die, kontrol txostenak erakunde ordaintzaileari igorriko dizkio, kontrolen foru plana eginen du eta baldintzazkotasuna betetzen den kontrolatzeko ezarritako sistemak behar bezala funtzionatzen duela ziurtatzeko beste edozein eginkizun beteko du.
3. artikulua. Landa Garapeneko eta Ingurumeneko Departamentuak baldintzazkotasunaren esparruan dituen eginkizunak.
Landa Garapeneko eta Ingurumeneko Departamentuak eginkizun hauek izanen ditu:
a) Kontseiluaren 1782/2003 (EE) Erregelamenduaren 3. artikuluan aipatzen den kudeaketa arloko legezko betebeharren eta nekazaritzako eta ingurumeneko baldintza egokien zerrenda nekazariei ematea.
b) Baldintzazkotasunaren betetzearen kontrol eraginkorra bermatzeko prozedurak ezartzea, Batzordearen 796/2004 (EE) Erregelamenduaren 9. artikuluan ezarritakoari jarraikiz.
c) Kontrolen foru plana onestea.
d) Erakunde ordaintzaileak murrizketa eta salbuespenei buruzko ebazpenak emanen ditu, hala badagokio, eta baimendutako murrizketak aplikatuko dizkio eskatzaileari edo lagapen-hartzaileari.
Azken xedapen bakarra. Indarra hartzea.
Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2008ko apirilaren 11n.-Landa Garapeneko eta Ingurumeneko kontseilaria, Begoña Sanzberro Iturriria.
ERANSKINA
Kontrol agintaritza eskudunen ardurapeko betekizunak edo arauak
1. Ikuskapenen Atala:
a) Araudi sektorialetan oinarritzen ez diren nekazaritzako eta ingurumeneko baldintza egokiak.
b) Ingurumenaren esparruan:
-86/278/EEE Zuzentaraua, Araztegiko lohiak nekazaritzan erabiltzen direnean, ingurumena eta, batik bat, lurzoruak babesteari buruzkoa. Gure legedian sartu zen, Nekazaritza sektorean arazketa-lohien erabilera arautzen duen urriaren 29ko 1310/1990 Errege Dekretuaren bidez.
-91/676 /EEE Zuzentaraua, Ura nekazaritzako nitratoek sortutako kutsaduratik babesteari buruzkoa. Gure legedian sartu zen Ura nekazaritzako nitratoek sortutako kutsaduratik babesteko otsailaren 16ko 261/1996 Errege Dekretuaren bidez.
2. Landareen Ekoizpen eta Osasun Atala:
a) Osasun publikoaren, animalien osasunaren eta fitosanitatearen arloan:
-Kontseiluaren 91/414/EEE Zuzentaraua, 1991ko uztailaren 15ekoa, Gai fitosanitarioak merkaturatzeari buruzkoa. Gure legedian sartu zen Gai fitosanitarioak merkaturatu eta erabiltzeko Europar Batasuneko sistema harmonizatua ezarri zuen azaroaren 4ko 2163/1994 Errege Dekretuaren bidez.
-Europako Parlamentuaren eta Kontseiluaren 2002ko urtarrilaren 28ko 178/2002 (EE) Erregelamendua, Elikagaiei buruzko legeen printzipio eta betekizun orokorrak ezarri, Elikagaien Segurtasunerako Europako Agintaritza sortu eta elikagaien segurtasunari buruzko prozedurak finkatzen dituena, nekazaritzako ustiategiei dagokienez.
-Europako Parlamentuaren eta Kontseiluaren 2004ko apirilaren 29ko 852/2004 (EE) Erregelamendua, elikagaien higieneari buruzkoa.
b) Landa garapeneko programetan zehaztutako ongarri eta gai fitosanitarioak erabiltzeko gutxieneko baldintzak.
3. Abeltzaintza Zerbitzua:
a) Osasun publikoaren, animalien osasunaren eta fitosanitatearen arloan:
-Kontseiluaren 92/102/EEE Zuzentaraua, 1991ko uztailaren 15ekoa, Abereak identifikatu eta erregistratzeari buruzkoa. Gure legedian otsailaren 9ko 205/1996 eta martxoaren 26ko 479/2004 errege dekretuen bidez sartu zen. Lehenengoak behi, txerri, ardi eta ahuntz azienda identifikatu eta erregistratzeko sistema ezarri zuen eta bigarrenak abeltzaintzako ustiategien erregistro orokorra ezarri eta arautu zuen.
-Batzordearen 1997ko abenduaren 29ko 2629/97 (EE) Erregelamendua, Europako Parlamentuaren eta Kontseiluaren 1760/2000 (EE) Erregelamendua aplikatzen duena, belarrietako markei, pasaporteei eta abeltzaintzako ustiategietako erregistroei dagokienez. Lehenengo erregelamendu hura Batzordearen 2004ko apirilaren 29ko 911/2004 (EE) Erregelamenduak indargabetu zuen.
-Europako Parlamentuaren eta Kontseiluaren 2000ko uztailaren 17ko 1760/2000 (EE) Erregelamendua, Behi azienda identifikatu eta erregistratzeko sistema, eta behi-aziendaren haragia eta haragi horrekin egindako produktuak etiketatzeko sistema ezartzen dituena eta Kontseiluaren 820/97 (EE) Erregelamendua indargabetzen duena.
-Kontseiluaren 21/2004 (EE) Erregelamendua, 2003ko abenduaren 17koa, Ardi eta ahuntz azienda identifikatu eta erregistratzeko sistema ezartzen duena.
-Kontseiluaren 96/22/EE Zuzentaraua, 1996ko apirilaren 29koa, Abereen hazkuntzan ondorio hormonal eta tireostatikoak dituzten substantzia jakin batzuk eta substantzia beta-agonistak erabiltzea debekatzen duena. Gure legedian azaroaren 12ko 2178/2004 Errege Dekretuaren bidez sartu zen. Dekretu horrek abereen hazkuntzan ondorio hormonal eta tireostatikoak dituzten substantzia jakin batzuk eta substantzia beta-agonistak erabiltzea debekatu zuen.
-Europako Parlamentuaren eta Kontseiluaren 2002ko urtarrilaren 28ko 178/2002 (EE) Erregelamendua, Elikagaiei buruzko legeen printzipio eta betekizun orokorrak ezarri, Elikagaien Segurtasunerako Europako Agintaritza sortu eta elikagaien segurtasunari buruzko prozedurak finkatzen dituena, abeltzaintzako ustiategiei dagokienez.
-Europako Parlamentuaren eta Kontseiluaren 2004ko apirilaren 29ko 853/2004 (EE) Erregelamendua, Animali jatorriko elikagaien higienerako berariazko arauak ezartzen dituena.
-Europako Parlamentuaren eta Kontseiluaren 2004ko apirilaren 29ko 183/2005 (EE) Erregelamendua, Pentsuen higienaren gaineko baldintzak finkatzen dituena.
-Europako Parlamentuak eta Kontseiluak 2001eko maiatzaren 22an emandako 999/2001 (EE) Erregelamendua, Entzefalopatia espongiforme kutsagarri batzuen prebentziorako eta haiek kontrolatu eta desagerrarazteko xedapenak ezartzen dituena.
-Kontseiluaren 1985eko azaroaren 18ko 85/511/EEE Zuzentaraua, Ahoeriaren kontrako borrokan, Europar Batasuneko neurriak ezartzen dituena. Zuzentarau hura, Ahoeriaren kontrako borrokan, Europar Batasuneko neurriak ezartzen dituen Kontseiluaren 2003ko irailaren 29ko 2003/85/EE Zuzentarauak indargabetu zuen. Gure legedian azaroaren 12ko 2179/2004 Errege Dekretuaren bidez sartu zen. Dekretu horrek ahoeriaren kontrako neurriak ezarri zituen.
-Kontseiluak 1992ko abenduaren 17an emandako 92/119/EEE Zuzentaraua, Europar Batasunak abereen zenbait gaixotasunen kontrako neurri orokor batzuk eta txerrien besikulako gaixotasunaren kontra berariazko neurri batzuk hartzen dituena. Gure legedian apirilaren 15eko 650/1994 Errege Dekretuaren bidez sartu zen. Dekretu horrek Europar Batasunak abereen zenbait gaixotasunen kontrako neurri orokor batzuk eta txerrien besikulako gaixotasunaren kontra berariazko neurri batzuk hartu zituen.
-Kontseiluak 2000ko azaroaren 20an emandako 2000/75/EE Zuzentaraua, Ardien katarro-sukarraren kontra borrokatu eta hura desagerrarazteko berariazko xedapenak onesten dituena. Gure legedian azaroaren 8ko 1228/2001 Errege Dekretuaren bidez sartu zen. Dekretu horrek ardien katarro-sukarraren edo ahoeriaren kontra borrokatu eta hura desagerrarazteko berariazko xedapenak onetsi zituen.
b) Animalien ongizatearen arloan:
-Kontseiluaren 91/629/EEE Zuzentaraua, 1991ko azaroaren 19koa, Txahalak babesteko gutxieneko neurriei buruzkoa. Gure legedian maiatzaren 20ko 1047/1994 Errege Dekretuaren bidez sartu zen. Dekretu horrek txahalak babesteko gutxieneko neurriak ezarri zituen.
-Kontseiluaren 91/630/EEE Zuzentaraua, 1991ko azaroaren 19koa, Txerriak babesteko gutxieneko neurriei buruzkoa. Gure legedian urriaren 31ko 1135/2002 Errege Dekretuaren bidez sartu zen. Dekretu horrek txerriak babesteko gutxieneko neurriak ezarri zituen.
-Kontseiluaren 98/58/EE Zuzentaraua, 1998ko uztailaren 20koa, Animaliak abeltzaintzako ustiategietan babesteari buruzkoa. Gure legedian martxoaren 10eko 348/2000 Errege Dekretuaren bidez sartu zen. Dekretu horrek Animaliak abeltzaintzako ustiategietan babesteari buruzko 98/58/EE Zuzentaraua legeetara bildu zuen.
4. Biodibertsitatea Zaintzeko Zerbitzua:
a) Nekazaritza eta ingurumen baldintza onak, haren eskumeneko araudi sektorial batean oinarrituta.
b) Ingurumenaren esparruan:
-Kontseiluaren 79/409/EEE Zuzentaraua, 1979ko apirilaren 2koa, Basa hegaztiak zaintzeari buruzkoa. Gure legedian hauen bidez sartu zen: martxoaren 27ko 4/1989 Legea, Natur guneak eta basa flora eta fauna zaintzeari buruzkoa; abenduaren 7ko 1997/1995 Errege Dekretua, Natur habitaten eta basa fauna eta floraren kontserbazioan oinarrituta biodibertsitateari eusten laguntzeko zenbait neurri ezartzen dituena; irailaren 8ko 1095/1989 Errege Dekretua, Ehizan eta arrantzan harrapa daitezkeen espezieak finkatu eta haiek babesteko arauak ezartzen dituena; eta martxoaren 30eko 439/1990 Errege Dekretua, Espezie mehatxatuen Espainiako katalogoa arautzen duena.
-80/68 /EEE Zuzentaraua, Lurpeko urak kutsaduraren kontra babesteari buruzkoa. Gure legedian apirilaren 11ko 849/1986 Errege Dekretuaren bidez sartu zen. Dekretu horrek Ur jabari publikoari buruzko Erregelamendua onetsi zuen.
-92/43/EEE Zuzentaraua, Natur habitatak eta basa fauna eta flora zaintzeari buruzkoa. Gure legedian hauen bidez sartu zen: martxoaren 27ko 4/1989 Legea, Natur guneak eta basa flora eta fauna zaintzeari buruzkoa; abenduaren 7ko 1997/1995 Errege Dekretua, Natur habitaten eta basa fauna eta floraren kontserbazioan oinarrituta biodibertsitateari eusten laguntzeko zenbait neurri ezartzen dituena.
