navarra.es
Castellano | Euskara | Français | English
Ezagutzera eman
1061/2012 Foru Agindua, abenduaren 24koa, Ekonomia, Ogasun, Industria eta Enpleguko kontseilariak emana, saltoki handietarako zergaren errolda prestatzeko arauak eta zerga kudeatzeko sistemarenak ematen dituena 2012. urterako, saltoki handietarako ..
1061/2012 FORU AGINDUA, ABENDUAREN 24KOA, EKONOMIA, OGASUN, INDUSTRIA ETA ENPLEGUKO KONTSEILARIAK EMANA, SALTOKI HANDIETARAKO ZERGAREN ERROLDA PRESTATZEKO ARAUAK ETA ZERGA KUDEATZEKO SISTEMARENAK EMATEN DITUENA 2012. URTERAKO, SALTOKI HANDIETARAKO ZERGA BAT SORTZEKO AZAROAREN 27KO 23/2001 FORU LEGEA GARATZEKO ASMOZ, ETA 910 EREDUA ONESTEN DUENA
(2013ko 11. NAOn argitaratutako testua, urtarrilaren 17an)
Atarikoa
Saltoki handietarako zerga bat sortzeko azaroaren 27ko 23/2001 Foru Legeak saltoki handietarako zerga ezarri zuen. Zerga horren xedea da merkataritza-guneen eta saltoki handien ahalmen ekonomikoa kargatzea, kanpo-efektu negatiboak sortzen baitituzte, bizitza kolektiboan eragina duten kostu ekonomiko eta sozialak bere gain ez hartzeagatik, bereziki hiriguneetako bilbe eta jarduerei, lurraldearen antolamenduari, ingurumenari eta azpiegiturei dagokienez.
Konstituzio Auzitegiak aurtengo azaroaren 14an emandako epaian ezetsi egin du aipatu foru legearen aurka Gobernuko lehendakariak aurkeztutako konstituziokontrakotasuneko errekurtsoa. Epai hori betetzeko, behin zerga hori abian jartzearen inguruko zalantzak argituta, eta foru lege hori garatu eta aplikatzeko behar diren xedapen guztiak emateko Ekonomia eta Ogasuneko kontseilari gisa dudan ahalmena erabiliz (aipatu 23/2001 Foru Legearen azken xedapenetako bigarrenean xedatzen dena), foru agindu honetan 2012. urteko zerga ordainarazteko ezinbesteko alderdiak arautzen dira, hots, zerga kudeatzeko prozedurarekin eta 2012. urteko zergadunen errolda prestatzearekin zerikusia dutenak.
Zerga kudeatzeko eta bilketa gauzatzeko, 23/2001 Foru Legearen 12. artikuluak Ekonomia eta Ogasun Departamentuari agintzen dio urtero subjektu pasiboen errolda prestatzeko, zerga kudeatzeko eta aplikatzeko behar diren datuak biltzen dituena. Errolda hori Nafarroako Aldizkari Ofizialean argitaratuko da eta lege beraren 15. artikuluan eta saltokien titularrek hasierako aitorpenean emandako datuak oinarri hartuta prestatuko da, xedapen gehigarrian xedatutakoari jarraikiz. Gainera, merkataritzaren eta turismoaren arloetan eskumenak dituzten Nafarroako Gobernuko departamentuek emandako datuak izanen ditu, baita saltokien kokalekuetako udalek emandakoak ere.
Azkenik, 2012. urteko zerga ordainarazteko, aurrekoaz gain, ordaintzeko epea eta modua ezarri behar dira, eta 910 eredua eta bera aurkezteko modua onetsi. Subjektu pasiboek eredu hori datu-aitorpenak egiteko erabiliko dute, baita zorraren ordainketa bankuan helbidera dadin eskatzeko ere. Eredu hori formatu elektronikoan baizik ezin da eskuratu.
Horrenbestez, lege agindu hori betetzeko eta emandako gaikuntzak erabiliz, agindu dut:
I. KAPITULUA. Zergadunen errolda
1. artikulua. 2012. urteko zergadunen errolda prestatzea.
1. Nafarroako Zerga Ogasuna erakunde autonomoko Zuzeneko Tributu, Zehapen eta Errekerimenduen Zerbitzuko Zehapen eta Errekerimendu Atalak 2012. urteko zergadunen errolda presta dezan eta dagokion likidazioa egin dezan, 23/2001 Foru Legeari atxikitako saltoki irekien titularrek 2013ko martxoan aurkeztu beharko dute hasierako datu-aitorpena.
2. Aipatu atalak onetsiko du zergadunen errolda, eta 2013ko maiatzean argitaratuko da Nafarroako Aldizkari Ofizialean.
3. Erroldak subjektu pasibo bakoitzaren datu hauek izanen ditu:
a) Ordainarazten zaion saltokia eta bere helbidea.
b) Saltokiaren titularraren izen-abizenak edo sozietatearen izena.
c) Saltokiaren titularrari dagokion sozietatearen kapitala: osaera eta titulartasuna.
d) Saltokiaren titularrak merkataritzako banaketaren sektorean duen partaidetza-kuota, bai Foru Komunitatean bai Foru Komunitatetik kanpoan.
e) Zerga-oinarria eta likidazio-oinarria.
f) Zerga-tasa.
g) Tributu kuota.
h) Ordaintzeko kopurua eta bankuan helbideratu den ala ez adieraztea.
4. Aipatu atalak kudeatuko du saltoki handietarako zerga, berak prestatutako errolda oinarri hartuta.
2. artikulua. Likidazioen jakinarazpen kolektiboa eta errekurtsoak.
1. Erroldaren argitalpenak bere likidazioak jakinarazteko efektua izanen du, subjektu pasibo bakoitzarentzat.
2. Erroldaren argitalpen horrek datu hauek izanen ditu:
a) Kobratzeko epea.
b) Likidazioen aurka jartzen ahal diren errekurtsoak.
c) Errekurtso horiek ebazteko eskumena duten organoak.
d) Errekurtsoak jartzeko epeak.
3. Erroldaren likidazioak aurkaratzen eta berrikusten ahal dira, Tributuei buruzko Foru Legeak ezartzen dituen printzipioei eta araubideari jarraikiz.
4. Errekurtsoak jartzeko epeak zergadunen errolda argitaratu eta biharamunean hasiko dira.
5. Kobratzeko iragarpena egitearen ordez, banakako jakinarazpenak egiten ahalko dira, Nafarroako Zerga Ogasuna erakunde autonomoko Zehapen eta Errekerimendu Atalak ebazpen bidez ezarritako modu eta baldintzetan.
3. artikulua. Aitorpenak aurkezteko ereduak eta lekuak.
Aitorpena telematika bidez aurkeztuko da, erabiliz, foru agindu honen 9. eta 10. artikuluetan ezarritako baldintza orokorrei eta prozedurari jarraikiz.
4. artikulua. Dokumentazioaren eskaera.
Nafarroako Zerga Ogasuna erakunde autonomoko Zehapen eta Errekerimendu Atalak subjektu pasiboari eskatzen ahal dio datuak egiaztatzeko edo aitorpenean hautemandako akatsak zuzentzeko beharrezkotzat jotzen duen dokumentazioa aurkezteko, baita jarduerari zein egunetan hasiera edo bukaera eman zitzaion eta hori egia den frogatzeko ere.
5. artikulua. Ofizioz erroldan alta ematea, zerbait aldatzea edo baja ematea.
Zergaren erroldan alta edo baja ematea edo zerbait aldatzea administrazioaren egiaztapen baten ondorioa ere izaten ahal da, Nafarroako Foru Komunitatearen zerga administrazioak dituen datuak oinarri izanik, edo Nafarroako tributuen ikuskapenaren ikerketa-jarduketa baten ondorioa.
II. KAPITULUA. Ordainketaren araubidea
6. artikulua. Zergaren ordainketa.
1. Taldeka jakinarazitako zorrak ordainagiri baten bidez ordainaraziko dira. 2012. urteko zerga honek sorrarazitako zorra ordaintzeko borondatezko epea 2013ko ekainaren 1ean hasiko da eta 2013ko ekainaren 30ean edo hurrengo egun baliodunean bukatuko da.
2. Jakinarazpena taldeka egiten duen argitalpen berean ohartarazi beharko da ordaintzeko borondatezko epea bukatu ondoren premiamendu aldia hasiko dela eta zorrak premiamendu bidezko prozeduraren bidez eskatuko direla, dagozkion errekargua eta berandutza-interesak barne.
7. artikulua. Ordainketa helbideratzea.
1. Zorraren ordainketa helbideratu nahi duten subjektu pasiboek aukera hori adierazi beharko dute datu-aitorpenean, edo geroago, Nafarroako Zerga Ogasuna erakunde autonomoko Zehapen eta Errekerimendu Atalari zuzendutako idazki baten bidez. Ordainketa helbideratuko da eskaera aurkeztu ondoren itxiko den lehenengo erroldan.
2. Erroldaren argitalpenean adierazi beharko dira kontuan noiz kargatuko diren helbideratutako ordainketa duten ordainagiriak.
III. KAPITULUA. Aitorpen ereduaren onespena eta aurkezteko modua
8. artikulua. 910 ereduaren onespena eta aurkezteko modua.
1. "Saltoki handietarako zerga. Errolda-aitorpena" 910 eredua onesten da. Azaroaren 27ko 23/2001 Foru Legeari jarraikiz saltoki handietarako zergaren subjektuak diren pertsonek edo entitateek aurkeztu beharko dute eredu hori, saltokiaren datuak aitortzeko eta ondoriozko ordainketaren banku helbideratzea eskatzeko.
Eredua formatu elektronikoan baizik ezin da eskuratu.
2. 910 eredua telematikaren bidez aurkeztuko da, erabiliz, foru agindu honen 9. eta 10. artikuluetan eta hurrengoetan ezarritako baldintza orokorren eta prozeduraren arabera, eta 1. artikuluan finkatutako epearen barnean.
9. artikulua. 910 ereduari dagozkion aitorpenen bidezko aurkezpen telematikoa egiteko baldintza orokorrak.
1. 910 ereduaren aurkezpen telematikoa egiteko, baldintza hauek bete beharko dira:
a) Aitortzaileak identifikazio fiskaleko zenbakia eduki beharko du (IFZ).
b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz.
Baimenduta dauden ziurtagiri elektronikoak eta ziurtapen zerbitzuak dagokien atalean aipatzen dira; hartara, Interneteko http://www.hacienda.navarra.es helbidetik iristen ahal da.
c) Aitorpenak, jakinarazpenak eta zerga arloko beste agiri batzuk hirugarren pertsonen izenean telematika bidez aurkezteko eta tributu zorren ordainketa telematika bidez tramitatzeko kanpo-lankidetzarako akordioa onesten duen Ekonomia eta Ogasuneko kontseilariaren ekainaren 29ko 130/2009 Foru Aginduan xedatutakoarekin bat, aurkezleak, aitorpenak hirugarrenen izenean egiteko baimendutako pertsona edo entitate bat baldin bada, Nafarroako Zerga Ogasunak onartutako ziurtagiri elektronikoa, aurreko b) letran aipatzen dena, eduki beharko du.
d) 910 ereduaren aurkezpen telematikoa egiteko, aitortzaileak edo, hala bada, baimendutako aurkezleak Nafarroako atarian eskuragarri dagoen inprimakia erabili beharko du.
e) Aitortzaileek aurkezpen telematiko hori egiteko eskatzen diren arau teknikoak bete beharko dituzte. Arau horiek Nafarroako Zerga Ogasunaren web orrian daude ikusgai, Interneteko http://www.hacienda.navarra.es helbidean.
2. Telematika bidez igortzen diren aitorpenetan akats formalak agertzen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.
10. artikulua. 910 ereduari dagozkion aitorpenen bidezko aurkezpen telematikoa egiteko prozedura.
Aitorpenen aurkezpen telematikoa Internet bidez, web inprimakia baliatuz, egiteko, prozedura hau erabiliko da:
1. Nafarroako Ataritik, Ogasunarekin egiten diren izapideen zerbitzuan sartu.
2. Egin nahi den aitorpenaren eredua hautatu, eta aitorpena aurkeztu ahal izateko datu guztiak bete.
3. Aitorpena bete ondoren, igortzeko aukera erabili. Aitorpena egokia bada, sistemak balioztatuko du. Akatsik atzemanez gero, inprimakiaren bidez jakinaraziko da, eta haiek zuzendu arte ezin izanen da aitorpena aurkeztu. Aitorpena zuzen bete ondoren, sistemak jakinaraziko du aurkeztutako aitorpen bakoitzari esleitutako zenbakia eta, orobat, inprimatzeko aukera eskainiko du, frogagiri gisa erabiltzeko.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
